Вакуль
| Вакуль | |
|---|---|
 Виталий Оньковлӧн «Вакуль» серпасісь тор, 1974 | |
| Мифология | коми |
| Удж | ваись чуд |
| Мӧдік культураэзын | Q18449951? |
 Медиафайлы на РУВИКИ.Медиа | |
Вакуль (cідзжӧ Ваись, Васа) — коми отир фольклорись герой, мифология персонаж, ваись чуд.
Ниммес
Ваись чуд понда коми-пермяцкӧй фольклорын тӧдса уна ним. XIX сёвося материаллэзын фиксируйтӧмӧсь этшшӧм ниммез: «гöна-морт», «ваа-морт» (Н. Рогов сьӧрті), «ваись-морт», «ваись», «ва-куль», «куль-пиан», «ваись-куль» (И. Смирнов сьӧрті), «ваись-кульпиян» (В. Янович сьӧрті)[1][2].
XX сёвося этнография туялан материаллэзын гижӧмӧсь этшшӧм ниммез: ваись, вакуль, вакулись, кульшун, кульпиян, ичетики, кузьюрсиа, сорваись. Гайна районын медпаськыта тӧдса кыдз вабес. Кудымкар районісь Ленинск посадын фиксируйтӧм вагöг ним. Ойвывся комиэсдын абу фиксируйтӧмӧсь кульпиян да кульшун номинацияэз, нія шуӧны сэтшӧм паськыт терминнэзӧн, кыдз чёрт, сатана, лешак. Зюздинса ваись чуддэсӧ шуӧны шишига.[2]
Ваись чуддэслӧн, фольклор сьӧрті, вермасӧ лоны асланыс асниммэз. Сідз, пантасьлӧны Зэтю[2] да Бӧдю[1] ниммез.
Синбаныс
Олӧмин
Вакуллес мыччасьлӧны юэз, тыэз да быдберся вадорын. Лыддиссьӧ, мый медыджыт вакульыс олӧ Гайна районісь Вадтыын да мыччасьлӧ ыджыт сирпиньӧн[3] нето Кӧс районісь Вадтыын, эта сирпинь вакульлӧн юрас абу перна вылӧ вачкисяна лы[2].
Вакульлӧн орддча олӧмыс мыччассьӧ кыдз тӧвныр нето ӧшымӧсісь вевдӧрӧ пондӧ лэбавны быдберся.
Вывтыр
Вермас мыччасьлыны кыдз ыджыт сирпинь, учӧт челядь гавед нето черибӧжа морт. Сирпинь вакульыс ӧддьӧны ыджыт нето куйлӧ вадӧрас да кужӧ сёртнитны морт моз. Сирпиньыс кужӧ пӧртчыны мортӧ.
Вакуллес вермасӧ лоны иньпӧлӧсісь да айпӧлӧсісь, ӧддьӧн басӧк нето нёштӧм. Айпӧв вакульыслӧн — кузь тош, ыджыт пеллез, гӧна кикок. Иньпӧлыслӧн —кузь чочком нето гӧрд юрси. Челядь вакуллеслӧн дженыт юрсиа кузьмӧса юр[4].
Вакуллес вытырын вермасӧ лоны тӧдчана аномалияэз: куим[1] нето нёль-квать[2] чунь ки вылас, синкымтӧм да синлыстӧм[4]. Вирныс — лӧз нето гӧрд[4].
Вермасӧ лоны пасьтасьӧмӧсь нето пасьтӧмӧсь. Меыджыт вакульыслӧн — зарниа паськӧм да зарниа юрвот[1].
Вакуллес вермасӧ мыччасьны мортлӧ сы ловья нето кулӧм тӧдсаӧн, сідз нія бӧбӧтӧны мортсӧ асладораныс нето отсалӧны умӧлись.[2]
Олӧм
Вакуллес лыддиссьӧны лёккериссезӧн — кыскӧны мортсӧ ва увтӧ. Лыддисис, мый вӧйӧм морттес уджалӧны вакуллес понда, да сійӧн вӧйӧны нія, кин колӧны вакуллеслӧ: кага лоас отсасисьӧн, пастук пондас пастукавны. Кӧч да Кӧс районнэзын висьтасьӧны ва пороз да мӧссэз йылісь, кӧда ветлӧны ва вылӧт да баксӧны. Кышӧтны ко вакульыс мӧс сюр вылӧ перна, сія кольччас отирыс дын да пондас вайны уна йӧв.
Туруналан кадӧ, кӧр ӧддьӧн зэрасис, Юсьва районісь Архангельскӧй посадын вакульыслӧ гижлісӧ гижӧт, кӧда шусис «40 плеша морт»: сыын норасисӧ, мый зэрыс кузя плешаммисӧ 40 морт да гижисӧ ны ниммез.
Одзза этнография туялан материаллэзын фиксируйтчӧ вакуль да изісь коласын йитӧт. Изанкерку лэбтікӧ изісьыслӧ ковсис кӧсйыны вакульыслӧ ӧтік нето унажык «морт юр» — эна морттэс вӧйисӧ, а изанкеркуыс сулаліс. Сідзжӧ лыддиссис, мый изісьыслӧ вакульпиян отсалӧ бергӧтлыны изынсӧ.
Культураын
- Вакульыс — Пера йылісь эпосісь персонаж. Вына мортыс пессьӧ ваись медыджыт чудыскӧт да вермӧ сійӧ, мед отирыс вермисӧ чериавны. Сы йылісь петісӧ уна небӧггез, кӧднӧ лӧсьӧтіс Василий Климов.
- 1988 воӧ петіс роч кывья «Сказ о Пере богатыре» нима мультфильм, кытчӧ пыртӧм Пераыслӧн Вакульыскӧт пессьӧм эпизодыс.[5]
- 2011 восянь Коми-Пермяцкӧй музейын «Важ Пармалӧн висьтассэз» (рочӧн «Сказки древней Пармы») челядь понда экспозиция. Экспозицияыслӧн медшӧр элементыс робота инсталляция «Вадтыся Вакуль», кытӧн Вакуль робот висьтасьӧ коми мифология йылісь.[6]
Пасйӧттэз
- ↑ 1 2 3 4 Материалы по коми-пермяцкой демонологии : монография / авт.-сост.: А. В. Кротова-Гарина, Ю. А. Шкураток, А. С. Лобанова, С. Ю. Королева, И. И. Русинова ; Пермский государственный национальный исследовательский университет. — Пермь, 2020. − 168 с. ISBN 978-5-7944-3422-4
- ↑ 1 2 3 4 5 6 Голева Т. Г. Мифологические персонажи в системе мировоззрения коми-пермяков. — СПб.: Маматов, 2011. — 272 с.
- ↑ Конаков Н. Д. Васа // Энциклопедия уральских мифологий. Т.I, Мифология коми. / Под ред.: А.-Л. Сиикала, В. В. Напольских, М. Хоппал. Руководитель авторского коллектива Н. Д. Конаков. — М., ДиК, 1999.
- ↑ 1 2 3 Какой ты, лесной дядюшка Вӧрись? (По материалам к. ист. н. Т. Голевой) // Сизимок, № 25. (2018) С. 5.
- ↑ Мультфильм «Сказ о Пере-богатыре», СССР, 1988 (реж. Л. Кощеников) smotrim.ru
- ↑ История одного экспоната. «Вакуль» ГКБУК «Коми-Пермяцкий краеведческий музей им. П. И. Субботина-Пермяка»