Ойпель

Босьтöм Рувикиись
Ойпель
Аркадий Мошевлӧн «Кӧрт керӧтӧм» серпас, 2004-2005 воэз. Серпас вылас Кудым-Ош, сылӧн аймам — Пӧвсин да Ош, Ойпель ен.
Аркадий Мошевлӧн «Кӧрт керӧтӧм» серпас, 2004-2005 воэз. Серпас вылас Кудым-Ош, сылӧн аймам — Пӧвсин да Ош, Ойпель ен.
Мифология коми
Ай Ен
Мам Омӧльлӧн инька
Сой Ёма

Ойпель (комиӧн (зыряна) Войпель)— коми отир мифологияын ен[1][2][3][4]. Касьтывсьӧ Рочму Митрополит Симон Ыджыт Перемӧ ыстӧм 1501 вося гижӧтын, кӧдаын сія корӧ отирсӧ кольны Ойпельлӧ кеймӧмсӧ. Кудым-Ош йылісь эпос сьӧрті, Ойпельлӧн еныс сулаліс Изъюр вылын, кытчӧ пуксис овны Кудым-Ошлӧн увтыр да аркмис Кудымкар.

Нимыс аркмӧм

[вильмӧтны | править код]

Ойпель (к-з. Войпель) нимыслӧн этимологияыс абу тӧдса. Туяліссез нуӧтӧны сы сьӧрті дискуссияэз. Лыддиссьӧ, мый еныслісь нимсӧ рочӧн гижтӧн вермисӧ сорасьны, сы кузя аркмӧны берся версияэз[1].

Медодз, чайтсьӧ, мый Ойпельыс аркмӧтӧм кык коми кывья кыв «ой» да «пель» ӧтлаӧтӧмӧн, сэк вежӧртаснас лоӧ «ойвывся пель» нето «ойкадся пель». Сэтшӧм версияыс абу быдӧнныслӧ лӧсялана. Мукӧд туялісь сьӧрті сэтшӧм нимнас эзӧ вермӧ шуны енӧс. Чайтӧны, мый кылыс мӧд компонентнас вӧлі ӧння кадӧ коми-пермяцкӧй кылын тӧдтӧм «пӧль» кыв. Коми-зыряна кывйын сія тӧдса ӧнӧдз да сы вежӧртаснас лоӧ «айлӧн ай». Сідзкӧ, еныслісь нимсӧ позьӧ реконструируйтны кыдз «Ойпӧль», сэк сы вежӧртаснас лоӧ «Ойвывлӧн важ» нето «Ойвыв видзись»[1]. Коми-зыряна ӧння орфографияӧн гижӧны еныслісь нимсӧ Войпӧль[5].

Мӧдӧдз, мукӧд коми-пермяцкӧй легендаэзын эм Вӧрпель нима герой, вӧрлӧн ен, вӧрись. Сідзкӧ, нимыс одзза компонентнас вермас лӧны «вӧр» кыв, сэк вежӧртаснас лоӧ «вӧрся пель». Мӧд компонентнас вермас лоны и «пӧль» кыв, сэк вежӧртасыс лоӧ «вӧр видзись»[1].

Куимӧтӧдз, ен нимыс вермис лоны гижӧм сорасьтӧг. Коми-зыряналӧн «вой пель» фразеологизмӧн шуӧны зэв бура кылісь мортӧс, пель садя мортӧс. Сэк сы вежӧртасӧн позьӧ шуны «быдӧс кылісь, быдӧс тӧдісь», мый лоӧ ен ним эпитет, кӧдӧн вермисӧ шуны эвфемистическӧй ним пыдди[1].

Синбаныс

[вильмӧтны | править код]

Ойпельыс йылісь медодззаись гижӧм Рочму Митрополит Симон Перемӧ ыстӧм 1501 вося гижӧтын, кӧдаын сія тшӧктӧ кольны Ойпельлӧ юрбитӧмсӧ: «... а кумиромъ бы есте не служили, ни требъ ихъ не пріимали, ни Воипелю болвану не молитеся по древнему обычяю, и всѣхъ Богу ненавидимыхъ тризнищъ не творите идоломъ...»[6].

Кудым-Ош йылісь эпос[7] сьӧрті позьӧ мымдакӧ реконструируйтны Ойпельлісь синбансӧ[1]. Сылӧ кеймӧмась мед видзны отирсӧ шоггезянь, тшыкӧтӧмсянь, отсавны пӧртмасьны. Ойпельыслісь енсӧ сувтӧтлӧмась кырйылӧ, сія сулалӧм кыдз пу увтын ордччӧн мӧдік еннэзкӧт да вӧлӧм ны коласын медвылын. Сы дынын сулалӧм пӧрт, кытчӧ тэчлӧмась Ойпель понда вайӧм берся дона кучиккез да эзысь доззэз. Еныс гӧгӧр вӧлӧмась тэчӧмӧсь галяэз да шоркытшшэз, нійӧ ӧктӧмась юэзісь, кӧдна дорын олӧма Ойпельлӧ кеймись отир. Сідзкӧ, нійӧ шоркытшшэсӧ позьӧ семантизируйтны сы пеллез символӧн, мый керис сійӧ быдӧс кылісьӧн да быдӧс тӧдісьӧн. Вежалуннэз коста сы дынын начкӧмась пода. Вӧраліссез вӧравтӧдз лыйлӧмась ньӧвъёссез вежаӧн пуктӧм пуас, корӧмась сідз вӧралісь шуд.

Ойпельсӧ мукӧдпырся серпасалӧны нёль чужӧма иньпӧлӧн. Сідз, Перем вӧрпа стильӧн керӧмторрезын эмӧсь уна чужӧма иньпӧввез[1]. Кудым-Ош йылісь эпосын Ойпельыскӧт тӧдсьӧны инька тӧдіссез — Чикыш да Пӧвсин[7].

Василий Климов гижӧ Ойпельыс йылісь этадз:

Важ гижӧттэзісь да преданнёэзісь мийӧ тӧдам мымдакӧ Ойпель ен йылісь. Сылісь лӧсъялӧм образзэсӧ адззылӧмась да сотлӧмась Стефан Пермскийлӧн монаххес, кӧр коми муэзын нія паськӧтӧмась Христослісь велӧтӧмсӧ. Ойпель — учӧтжык, вынтбӧмжык и нежык мывкыда Ен, нежели быдӧс тӧдісь и вермись Ен. Ciйö мукӧдпырсяс лыддьывлӧмась Му вылісь Енӧн. Роч гижӧттэз сылісь вежӧртассӧ петкӧтӧны сідз: северное ухо. А гортыс сылӧн кытӧнкӧ ойвыв саридз дорын. Но мыля сія «ухо», кӧр Ен? Эстӧн «пель» торыслӧн вежӧртасыс лоӧ «ен», сідзкӧ, Ойпель — ой ладорись нето ойся Ен. Эм легенда сы йылісь, кыдз Пель нима богатырь мыйкӧ керӧма не сідз, кыдз тшӧктӧма Еныс, и эта понда Ен сійӧ пӧртас изӧ. Чердынь гӧгӧрись оліссес сійӧ изсӧ шуӧны Пеля нето Пелины уши. Кӧть и Ойпельыс не сэтшом «авторитетной» Ен, но сылӧ юрбитлывлӧмась уна увтыррез: Пермь Великаяын оліссез, зыряна, иньвенса. Кӧднакӧ ны коласісь Ойпельсӧ лыддьӧмась ой тӧвлісь духӧн и кеймывлӧмась сылӧ сы понда, медбы эз кер нем умӧльсӧ мортлӧ, подалӧ, карчлӧ. Но кӧр морт Ойпельсӧ шуӧ ойся Енӧн, дак этӧ лоӧ — Töлісь. Ойпель йылісь отирыс тӧдӧ нач етша. Этӧ, натьтӧ, сы кузя, что сія и бурсӧ керӧ етша. Но сётаки ciя кольччӧма еннэс чукӧрӧ. А вот удмурттэз ассиныс сэтшӧмкодь енсӧ, кӧда етша отсавлӧма, вештӧмась бокӧ: ен Тӧлпери лоис куль кодьӧн и олӧ-лэбалӧ тӧв сорӧн. Удмурттэзлӧн эм и мӧдік лёк дух — Уйпери, и эта нимыс вачкисьӧ Ойпель вылӧ. Мукӧдыс Тӧлперисӧ да Уйперисӧ лыддьӧны ӧтік духӧн. [8]

Владимир Петрухин шуӧ Ойпельсӧ да Ёмасӧ (Йома) Енлӧн да Омӧль инькалӧн кагаэзӧн[9]. Ойпельыс, сы сьӧрті, вӧлӧма Ойвывся тӧв енӧн, отсалӧма вӧралісселӧ. Ойпельыслӧн гортыс вӧлӧма Тӧвпоз Из вылын (рочӧн Тельпосиз). Еныс абу радейтӧм гора шыэз: вӧраліссезлӧ эз позь вӧрас лэбтыны гор, сю шепасикӧ инькаэзлӧ эз позь горӧна гывьясьны, а челядьлӧ шутнясьны, Ойпельыс сэк вермис кынтны няньсӧ. Ойпельыс Шуа нима синбанӧн вермис портны мортӧс изӧ.

Культураын

[вильмӧтны | править код]
2020 во гожумпом 14 лунӧ Кудымкарын скульптор Валентина Ракишева, Кудымкарлӧн юралісь Наталья Стоянова да Коми округлӧн юралісь Виктор Рычков осьтісӧ Кудым-Ош аллеяын «Ойпельлӧ пельнянь» арт-объект.
  • Каллистрат Жаков 1901 воӧ гижис «Языческое миросозерцание зырян» статья[10] да Бегство северных богов: сказание.
  • Василий Климов ӧктӧм да публикуйтӧм Кудым-Ош йылісь легендаэзын Ойпельыслӧ кеймӧ Кудымкар увтырись отир[7].
  • 1994 воӧ Коми Республика шылада театр керис композитор Михаил Герцманлісь «Войпель» балет.
  • 2014 воӧ Вӧркутаын чулаліс карся конкурс «Кӧні олӧ Войпель?» модян вылӧ[11].
  • Ойпельыс мыччасьӧ 2017 воӧ лэдзӧм «The Mooseman» («Morteshka» студия) нима компьютер орсанын.
  • 2018 воӧ Сыктывкарись аэропортлӧ ним бӧрйикӧ вӧзйисӧ и Войпельӧс кыдз ру кӧзяинӧс[12].
  • 2020 воӧ Кудымкарын Кудым-Ош аллея вылӧ пуктісӧ «Ойпельлӧ пельнянь» нима арт-объект, скульпторыс Валентина Ракишева[13].
  • 2020 воӧ Вуктылын осьтісӧ «Вой тӧвъяслӧн ен» нима арт-объект, кӧдалісь эскизсӧ керис география велӧтісь Александр Пинежанинов[14].
  • Ойпельсӧ уна серпасалӧны берся иллюстрацияэз да торья серпассэз понда.

Пасйӧттэз

[вильмӧтны | править код]
  1. ↑ 1 2 3 4 5 6 7 Конаков Н.Д. Войпель // Энциклопедия уральских мифологий. Т.I, Мифология коми. / Под ред.: А.-Л. Сиикала, В.В. Напольских, М. Хоппал. Руководитель авторского коллектива Н.Д. Конаков. – М., ДиК, 1999.
  2. ↑ Конаков Н. Войпель // Республика Коми. Энциклопедия. Том I. — Сыктывкар: Коми книжное издательство, 1997. — С. 313.
  3. ↑ Войпель Культурная карта Республики Коми
  4. ↑ Войпель // Коми сёрнисикас кывчукöр. Словарь диалектов коми языка: в 2-х томах. Сыктывкар: ООО «Издательство «Кола», 2012.
  5. ↑ Войпӧль // Безносикова Л.М., Айбабина Е.А., Коснырева Р.И. Коми-роч кывчукӧр (Коми-русский словарь) / Отв. ред. Л.М.Безносикова; ИЯЛИ Коми НЦ УрО РАН. - Сыктывкар: Коми кн. изд-во, 2000.
  6. ↑ 1501 г. 112. Авг. 22. Послания Митрополита Симона в Пермь а) духовенству, о соблюдении пастырских обязанностей и наставлении новопросвещенных в христианских добродетелях, и б) мирянам, об оставлении языческих заблуждений и хранении уставов православной веры
  7. ↑ 1 2 3 Кудын-Ош, чудскӧй пам. Коми-пермяцкӧй народнӧй преданнё (гижис Василий Климов) // Иньва. — Кудымкар: КПКИ, 1964. — С. 55-66.
  8. ↑ Климов В. В. Корни бытия (Олан вужжез): этнографические заметки о коми-пермяках; на русском и коми-пермяцком языках. — Кудымкар, Коми-Пермяцкое книжное издательство, 2007. — 368 с. ISBN 5-87901-110-0
  9. ↑ Петрухин В. Я. Мифы финно-угров / В. Петрухин. – М. : Астрель : АСТ : Транзиткнига, 2005. – 463 с. – С. 201-202.
  10. ↑ Жаков К.Ф. Языческое миросозерцание зырян // Научное обозрение. 1901. №3. С. 63–84.
  11. ↑ Городской конкурс на лучшую сказку «Где живет Войпель?»
  12. ↑ Сыктывкарский аэропорт вошел в проект «Великие имена России»
  13. ↑ В Кудымкаре торжественно открыли памятник пельменю. 15.08.2020. Вести-Пермь
  14. ↑ Журавлёва С. Войпель. Дух зимы

Лыддьӧтан

[вильмӧтны | править код]
  • Белицер В. Н. Очерки по этнографии народов коми: XIX - начало XX в. / В. Н. Белицер. – Москва: АН СССР, 1958. – 393 с., 9 л. ил.
  • Гагарин Ю. В. История религии и атеизма народа коми. М., 1978.
  • Габова Е. В. Дети древней земли: повесть / Е. Габова, Н. Макарова; худож. М. Ф. Беллон. – Сыктывкар: Кола, 2011. – 160 с.
  • Грен А. Зырянская мифология / А. Грен // Коми му. – 1925. - № 1 (11). – С. 23-33.
  • Жаков К. Ф. Бегство северных богов: сказание
  • Климов В. В. Корни бытия (Олан вужжез): этнографические заметки о коми-пермяках; на русском и коми-пермяцком языках. — Кудымкар, Коми-Пермяцкое книжное издательство, 2007. — 368 с. ISBN 5-87901-110-0
  • Мифология Коми. – Москва - Сыктывкар: ДИК, 1999. – 480 с.: ил., карт.
  • Му пуксьӧм: коми войтырлӧн мифология / лӧсьӧдiс, коми кыв вылӧ вуджӧдiс П. Ф. Лимеров; серпасалic А. В. Мошев. – Сыктывкар: Коми небӧг лэдзанiн, 2005. – 622, [2] л. б.: серпас.

Босьтӧма "https://koi.ruwiki.ru/w/index.php?title=Ойпель&oldid=116447"-ись