Ыджыт Перем

Босьтöм Рувикиись

Экспертиза РАН

Logo-ran.pngLogo-ran-black.png
Чулӧтӧм экспертиза
Россиялӧн наукаэз академияӧн
Унажык
Aprove.svg

РНА-лӧн экспертиза

Arrow-Right.png
Logo-ran.png
Чулӧтӧм экспертиза
Россиялӧн наукаэз академияӧн
Унажык
Learning.svg

Б. Н. Ельцин нима библиотекалӧн материаллэз

Arrow-Right.png
Library.png
Эта статьяыс гижӧм
Б. Н. Ельцин нима Президентскӧй библиотека фонддэзісь материаллэзӧн
Унажык
Вӧвлӧм асму
Ыджыт Перем
Царскӧй титулярникись Ыджыт Перемлӧн эмблема, 1672 во
Царскӧй титулярникись Ыджыт Перемлӧн эмблема, 1672 во
Герб
Герб
География регион Из
Кад 1324 — 1708
Ин Пермскӧй край
Йӧз 6 сюрс олісь мымда (XVI век сёво)
Ыжда 9 сюрс км² (XVI сёво)
Great Perm and Pelym principalities RU.jpg
Канмуэз сы территорияын
Новгород республика XII сёво — 1451 во
Ыджыт Перем ӧксуму 1451—1505
Роч канму 1505 восянь
Логотип РУВИКИ.Медиа Медиафайлы на РУВИКИ.Медиа

Ыджыт Перем (рочӧн Пермь Великая, Пермская земля, Пермское княжество, Пермь Камская [1][2]) — вӧвлӧм асму Россияын, шӧрӧт сёвоэзся ӧксуму[3], сідзжӧ тӧдса кыдз Комму, иналӧм Кама катытын да Кама, Висер, Колва да Ёдзва юэз пӧлӧн. Увтырся шӧрин — Чердын, медыджыд ӧксулӧн резиденция — Покча[4], кеймисян шӧрин — Искар[5]. Археология сьӧрті ӧксумуыс пырӧ родановскӧй культура территорияӧ.

1471 воӧдз вӧлі Новгород республикалӧн вот ӧктан территорияӧн, да сэсся вӧлі Москваса великӧй княжество да ӧтласа Роч канму кипод увтын. Ӧтлаасис Москвакӧт 1505 воӧ[3].

Ыджыд Перемлӧн юркаррез: 1472 воӧдз — Чердын, 1472—1535 — Покча, 1535—1613 — Чердын, 1636—1708 — Совкар[6].

Историк Н. Г. Устрялов шуӧмӧн, Ыджыд Перемнас шусьлісӧ Чердын, Совдор, Совкар, Кайкар каррез[7].

Г. С. Лыткин чайтӧмӧн, «Ыджыт» эпитетыс йитӧм эна муэзлӧн Строгановвезлӧн Из сайӧ экспансияын медшӧр ролькӧт[8].

Территория

Ӧксумуыс вӧлі Камадорся муэзын, Коммуын. Сы ыждаыс 9 сюрс км² мымда. Контролируйтіс быдӧс асладорся муэсӧ, 84,6 сюрс км²-ся унажык. Ойланяс нюжаліс Колва ю йывсянь Эжва ю вожжез вылӧ петан туйӧдз, кытӧн визираліс Важ Перемкӧт. Рытвылас ӧксумулӧн территорияыс сибӧтчис Кама да Ватка ю катытӧдз, кытӧн пондӧтчис Ватка му. Лунвылас ӧксумуыс контролируйтіс территорияэз Чусва юӧдз, кӧда сайын муэс вӧлісӧ башкиррезлӧн, кӧдна вӧлісӧ Казань канму кипод увтын. Асыввывся визирыс муніс Изӧт, ордччӧтчис манси ӧксумуэзкӧт. Ӧксумулӧн шӧриныс вӧлі Колва, Висер да Кама юэз ӧтлаасянінын. Административнӧя сія вӧлі торйӧтӧм Вылісь му да Улісь му вылӧ. Сэтшӧм янсӧтӧмыс кольччис и сёрӧнжык, ниммес вӧлісӧ вежӧмӧсь Чердын уездлӧн Вылісь да Улісь станнэз вылӧ.

XVI да XVII сёвоэзся гижӧттэзын, государевӧй грамотаэзын да мӧдіклаын муыс шусис рочӧн «Пермь Великая» да Чердын карыс понда нимнас вӧлі рочӧн «Пермь Великая-Чердынь».

1623—1624 воэзӧ Ыджыт Перемын чулаліс Москваись локтӧм М. Ф. Кайсаров кипод увтын отир лыддьӧм[9].

Перем му 1579 воын, И. И. Яхонтов небӧггез сьӧрті (С. А. Андрианов сьӧрті)

«Книга Большого Чертежа» нима небӧгын (1627 во) пантасьлӧны Важ Перем кыдз Эжва ю вылын Емдын карлӧн ним да Учӧт Перем, нето «Пермца», кыдз Совдорын ӧтса коми волосьтлӧн ним[10].

Подув ӧшмӧссэзісь юӧррезсянь ӧддьӧн сьӧкыт тӧдмавны сы кадся Ыджыт Перемлісь визирсӧ. Но тӧдса, мый важся Пермия ойвылас визираліс самоди (яран) отиркӧт, асыввылас Изӧт манси отиркӧт, лунвылас башкиррезкӧт да удмурттэзкӧт, рытвылас Югдынкӧт, Вологдакӧт да Чочком саридзӧн.

ХІХ да ХVІІ сёвоэзӧ, отиргижӧм лӧсьӧтіссез И. И. Яхонтов да М. В. Кайсаров кыввез сьӧрті, Ыджыт Перемын, мӧднёж шуны, Чусва юсянь Чустыӧдз, Кама пӧлӧн вӧлісӧ куим кытш: Ыджыт Перем (юркарыс Чердын), XV векӧ аркмӧм Совдор (юркарыс рочӧн Усолье Камское) да Строгановвезлӧн вотчинаэз.

XVІІІ сёвоӧ нія муэс пырисӧ Чердын, Совкар, Перем уезддэзӧ да сідзжӧ торйӧн Кунгур, Оханскӧй, Глазов да Слободскӧй уезддэзӧ, бӧрья кыкыс Ватка губернияын.

Оліссез

Оліссезлӧн лыдыс абу тӧдса. Эна муэзын оліссезӧс медодзза гижӧтӧм сьӧрті, кӧдӧ 1530 воӧ чулӧтіс дяк И. И. Бобров, мӧднёж шуны, Перем ӧксуму ликвидируйтӧмсянь 25 во бӧрті, Ыджыт Перемын вӧлісӧ 2145 ньӧввуж — айпӧлӧс вӧралісь. Этна даннӧйез сьӧрті позьӧ чайтны, мый асъюралӧм коста оліссес вӧлісӧ 6 сюрс мортся унажык. Историк В. А. Оборин лыддис, мый IX—XV сёвоэзӧ родановскӧй культура территория вылын оліс 4,5 сюрс мортся унажык[11].

Камадорын олісь отир важысянь вӧраліс, кыйис чери да ӧктісис. Сы киння, Кама катытын важысянь ни вӧлі металлургия. Ӧння Оралово деревнясянь неылын вӧлісӧ адззӧмӧдсь миян эраӧдз X—IX сёвоэзся ыргӧн кисьтан луэз да тигллез (Ананьино культура)[12]. IX—XV сёвоэзӧ Ыджыт Перемлӧн территорияыс археология дорсянь вӧлі родановскӧй культуралӧн[13]. Родановскӧй культураись отир йӧз вӧдитісӧ му, видзисӧ пода, вӧралісӧ, нылӧн вӧлі кӧрт металлургия[13]. Родановскӧй культуралӧн металлургия шӧринӧн вӧлі ӧння Березники кар дынын посёлок, кӧдӧ археологгес тӧдӧны кыдз Чашкинскӧй[14]. Сійӧ вӧлі IX—XIII сёвоэзын[14]. Монгол кад бӧрын Камадорын металлургия шӧриннэзӧн вӧлісӧ Зырянка ю вожын дорся Сёмино важся кар да Абрамово, Пермяково деревняэз[14].

Оланаиннэз

XX сёво пондӧтчик костася туялӧмын ӧксумуын гижӧмӧсь вӧлӧмась этшшӧм оланіннэз[15]:

Чердынісь Троицкӧй важся кар.
  • Каррез (важся каррез): Чердын (Вятское, IX—XI св.; роч отира Троицкое, XV св.), Редикар (IV—IX св., важ шойна), Пымпал (IX—XI св.), Искар (вежаин, IV—IX св.), Урӧс (XV сёво).
  • Горттэз: Покча (IX—XI св.), Вильгорт (IX—XI св.), Бондюг (IX—XI св.).

Но археологическӧй туялӧм 2001—2008 воэзӧ мыччаліс, мый Чердын да Искар вӧлісӧ дорйыттӧм вежаиннэзӧн, эзӧ «каррезӧн». Гарйикас эзӧ вӧлӧ адззӧмӧсь не мудйӧттэзлӧн, не керкуэзлӧн коляссэз[16].

Эскӧм

Отир коласын унажыксӧ вӧлі традиционнӧй эскӧм. Вежаиннэзӧн вӧлісӧ Чердын да Искар[16]. XIV сёво помын Коммуӧ пырӧ православнӧй эскӧм. 1383 воӧ Ыджыт Перемся Степан вӧлі пуктӧм медодзза епископӧн. Летописьын сы йылісь гижӧм этадз: «приде Стефан до митрополита до Москвы для новокрещении пермяки епискупа просити. Пимен митрополит с князем с Дмитрием сразсудив, поставил его Стефана епискупом пермскую землю»[16]. Сідз кыдз вичку сьӧрті Ыджыт Перем пырис Новгород епархияӧ, то аркмис конфликт. Новгород кыкись ыстыліс Перемӧ вооружитӧм отряддэз[16]. Чожа мыйись конфликтыс вӧлі ладмӧтӧм — Новгород бурсьӧтіс епископсӧ, кӧдӧ пуктіс Москва[16]. Кӧть некытшӧм документальнӧй тӧдчӧттэз Ыджыт Перемся Степан Коммуын олӧм йылісь абуӧсь, сія лыддиссьӧ Перем епархия аркмӧтісьӧн[17]. XV сёвоӧ перемса епископпез вӧлісӧ Москва дор. Сідз епископ Питирим Москва княжествоын феодальнӧй война коста дорйис Василий ІІ-ӧс, 1447 воӧ Рочумын мӧдік церковнӧй иерарххезкӧт ӧтлаын лэдзис анафема сы паныталісь князь Дмитрий Шемяка вылӧ[16]. Отсӧт петіс сыын, мый Питирим 1450 воӧ ыстіс Югдынӧ дорйиссезӧс Шемяка паныт, да кык перемса сотникӧс Шемяка казнитіс[16].

«Епископ Питирим вийӧм», Лицевӧй летописнӧй сводісь миниатюра. Голицынскӧй том, 477 лб.

1455 воӧ епископ Питирим мӧдіс пыртны православнӧй вичкуӧ Ыджыт Перемсӧ, но вӧлі вийӧм манси уськӧтчӧм коста[16]. Виль епископ Иона пыртіс Коммуын оліссесӧ 1462 воӧ. П. А. Корчагин лыддьӧ, мый пыртӧмыс кыссис 1472 вося Чердын тышкӧдз, кӧда коста московскӧй отряд паздіс Искарись важ эскӧма вежаин[16].

XVI сёво пондӧтчикӧ важ эскӧм видзис ӧксумуын оліссезісь тор, мый йылісь висьтассьӧ московскӧй митрополит Симонлӧн 1501 вося гижӧттэзын, кӧдна вӧлісӧ адресуйтӧмӧсь Перемса епархияын уджаліссезлӧ да Ыджыт Перемись отирлӧ, оа сідзжӧ Матвей ӧксулӧ"[17]. Гижӧтас Симон пасйис, мый гӧтрасьӧмыс Ыджыт Перемын чулӧтсис важмоза. Сія гижис: «Яко же слышу о вас, что де у вас поимаются в племени по ветхому и по татарскому обычаю: кто у вас умрёт, и вторы де его брат жену его поимает, и третьи де и брат его того ж де творит; а жены де и ваши ходят простовласы, непокровенными главами»[17]. Митрополит Симон тшӧктіс видзны кӧслун, гӧтрасьны вичкуын, да инькаэзлӧ ветлӧтны вевттьӧм юрӧн[17]. Сідз, ХVI сёво пондӧтчикӧ комиэз копрасьлісӧ одзза еннэзлӧ, ны лыдын и Ойпельлӧ. Эта йылісь митрополит Симон гижӧм: «А кумиром бы есте не служили, ни треб их не принимали, ни Войпелю болвану не молитеся по древнему обычаю, и всех Богу ненавидимых тризнищ не творите идолом»[17].

Митрополит Симон вӧлі зэв лӧг вичкуын уджаліссез вылӧ, кӧдна эзӧ кывзӧ епископ Филофейлісь велӧтӧмсӧ, кӧда юраліс Перем епархияӧн 1471—1501 воэзӧ[17]. Епископыс «унаись ысталіс тіянлӧ ассис грамотаэз сы йылісь жӧ, велӧтіс тіянӧс, медбы тійӧ одзжык сёйӧмсянь да юӧмсянь видзситӧ, а ассиныт пыртӧм христианскӧй челядьнытӧ велӧтітӧ быдӧс Ен законӧ, христианскӧй эскӧмӧ: и тійӧ эта быдӧс йылісь да абу кывзӧмныт йылісь да епископсянь Ен гижӧттэзлісь велӧтӧмсӧ одӧ кывзӧ».[17].

Топоним

«Пермь» топоним аркмӧм йылісь мунӧны дискуссияэз. Медодзза вариантыс вӧлі вӧзйӧм 1730 воӧ Ф. И. фон Страленбергӧн, кӧда сорасьӧмӧн ӧткодяліс Перем да скандинавскӧй сагаэзын казьмӧтӧм Биармия: «Мӧдік ӧзын вӧлі Биармияын нето Ыджыт Перемын Чердын кар дынын» да тодиляліс, мый «Европаын эм Ыджыт Перем, кӧда важ кадӧ шусис Биармаланд шуӧ, да вӧлі ӧддьӧн паськыт му». Пермь-Биармия гипотезаыс вӧлі медпаькыта чайтана история туялӧмын XIX сёво понӧдз, сійӧ видзисӧ быльӧн В. Н. Татищев, М. В. Ломоносов да Н. М. Карамзин. XIX—XX сёвоэзӧ гипотезасӧ пондісӧ критикуйтны да «Пермь» кылыс аркмӧм йылісь аркмисӧ эттшӧм гипотезаэз[18]:

  • Финн кылісь Perämаа — «бӧр му» нето коми кылісь Perjema — «перйӧм му» нето вепс кылісь Perämaa — «бӧр му»;
  • Päärmа кылісь — «дор, ладор». Макс Фасмер мыччаліс мый, «парма» кылісь оз позь фонетическӧя аркмӧтны «пермь» кыв;
  • Пера-богатырь нимись — «Пералӧн му».

«Пермь/Перемь» топонимыс важ роч кывья тексттэзын XIV сёво кеж пантасьлӧ 6-ись[18]:

  • «Повесть временных лет» текстын (абу датируйтӧм торын, кӧда вӧлі гижӧм 1113 воӧ) «Пермь» кылыс пантасьлӧ кыкись — «Афет торись» йӧз нимлёдзын чуд да печора коласын (пермь формаын, быдӧс варианттэзын) да нимлёдзын, кӧдаӧ ӧктӧмӧсь Рочмулӧ вот вештісь йӧззэз мордва да печера коласын (пѣрмь формаын, Ипатьевскӧй гижӧмын);
  • Новгород нёльӧт летописьын гижӧм, мый перем муэз вештісӧ вот Новгородлӧ да 1187 воӧ вӧлісӧ вийӧмӧсь Перемись да Юграись отир: «избъени быша даньникы Перемьские и Югорьскии, а друзии за Волоком, и паде головъ о сте кметей»;
  • Князь Ярослав Ярославич 1264 вося Новгородкӧт договорын Перем гижӧм Югракӧт да Печеракӧт, сыын сідзжӧ пыртӧм «Колопермь» кыв, кӧда одзжык эз пантасьлы Новгород кипод увтся муэз нимлёдзын:[19][20] А̇ се волости новгородьскꙑе̇ · Бежиче · Городець · М[ел]ечѧ[21] · Шипино · Е̇гна · Вологда · Заволоцье̇ · Колоперемь · Тре · Перемь · Ю̇гра · Печера;
  • Пермь да Колопермь гижӧмӧсь Новгород кипод увтся муэз нимлёдзын 1304—1305 воэзся грамотаын:[22][23] А се волости новгородьскꙑꙗ · Бѣжицѣ · Городьць · Мелеча · Шипино · Ѥгна · Волъгда · Заволочиѥ · Голопьрьмь · Тьрѣ · Пьрьмь · Печера · Югра;
  • 1324 воӧ летописьын медодззаись гижӧм Ыджыт Перем московскӧй князь Юрий Данилович Ордаӧ ветлӧмкӧт йитӧмӧн: «поиде… в Орду, а шёл на Пермь Великую и поиде по Каме реке».

Ыджыт Перем кыдз кар

Ыджыт Перем топонимыс кыдз карлӧн ним пантасьлӧ XVI—XVIII сёвоэзся историческӧй документтэзын[18], но история туяліссез чайтӧны, мый сэтшӧм карыс эз вӧвлы.

История сьӧрті документтэз

Сигизмунд Герберштейн XVI сёво медодзза джынын вовліс Россияӧ да лӧсьӧтіс «Rerum Moscoviticarum Commentarii» (рочӧн лэдзӧм «Записки о Московии» нимӧн) латин кывья небӧг, кӧдаын касьтывсьӧ Permia нима кар[24].

1676—1682 воэзӧ царскӧй грамотаэз ыстывлісӧ Ыджыт Перемӧ, Чердынӧ да Совкарӧ (рочӧн «в Пермь Великую, в Чердынь и к Соли Камской»)[25].

Мӧдікпырся Ыджыт Перем нима кар касьтывсьӧ Эдмунд Боун «A geographical dictionary representing the present and ancient names of all the countries, provinces, remarkable cities … of the whole world» 1688 воӧ лэдзӧм английскӧй кывья небӧгын кыдз Permaweliki нето Permia Magna, Пермскӧй провинцияын Кама ю дорся кар, Вынва да Об юэз коласын[26][18].

1708 воӧ Пётр I лэдзис «Об Учреждении Губернии и росписании к ним городов» нима указ да Ыджыт Перемыс вӧлі пыртӧм Сибирскӧй губернияӧ[27].

XVІІІ век пондӧтчикӧ роч официальнӧй документтэзын сідзжӧ пантасьлӧ Пермь Великая кар, сэк жӧ сія оз ӧткодясь Чердынкӧт. Сідз, Петр І-лӧн 1708 во одзтӧв 18 лунся указын «поморскӧй» каррез нимлёдзын казьмӧтӧм Пермь Великая кар да бӧжачут пыр — Чердынь[18]. 1719 во тулыспом 29 лунся указӧ содтӧтын лӧсьӧтӧм Соликамскӧй провинциялӧн оланіннэз нимлёдзын гижӧмӧсь Соль Камская, «Пермь Великая и Чердынь»[18].

1744 воӧ петӧм небӧгын Томас Сальман пуктӧ Ыджыт Перемсӧ (бӧра карнас шуӧм Пермь Великая): "Перм (Permia) провинция визиралӧ зырянакӧт (Syrianes) ойвылын, да Вологдакӧт лунвылын; асыввыв визирыс, дзик, Иртыш (Irtis) ю, кӧда усьӧ Об (Oby) юӧ; медшӧр карыс Пермь Великая (Permia Weliki)[18].

Кыдз паздӧм кар йылісь Пермь Великая йылісь гижӧм[28] небӧгын, кӧда петіс 1736 воӧ[29].

Картаэз

Пермь Великая — кыдз кар пантасьлӧ уна визирсайся картаэзын вылын.

Энтони Дженкинсонлӧн карта, 1562 во
Г. Герритсӧн керӧм Россиялӧн карта. 1614 во
Делиль Гийомӧн керӧм Московиялӧн картаись фрагмент. 1742 во

Энтони Дженкинсон карта вылын, кӧда вӧлі лэдзӧм 1562 годӧ, Пермь Великая нима кар (карта вылын сія шусьӧ Пермвелик) сулалӧ Эжва ю петанін дорын (пасйӧм асторья «карья» пасӧн). Сэтӧн жӧ мыччис карсӧ паськыта тӧдса фламандскӧй географ да картограф Герард Меркатор (1512—1594).

1613 воӧ царевич Фёдор II тшӧктӧм сьӧрті картограф Гессель Герритс керис Россиялісь карта да лэдзис сійӧ Амстердамын. 1614 воӧ вӧлі керӧм сы карталӧн роч кывья версия.

XVIII сёвося картаэз вылын Пермь Великая (Perma Velikaia) нима кар мыччалӧм сулалӧмӧн Висер ю дорын, ӧння кадся Соликамск (Solcamskaia) да Чердын (Surdin) коласын. Сідзжӧ мыччалӧм французскӧй картограф Гийом Делильӧн керӧм Carte de Tartarie (Тартариялӧн карта) 1706 вося карта вылын[30] — La Grande Perme (Пермь Великая) кар, да Московия карта[31] вылын (1742).

История

Одзза история

Медшӧр ӧшмӧсӧн лоӧ Вычегодско-Вымскӧй летопись. Тӧдса, мый Комму сулаліс вузасян туйез вежын. Шуам, Чердын, П. А. Корчагин да А. С. Лобанова шуӧмӧн, сулаліс ва да вӧр туйез вежын[32]:

Ыджыт Перем ӧксуму, Москвасянь вассалитет (1451—1505 вз).
Веж-гӧрд рӧмӧн пасйӧм Пелым ӧксуму

Унажык историккес чайтӧны, мый медодзза идентифицируйтӧм оліссезӧн Из дорын вӧлісӧ Урал кыв котырись быдкодь финн-йӧгра йӧззэз. Ыджыт мунӧм коста Из дорӧ да сайӧ локтісӧ тюрк кывья отир. Финн-йӧгра отирлӧн ыджыткодь юкӧн венгррез веськӧтлӧм увтын муніс Перем муэзісь Дунай ю дорӧ. X сёвосянь Коммуыс да Камадорыс вӧлісӧ волга булгаррез кипод увтын да лыддисисӧ ны колонияӧн. Ыджыт Перем му арабскӧй хроникаэзын тӧдса кыдз Вылісь Булгария нето Вису му. Сы пыр муніс активнӧй вузасян туй Сибирӧ. Перемын адззӧмӧсь уна персидскӧй искусствоись керӧмторрез да сьӧм — «камасайся эзысь»[33][34], мый висьталӧ паськыта дона кучиккез вузалӧм йылісь. Сы киння, Коммуын ӧддьӧн одз аркмис металлургия. Ӧнняся Оралово деревня дынсянь неылын адззӧмӧсь ыргӧн сылӧтӧм понда кисьтан луэз да тигллез, кӧднӧ датирутӧны миян эраӧдз X—IX сёвоэзӧн (Ананьино культура)[12]. Археология сьӧрті Ыджыт Перем пырӧ родановскӧй культураӧ (IX—XV сёвоэз). Родановскӧй культуралӧн металлургическӧй шӧринӧн вӧлі ӧння Березники дынся посад, кӧдӧ археологгез тӧдӧны кыдз Чашкинскӧй[14]. Сійӧ вӧлі олана IX—XIII сёвоэзӧ. Постмонгольскӧй кадӧ Ыджыт Перемын металлургическӧй шӧриннэзӧн вӧлісӧ Зырянка ю бассейнын Сёмино важся кар да Абрамово, Пермяково посаддэз[14].

Перем муэз Новгород республикаын (XII—XV севӧлӧн медодзза джын)

XII сёво кеж Перем муэз сюрисӧ Новгород республика кипод увтӧ да 1471 воӧдз Югракӧт ӧтлаын касьтывсьӧны кыдз Новгородлӧн «волосттез» 1264, 1304—1305 да 1471 воэзся договоррезын[18]. Тӧдса, мый Перем да Югра муэз XII сёвоӧ ни вештісӧ Новгородлӧ вот. Новгородся нёльӧт летопись юӧртӧ, мый 1187 воӧ «избъени быша даньникы Перемьские и Югорьскии, а друзии за Волоком, и паде головъ о сте кметей». Эта юӧрсянь тыдалӧ, мый сэк ни Новгород ыстывліс Перемӧ да Юграӧ вот ӧктіссезӧс да отирыс мукӧд коста сувтліс нылӧ паныт. Новгород ӧктіс вотсӧ Перем муэзын татар-монгол кад бӧрын. 1322 воӧ Иван Калита «локтіс ордаись, и лэдзис лӧгсӧ Новгород вылӧ, корис нылісь камасайся эзысь»[18].

Роччезлӧн Камадорӧ локтӧм (XIII—XIV сёвоэз)

XIII—XIV сёво пондӧтчикӧ Ыджыт Перем видзисӧ кыдз транзитнӧй территория владимиро-суздальскӧй (да сёрӧнжык нысянь петӧм московскӧй) княззез. Кама кывтытын да Волга дорын X сёвосянь вӧлі тюрк кывья мусульмана канму — Волга Булгария. Эм версия, мый Коммуын XI сёвоӧ ни вӧлісӧ булгарскӧй вузасян факторияэз, но сійӧ версияыс абу ӧтчайтана быдӧс историккезӧн[35]. Родановскӧй культура памятниккез перйикӧ адззӧмӧсь ӧддьӧн етша болгараись петӧм эмторрез. Сідз, болгара керамикаыс Коммуись родановскӧй кадся оланаиннэзын адззӧм керамическӧй массаись етшажык 1%-ся[14].

Кӧть унажык археологическӧй памятниккез (шойнаэз да оланаиннэз) Камадорын вӧлісӧ гарйӧмӧсь революцияӧдз, историк Л. Д. Макаров чайтіс, мый XI сёвоӧ ни регионас пырисӧ Рочмуись эмторрез[35]. Сідз, ӧння Чермӧс дынын адззӧмӧсь важся роч сабля оропись фрагмент (эм ӧтік аналог — сэтшӧм оропа IX—X сёвоэзся мичмӧтӧм киевскӧй шыпурт) да каролингскӧй шыпуртлӧн тор[36].

Коммусянь ойвыв-рытвылын XIII сёво пондӧтчикӧ вӧлі аркмӧтӧм Югдын, кӧда пырис Владимирско-Суздальскӧй княжество кипод увтӧ. Югдысянь Кама катыт пыр кыссис туй Волга Булгарияӧ, кӧдаӧн ветлісӧ роч княззес. Кӧр 1220 воӧ князь Юрий Всеволодович ӧктіс тышк Волга Булгария вылӧ, то сыись ӧтік полк вӧлі ыстӧм «Югдынсянь Коммуӧ»[18]. Татарско-монгольскӧй нашествие бӧрын, кӧда розоритіс кыдз роч княжествоэсӧ, сідз и Волга Булгария, Коммуыс кольччис транзитнӧй территорияӧн. 1324 воӧ московскӧй князь Юрий Данилович ветліс Зарни Ордаӧ, сія «муніс Ыджыт Перемӧ Кама ю кузя»[18]. 1409 воӧ новгородскӧй боярин Анфал Никитинлӧн флотилияыс петіс тышкӧн Волга Булгарияӧ сія жӧ маршрут кузя, кыдз и князь Юрий Всеволодович 1220 воӧ: 150 пыж уисӧ Волга кузя, да ачыс Анфалыс юраліс 100 пыжӧн Кама кузя[37].

Ӧксуму (1451—1505 гг.)

Коммуись коми отир увтыррез важынсянь видзисӧ вузасян йитӧттэз Волгдаркӧт да Каспий саридз дынся канмуэзкӧт, кытчӧ Кама да Волга кузя кыссис ю туй. Рытвывсянь Важ Перем Вынва да сы вожжез пыр кыссис ю туй Югдынӧ да Вологдаӧ. Асывланьӧ Висер, Лозьва да Тавда юэз кузя кыссис Сбирӧ туй, кӧда ХVI сёво помӧдз вӧлі медшӧр туйӧн («Московскӧй» нето «Ыджыт туйӧн» Из сайӧ[38]. Камадорын ӧксьӧм уна сідз шуана «камасайся эзысь» — Сасанид Иранісь, Византияись да Шӧр Азияись эзысись керӧм дозмук да арабскӧй сьӧм да мичаторрез[39].

ХІІІ сёвоӧ монголлэз паздісӧ Волга Булгария да асторья роч княжествоэз. Ӧддьӧн уна отир пышшисӧ овны лӧнь да етша отира Перем муэзӧ, кӧдна сайӧвтӧмӧсь дзибья вӧрӧн да нюррезӧн. Эта муыс пырис Новгород волосттезӧ, но кольччис мымдакӧ асъюраланаӧн: сійӧн юралісӧ ӧкмуэз, Новгородыслӧ вештісӧ вот дона гӧна кучикӧн.

1451 воӧ Москваись ыджыт князь Василий II Тёмнӧй пуктіс Важ Перемӧ аслас наместниккезӧн князь Ермолайӧс да сылісь Василий зонсӧ, да Ермолайлӧн мӧдік зон — Михаил — лоис Ыджыт Перемлӧн ӧксуӧн. Летопись сьӧрті Ермоличчез — Верейскӧй линия сьӧрті роч княззез увтырись петӧм отир, но унакодь ӧння кадся авторрес лыддьӧны нійӧ коми увтырись ӧксуэзӧн, вермасӧ лоны роччезӧн, сідз кыдз нія пыртӧмӧсь христиана вичкуӧ да нылӧн вӧлісӧ роч ниммез.

Быдса статья: Чердын тышк

1472 воӧ пермяккезӧн московскӧй купеццезӧс оскорбитӧм понда Иван ІІІ ыстіс Ыджыт Перемӧ московскӧй воевода князь Фёдор Пёстрыйӧс войскоэзӧн, кӧдна босьтісӧ муэсӧ Москва кипод увтӧ. Фёдор Пёстрый лэбтіс Покчаын неыджыт роч дорйисян. Сія жӧ воӧ медодззаись Чердынісь Богословскӧй монастырьлӧн синодикаын вӧлісӧ казьмӧтӧмӧсь Ыджыт Перем ӧксуэзлӧн да ны иннезлӧн ниммез. Иван ІІІ аслас юралӧм помӧдз колис номинальнӧй юралісьӧн Михаилсӧ, фактическӧй юралісьӧн жӧ вӧлі епископ Филофей. 1505 воӧ Михаилыслӧн зоныс, Матвейыс туйӧ Ыджыт Перемӧ вӧлі ыстӧм наместник князь В. А. Ковёр, «медодзза роч княззэзісь». Московскӧй княззес строитісӧ каррез, сеталісӧ кадкостся воттэзісь лэдзӧм[10].

Пермяккез ветлісӧ московскӧй воеводаэзкӧт тышккезӧн Юграӧ (1483, 1485 да 1499 воэзӧ) да манси муэзӧ (1484 во); сія жӧ кадӧ нія асьныс сюрисӧ манси да татараэзлісь уськӧтчӧммез увтӧ (1481, 1505, 1531, 1539, 1547, 1572, 1573 да 1581 воэз). Пелымись ӧксу Кихек 1581 воӧ сибирскӧй, сылвенскӧй да иренскӧй татаракӧт, ханты, мансиэ, удмурт да башкиррезкӧт вынӧн тышйис Ыджыт Перемсӧ.

Отир олісӧ унажыксӧ Колва да Висер дор. Чердынсянь быд ладорӧ кыссисӧ паськыт ва туйез: Кама кузя рытланьӧ да лунланьӧ Москваӧдз да Каспий саридзӧдз, Колва кузя Печораӧ кыскисьмӧн ойланьӧ Ойвыв океанӧдз, Висер кузя асывланьӧ Из пыр Сибирӧ, Ивдель, Лозьва, Тавда, Тобол, Иртыш да Об юэз кузя кыссис Чердын туй. Тӧвнас груззэз новйӧтлісӧ сія жӧ юэз йи кузя. Медодзза мувывся Бабиновскӧй туй (Ыждыт туйлӧн тор) Сибирӧ вӧлі лэбтӧм 1597 воӧ ни.

Овмӧсын медыджыт удж муніс вӧралӧмын да чери кыйӧмын, да лунвыв районнэзын (Кама да Чусва дорын) — мувӧдитӧмын. Никоновскӧй летопись сьӧрті вӧлісӧ тӧдсаӧсь нёль ыджыт оланаин, ӧксу резиденцияэз — Искар, Урӧс, Покча да Чердын; быдӧс нія вӧлісӧ Колва дорын.

Роч канмуын

XVI сёвосянь Важ Перем весьтын пондӧ лэбтісьны Ыджыт Перем[40].

Перем мулӧн эмблема, 1626 во

XVI сёво шӧрын татӧн вӧлісӧ ни кынымкӧ монастырь, кӧть христианство пондіс паськавны Важ Перемын сьӧрті сёво сьӧрна сёрӧнжык, Важ Перемас медодзза куим монастырь осьтіс Ыджыт Перемся Степан. Перем муэз христианизацияӧ ыджыт пай пуктіс Трифон Вятскӧй. Уна керисӧ мусӧ овмӧтӧм да промышленнӧя уджӧтӧм понда Строгановвез, кӧдналӧ 1517 воӧ великӧй князьсянь вӧлі сетӧм грамота Сольвычегодскын совпуан лӧсьӧтӧм понда, а 1558 воӧ — паськыт муэз Ыджыт Перемын. XVII сёвоӧ Ыджыт Перем му вӧлі юкӧм куим уезд вылӧ — Чердын, Совкар да Кунгур[41].

Царскӧй титулярник, Перем муэлӧн эмблема. 1672 во
Ыджыт Перем (тор). И. К. Кириловлӧн 1722—1737 воэзся Российскӧй империялӧн атлас

XVII сёвоӧ Камадорын пондӧтчисӧ кошшыны мупытшкся колана шедтӧссэз. 1617 воӧ строгановскӧй крестьянин Я. Литвинов юӧртіс Москваӧ, мый адззис Соликамскӧй уездісь ыргӧн[42]. 1618 воӧ ни сэтӧн чулӧтсис геологическӧй экспедиция, кытчӧ пырисӧ дворянин Ч. Бартенев, подьячӧй Г. Леонтьев да англичанин-рудовед Д. Ватер[42]. Экспедиция адззис ыргӧн да невна зарни[42]. 1634 воӧ вӧлі лэбтӧм Пыскарын ыргӧн сылӧтан завод, кӧда уджаліс 1657 воӧдз[43]. Сійӧ строитӧмын участвуйтісӧ 15 саксонскӧй морт А. Петцольт кипод увтын[43].

Горнозаводскӧй уджыс вӧлі канму эмалӧмлӧн медшӧр ӧшмӧсӧн, отсаліс отирлӧ локны да аркмӧтны каррез, сы лыдын губернскӧй кар Перем (рочӧн Пермь[10]), сія вӧлі аркмӧтӧм лунвыв Камадорын, кытӧн унажыксӧ олісӧ татара. Нимсӧ карыслӧ вӧлі сетӧм XVIII севоӧ Пермскӧй губерния аркмӧтӧмкӧт йитӧтӧн.

Роч канмуӧ пырӧм бӧрын Ыджыт Перемын вӧлісӧ берся административнӧй юкӧттэз:

  • Поместнӧй система,
  • Новгород приказ увтся воеводаэзлӧн разряддэз,
  • Архангелогородскӧй да Сибирскӧй губернияэз вылӧ янсӧтчӧм,
  • Российскӧй империялӧн провинцияэз,
  • Уезддэз,
  • Волосттез,
  • Медодзза (да дзир ӧтса) Российскӧй империяын 1897 вося Ӧтласа отирлыддьӧм материаллэзын пасйӧм комиэзлӧн (рочӧн пермяки) национальность — сія вӧлі тӧдмалӧм чужан кыв сьӧрті[44].

Юраліссез

  • Михаил ӧксу (1451—1481)
  • Матвей ӧксу (1481—1505)

Ыджыт Перем литератураын

Ыджыт Перемлӧн история, отир да лоӧмторрес лоисӧ Алексей Иванов «Сердце Пармы или Чердынь — княгиня гор» нима романлӧн сеттинг подулӧн, кӧдаын былься историческӧй йӧз, иннэз ла лоӧмторрез йитӧмӧсь финн-йӧгра мистикаӧн да эскӧмӧн.

Пасйӧттэз

  1. ↑ Туркин А. Происхождение названий народов коми // Linguistica Uralica. — Tallinn, 1995. — Т. 31, № 1. — С. 19.
  2. ↑ Вершинин Е. Пермь Великая // Родина. — 2001. — №. 11. — С. 37—40.
  3. ↑ 1 2 Пермская земля : [арх. 7 Одзгожум 2020] / Г. Н. Чагин // П — Пертурбационная функция. — М. : Большая российская энциклопедия, 2014. — С. 706—707. — (Большая российская энциклопедия] : [в 35 т.] / гл. ред. Ю. С. Осипов ; 2004—2017, т. 25). — ISBN 978-5-85270-362-0.
  4. ↑ Кривощёков И. Я. Словарь географическо-статистический Чердынского уезда Пермской губернии. / Чердын. уезд. земство. — Пермь: Электро-тип. "Труд", 1914. — С. 624.
  5. ↑ Кривощёков И. Я. Словарь географическо-статистический Чердынского уезда Пермской губернии. Пермь, 1914. С. 399.
  6. ↑ Пермь Великая. Уральская историческая энциклопедия. Видзӧтӧм 23 Одзтӧв 2025.
  7. ↑ Устрялов, Николай Герасимович. Именитые люди Строгановы. — 1842.
  8. ↑ Г. С. Лыткин Зырянский край при епископах пермских и зырянский язык. СПб.: Тип. Акад. наук, 1889. С. 21..
  9. ↑ Календарь знаменательных и памятных дат г. Перми на 2023 год. Муниципальное бюджетное учреждение культуры города Перми "Объединение муниципальных библиотек". Видзӧтӧм 23 Одзтӧв 2025.
  10. ↑ 1 2 3 Пермская губерния (ЭСБЕ)
  11. ↑ История Урала с древнейших времен до конца XIX века / Под ред. акад. Б. В. Личмана. — Екатеринбург: СВ-96, 1998. — С. 116
  12. ↑ 1 2 Майстренко Д. А., Мельничук Л. Ф. Ораловское озеро II поселение рубежа поздней бронзы и начала раннего железного века в Северном Прикамье // Вестник Пермского университета. Серия: История. — 2015. — № 1 (28).
  13. ↑ 1 2 История Урала с древнейших времен до конца XIX века / Под ред. акад. Б. В. Личмана. — Екатеринбург: СВ-96, 1998. — С. 78
  14. ↑ 1 2 3 4 5 6 Головчанский Г. П., Мельничук А. Ф., Рублев А. В., Скорнякова С. В. Чашкинское II поселение крупнейший неукрепленный памятник родановской культуры в верхнем Прикамье // Вестник Пермского университета. Серия: История. — 2011. — № 1 (15).
  15. ↑ Кривощеков И. Я. Пермь Великая, ее живая старина и вещественные памятники : Археол.-этногр. заметки по Чердын. уезду с картой / Под ред. и с примеч. А.Ф. Теплоухова.. — Пермь: : электро-тип. "Труд", 1911. — 61 с.
  16. ↑ 1 2 3 4 5 6 7 8 9 Корчагин П. А., Шабурова Е. В. Вехи крещения и христианизации Перми Великой XV – нач. XVIII В. : археологический и искусствоведческий аспекты // Труды Камской археолого-этнографической экспедиции. — 2009. — № 6.
  17. ↑ 1 2 3 4 5 6 7 Чагин Г. Н. Пермь Великая и первые века ее христианизации // Вестник Православного Свято-Тихоновского гуманитарного университета. Серия 2: История. История Русской Православной Церкви. — 2011. — № 42.
  18. ↑ 1 2 3 4 5 6 7 8 9 10 11 Корчагин П. А. Пермь. «Что в имени. . . » // Вестник Пермского федерального исследовательского центра. — 2013. — № 4.
  19. ↑ 1264 г. — Договорная грамота Новгорода с тверским великим князем Ярославом Ярославичем. Восточная литература / Средневековые исторические источники Востока и Запада. Видзӧтӧм 25 Одзтӧв 2025.
  20. ↑ Договорная грамота Ярослава Ярославича. Видзӧтӧм 15 Тӧвшӧр 2026.
  21. ↑ Две буквы в грамоте не читаются, в списке XVIII века «Мелеча»
  22. ↑ 1304—1305 гг. — Грамоты Новгорода тверскому великому князю Михаилу Ярославичу // 7 - Грамота с условиями договора. Восточная литература / Средневековые исторические источники Востока и Запада. Видзӧтӧм 25 Одзтӧв 2025.
  23. ↑ Договорные грамоты Новгорода Великого вел. кн. владимирскому и тверскому Михаилу Ярославичу. Видзӧтӧм 26 Тӧвшӧр 2026.
  24. ↑ Записки о Московии (rerum moscoviticarum commentarii) Барона Герберштейна 129. С-Пб (1866). Видзӧтӧм 15 Тӧвшӧр 2026.
  25. ↑ Акты исторические, собранные и изданные Археографическою коммиссиею. Т. 5. 1676-1700. Электронная библиотека исторических документов (ЭБИД). Видзӧтӧм 25 Одзтӧв 2025.
  26. ↑ Catalog Record: A geographical dictionary [electronic... | Hathi Trust Digital Library англ..
  27. ↑ Полное собрание законов Российской Империи. Собрание Первое. Том IV 438.
  28. ↑ La Geographie moderne, naturelle historique & politique...
  29. ↑ Abraham DuBois. La Geographie moderne, naturelle historique & politique: dans une methode nouvelle & aisée стр.542. — chez Jacques vanden Kieboom, 1736. — С. 542. Архивная копия от 10 Тулысшӧр 2021 на Wayback Machine
  30. ↑ L’Isle de Guillaume. Carte de Tartarie (1706 год) (David Rumsey Historical Map Collection).
  31. ↑ Московия карта рус..
  32. ↑ Корчагин П. А., Лобанова А. С. Очерки ранней истории Перми Великой: водно-волоковые пути // Вестник Пермского университета. Серия: История. — 2012. — № 1 (18).
  33. ↑ Белавин А. М. «Серебро закамское» в истории и археологии Пермского Предуралья // Вестник Пермского федерального исследовательского центра. — 2013. — № 2.
  34. ↑ Мельничук А. Ф., Вильданов Р. Ф., Голдобин А. В., Головчанский Г. П. Истоки Восточно - Римской утвари и монетного материала на средневековых памятниках археологии Верхнего Прикамья // Труды Камской археолого-этнографической экспедиции. — 2015. — № 10.
  35. ↑ 1 2 Макаров Л. Д. Этноопределяющие маркеры в археологии и проблемы славяно-финского этнокультурного синтеза // Вестник Удмуртского университета. Серия «История и филология». — 2005. — № 1.
  36. ↑ Макаров Э. Ю., Мельничук А. Ф., Третьяков Д. В. Новые средневековые археологические древности близ г. Чермоза Пермского края // Вестник Пермского университета. Серия: История. — 2011. — № 1 (15).
  37. ↑ Феденёв А. А., Белавин А. М. Реконструкция биографии Анфала Никитина (на основе летописных сообщений) // Вестник научной ассоциации студентов и аспирантов исторического факультета Пермского государственного гуманитарно-педагогического университета. Серия: Studis historica juvenum. — 2010. — № 1 (6).
  38. ↑ На путях из Земли Пермской в Сибирь. Ред. В. А. Александрова. «Наука», М.1989 г.
  39. ↑ Белавин А. М. «Серебро закамское» в истории и археологии Пермского Предуралья // Вестник Пермского федерального исследовательского центра. — 2013. — № 2.
  40. ↑ Корчагин П. А. Присоединение Перми к Русскому государству // Вестник Пермского университета. Серия: История. — 2025. — № 1 (68).
  41. ↑ Космовская А. А. Воеводское управление в Перми Великой в XVII в // Вестник Пермского университета. Серия: История. — 2012. — № 1 (18).
  42. ↑ 1 2 3 Корепанов Н. С., Курлаев Е. А. К истории открытия золота на Урале // Известия высших учебных заведений. Горный журнал. — 2013. — № 6. — С. 170
  43. ↑ 1 2 Курлаев Е. А. Роль иностранных специалистов и технологий в формировании геологоразведочной и горнодобывающей отраслей на Урале в XVII — первой четверти XVIII века // Известия высших учебных заведений. — Горный журнал. — 2012. — № 8. — С. 110
  44. ↑ Первая Всеобщая перепись населения Российской империи, 1897 год., издание Центрального статистического комитета (под редакцией Н. А. Тройницкого).

Литература

  • 100 и 1 документ: нескучные архивные истории. — Пермь, 2020. — С. 8-9: фот. цв.
  • Белавин А. М. 900 ЛЕТ ИМЕНИ «ПЕРМЬ» // Пермский государственный гуманитарно-педагогический университет, Пермь — 2014. — № 9. — С. 4-10.
  • Белянкин Ю. С. Книжное наследие Перми Великой в фондах РГБ // Язык, книга и традиционная культура позднего русского средневековья в науке, музейной и библиотечной работе: Труды III международной научной конференции (Мир старообрядчества. Вып. 9.) / Сост. Н. В. Литвина, Ю. С. Белянкин. — М.: Археодоксiя, НКТ, 2019. — 820 с. — С. 54-63
  • Logo-bie.svg Берх В. Н. Путешествие в города Чердынь и Соликамск.: для изъискания исторических древностей. — Санкт-Петербург: Печатано в Военной типографии Главнаго штаба его императорскаго величества, 1821
  • Коловарский, Л. Новый список писцовых книг Михаила Кайсарова / Л. Коловарский, Ю. Мельков И На Западном Урале: сборник статей 1951 года. Вып. 1. — Пермь, 1951. — С. 201—208.
  • Морозов Б. Н., Симонов Р. А. К проблеме источников древнепермской письменности Стефана Пермского (около 1340—1396) // Древняя Русь. Вопросы медиевистики. 2009. № 1 (35). С. 5-16.
  • Семёнов О. В. К вопросу о времени вхождения в состав Московского государства Перми Великой / О. В. Семёнов // Известия Уральского государственного университета. — 2004. — № 31. — С. 34-45.
  • Семёнов О. В. Становление и эволюция системы местного управления на Урале во второй половине XV — первой половине XVII в. Екатеринбург, 2006.
  • Семёнов О. В. Великопермская уставная наместничья грамота 1553 г. // Проблемы истории России. — Екатеринбург: Волот, 2008. — Вып. 7: Источник и его интерпретации. — С. 295—333.
  • Чагин Г. Н. Пермь Великая в топонимических доказательствах / Пермский государственный университет. — Пермь: Изд-во Перм. ун-та, 2004. — 100 с. — 200 экз. — ISBN 5-8241-0334-8. (обл.)
  • Шумилов Е. Н. Пермь Великая — Чердынь: Опыт исторической реконструкции. 2-е издание, исправленное. Пермь, 2005.

Ыстӧттэз

Коми отир
Перем комиэз Иньвенса | Зюзьдінса | Косинса | Лупьинса | Язьвинса
Коми зыряна Емватас | Изьватас | Колва яраннэз | Лузса | Печораса | Сыктылса |
Удораса | Эжвайывса | Эжватас
† — Ӧшӧм группаэз
Босьтӧма "https://koi.ruwiki.ru/w/index.php?title=Ыджыт_Перем&oldid=215935"-ись