Костӧ

Босьтöм Рувикиись
Костӧ
«Костӧ» парковӧй скульптура Кудымкарын Кудым-Ош аллея вылын. Скульптор Валентина Ракишева. 2019 во.
«Костӧ» парковӧй скульптура Кудымкарын Кудым-Ош аллея вылын. Скульптор Валентина Ракишева. 2019 во.
Мифология коми
Пӧв иньпӧв[d]
Ай Ман-Ньяысс, Асыка
Айка Кудым-Ош
Кагаэз Ошпи, Пера
Кытісь лоис манси памлӧн ныв

Костӧ (рочӧн Костэ) — коми отир фольклорись герой, манси памлӧн ныв, Кудым-Ошлӧн инь.

Синбаныс

Костӧыс Кудым-Ош йылісь эпосын — одззись герой, манси памлӧн ныв[1]. Сідзжӧ нимсӧ гижлӧны кыдз Костэ, Хесте нето Хэсте.

Медпаськыта тӧдса сюжет сьӧрті, кӧдӧ ӧктіс да лӧсьӧтіс Василий Климов, Кудымкарись тӧдісь Чикыш ыстас Кудым-Ошсӧ тшыкӧтӧм могись корасьны Костӧсӧ, мед нывкаыслӧн айыс вийис Кудымкарись памсӧ, кыдз и одзза корасиссесӧ. Анюшкарись окся отсалас Кудым-Ошыслӧ, сетас ассис мортӧс, манси кывья Ваясиӧс. Сія висьталас Кудым-Ошыслӧ манси пам ордӧ локтікӧ корасьӧмсис не панӧвтчыны, кытшӧмӧн бы эз мыччась нывкаыс. Пырас Костӧыс дынӧ Кудым-Ошыс, а нывкаыс пукалӧ гӧна чужӧма. Нывкаыс гусьӧнмоз чепӧльтас чужӧм вывсис гӧн пилим, а сы увтын чочком кучик. Кудым-Ошыс оз панӧвтчы кывсис. Манси памыс тшӧктас гӧтравны томмесӧ. Петас нывкаыс отирыс одзӧ басӧк чужӧма, кузь чикиссеза. Сійӧ мамыс дзеблӧма вӧрмӧс кучикӧн, мед нывкаыс ачыс бӧрйис аслыс айкасӧ. Мансиэзас гӧтрасьӧм бӧрын локтасӧ томгозъя Кудымкарӧ. Костӧыс да Кудым-Ошыслӧн мамыс Пӧвсин бура лӧсяласӧ. Кудым-Ошлӧн да Костӧлӧн чужас Ошпи нима зон.

Пимен Ярков висьтасьӧм сьӧрті сюжетын, кӧдӧ 1931—1935 воэзӧ гижис да 1936—1937 воэзӧ публикуйтіс Александр Крутецкий[2], нывкаыслӧн нимыс Хэсте, сія Ман-Ньяысс нима вогул ӧксулӧн витӧт ныв. Кудым-Ошыс мунӧ Тоссем да Ялпынг-нёр сайӧ сійӧ корасьны, сідз кыдз Виджо нима тӧдісь ӧксу инька висьталӧ сылӧ, мый сія нывкаыс чужтас сылӧ вына да мывкыда зонӧс, да мед Кудым-Ошыс оз панӧвтчы корасьӧмсис нывкаыс нёштӧм чужӧмыс кузя, сія пӧ пӧртчас мичаӧ да басӧкӧ гӧтрасян ойӧ памыс радейтӧмсянь. Сідз и аркмас. Кудым-Ошыс том иньканас бертасӧ Кудымкарӧ. Хэстеыс чужтас Пера нима зонӧс. Пераыс чужикас ачыс кералас гӧгсювсӧ да панталас айсӧ быдмӧмӧн ни.

Культураын

Небӧггез да публикацияэз

  • П. М. Ярков. Рунноез о Кудым-Оше и сыне его Пера (записал А. А. Крутецкий в 1931—1935 гг.) // Литературный альманах. — Свердловск: ОГИЗ, 1936. — С. 178-185.
  • Рунноез о Кудым-Оше и сыне его Пера. Записано А. Крутецким // Народы Северного Урала. — Свердловск: ОГИЗ,1937. — С. 198-209.
  • 12 подвигов Перы (П. Ярков, предисловие Е. Лундберга) // Дружба народов. — 1940. — №5.
  • Ожегова М. Н. Устно-поэтическое творчество коми-пермяцкого народа. Кудымкар, 1961.
  • Кудим-Ош и його син богатир Пера (Комі-пермяцька богатирська легенда, літературний переказ С. Лаврова). — Київ: Видавництво дитячої літератури «Веселка», 1964. — 54 с.
  • Кудын-Ош, чудскӧй пам. Коми-пермяцкӧй народнӧй преданнё (гижис Василий Климов) // Иньва. — Кудымкар: КПКИ, 1964. — С. 55-66.
  • Сказания о Кудым-Оше и Пере-охотнике : по мотивам коми-пермяцкого фольклора / А. М. Домнин ; художник В. Захаров-Холмский. – Пермь : Пермское книжное издательство, 1972. – 71 с. : ил.
  • Сказания о Кудым-Оше и Пере-охотнике : по мотивам коми-пермяцких преданий / А. М. Домнин ; худож. В. Оньков. – Пермь : Книжное издательство, 1990. – 101 с. : ил.
  • Оласö да вöласö. Лöсьöтісьыс В. В. Климов. Кудымкар, 1991. ISBN 5-7625-0262-7
  • Климов, В. В. Сказание о Кудым-Оше : [пьеса по мотивам   коми- пермяцкого эпоса] / В. В. Климов ; перевод с коми-пермяцкого на русский язык И. Волкова // Современная  литература народов России. Драматургия [антология] / Программа поддержки национальных литератур народов Российской Федерации. — Москва, 2020. — С. 429-442.
  • В. В. Климов. Кудым-Ош йылісь висьтас // Дзирыт гожум: пьезаэз. / Жаркое лето: пьесы на коми-пермяцком языке. — Кудымкар: ГКБУК «Коми-Пермяцкий этнокультурный центр», 2022. — 232 с. — 37-72 с.

Театр

  • 1968 воӧ Коми-Пермяцкӧй театр керис роч кывья спектакль «Зори над Пармой» (Николай Свечков «Легенда о Кудым-Оше» пьеса сьӧрті), Хесте рольсӧ орсіс Ирина Аксёнова[3].
  • 2008 воӧ Коми-Пермяцкӧй театр керис коми кывья спектакль «Кудым-Ош йылісь висьтас» (Василий Климов ӧтнимья пьеса сьӧрті), Костӧ рольсӧ орсіс Марина Бенцал[4].

Мультфильм

  • 1988 воӧ «Пермьтелефильм» керис роч кывья мультфильм «Сказание о Кудым-Оше» (СССР, 1988), реж. Леонид Кощенников.[5]

Шылад

  • 1976 воӧ композитор Александр Рочев гижис балет дивертисента коми кывья ӧтіакта опера «Кудым-Ош» (роч нимыс «Кудым — медвежья сила»). 1983 воӧ керис опералісь мӧдӧдзза редакция, либреттоыс Любовь Грибовалӧн.[6]
  • 2022 воӧ Перемись рок-группа «Альбион» керис роч кывья Кудым-Ош да Костӧ йылісь сьыланкыв.

Серпасалӧм

  • Костӧлісь синбан серпасалісӧ унаись иллюстрацияэз понда серпасаліссез Аркадий Мошев, Виталий Оньков; торья серпассэз керисӧ Елена да Степан Калюпановвез, Светлана Панина, Нина Новикова.

Скульптура

  • 2015 воӧ Кудымкарын Коми-Пермяцкӧй этнокультурнӧй центрись «Ловья пу» паркӧ вӧлі сувтӧтӧм «Пӧвсин да Костӧ» пуись керӧм парковӧй скульптура (мастер Александр Мехоношин).
  • 2019 воӧ Кудымкарын Кудым-Ош аллея вылӧ вӧлі сувтӧтӧм «Костэ» нима парковӧй скульптура (скульптор Валентина Ракишева)[7].

Пасйӧттэз

  1. ↑ Конаков Н. Д. Костӧ // Энциклопедия уральских мифологий. Т.I, Мифология коми. / Под ред.: А.-Л. Сиикала, В.В. Напольских, М. Хоппал. Руководитель авторского коллектива Н.Д. Конаков. – М., ДиК, 1999.
  2. ↑ П. М. Ярков. Рунноез о Кудым-Оше и сыне его Пера (записал А. А. Крутецкий в 1931—1935 гг.) // Литературный альманах. — Свердловск: ОГИЗ, 1936. — С. 178-185.
  3. ↑ Легенда о Кудым-Оше — 55 лет. 27 июня 2023 Коми-Пермяцкий национальный драматический театр
  4. ↑ Кудым-Ош йылісь висьтас (Сказание о Кудым-Оше). Архив спектаклей Коми-Пермяцкий национальный драматический театр
  5. ↑ Сказание о Кудым-Оше (мультфильм, СССР, 1988) smotrim.ru
  6. ↑ Композитор от земли (А. А. Рочев) // Герстле Н. Ф. Композиторы Республики Коми : сборник статей / Наталья Герстле. — Оренбург : Изд-во ИП Кострицын, 2016.— 343 с. : ил., цв. ил., фот., портр., факс., нот. — С. 104-135.
  7. ↑ Валентина Коньшина Костэ украсила аллею Кудым-Оша в Кудымкаре (03.10.2019) Парма-Новости
Босьтӧма "https://koi.ruwiki.ru/w/index.php?title=Костӧ&oldid=214334"-ись