Парма (газета)
| «Парма» | |
|---|---|
 «Ленин туй вылöт» 1940 воö | |
| Тип | Общественно-политическая |
| Формат | А3 |
| Юралісь редактор | Боталов М. А. |
| Аркмӧтӧм | 1926 |
| Кыв | роч, коми |
| Шӧр офис | Кудымкар, ул. Володарского, 15 |
| Тираж | 4500 - 7300 |
| Веб-сайт | газетапарма.рф |
Парма (одзжык Гӧріԍ (рочӧн Пахарь), Ԉеԋін туј вылӧт, Ļeꞑin tuj vьlət, Ленин туй вылэт, Ленин туй вылӧт (рочӧн По ленинскому пути) — Коми-Пермяцкӧй округись роч да коми кывья газета. Вӧлі аркмӧтӧм 1926 воӧ да петӧ ӧнӧдз.
Аркмӧтӧм да удж
Гӧріԍ (1926—1931)
1926 воӧ Кудымкарын вӧлісӧ аркмӧтӧмӧсь медодзза типография[1] да газета «Гӧріԍ» (рочӧн Пахарь). Газетаыс вӧлі аркмӧтӧм кыдз Коми-Пермяцкӧй ВКП(б) окружкомлӧн, окрисполкомлӧн да окрпрофбюролӧн орган. Медодзза номерыс петіс арпом 7 лунӧ[2][3], Октябрьскӧй революция 9 во порйӧтӧм кеж. Номерсӧ сеталӧмась отирыслӧ демонстрация коста.[3]
Медодзза редакторнас вӧлі Фёдор Копытов (уджаліс пост вылас 7 тӧлісь дырна[3]). Сы кипод увтісь петісӧ 3 ӧтік неделься номер. Ны тиражыс вӧлі 500 экз. 1927 во пом кеж газетаыслӧн тиражыс содіс 1300-ӧдз.[3]
Газетаыс петіс кык кывья: рочӧн да комиӧн. Сы коста газетаас уна гижисӧ Михаил Лихачёв, Питю Ӧньӧ, Степан Караваев да мӧдік коми литература классиккез.
Ленин туй вылӧт (1931—1991)
1931 во арпом 2 лунсянь газетаыс пондіс шусьны «Ленин туй вылöт». Сідз кыдз коми кывья графикаыс 1930-ӧт воэзӧ вежсис куимись, нимыс гижсис молодцов анбурӧн, латин алфавитӧн, кириллицаӧн кык моза — Ԉеԋін туј вылӧт, Ļeꞑin tuj vьlət, Ленин туй вылэт да Ленин туй вылӧт.
1951 во одзгожум 1 лунӧ «Ленин туй вылöт» да «Коми-пермяцкöй колхозник» газетаэз вӧлісӧ ӧтлаӧтӧмӧсь. Нёль листбока газета, кӧда кольччис «Ленин туй вылöт» нимӧн («По ленинскому пути»), пондіс петны недель вылас витісь. Тиражыслісь учöтжык тор (800 экземпляр) печатайтöмась комиöн, а ыджытжыкö (4000 экземпляр) — рочöн. Пытшкöсыс вöлі öткодь. 1958 восянь коми кывья материаллэз пондісӧ петны газета пытшкас сорӧн роч кывьяэскӧт.
1960-ӧт воэзсянь газетаас гижисӧ ӧння кадся коми литература классик Василий Климов, этнография туялісь да журналист Анна Долдина да мӧдік гора нима журналисстэз.
1977 во арпом 14 лунсянь роч кывья газетаас пондіс петны «Лымдорчача» нима листбок. Сійӧ лӧсьӧтіс Василий Кольчурин. 1981 восянь листбокыс листбокыс шусьӧ «Коми говк» да петӧ ӧнӧдз.
1970-1980-ӧт воэзын газетаас Вячеслав Мешавкин кипод увтын уджалісӧ Фёдор Истомин, Иван Денисов, Леонид Надымов, Иван Боталов, Герман Фирсов, Галина Бажина.
Парма (1991— ӧнӧдз)
1991 во одзар 1 лунсянь газетаыс шусьö «Парма». 1990—2014 воэзын газетаыс петаліс неделяас куимись (нёль, нёль да 16 листбок вылын). 2002—2009 воэзӧ петаліс «У Ольги» нима газета 14 листбока тӧлісся содтӧт, кӧдӧ лӧсьӧтіс Ольга Радостева. 2009 восянь «Коми говксӧ» лосьӧтӧ Ирина Дульцева.
2000-ӧт воэзын газетаас уджалісӧ Дмитрий Никитин, Ирина Дульцева, Ольга Радостева, Марина Сизова, Ольга Баяндина, Елена Доровикова, Елена Хорошева (Истомина).
2005 воӧ Коми-Пермяцкӧй автономнӧй округ Пермскӧй областькӧт ӧталаӧтікӧ газетасӧ сетісӧ Кудымкарлӧ кыдз муниципальнӧй унитарнӧй предприяттё.
2015 восянь газетаыс петӧ 20-24 листбока ӧтпырись недельӧ.
2021 восянь сія уджалӧ кыдз автономнӧй некоммерческӧй организация, кӧда аркмӧтісьыс Кудымкарлӧн дума.
Редакторрез
- Копытов Ф. Г. (1926—1927)
- Нефедьев С. Г. (1928—1932)
- Калашников П. М. (1937—1941)
- Хорошев Н. И. (1941—1944)
- Отинова С. С. (1944—1947)
- Гагарин В. Н. (1947—1961)
- Карпов Ф. М. (1961—1967)
- Киприянов А. Н. (1967—1970)
- Мешавкин В. А. (1970—1984)
- Алешков В. Д. (1984—1998)
- Иванов Н. И. (1998—1999)
- Власов С. М. (1999—2009)
- Радостева О. Н. (2009—2010)
- Зидляев Д. В. (2010—2012)
- Ражева З. И. (2012—2014)
- Власов С. М. (2014)
- Хорошева А. М. (2014—2016)
- Дульцева И. Л. (2017)
- Казанцева В. С. (2017—2019)
- Хорошева А. М. (2019—2021)
- Боталов М. А. (2021 — ӧнӧдз)
Пасйӧттэз
- ↑ Данилова Н. И. Коми-Пермяцкий округ — начало пути ГКБУ «Коми-Пермяцкий окружной государственный архив»
- ↑ Календарь знаменательных дат Коми-Пермяцкого края на 2011 год ГКБУ «Коми-Пермяцкий окружной государственный архив»
- ↑ 1 2 3 4 Бажина Г. Г. Живая река времени (К 90-летию окружной газеты). — Кудымкар: МАУ "Газета «Парма», 2016. — 48 с.