Вӧрись
| Вӧрись | |
|---|---|
 Виталий Оньковлӧн «Вӧрись» эскиз, 1993 | |
| Мифология | коми |
| Удж | вӧр чуд |
| Мӧдік культураэзын | лесник[d] и лесные духи в польской мифологии[d] |
 Медиафайлы на РУВИКИ.Медиа | |
Вӧрись — коми отир фольклорись герой, мифология персонаж, вӧр чуд.
Ниммес
Вӧр чудыс понда коми фолькорын фиксируйтӧмӧсь уна ним: вöра-морт, вöра-дядя, ыджит-морт, лешак (Н. Рогов сьӧрті), вэрысь-морт (И. Смирнов сьӧрті), лешöй, лешачика, вöрись дядько, вöрлешак, вöровöй дядь, вöрдядь, вöрись, вöрись инька, вöр инька, лешачика.[1] Мукӧд номинацияыс мыччалӧ вӧр чуддэслісь пуктӧм лёккериссез коласӧ: нечистöй, вукавöй, чёрт, калян, сатана. Мукӧд нимыс лоӧ эмфемизмӧн: кузь дядь, ыджыт дядь.[2]
Кудымкар районын фиксируйтӧм кöспель ним, Гайна районын (лупьинса) — киззя-виззя. Мукӧдпырся вӧрисьлын эм асним. XIX-XX сёвоэзын этнография туялан материаллэзын фиксируйтӧмӧсь Митрофан Митрофанович да Вихорь Вихоревич, нія пантасьӧны кабала гижӧм йылісь материаллэзын.XX сёвося материаллэзын — Виктор Викторович, Фёдор Фролович, Фёдор Фёдорович, Захар Фёдорович, Тимофей Иваныч, Иван Грознович, Öрина, Дмитрий Дмитриевич, Василий Васильевич, Данило Соболёвый, Иван Иванович, Вэтряная мать да Виктор Иванович. Кӧч районын фиксируйтӧм Световласий ним (Вежа Власий сьӧрті).[2]
Синбаныс
Вывтыр
Вӧр чудыс коми-пермяккез мывйын вермас лоны быдберся синбана. Медодз, сія мыччасьӧ вӧрва объектӧн, шуам, тӧвчикӧн нето мубырӧн. Сы синбанӧн лыддиссьӧны вӧрись пуэз да мыррез, кӧдна мыччисьӧны да ӧшӧны мортыс мунтӧн, нето вӧрсис медвылын пу. Мӧдӧдз, вӧр чудыс мыччисьлӧ зооморфнӧй нето орнитоморфнӧй синбанӧн: кырнышӧн, кӧчӧн, понӧн, ошӧн.[2]
Куимӧтӧдз, вӧрисьыс морт кодь, но сыын эмӧсь вӧрпа ассяматоррез: гӧна, сюра, чуньтӧм, вӧвкококкеза. Персонажсӧ шуӧны вуджӧрлӧ вачкисянаӧн, отирыс озӧ адззӧ сійӧ бура. Вӧрчудыс мыччасьӧ кыдз айпӧв, шочажыка кыдз иньпӧв. Лыддиссьӧ, мый вӧр чуддэслӧн эм асланыс иерархия, кӧда мыччассьӧ ны вывтырын, паськомын, керӧмын да функцияэзын.[3][4]
Вöрисьсӧ шуӧны вӧр вылынаӧн, но сія вермы вежны ассис мыгӧрсӧ.
Сы вывтырын эмӧсь аномалияэз: кӧс пеллез, чукыля коккез, гӧгрӧса чужӧмбан, синкымтӧм да синлыстӧм, гӧна кока. Вӧрисьлісь инькасӧ да ныввесӧ шуӧны басӧккезӧн, нылӧн чикиссезныс муӧдз.[2]
Вӧрисьыс новйӧ морт паськӧм. Айпӧлыс новйӧ йӧрнӧс, запон, шабур, иньполыс — чышьяна, визиткаа, юпкаока, сапога. Ассяматоррезнас вӧр чудыс паськӧмын лоӧны зарниа киззез да галстук. Паськӧмсӧ вӧрисьыс пӧдналӧ шульга ладорӧ. Кӧмкӧтыс — нинкӧммез, кирза нето лаковӧй сапоггез, вермас мыччасьны кӧмтӧг. Юр вылас новйӧ ыджыт шляпа, пеля шапка, нёль пельӧса шапка. Туяліссез сьӧрті, сідз мыччасьӧ вӧрисьлӧн кыдз мифологическӧй персонажлӧн ыджыт статус.
Зэв ассяматорӧн вӧрисьыс вывтырын лоӧ чочкӧм рӧм: юрсиыс нето паськомыс дзир чочком нето верзьӧм чочком вӧв вылӧ. Характеристкаэзас сідзжӧ пантасьлӧны сьӧд да гӧрд рӧм: вермас лоны пасьтасьӧм сьӧд шинельӧ, иньпӧлыс сьӧд шабурӧ, гӧрд платтёӧ; гӧрд йӧрнӧсӧ, шапкаыслӧн дорышыс пермас лоны гӧрд. Лӧзӧн вермасӧ лоны шабур да кушак, да сідзжӧ сы вӧлыс.
Вӧрисьыс атрибуттэзӧн лыддисьӧны туйбедь, чер кос саяс да сьӧктан, иньпӧлыс мыччасьлӧ печканӧн. Вӧриськӧт ордччӧн мыччасьлӧ пон.
Олӧм
Коми-пермяцкӧй фольклор сьӧрті, вӧриссес олӧны кыдз отир: кыйӧны нинкӧммез, быдтӧны нянь, видзӧны пода, вузасьӧны да тышкасьӧны. Ны тышкасьӧм бӧрын кольччӧ пӧрӧм вӧр. Нія олӧны увтыррезӧн, гӧтрасьӧны да быдтӧны кагаэз. Керкуэзныс нылӧн ыджытӧсь. Лупьинса сьӧрті, вӧриссезлӧн керкуэс куим пельӧсаӧсь да керӧмӧсь стеклоись.
Вӧрисьыс бӧбӧтӧ морттэсӧ да вайӧтӧ дынас (ёрдӧммесӧ, асвийиссесӧ). Тодиль висьтасьӧны, мый вӧрись зэв радейтӧ иньпӧлӧс. Вӧриссес уна сёйӧны, ӧткоста неӧтік човпан нянь. Лупьинса лыддьӧны, мый вӧрисьыс оз сёй сирпинь, сідз кыдз сы юрын эм перна кодь лы. Ӧддьӧн радейтӧ табак да кодззӧтан юаннэз, отирыс кольӧ вӧрас нійӧ козин туйӧ.
Культураын
- Вӧрисьыс — Пера йылісь эпосісь персонаж. Вына мортыс пессьӧ Лупья дорын Вӧрисьыскӧт да вермӧ сійӧ, мед отирыс вермисӧ вӧравны. Сы йылісь петісӧ уна небӧггез, кӧднӧ лӧсьӧтіс Василий Климов.
- 1988 воӧ петіс роч кывья «Сказ о Пере богатыре» нима мультфильм, кытчӧ пыртӧм Пераыслӧн Вӧрисьыскӧт пессьӧм эпизодыс.[5]
Пасйӧттэз
- ↑ Материалы по коми-пермяцкой демонологии : монография / авт.-сост.: А. В. Кротова-Гарина, Ю. А. Шкураток, А. С. Лобанова, С. Ю. Королева, И. И. Русинова ; Пермский государственный национальный исследовательский университет. — Пермь, 2020. − 168 с. ISBN 978-5-7944-3422-4
- ↑ 1 2 3 4 Голева Т. Г. Мифологические персонажи в системе мировоззрения коми-пермяков. — СПб.: Маматов, 2011. — 272 с.
- ↑ Какой ты, лесной дядюшка Вӧрись? (По материалам к. ист. н. Т. Голевой) // Сизимок, № 25. (2018) С. 5.
- ↑ Конаков Н. Д. Вӧрса // Энциклопедия уральских мифологий. Т.I, Мифология коми. / Под ред.: А.-Л. Сиикала, В. В. Напольских, М. Хоппал. Руководитель авторского коллектива Н. Д. Конаков. — М., ДиК, 1999.
- ↑ Мультфильм «Сказ о Пере-богатыре», СССР, 1988 (реж. Л. Кощеников) smotrim.ru