Кудым-Ош

Босьтöм Рувикиись

Кудым-Ош (Кудым Ош, Кудын Ош, Кудін Ош)— ӧння перем комиэз культураын герой. Лыддиссьӧ иньвенса эпосісь геройӧн, Кудымкар аркмӧтісьӧн. Ӧння кадся туяліссез лыддьӧны Кудым-Ошыслісь образсӧ 1920-ӧт воэзӧ керӧм да йӧзӧтӧм конструктӧн[1].

Кудым-Ош йылісь тексттэз

Сюжет Василий Климов сьӧрті

Ӧння кадӧ медтӧдса Сылпанісь чуд увтыр памлӧн зонӧн. Айыс кулӧм бӧрын увтырыс бӧрйӧ Ошсӧ (сэкся нимыс) памӧн. Сылӧ отсалӧ юравны мамыс — тӧдісь Пӧвсин, вына да мывкыд инька. Тӧдісялӧм увтырас Чикыш нима инька. Сылпанас лоӧм сьӧкыт овны, вовлӧмась уна лёк йӧз. Ошыс висьталас поздісьны паныт Сылпаныслӧ Изъюр керӧс вылӧ, кытӧн сулалӧмась увтырлӧн еннэс, мед пыр лоны Ойпельыс син увтын. Чикышыс сувтас паныт том памлӧ, сідз кыдз еннэс дын оз туй гарйыны му. Ошыс оз кывзы тӧдісьсӧ да нуӧтас отирсӧ сьӧрас лэбтыны Изъюр вылын кар. Сэксянь Ошсӧ пондасӧ шуны Ку дынісь Ошӧн, Кудым-Ошӧн, а карсӧ — Ку дынісь карӧн, Кудымкарӧн. Локтас кад Кудым-Ошыслӧ гӧтрасьны. Чикышыс тшыкӧтӧм могись ыстас том памсӧ корасьны вогул окся Костэ нима нылӧс. Анюшкарись окся отсалас Кудым-Ошыслӧ, сетас ассис мортӧс, вогул кывья Ваясиӧс. Сія висьталас Кудым-Ошыслӧ вогул окся ордӧ локтікӧ корасьӧмсис не панӧвтчыны, кытшӧмӧн бы эз мыччась нывкаыс. Пырас Костэыс дынӧ Кудым-Ошыс, а нывкаыс пукалӧ гӧна чужӧма. Нывкаыс гусьӧнмоз чепӧльтас чужӧм вывсис гӧн пилим, а сы увтын чочком кучик. Кудым-Ошыс оз панӧвтчы кывсис. Вогул оксяыс тшӧктас гӧтравны томмесӧ. Петас нывкаыс отирыс одзӧ басӧк чужӧма, кузь чикиссеза. Сійӧ мамыс дзеблӧма вӧрмӧс кучикӧн, мед нывкаыс ачыс борьис аслыс айкасӧ. Вогуллэзас гӧтрасьӧм бӧрын локтасӧ томгозъя Кудымкарӧ. Чикышыс повзяс сэсся мунны Кудым-Ошыслӧ паныт , эд сы дор Ойпельыс да мӧдік еннэс. Костэыс да Пӧвсиныс бура лӧсяласӧ. Кудым-Ошлӧн да Костэлӧн чужас Ошпи нима зон. Бура пондас овны Кудым-Ошыслӧн увтыр. Ваяс сія чуддэзлӧ сю, велӧтас керны нянь. Олас Кудым-Ош сё гожум да сё тӧв. Кувтӧнняс висьталас дзебны сійӧ сыспуись керӧм да кӧртӧн вартӧм гробйӧ, мед узьӧм бӧрын вермис бӧр саймыны да вились керны отирлӧ бур олан.

Кудым-Ош культураын

Кудым-Ош урбанистикаын

  • Скульптурнӧй композиция «Кудым-Ош йылісь висьтас» Кудымкарын (Кудым-Ош нима аллея). Керис скульптор Валентина Ракишева 2007 воӧ[2].
  • Мурал «Кудым-Ош» Кудымкарын (ул. 50 лет Октября, 25). Серпасаліс Александр Жунёв 2011 воӧ[3].
  • Парковӧй скульптураэз «Кудым-Ош да Чикыш» да «Костэ» Кудымкарын (Кудым-Ош нима аллея). Керис скульптор Валентина Ракишева 2018-2019 воэзӧ[4].

Лыддьӧтан

  • Ожегова М.Н. Устно-поэтическое творчество коми-пермяцкого народа. Кудымкар, 1961.
  • Оласö да вöласö. Лöсьöтісьыс В. В. Климов. Кудымкар, 1991. ISBN 5-7625-0262-7
  • П. М. Ярков. Рунноез о Кудым-Оше и его сыне Пера (Записано А.А. Крутецким в 1931-1935 гг.) «Литературный альманах», 1, Свердловск, 1936, с. 178-185.
  • Рунноез о Кудым-Оше и его сыне Пера (Записано А. Крутецким). Народы Северного Урала : Очерки и рассказы / Сост. Вл.А. Попов. - Свердловск : Свердлгиз, 1937. -229, [2] с. : ил. С. 198-208.

Ыстӧттэз

  1. ↑ Юрганов Ф. А. Власть и искусство: эпический герой на службе политики // Диалоги о культуре и искусстве. Материалы VII Всероссийской научно-практической конференции (с международным участием). Пермский государственный институт культуры ; отв. ред. Е.В. Баталина-Корнева. 2017. С. 218-225.
  2. ↑ Памятник Кудым-Ошу // Туристический портал Пермского края "Пермь Великая"
  3. ↑ В Кудымкаре появился пятиэтажный вождь коми Кудым-Ош // Российская газета
  4. ↑ Аллею Кудым-Оша украсит новая скульптура // Вести Пермь
Босьтӧма "https://koi.ruwiki.ru/w/index.php?title=Кудым-Ош&oldid=77754"-ись