Коми-Пермяцкӧй гортладор туялана музей

Босьтöм Рувикиись
Gerb-icon.png

РФ культура министерство

Arrow-Right.png
Gerb-big.png
Министерство культуры Российской Федерации
П. И. Субботин-Пермяк нима
Коми-Пермяцкӧй гортладор туялана музей
Экспозиционный корпус Коми-Пермяцкого краеведческого музея.jpg
Аркмӧтан кад 1921 во гожумшӧр 30 лун
Аркмӧтісь Субботин-Пермяк Пётр Иванович
Адрес Кудымкар, Пермскӧй край
Директор Елена Дунина
Сайт subbotin-permyak.com
Логотип РУВИКИ.Медиа Медиафайлы на РУВИКИ.Медиа

П. И. Субботин-Пермяк нима Коми-Пермяцкӧй гортладор туялана музей (рочӧн Коми-Пермяцкий краеведческий музей им. П. И. Субботина-Пермяка) — медшӧр Коми-Пермяцкӧй округын гортладор туялана центр; ӧктӧ, видзӧ да мыччалӧ коми отирлісь история да культура.

Музейнӧй собраннёас 87 сюрс мымда видзантор. Медтӧдчанаэзӧн лоӧны перем вӧрпа стиля берсятор, Сасанид кадся эзысьторрез, Перем еннэз, Андрей Воронихинлӧн миниатюраэз, Пётр Субботин-Пермяклӧн серпассэз, Иван Кривощёковлӧн да Николай Кузнецовлӧн архиввез. Музеяс мирын медыджыт коми культура сьӧрті фонд.

Быдса нимыс рочӧн — Государственное краевое бюджетное учреждение культуры «Коми-Пермяцкий краеведческий музей им. П. И. Субботина-Пермяка». Учредительыс — Пермскӧй крайлӧн культура министерство.

Уджалӧ Кудымкарын. 1996 восянь музейнас юралӧ Елена Дунина, РФ культураын Заслуженнӧй уджалісь.

История

Музейыс вӧлі осьтӧм 1921 гожумпом 30 лунӧ Пётр Субботин-Пермяк инициатива сьӧрті да Фёдор Тараканов отсӧтӧн[1]. Музейыс вӧлі аркмӧтӧм мувӧдитан выставкаэз вылісь экспонаттэзісь, Кудымкарскӧй мастерскӧйез музейись (1920) да отир велӧтан музейись[2]. Медодзза юралісьнас вӧлі пуктӧм П. И. Субботин-Пермяк[1]. Сы кулӧм бӧрсянь, 1922 восянь музейнас юраліс сылӧн инь Евстолия Субботина[3]. Сія уджаліс пост вылас 1928 воӧдз, организуйтіс ӧктан удж, экспедицияэз да ӧктіс библиотека[3].

1940-ӧт воэзсянь 2009 воӧдз музейыс уджаліс Вежа Николай вичку керкуын[4].

1945 воӧ музейыслӧ вӧлі сетӧм П. И. Субботин-Пермяк ним[5].

1950 воӧ музейыс медодззаӧн Пермскӧй областись музейезісь мыччаліс советскӧй кад история сьӧрті экспозиция[6].

1959 воӧ, вичку реконструкция кадӧ (1958—1962), вӧлі аркмӧтӧм медодзза Советскӧй Союзын гӧняйтана музей. Сы аркмӧтӧм понда 1962 воӧ коллективыс вӧлі ошкӧм СССР ВДНХ 3-ӧт тшупӧта медальӧн, а музейлӧн директор Флор Будкевич — СССР ВДНХ эзысь медальӧн да радиоӧн[6][7].

Коллекцияэз

Археология коллекция

Археология коллекцияас видзӧны 21 сюрсся унажык видзантор[8].

Эльдар Макаров кипод увтын вӧлі ӧктӧм палеолит кадся коллекция, кӧдаӧ 2024 во кеж пырӧны 7 сюрся унажык видзантор. Ны лыдын изісь керӧм инструменттэз: нуклеуссэз, зыртаннэз, пурттэз, еммез, черрез да с.о. Гарчи, Усть-Пожва, Шированово, Рагозино, Дорошево Емельяниха палеолит кадся оланаиннэзісь (10-40 сюрс во миян эраӧдз)[8].

Тӧдчанаэзӧн лоӧны перем вӧрпа стиля мичаторрез, 70-ся унажык мичатор[9]. Коллекцияас пырӧны М. В. Талицкий, В. Ф. Генинг, В. А. Оборин да с.о. кипод увтын чулӧтӧм гарйӧссэз коста адззӧм берсятор. Видзӧны Плёсо, Урья, Митина важ шойнаэзісь, Кудымкар важся кар вылісь да мӧдік археология памятниккезісь адззӧмторрез. Ны коласын эзысись да бронаись керӧм мичаторрез, дзебан маскаэз, сикӧджжез, оружие, инструменттэз, вӧв видзан берсятор. Медтӧдчанаэзӧн лоӧны Плёсо важ шойнаись адззӧм эзыся шыпурт (VII—X св.), да сідзжӧ Византияись эзысь тасьтіэз (VII—VIII вв)[8].

2007 воӧ фондас вӧлі пыртӧм Плотникова важ шойнаись адззӧмторреза коллекция. Ны коласын мичаторрез стеклоись, каури шоркытшись, грифон серпаса медальон, керамика. Адззӧмторрес мыччалӧны Родановскӧй культура[8].

Этнография коллекция

Коллекцияас пырӧны 5 сюрс мымда XVIII—XX сёвоэзя видзантор. Видзӧны коми отирлісь паськӧм-кӧмкӧт, быдкодь бекӧрбань да инструмент. Уникальнӧйезӧн лоӧны Зюльганісь вайӧм керку, совдоззэз, серӧтӧм чӧрссэз да печканнэз, нарта, пыж, личканпӧввез (500-ся унажык).

Художественнӧй коллекция

Художественнӧй коллекцияас пырӧны живопись, графика да скульптура (1800 мымда видзантор)[10].

Ны коласын:

  • П. И. Субботина-Пермяклӧн живопись да графика;
  • XIX сёвося роч серпасаліссезлӧн (А. М. Колесов, И. А. Пелевин, П. О. Ковалевский, Ю. Ю. Клевер да мд.) картинаэз;
  • А. К. Кривощёковлӧн портретнӧй живопись;
  • А. Н. Воронихинлӧн миниатюраэз;
  • XIX сёвося еннэз;
  • И. И. Крохалевлӧн живопись;
  • 1960—1980 воэзся пермскӧй серпасаліссезлӧн живопись да графика;
  • Ӧння кадся Пермскӧй крайись серпасаліссезлӧн живопись да графика;

Естественноисторическӧй коллекция

Фондас пырӧны 1700-ся унажык видзантор зоология, остеология, ботаника да геология сьӧрті. Коллекциясӧ пондісӧ ӧктыны 1930-ӧт воэзӧ отирӧн вайӧмись, экспедицияэз коста адззӧмись да Москваись Дарвиновскӧй музейись ыстӧмись.

Териология сьӧрті керӧмӧсь вӧрмӧс, ош, кӧин, вӧркань, вӧрпорсь да мӧдік вӧрпа чучелоэз. Медтӧдчананэзӧн лоӧны Гӧрд небӧгӧ пыртӧм вӧрпиэзлӧн чучелоэз да шойез. Ны коласын — анча да варыш кайез, кутш кайез, тупкаэз да сюззез.

Ботаника коллекцияын медтӧчанаӧн лоӧ 1948—1949 воэзӧ Коми округын Ю. Н. Нешатаевӧн ӧктӧм гербарий (700 экз.), да сідзжӧ гербарий, кӧдӧ гортас, Талицаын, ӧктіс да сэсся козьналіс музейыслӧ Николай Кузнецов.

Палеонтология коллекцияӧ пырӧны абу олана вӧрпаэзлӧн лыэз: мамонтлӧн, гӧна носороглӧн да с.о.

Геология коллекцияӧ пырӧ Кува заводісь шомиз, чугун да шлак коллекция.

Фотодокументальнӧй фонд

Коллекцияас пырӧны 41 сюрс мымда видзантор. Сія музеяс медыджыт коллекция[11]. Сы пыртӧтӧмӧсь Коми округын керӧм фотографияэз берся тематика сьӧрті. Медтӧчанаэзӧн лоӧны П. И. Субботин-Пермяклӧн материаллэз да И. Я. Кривощёковлӧн картаэз.

Небӧг фонд

Фондас пырӧны 627 видзантор, ны коласын коми, роч да латин кывья XVII—XIX сёвоэзся кывчукӧррез, каталоггез, энциклопедияэз, небӧггез. Ны коласын эмӧсь медодзза коми кыв велӧтан небӧггез: М. П. Лихачёвлӧн «Шыппассэз», медодзза грамматикаэз, ӧктӧм Н. А. Роговӧн коми-роч кывчукӧр, И. Я. Кривощёковӧн ӧктӧм Пермскӧй губернияись оланаиннэз нимлёдззез.

Фондас видзӧны С. И. Караваевлісь, А. Г. Долдина, А. П. Замышляева, Г. К. Конин библиотекаэз, да кырымпаса небӧггез.

Коллекцияас — «Парма» газеталӧн медбыдса ӧктӧт.

Экспозицияэз

Музейлӧн экспозицияэс куимлаын:

  • «Горком ВКП(б)» керкуын (М. Горький нима ул., 26) — экспозицияэз, фонддэз, администрация.
  • экспозиционнӧй корпус (8-ӧт март ул., 27) — экспозицияэз, художественнӧй галерея.
  • П. И. Субботин-Пермяклӧн керку-музей (Киров нима ул., 23).
П. И. Субботин-Пермяклӧн керку-музей.
Экспозицияэза корпус.
Фонддэз видзанін да администрация керку.

Пырся экспозицияэз

Музеяс 6 пырся экспозиция, кӧдна мыччалӧны Коми-Пермяцкӧй округлісь история, культура да природа:

  • «Коми-Пермяцкӧй край важ кадсянь…»[12] — мыччалӧмӧсь палеолит да Ломоватовскӧй да Родановскӧй кадся берсятор, ны коласын Перем вӧрпа стиля берсятор, «Кабала», «Турун вежан лун», «Быкобой», «Гаврив лун» чулӧтӧм фотоэз; Кудымкар, Кама катытся заводдэз, Строгановвез, коми-пермяцкӧй гижан кыв ла литература, Россияын медодзза национальнӧй округ аркмӧтӧм йылісь.
  • «Крайлӧн вӧрва»[13] — мыччалӧм Коми округись вӧрва, тодиль мыччалӧм Вадты.
  • «Дзор Пармалӧн сказкаэз»[14] — челядь понда экспозиция, мыччалӧм с робот Вакульӧн инсталляция.
  • «Пётр Иванович Субботин-Пермяк»[15].
  • «Коми-пермяцкӧй паськӧм»[16].
  • «Кужись киез»[17] — осьтӧн видзана экспозиция.

Ӧтӧрся экспозицияэз

Экспозиционнӧй корпусыс дын сувтӧтӧм П. И. Субботин-Пермяклӧ памятник, выставка «Вӧрись горт», ретро-машинаэз выставка, ботаническӧй мини-парк «Пожум. ОК».

Удж

Музеяс быд во вовлӧ 50 сюрсся унажык отир, чулӧтсьӧны 500 мымда экскурсия, лекция да мӧдік мероприяттё[2].

1964 восянь музейыс лэдзӧ «Наш край» нима ӧктӧт[2].

Музейыс организуйтӧ да чулӧтӧ научнӧй конференцияэз, публикуйтӧ каталоггез да небӧггез. Удж понда вӧлі унаись ошкӧм Пермскӧй край да Коми-Пермяцкӧй округ премияэзӧн, вермис мирпасьта форум-фестивальын «Интермузей» («Субботин-Пермяк: музею быть!» (2008) да «Музей с колыбели» (2013)[2] проекттэзӧн).

2025 воын лӧсьӧтсьӧ виль экспозиция — «Пера Маа отир»[18]. 2025 во одзтулыс 28 лунӧ пондӧтчис велӧтан проект «Чужанін», кӧда кӧсйӧм Коми-Пермяцкӧй округ 100 вося юбилейлӧ да Пермскӧй крайын чулӧтана Коми-пермяцкӧй кыв волӧ[19].

Пасйӧттэз

  1. ↑ 1 2 Протокол № 27 от 30 июля 1921 г. об организации музея, Коми-Пермяцкий краеведческий музей им. П.И. Субботина-Пермяка. Дата обращения: 11 Тулысшӧр 2025.
  2. ↑ 1 2 3 4 О музее, Коми-Пермяцкий краеведческий музей им. П.И. Субботина-Пермяка. Дата обращения: 11 Тулысшӧр 2025.
  3. ↑ 1 2 Субботина Евстолия Ивановна, Коми-Пермяцкий краеведческий музей им. П.И. Субботина-Пермяка. Дата обращения: 11 Тулысшӧр 2025.
  4. ↑ Памятники рус..
  5. ↑ Государственный каталог Музейного фонда Российской Федерации.
  6. ↑ 1 2 Из истории, Коми-Пермяцкий краеведческий музей им. П.И. Субботина-Пермяка. Дата обращения: 11 Тулысшӧр 2025.
  7. ↑ Флор Павлович Будкевич (3.09.1911–15.08.1965), к 110-летию директора Коми-Пермяцкого окружного краеведческого музея им. П. И. Субботина-Пермяка, Коми-Пермяцкий краеведческий музей им. П.И. Субботина-Пермяка. Дата обращения: 11 Тулысшӧр 2025.
  8. ↑ 1 2 3 4 Археологическая коллекция, Коми-Пермяцкий краеведческий музей им. П.И. Субботина-Пермяка. Дата обращения: 11 Тулысшӧр 2025.
  9. ↑ Пермский звериный стиль, Коми-Пермяцкий краеведческий музей им. П.И. Субботина-Пермяка. Дата обращения: 11 Тулысшӧр 2025.
  10. ↑ Художественная коллекция, Коми-Пермяцкий краеведческий музей им. П.И. Субботина-Пермяка. Дата обращения: 11 Тулысшӧр 2025.
  11. ↑ Фотодокументальный фонд, Коми-Пермяцкий краеведческий музей им. П.И. Субботина-Пермяка. Дата обращения: 11 Тулысшӧр 2025.
  12. ↑ Коми-пермяцкий край с древнейших времён…, Коми-Пермяцкий краеведческий музей им. П.И. Субботина-Пермяка. Дата обращения: 11 Тулысшӧр 2025.
  13. ↑ Природа края, Коми-Пермяцкий краеведческий музей им. П.И. Субботина-Пермяка. Дата обращения: 11 Тулысшӧр 2025.
  14. ↑ Сказки древней Пармы, Коми-Пермяцкий краеведческий музей им. П.И. Субботина-Пермяка. Дата обращения: 11 Тулысшӧр 2025.
  15. ↑ Пётр Иванович Субботин-Пермяк, Коми-Пермяцкий краеведческий музей им. П.И. Субботина-Пермяка. Дата обращения: 11 Тулысшӧр 2025.
  16. ↑ Коми-пермяцкая одежда, Коми-Пермяцкий краеведческий музей им. П.И. Субботина-Пермяка. Дата обращения: 11 Тулысшӧр 2025.
  17. ↑ "Кужись киэз" (Умелые руки): открытое хранение коллекции декоративно-прикладного искусства, Коми-Пермяцкий краеведческий музей им. П.И. Субботина-Пермяка. Дата обращения: 11 Тулысшӧр 2025.
  18. ↑ Проект «Пера Маа отир» (Люди Дальней земли), Коми-Пермяцкий краеведческий музей им. П.И. Субботина-Пермяка. Дата обращения: 11 Тулысшӧр 2025.
  19. ↑ Проект «Чужанін» («Родина»): погружение в историю и культуру коми-пермяцкого народа рус..

Ыстӧттэз

Босьтӧма "https://koi.ruwiki.ru/w/index.php?title=Коми-Пермяцкӧй_гортладор_туялана_музей&oldid=216064"-ись