Кудымкар (важся кар)

Босьтöм Рувикиись
Важся кар
Кудымкар
коми-перм. Изъюр, рочӧн Красная горка
Изъюр - Кудымкарское городище Администрация КМО.jpg
59°00′50″ с. ш. 54°38′57″ в. д.HGЯO
Канму  Российскӧй Федерация
Местоположение Пермскӧй край
Медодззаись касьтылӧм VII сёво
Аркмӧтӧм кад VII век
Помассьӧм кад XVII век
Статус Археологическӧй памятник
Видзалӧм бура туялӧм

Кудымкар (сідзжӧ Изъюр, рочӧн Кудымкарское городище) — ломоватовскӧй да родановскӧй археологическӧй культураэзісь важся кар. Вӧлі олана VII ‒ XV вв сёвоэзын. Федеральнӧй статуса археология памятник[1][2].

Важ Кудымкарлӧн план ӧння кадся Кудымкар сьӧрті.

Инас

Археология памятникыс иналӧ Кудымкарын, Изъюр нима керӧс вылын (рочӧн Красная горка), Кува ю шульга вадорын. Сыкӧт ордччӧн иналӧ важ шойна (рочӧн Кудымкарский могильник)[3].

В. А. Оборинлӧн реконструкция важся Кудымкар сьӧрті.

Ним аркмӧм

Кудымкар топомнимлӧн этимологияыс абу тӧдса. Сы сьӧрті нуӧтӧны дискуссияэз. Нимыс аркмӧм кывторрезісь. Ныись медбӧрьяыс коми «‎кар» кыв. А. С. Кривощёкова-Гантман сьӧрті -кар (-кор) компонентыс перем ӧткывья вежӧртаснас вӧлі «йӧрйӧм оланаин», «увтыр оланаин»[4]. «Кар» кывторья топониммес ӧддьӧн важӧсь, аркмӧмӧсь ананьинскӧй да ломоватовскӧй археологическӧй культураэз кадӧ. Ӧнӧдз Пермскӧй крайын эмӧсь оланаиннэз, кӧдналӧн ниммес аркмӧтӧмӧсь сія компонентӧн (Канкар, Дӧйкар, Важкар, Изкар, Редикар, Крымкар, Пыскар, Майкар). Коми-Пермяцкӧй округын эмӧсь оліссезтӧм важ оланаиннэз (Дзугыркар, Кочкар, Зырянкар, Чумкар, Курӧгкар да с. о.)[4]. Одзза «кудым» компонентыс дискуссионнӧй. А. С. Кривощёкова-Гантман вайӧтӧ сэтшӧм версияэз[5]. Медодз, «кудым» компонентсӧ позьӧ торйӧтны кык вылӧ «Ку» да «дым, дын», сэк вежӧртаснас лоӧ «кар, кӧда лэбтӧм Ку нима ю ӧм дынын»[4][5]. Сідзжӧ тӧдса, мый XVI сёво гижӧттэзын Кува ю нимыс гижӧм кыдз Кудва. Мӧдӧдз, карыслӧн нимыс аркмӧм айпӧв морт Кудым тюрк кывья ним сьӧрті[5].

Изъюр вылын адззӧм пельгудьян. Коми-Пермяцкӧй музей.

Туялӧм

Туялӧм история

Важся карсӧ туялӧм пондӧтчис XIX сёвоын. 1879 воӧ сійӧ туяліс А. Е. Теплоухов: керис гарйӧссэз да лӧсьӧтіс медодзза гижалӧм. Теплоуховыс ӧктіс гарйӧссэзісь адззӧмторрез коллекция[6]. Сёрӧнжык коллекция публикуйтіс археолог А. А. Спицын. 1917 вося Революция бӧрын коллекцияыс вӧлі сетӧм Пермскӧй краеведческӧй музейӧ[7].

Изъюр вылын адззӧм берсятор. Коми-Пермяцкӧй музей.

1880 воӧ важ караинсӧ туяліс А. П. Иванов, сія адззис важся кадся мудйӧтлісь мусеррез. 1887 воӧ важся кар вылас вовліс антрополог Н. М. Малиев да туяліс важся мортлыэз. 1894 воӧ важся карсӧ туяліс да гижис сы сьӧрті удж И. Я. Кривощёков.

1930-ӧт воэзӧ важ караинісь петӧм адззӧссэсӧ ӧктісӧ горт история туяліссез А. А. Крутецкий (1930 во) да В. Б. Тотьмянин (1929‒1936 вз.), нія сетісӧ адззӧссэсӧ Коми-Пермяцкӧй музейӧ.

1938 воӧ важся карсӧ гарйис М. В. Талицкий, кӧда датируйтіс сійӧ IX ‒ XIII сёвоэзӧн[7].

1951 воӧ важ кар ойвывся ладорас уджалісӧ областнӧй музейнӧй совещаннё участниккез[7].

1968 во гожумшӧрӧ Пермскӧй университетісь Камскӧй археологическӧй экспедициялӧн В. А. Оборин кипод увтся отряд уджаліс важся карыс лунвывся дорын[7][8].

1971 воӧ чулӧтсис одзлань В. П. Бочкарёва кипод увтын[7].

Эсся сэксянь важ карыс эз вӧв туялӧм. Сія лыддиссьӧ бура туялӧмӧн.

Реконструкция

Карсӧ лыддьӧны аркмӧмӧн VII-VIII сёвоэзӧ кыдз уна учӧт дорйытӧм оланаиннэзлӧн шӧрин. Матын сысянь 20-ся унажык сы кадся важся горт да шойна. Карыс вӧлі олана роч колонизацияӧдз. XVI сёво шӧрын карыс дын аркмис роч деревня, кӧда XVII сёво кеж паськаліс погостӧдз. Сыын ӧтлаын олісӧ комиэс да роччес[8].

1968 вося гарйӧм коста лун-рытвывся дорас вӧлісӧ адззӧмӧсь мудйӧт мусеррез да сісь йӧр коляссэз. Йӧрыс ӧтӧрсянь вӧлӧм вартӧм сёйӧн. Карыс абу вӧлӧм ыджыт — 3000 м² мымда, да ӧддьӧн бура дорйӧм. Культура отыс — 0,4—1,2 метр пыдына, мый мыччалӧ сэтӧн дыр олӧм.[8]

Лунвывся дорас вӧлі адззӧм одзза культура от, кӧда аркмӧм карыс аркмӧтікӧ. Отсис адззисӧ ломоватовскӧй кадся татӧн керӧм керамика, ыргӧнісь керӧм мичаторрез (гӧгрӧса бляха, синма моллез, вӧвьюра мичаторрез да мӧдікӧсь, куим дора кӧртісь вартӧм ньӧвьёсь да вайӧм дозлӧн потӧм торрез, дозыс вачкисьӧ Башкортостанісь Кушнаренковскӧй важ шойнаись (VI ‒ VIII свз.) адззӧм доззэз вылӧ. Сідзкӧ, позьӧ висьтавны, мый карыс пондӧтчис лынвыв ладорас да паськаліс ойвыв ладорӧ, кытӧн сэсся вӧлі дорйӧм мудйӧтӧн. Ойвывся дорас вӧлісӧ адззӧмӧсь IX‒XVII сёвоэзся берсяторрез. Сідзжӧ вӧлісӧ адззӧмӧсь ыджыт керку мусеррез, ныын вӧлӧмась осьта биэз да видзан гуэз. Сэтшӧм керкуэсӧ лыддьӧны типичнӧйезӧн родановскӧй культураын. Керкуас вермис овны быдса увтыр. Карыс эз вӧв ӧтік увтыр гортӧн. Сійӧ позьӧ висьтавны, сідз кыдз вӧлісӧ адззӧмӧсь лыись керӧм берсяторрез, кӧдна пасйӧмӧсь 6 пас типӧн. Сідзкӧ, петӧ мый карас олісӧ 6-ся унажык увтырись отир[8].

Культураын

  • Лыддиссьӧ, мый Кудымкарсӧ аркмӧтіс Кудым-Ош. Сійӧн карыс шусьӧ сы нимӧн. Эпос сьӧрті, сія вайӧтіс ассис увтырсӧ Изъюр вылас Сылпан вылісь, кытӧн увтырыс оліс дорйытӧм гортын да эз вермы бура дорйисьны[9].

Пасйӧттэз

  1. ↑ Об установлении границ территории, предмета охраны и режима использования территории объекта археологического наследия – памятника «Кудымкарское городище, IX – XV вв.» Министерство культуры Пермского края
  2. ↑ Кудымкар, городище. База данных «Памятники, памятные знаки, исторические здания и места Коми-Пермяцкого округа» ГКБУ «Коми-Пермяцкий окружной государственный архив»
  3. ↑ Брюхова Н. Г., Смертин А. Р. Историографический обзор и описание могильников родановской культуры Пермского Предуралья // Труды Камской археолого-этнографической экспедиции. — 2018. — № 14.
  4. ↑ 1 2 3 Кривощекова-Гантман А. С. Откуда эти названия? Пермь: Перм. кн. изд-во, 1973. 109 с. — С. 31.
  5. ↑ 1 2 3 Кривощекова-Гантман, А. С. Географические названия Верхнего Прикамья : С крат. топоним. словарем / А. С. Кривощекова-Гантман. — Пермь : Кн. изд-во, 1983. — 175 с. : ил.; 16 см. — С. 108-110.
  6. ↑ Ильиных Вероника Викторовна. Сведения о средневековых поселениях в личном фонде Теплоуховых // Труды Камской археолого-этнографической экспедиции. — 2007. — № 4.
  7. ↑ 1 2 3 4 5 Конин Г.К. Памятники истории и культуры Коми-Пермяцкого национального округа. — Кудымкар: Перм. кн. изд-во, Коми-Перм. отд-е, 1976 г. —135 с. — С. 22.
  8. ↑ 1 2 3 4 Оборин В. А. Основание и ранняя история Кудымкара // Наш край. Сборник статей. Выпуск 4. Перм. кн. изд-во, Коми-Перм. отд-е, 1970. — С. 113-121.
  9. ↑ Кудын-Ош, чудскӧй пам. Коми-пермяцкӧй народнӧй преданнё (гижис Василий Климов) // Иньва. — Кудымкар: КПКИ, 1964. — С. 55-66.

Ыстӧттэз

Босьтӧма "https://koi.ruwiki.ru/w/index.php?title=Кудымкар_(важся_кар)&oldid=207164"-ись