Ыджыт Перемся Степан

Перемся Степан
Епископ Перемся Степан, вичкуӧ пыртісь; Сергиев-Посад, XVI сёво; памятник: Вежа Сергий Радонежскийлӧн олан йылісь гижӧт
Чужан ним	абу тӧдса
Чужис	1340 во нето 1340-ӧт воэз Югдін[d], Ростов княжество[d]
Куліс	1396 во тулысшӧр 26 лун Москва, Москвася великӧй княжество[d]
Почитается	Роч православнӧй вичку
Канонизируйтӧм	1549 во
Вежаӧтӧм	вичкуӧ пыртісь
Касьтылан лун	тулыспом 9 лун
Уджжез	стригольниккез паныт велӧтӧм
Подвижничество	коми отирӧс православнӧй вичкуӧ пыртӧм
Медиафайлы на РУВИКИ.Медиа

Ыджыт Перемся Степан (рочӧн Степан Пермский, кз. Перымса Степан, чужан нимыс абу тӧдса; 1340 во нето 1340-ӧт воэз, Югдін — 1396 во тулысшӧр 26 лун, Москва) — Роч православнӧй вичку епископ. Пыртіс вичкуӧ коми отирӧс, аркмӧтіс анбур да комиотіс вичку небӧггез. 1383 воӧ вӧлі пуктӧм медодзза епископӧн аркмӧтӧм Перем епархияӧ. Роч православнӧй вичку видзӧ сійӧ вежа мортӧн, касьтылан луныс — тулысшӧр 26 лунӧ (вильмоза — тулыспом 9 лунӧ).

Олӧм да висьтӧссэз

Чужис 1340-ӧт воэзӧ Югдінын. Айыс — Симеон Храп — уджалӧм Успенскӧй вичкуын, вӧлӧма роч, мамыс — Мария, дорсись Иван Секиринлӧн ныв. Чайтӧны, мый мамыс вӧлӧм коми. Степан чужӧмыс йылісь одзвыв висьталӧм Югдінся Прокопий, копыртчӧм пӧ Марияыслӧ, сэк 3 вося нылочкалӧ, да горӧтчӧм: «мунӧ то ыджыт Степанлӧн, Перем епископлӧн да велӧтісьлӧн, мам».

Вичкуын айыслӧ отсасикӧ Степан велӧтчис вичку сьылӧмӧ да уставӧ.

Митрополит Пимен локтӧ Владимирӧ да пуктӧ Степан Храпсӧ перемся епископӧ. Лицевӧй летописнӧй сводісь миниатюраэз

Одзлань велӧтчӧм понда Степан муніс Ростовӧ да шырсис Григорий Богослов монастырьын, кытӧн вӧлі ыджыт библиотека. Сія вӧлі Русьлӧн интеллектуальнӧй кыптӧм да монашескӧй движеннёлӧн представительезлӧн подвижническӧй уджлӧн кад, сы лыдын Сергий Радонежскийлӧн, кӧда одзланьын признайтіс Степанлӧн керӧммезлісь значеннёсӧ.

1364 воӧ великӧй князь Дмитрий Донскӧй лӧгасис ростовскӧй князь Константинкӧт да мырддис сылісь Ростовсӧ да Югдінсӧ да «Перемся устюгскӧй местаэз». Том аскетлӧн асмылаыс нуӧтны миссионер удж коми отирын, тыдалӧ, лӧсяліс Москвалӧн политикаӧн.

Медбы уджавны оригинальнӧй Вежа Гижӧтӧн да Вичку Айезлӧн гижӧмӧн, Степан велӧтіс грек кыв. Сыбӧрын сія пондіс комиӧтны православнӧй вичкулісь юрбитаннэз, вуджӧтіс грек кыв вылісь нельки нійӧ кыввесӧ, кӧдна кольччисӧ вуджӧттӧг славянскӧй кыввезын. Анбур лӧсьӧтӧм понда Степаныс босьтіс шыпассэз грек, славяна да важ тюрк алфавиттэзісь, да сізджӧ коми пассэз.

Перемся Степан кералӧ Вежа кыдз

Митрополит Алексий кулӧм бӧрын Степан муніс Москваӧ да Рочму митрополит Михаил (Митяй) кафедраись наместниклісь ӧтсӧтӧн вӧлі сувтӧтӧм епископ Герасим Коломенскийӧн пресвитерӧн. 1379 воӧ епископ Герасим буркывтӧмӧн иеромонах Степан вӧлі ыстӧм миссионерӧн Перем муэзӧ да эз ни берт Ростовас, кӧдаись отир сійӧ ӧнӧдз видзӧны ӧтікӧн Ростов вежаэз коласісь. Великӧй князьсянь Степанлӧ вӧлі сетӧм охраннӧй грамота.

Югдінісь отир отсӧтӧн Степан муніс Пырасӧ (ӧння Котлас) да локтіс Эжва ю ӧмӧмдз (усьӧ Вынваӧ), да пондіс висьтасьны христианскӧй велӧтӧм йылісь. Сэсся Степаныс муніс Емдінӧ, кытӧн вӧлі комэзлӧн медыджыт вежаин. Сійӧ разьӧм бӧрын Емдінас вӧлі лэбтӧм крайын медодзза православнӧй вичку, а сёрӧнжык — Михайло-Архангельскӧй монастыря владыческӧй городок.

Перемся Степан олӧм йылісь гижӧт юӧртӧ Степан да Пам коласын аркмӧм етшасьӧм йылісь. Памыс агитируйтӧм зырянасӧ: «Эд кывзӧ Степансӧ, кӧда локтіс Москваись. А Москвасянь вермас я бурыс локны? Оз я сэтісь миян дынӧ сьӧкыт лок, ыджыт воттэз, насиллё, тиуннэз, да доводчиккез, да приставвез?». Дыр видчӧм бӧрын арталісӧ вермасьны: Степаныслӧ да Памлӧ, киэзӧн кутчисьӧмӧн, коліс мунны сотчан керку пыр да Эжва ю йи увтӧт (лэдзчыны ӧтік юкмӧсӧ да кайны мӧдікӧт). Памыс кидсис вермасьӧмсис. Йӧзыс лӧгасисӧ, сетісӧ сійӧ Степаныслӧ, висьталісӧ: «Босьт сійӧ да казнит, сійӧ эд колӧ казнитны и миян важ обычай сьӧрті колӧ кувны», но Степаныс лэдзис Памсӧ.

Вежа Степанлӧн кулӧм да дзебӧм

Степаныс эшӧ неӧтпыр вӧлі Москваын и 1383-ӧт воӧ митрополит Пимен пуктіс сійӧ виль Перем епархияын медодзза епископӧн. Аслас епархияын сія пондіс лэбтыны вичкуэз сьӧмӧн, кӧдӧ сетлісӧ Москваись да паздіс одзасся культовӧй памятниккез.

1396 воӧ тулыснас епископ Степан аслас епархия делоэз сьӧрті локтіс Москваӧ митрополит Киприан дынӧ да кольччис Спасо-Преображенскӧй Кремлёвскӧй монастырьӧ. Москваас овтӧн пондіс шогавны. Куліс 1396 тулысшӧр 26 лунӧ да вӧлі дзебӧм Спасскӧй монастырскӧй соборын Бор вывся вичку пельӧсын. Вӧлі канонизируйтӧм 1549 воӧ. Поляккезлӧн 1610 воӧ уськӧтчӧмӧдз сылӧн лыторрес, висьтӧс сьӧрті, видзсьӧмась осьтаӧн, а сыбӧрын дзебӧмась и абу «лэдзӧмась» Перемӧ, кӧть пермяккез унаись корӧмась.

Дзебӧминас ордчӧн вӧлі и Степанлӧн епископскӧй бедь, кӧдӧ 1612 годӧ гетман Ходкевич нуӧтіс Литваӧ да сетіс Супрасльскӧй соборӧ. 1849 воӧ Вежа Синод тшӧктіс сетны бедьсӧ Перемӧ, кытӧн сійӧ видзисӧ кафедральнӧй соборын. Сія 1,5 метра мымда кузя ниаись керӧм бедь, кӧда мичӧтӧм лы кузя вундалӧм пластинкаэзӧн (бӧрынжык содтӧм). 1918 воӧ бедьсӧ сетӧмась Перем гортладор туялана музейӧ, кытӧн сія и ӧнӧдз видзсьӧ.

Сёрӧнжык Перемся Степан лыэсӧ эз жӧ пет судзӧтны. Борын Спас вичкусӧ реставрируйтікӧ XIX векӧ сылісь ӧтік придел вӧлі вежаӧтӧм Перемся Степан Перемся нимӧн. 1933 во тулыспом 1 лунӧ Спас вичкусӧ Борын разьӧмась. Вежа Степанлісь лыэсӧ колӧ лыддьыны ӧштӧммезӧн.

Перемся Степан олан йылісь висьтӧссэз пондісӧ петны XV сёвосянь, унажыкыс ныись эз лӧсяв сы быль оланӧн. Висьтӧссэсӧ позьӧ янсӧтны кык группаӧ: вичкуись да отиркостся. Медодззаэзсӧ аркмӧтӧмын вӧлі участвуйтӧм ачыс Епифаний Премудрый, кӧда «Житие Сергия Радонежского» нима олӧм гижӧтын гижис Степанкӧт вовлісьӧм йылісь. Эта жӧ типӧ колӧ юкны «Емдін кар лэбтӧм йылісь история» Емдін-Эжва летописьын, а сідзжӧ «вежа кыдз» керӧм йылісь паськыта тӧдса история. Отиркостся пырӧны Степанлӧн туннэзкӧт пессьӧм йылісь сюжеттэз, из вылын вартчӧм йылісь висьттэз, торья деревняэзісь оліссезӧс да торья вӧрпиэз мыжйӧм (ошкӧм) йылісь историяэз. Сідз, Эжолты посадын Эжва шульга вадӧрын тӧдӧны из «пур», кӧда вылын уявлӧма Перемся Степан.

Удж

Перемся Степан Новгородын «Рочмулӧ 1000 во» памятник вылын

Перемся Степан лыддиссьӧ медодзза христианскӧй апостольскӧй традицияэз нуӧтісьӧн. Сы уджӧн Рочму лоис полиэтническӧй христианскӧй канмуӧн, кытчӧ пырисӧ быдкодь отир. (Новгород республика лоис «полиэтническӧй христианскӧй странаӧн» уна сёвоӧн одзжык — сету, ижора, водь пырисӧ вичкуас ӧтік кадӧ славянакӧт да роччезкӧт князь Владимир дырни, а кареллэз 1227 воӧ). Перемся Степанлӧн уджыс отсаліс пыртны Перем муэз Великӧй Московскӧй княжествоӧ.

Перемся Степаныс вӧлі фактическӧя пуктӧм вежаӧн олікас. Сы олӧмыс йылісь гижӧм Епифаний Премудрый, кӧда ачыс тӧдіс Степансӧ.

Рочму понда ыджыт удж понда Вежа Степаныс серпасалӧм Новгородын «Рочмулӧ сюрс во» памятник вылӧ (1862). Скульптураыс Степаныслӧ сідзжӧ сувтӧтӧм Москваын Христос Мездісь вичку асыввыв фасадын. Вежа Степан гижӧттэзісь кольччис сылӧн «Велӧтӧм», кӧда вӧлі веськӧвтӧм стригольниккезлӧ паныт.

Анбур да вичку небӧггез

Коми анбур, кӧдӧ керис Перемся Степан

Анбурсӧ Перемся Степан аркмӧтіс 1372 воӧ Емва ю дорын овтӧн, сыӧ сія пыртіс кириллица, греческӧй алфавит да важ тюрк шыпассэз, да сідзжӧ коми пассэз. Анбурнас гижисӧ XVII сёвоӧдз, сэсся сійӧ вежис кириллица. Анбурнас дыркодь гижисӧ рочӧн гусьӧнмоза гижӧм понда.

Перемся Степанӧн комиӧтӧм христианскӧй тексттэз миянӧдз эзӧ локтӧ. ХVІІІ сёвоӧ академик Иван Лепёхин адззис юрбитан тексттэзісь комиӧтӧм фрагменттэз, кӧдна вӧлісӧ Степан вуджтӧммез кодьӧсь, но гижӧмӧсь кириллицаӧн.

Зырянскӧй Троица

«Зырянскӧй Троица» енбан, кӧдӧ пӧ серпасалӧм Перемся Степан

«Зырянскӧй Троица» — ХІV сёвося (1379 во бӧрын) Вежа Троицалӧн енбан, лыддиссьӧ, мый сійӧ серпасаліс Перемся Степан. Енбаныслӧн эм важжык вариант, кӧда вылын эмӧсь анбурӧн гижӧм гижӧттэз. «Зырянскӧй Троица» вӧлі адззӧм ӧтлаын «Вежа Ловлӧн Сошествие» енбанкӧт (ӧшӧм), кытӧн сідзжӧ вӧлі анбура гижӧт. Гижӧттэз петкӧтлӧны сетӧм сюжеттэзкӧт йитчӧм библиа тексттэзлісь вуджӧтӧммез. Искусствоведдэз лыддьӧны «Зырянскӧй Троицасӧ» византийскӧй енбанлӧн изводӧн. Уна формальнӧй да концептуальнӧй виззез сьӧрті сія лоӧ Андрей Рублёв «Троицалӧн» одзза мунісьӧн.

Перемся Степанлӧн енбан сарпасалан уджыс абу бура тӧдса (сы йылісь гижӧм Яков Фриз вичкуӧ ветлісь отир кыввез сьӧрті XVIII сёво помын). Вежа морт олӧм йылісь гижӧтын, кӧдӧ гижис во бӧрті сы кулӧм бӧрсянь Епифаний Премудрый, кӧда вӧлі тӧдса Перемся Степанкӧт, сы йылісь абу гижӧм. Но мӧдік морттэз сія кадӧ эзӧ вермӧ гижны комиӧн анбурӧн. Перемся Степансӧ сідзжӧ лыддьӧны перем енбаннэз серпасалан концепция авторӧн, кӧда йитӧм сы кадся Роч образно-литургическӧй творчествоӧн. Перемся Степансӧ лыддиссис енбаннэз да пернаэз авторӧн, но ныись унажыкыс вӧлі датируйтӧм сёрӧнжык кадӧн.

Касьтылӧм

• Перемся Степан серпасалӧм «Рочмулӧ 1000 во» памятник вылын Новгородын.
• 2009 во одзтӧв 21 лунӧ Из вывся официальнӧя нимтӧм керӧслӧ (отирын шусис Победа, 1582 метра вылына, Коми Республикаись Печора муниципалитетын) вӧлі сетӧм Перемся Степанлӧн ним.
• Перемся Степан нимӧн шуӧм Сыктыкарын медшӧр площадь.
• Роч православнӧй вичкулӧн Сыктывкар епархияись кафедральнӧй собор шуӧм Вежа Степан нимӧн. 2013 во тулыспом 7 лунӧ Степановскӧй соборын вӧлі сувтӧтӧм сы памятник.
• Вежа Перемся Степан нимӧн шуӧмӧмӧсь вичкуэз Котласын, Владимир областись Налескинын, Югдінын, Верх-Юсьваын, Сылваын да Куедаын, Перемын, Емдінісь Михайло-Архангельскӧй да Ыбись Серафимовскӧй монастыррезын, Ухтаын, Екатеринбургын, Десногорскын, Хабаровск крайись Тырмаын, Москваын.

Пасйӧттэз

Литература

• Попов Е. А. Пятистолетие в 1879 году проповеди св. Стефана Пермскаго. — Пермь: Тип. Никифоровой, 1879. — 6 с.
• Попов Е. А. Святитель Степан Великопермский. Жизнь его с литографированным изображением . — Пермь: Типография губернского правления, 1885. — 94 с.
• Барсов Н. И. Стефан Пермский // Энциклопедический словарь Брокгауза и Ефрона : в 86 т. (82 т. и 4 доп.). — СПб., 1901. — Т. XXXIa. — С. 637—638.
• Вычегодского-Вымская (Мисаило-Евтихиевская) летопись. Восточная литература. Видзӧтӧм 28 Гожумпом 2025.
• Красов А. В. Апостол зырян святый Степан, первый епископ Пермский и Устьвымский (1383—1396). — Санкт-Петербург: Тип. В.В. Комарова, 1896. — 41 с.
• Федотов Г. П. Святитель Стефан Пермский // Святые Древней Руси. — М., 1990. — С. 130—139.
• Степан Пермский и современность: Сб. статей / Редкол.: Г. Г. Бараксанов (отв. ред.) и др.. — Сыктывкар: Коми НЦ УрО РАН, 1996. — 105 с. — ISBN 5-7691-0634-4.
• Korpela, Jukka. Stefan von Perm'. Heiliger Täufer im politischen Kontext // Jahrbücher für Geschichte Osteuropasнем.. — 2001. — Bd. 49. — S. 481—499.
• Лимеров П. Ф. Стефан Пермский, просветитель и маг: к вопросу об одной фольклорной инверсии // Культура славян и культура евреев: диалог, сходства, различия. — 2009. — № 2009.
• Лимеров П. Ф. Легенда о Стефане-мученике: трансформации житийного сюжета // Сборник научных статей «Всероссийский конгресс фольклористов». — 2019. — № 4.
• Лимеров П. Ф. Зырянский апостол: Образ Стефана Пермского в художественной словесности народов Русского Севера // Вестник Русской христианской гуманитарной академии. — 2020. — № 1.
• Лимеров П. Ф. Кирилло-мефодиевская традиция и её роль в сложении образа Стефана Пермского в «Слове о житии св. Стефана Пермского» Епифания Премудрого // Человек. Культура. Образование. — 2017. — № 1 (23).
• Лимеров П. Ф. Путешествия Степана-чудотворца: к вопросу о топонимическом мотиве в легендах о христианизации коми // Вестник Пермского университета. Российская и зарубежная филология. — 2012. — № 1.
• Котылев А. Ю. Роль икон пермской епархии XIV-XV веков в запечатлении и распространении идей христианского просветителя Стефана Пермского // Человек. Культура. Образование. — 2013. — № 4 (10).
• Некрасова Г. А. Роль первых переводов Библии в развитии и сохранении коми языка (к 630-летию образования пермской епархии) // Ежегодник финно-угорских исследований. — 2014. — № 3.

Ыстӧттэз

• Святитель Степан Пермский Православие.Ru
• Святитель Степан, Епископ Пермский Культурное наследие Прикамья
• Слово о житии… святого Степана, бывшего епископом в Перми… (Библиотека литературы Древней Руси / РАН. ИРЛИ)
• Святитель Степан Пермский (Великопермский), епископ Православная энциклопедия «Азбука веры»