Перем еннэз

Босьтöм Рувикиись
«Мездӧтісь дзескытінын» перем еннэз Москваын, ГИМ-ын, мыччалікӧ

Перем еннэз (рочӧн Пермская деревянная скульптура нето Пермские боги) — Пермскӧй крайись вичкуся скульптура, кӧда аркмис Ыджыт Перем христианизация бӧрын да вӧлі керана XIX сёво помӧдз. Лыддиссьӧ асыввывся христианскӧй искусствоӧн, кӧда аркмис комиэз важ эскӧммез под вылын да асмознас пыртіс сыӧ барокко стиль ассяматоррез.

Вежа Николай Можайскӧй Зеленятаись. XVIII—XIX св. пп.

Перем еннэзісь ӧння кадӧ тӧдса медважсяэсӧ датируйтӧны XVII сёво помӧн — XVIII сёво понӧн. Нія вӧлісӧ адззӧмӧсь Чердын районісь православнӧй вичкуэзісь[1]. Чердыныс XV—XVI сёвоэзӧ вӧлі Ыджыт Перем юрму. Пуись керӧм скульптураэсӧ шуӧны пырӧмась Ыджыт Перемӧ Важ Перемись[2]. П. А. Корчагин да Е. В. Шабурова сьӧрті, культовӧй скульптураыс, кӧда аркмис да паськаліс кык сёво Ыджыт Перем пыртӧм бӧрын, эз вӧв керӧм, мед вежны одзза важ еннэсӧ, а вӧлі «религияӧ велӧтан факторӧн»[1][2][3].

XVIII сёво пондӧтчикӧ Роч православнӧй вичку пондіс падмӧтны вежаморттэзлісь балбан кодь синбан керӧм. Медвежа Синодлӧн 1722 во тулыспом 21 лунся постановленнё сьӧрті, эз позь «видзны вичкуэзын ӧжыналӧм енбаннэз нето лӧсйӧм, рельефа синбаннэз»[1]. Но падмӧтны традициясӧ эз пет. Вичкуын уджаліссез лэдзисӧ мичӧтны вичкуэсӧ еннэзӧн. Перем еннэзӧс керись мастеррес уджалісӧ сакральнӧй пластика керӧм важ традицияэз сьӧрті[2][4].

Материаллэз да инструменттэз[вильмӧтны | править код]

Мастеррес унажыксӧ уджалісӧ пожум пуӧн, сідз кыдз мӧдік пуэзся небытжык, буражыка да дыржык видзсьӧ. Поснит торресӧ унажыксӧ керлісӧ нинпуись да мукӧдпырся чорытжык пуэзісь — кыдзись нетӧ кӧзісь. Пусӧ бура лӧсьӧтлісӧ удж кежӧ. Медодз сійӧ косьтісӧ, мед одзлань скульптураыс эз деформируйтчы, сыбӧрын барельефнӧй фигураэз понда кер лӧсйисӧ пӧлӧ. Уна скульптураэз керӧмӧсь кыскӧм сьӧлӧмӧса керрезісь, сідз кад бӧрті скульптураыс оз потлась[5].

Вӧлісӧ кӧ керан скульптураыс понда блоккес учӧтӧвӧсь, нійӧ дынӧ содтывлісӧ мӧдік торрез: лемалісӧ пусӧ сідз, мед эз тӧдчы. Петана торресӧ — киэз, ема юркытшшез, ангеллэзлісь борддэз — мастеррес пыр керлісӧ торйӧн, а сыбӧрын крепитлісӧ тодиль поззэзӧ штифттэзӧн да лемалісӧ.

Мастеррес используйтісӧ тодиль уджаннэз. Фигураэз вылас кольччӧмась кырӧввез кыдз черсянь да пуртсянь, сідз и ӧжынсянь, писькӧтчансянь да мӧдік пу керӧтан уджансянь. Нійӧн скульпторрес уджалісӧ мед керны рельеффез — верӧпа юрси, чукыра дӧра.

Керӧм фигурасӧ медодз волькӧтісӧ. Сыбӧрын мастеррез лемалісӧ фундаментсӧ дӧраӧн, кӧдӧ сэсся грунтуйтісӧ. Тшӧкытжыка рӧмсӧ мавтлісӧ дзир пу вылас: сідз вӧлі донтӧмжык да перытжык. Но сэк ковсьывліс рӧмсьӧтӧм вевдӧрсӧ вильмӧтлывлыны, сія быгавліс. Рӧмсьӧтісӧ фигураэсӧ пемытвевья ӧммезӧн, кӧдна буржыка тӧдчӧтісӧ рельефсӧ. Мукӧдпырся скульпторрес имитируйтісӧ сійӧ югыт да пемыт вевья рӧммез мавтӧмӧн.

Сюжеттэз да стиль[вильмӧтны | править код]

Перем еннэз коласын Исус Кристослӧн медтшӧкжыка пантасяна синбан — «Кристос дзескӧтінын» нето «Ойшӧрся Мездӧтісь». Роч иконографияын эта сюжетыс мыччисис XVII сёвоӧ, сійӧ шуӧны босьтӧмӧн католическӧй серпасалӧмись. Сія мыччалӧ Исусӧс Голгоп вылӧ кайтӧдзас, кӧр сійӧ нерӧмась римскӧй шыпуртаэс[6].

Кристос киння мастеррес радейтісӧ керны Вежа Николай Можайскӧйлісь синбан. Сідз жӧ тӧдсаӧсь Кристосӧс крест вылӧ дорӧм уна скульптураа сценаэз.

XVIII сёвоӧ перем еннэсӧ, кыдз и мӧдік Россияын керана скульптураэсӧ, пондісӧ керны Европаись локтӧм барокко стиль чужӧмаӧсь[7]. Сідз аркмис Дмитрий Домнинлӧн керӧм Саваоф Дӧсвидзись скульптура, кӧдӧн вӧлі мичӧтӧм Лысьваись вичку[8].

Ӧддьӧн бура тӧдчӧ барокко стиля примитив «шакшерскӧй школаын», кӧда аркмӧм XVIII—XIX севоэз пом-понын Чердын дынся посаддэзын.

XIX сёвоӧ примитивыс мӧдкодьсялӧ, лоӧ вежалунся кодь, унажык «романтизируйтӧм»[8]. Сэтшӧмӧсь быдӧс скульптураэз, кӧдӧ керис Карагай дынся Габовись мастер Никон Кирьянов. Сійӧ лыддьӧны Назарий Филимоновлӧн велӧтчисьӧн. Кирьяновыс Габовись часовня мичӧтӧм понда лӧсйӧм 500-ся унажык синбан, ны коласын Херувим скульптура.

Туялӧм да экспонируйтӧм

[вильмӧтны | править код]

Перес еннэз осьтісьӧн лыддиссьӧ Н. Н. Серебренников, кӧда 1923 воӧ организуйтлывліс экспедицияэз еннэсӧ Перем художествоа галереяӧ ӧктӧм понда. 1925 воӧ экспедицияын участвуйтіс И. Э. Грабарь, кӧда вылына донъяліс еннэзлісь ассямасӧ. Ӧння кадӧ медыджыт туялісьнас лыддисьӧ искусствотӧдӧм сьӧрті доктор Ольга Власова.

Медунаӧсь еннэс Перем художествоа галереяын (500-ся унажык). Нійӧ мыччавлісӧ выставкаэз коста Францияын, Японияын, Италияын, Бельгияын, Германияын. Россияын нія вӧлісӧ экспонируйтӧмӧсь Третьяковскӧй галереяын, Канму история музейын, А. С. Пушкин нима изобразительнӧй искусствоа музейын. 2017 воӧ коллекцияись экспонаттэсӧ медодззись мыччалісӧ Владивосток да Хабаровск музейезын, 2018 воӧ — Омскын.

Сідзжӧ перем еннэз сьӧрті коллекцияэз ӧктӧмӧсь Чердын гортладор туялана музейын, Коми-Пермяцкӧй гортладор туялана музейын, Березникиись художествоа да история туялана музейын, Перем гортладор туялана музейын.

  1. 1 2 3 Корчагин Павел Анатольевич, Шабурова Е. В. Вехи крещения и христианизации Перми Великой XV – нач. XVIII В. : археологический и искусствоведческий аспекты // Труды Камской археолого-этнографической экспедиции. — 2009. — № 6.
  2. 1 2 3 Истоки «Пермских богов»: изображение святого это и есть сам бог Пермь-300 (21.11.2022)
  3. Манин Александр Анатольевич. О ЯЗЫЧЕСКИХ КОРНЯХ ПЕРМСКОЙ ДЕРЕВЯННОЙ СКУЛЬПТУРЫ // Вестник научной ассоциации студентов и аспирантов исторического факультета Пермского государственного гуманитарно-педагогического университета. Серия: Studis historica juvenum. — 2023. — № 1.
  4. Владимир Шилов. Деревянные боги из чулана. Благодаря ученым-энтузиастам Пермский край сохранил уникальное скульптурное наследие Родина (13.01.2023) Видзӧтан кад: 29.05.2025
  5. Пермские боги Культура. РФ Видзӧтан кад: 29.05.2025
  6. Ольга Власова. Пермская деревянная скульптура tatlin.ru (04.10.2023) Видзӧтан кад: 29.05.2025
  7. Власова Ольга Михайловна. Пути барокко в пермской деревянной скульптуре // Вестник Челябинского государственного университета. — 2011. — № 20.
  8. 1 2 Власова О. М. Пермская деревянная скульптура Государственный архив Пермского края (24.05.2018) Видзӧтан кад: 29.05.2025
  • Искусство Прикамья. Пермская деревянная скульптура. — Пермь: Пермское книжное издательство, 1985.
  • Власова О. М. Пермская деревянная скульптура. Между востоком и западом. — Пермь: Книжный мир, 2009.
  • Власова О. М. Пермская деревянная скульптура конца XVII — начала XX века. Коллекция Пермской государственной художественной галереи. — Москва: Арт-Волхонка, 2013. — ISBN 978-5-904508-31-9.