Ыджыт Перемлӧн ӧксуэз

Ыджыт Перем ӧксуэз
Кад	XV – XVI сёвоэз
Ним	ӧксуэз, княззез
Увтыр аркмӧтісь	Михаил
Когнаттэз	Важ Перем ӧксуэз
Чужанін	Ыджыт Перем ӧксуму/Верея княжество
Подданство	Ыджыт Перем ӧксуму, Московскӧй княжество, Роч канму
Муэз	Тула да Медынь уезддэзын
Йӧз удж	Ыджыт Перемлӧн ӧксуэз
Военнӧй удж	воеводаэз

Ыджыт Перемлӧн ӧксуэз (рочӧн Великопе́рмские князья́, Пе́рмские князья́, Ермо́личи) — роч княззэз увтыр, кӧда московскӧй княззэз пуктӧм сьӧрті юраліс Ыджыт Перем ӧксумуӧн 1451—1505 воэзӧ.

Увтырлӧн вужжез

История туялӧмын эмӧсь кык теория Ыджыт Перемлӧн ӧксуэз увтырлӧн вужжез йылісь:

1. Династияыс коми вужжеза, ӧксуэс петісӧ элита батюррезісь, Комму ӧксуэзісь. Эта версияыс вӧлі медчайтана роч историческӧй да религия тӧдмалан литератураын XX сёво пондӧтчикӧдз. Сідз чайтісӧ С. М. Соловьёв, Н. И. Костомаров. Советскӧй кадӧ сійӧ версиясӧ видзисӧ медшӧрсаӧн финн-йӧгра йӧз история туяліссез. XXI сёвоӧ версияыс вились мыччассьӧ Ураллісь либеральнӧй историккез статьяэзын (Е. В. Вершинин да мд.).
2. Ыджыт Перемлӧн ӧксу увтыр петӧ Рюриковиччез увтырись. Сідз чайтіс, шуам, роч генеалогиялӧн аркмӧтісь М. Г. Спиридов (1751—1829). Ыджыт Перем ӧксуэзлӧн московскӧй да верейскӧй княззескӧт ӧтік увтырись петӧм вӧлі подулалӧм 1958 воӧ Вычегодско-Вымскӧй летопись йӧзӧтӧм бӧрын (XVI сёво пом — XVII сёво пон). Сыын гижӧм: «Лета 6959 прислал князь великий Василей Васильевич на Пермскую землю наместника от роду вереиских князей Ермолая да за ним Ермолаем да за сыном ево Василием правити пермской землёй Вычегоцкою, а старшево сына тово Ермолая, Михаила Ермолича, отпустил на Великая Пермь на Чердыню. А ведати им волости вычегоцкие по грамоте наказной по уставной». Сійӧ версиясӧ ошкисӧ В. А. Оборин, В. Н. Давыдов, Л. Д. Макаров, Г. Н. Чагин да мд. Верея княззезісь петӧм йылісь версиясӧ паныталіссез (шуам, П. А. Корчагин, Е. В. Вершинин) лыддьӧны, мый летописяс гижӧм сорасьӧмӧн «перемскӧй» «верейскӧй» туйӧ. XXI сёво пондӧтчикӧ петіс мӧдік версия Рюриковиччезсянь петӧм йылісь — «косицкӧй княззес увтыр пыр», кӧдналӧн XV сёво пондӧтчикӧ Верея княжествоын вӧлісӧ наделлэз (С. Н. Келембет).

Ӧтвужьяӧсь Важ Перем ӧксуэзкӧт, кӧднакӧт ӧтлаын касьытвсьӧны Чердын синодикаын кыдз «перемса ӧксуэз (княззез да княгиняэз)» нимлёдзын.

История

Ыджыт Перемлӧн медодзза тӧдса ӧксу увтырись морт — Михаил, кӧдӧ великӧй князь Василий II Тёмнӧй 1451 воӧ пуктіс аслас наместникӧн Ыджыт Перемӧ. Михаиллӧн айыс Ермолай да учӧтжык воныс Василий вӧлісӧ пуктӧмӧсь наместниккезӧн Важ Перемӧ.

Юралӧмыс Михаиллӧн эз чулав лӧня. 1455 воӧ пермяккезӧс вичкуӧ пыртӧм понда локтӧм епископ Питирим вӧлі вийӧм манисэзӧн. Пыртӧмыс вӧлі помалӧм 1462 воӧ епископ Ионаӧн. 1467 воӧ великӧй князьлісь юасьтӧг Михаил аркмӧтіс союз ваткасаэзкӧт пелымись мансиэз паныт, да перемса да ваткаса ӧтлаӧтӧм войскоэз босьтісӧ пленӧ нылісь юралісьӧс Асыка, но сія кужис пышшыны. Сідзжӧ Михаил ӧксу эз орӧтсьы Новгородсянь.

1471 воӧ Михаил кидсис участвуйтны ӧтлаын Москвакӧт Казань тышкын. Кыдз гижис летописец: «Сулаліс Юрий Казань дорын 5 лун, кар бердӧ эз сибӧтчы, видзчисис белозерса да чердынса, а чердынасаыс повзьӧмӧн эзӧ локтӧ, казансаӧс дорйисӧ». Новгородкӧт война бӧрын, кӧр Ыджыт Пермыс вӧлі пыртӧм ни Московскӧй княжествоӧ, Иван ІІІ ыстіс Ыджыт Перемӧ карательнӧй экспедиция, могнас вӧлі юӧртӧм, мый перемсаэз ӧмасисӧ Москваись купеццезкӧт. 1472 воӧ тулыснас московскӧй полккез воевода князь Фёдор Пёстрый командуйтӧм увтын вермисӧ перемсалісь войско, кӧда петіс нылӧ паныт, и босьтісӧ пленӧ Михаилсӧ.

Фёдор Пёстрый лэбтіс роч дорйисян Покчаын, кытӧн вӧлі Михаиллӧн резиденция. Сэтчинсянь сія контролируйтіс быдӧс ӧксумусӧ, кытчӧдз Михаил, кӧда вӧлі кыскӧм Москваӧ, эз бурсьӧтчы Иван IIIИван ІІІ одзын да вӧлі лэдзӧм бертны гортас.

Пелым юралісь Асыка Ыджыт Перем вылӧ уськӧтчӧм бӧрын сӧтіс Покчасӧ, да Михаилыс да сы кынымкӧ зон вӧлісӧ тышкыс коста вийӧмӧсь.

Михаил бӧрын Ыджыт Перемнас пондіс юравны сы зон Матвей. Сыл дыр юралӧм коста Покча-Чердынса ополченнё участвуйтіс московскӧй полккезлӧн Пелым да Югракӧт тышккезын (1483).

Эжваса-Емдынса ополченё сыбӧрын участвуйтіс тышккезын Ваткакӧт (1489), Печоракӧт (1499) да бӧра Пелымкӧт (1500), но абу тӧдса, участвуйтіс я эна тышккезын Матвейлӧн войскоыс. Сыбӧрын сылӧн аркмис тӧдтӧм мога конфликт великӧй князькӧт, да 1505 воӧ тулыснас лӧгасьӧм Иван ІІІ ыстіс Ыджыт Перемись Матвейсӧ да сы увтырись отирсӧ.

Матвей туйӧ Ыджыт Перемӧ локтіс князь В. А. Ковров, кӧда лоис наместникӧн, «роч княззезісь медодззаӧн».

Матвейыс аслас увтрыӧн вӧлі овмӧтӧм Роч канмулӧн шӧр уезддэзӧ. Сёрӧнжык, XVI—XVIII сёвоэзӧ, Ыджыт Перемса ӧксуэзлӧн вӧлісӧ муэз Тула, Медынь да Ярославль уезддэзын.

Муэз

Ӧксу увтыр дзебсянінӧн вӧлі Чердынісь Богословскӧй монастырь.

Увтырись морттэз

• Ермолай зон Михаил, ӧксу (юраліс 1451—1481 воэзӧ).
• Михаил зон Матвей, ӧксу (юраліс 1481—1505 воэзӧ).

Ыджыт Перемись ыстӧм бӧрын:

• Юрий Великопермскӧй, князь (сёрӧнжык касьтывсьӧ сы зон Василий).
• Василий Юрьевич Великопермскӧй, князь, Казань тышк коста 5-ӧт ыджыт полклӧн 3-ӧт воевода (1544).
• Иван Великопермский, князь (сёрӧнжык касьтывсьӧны сы зоннэз Григорий да Семён).
• Григорий Иванович Великопермскӧй, князь.
• Семён Иванович Великопермскӧй, князь — дворянин, боярскӧй зон, 1587—1589 воэзся документтэзын касьтывсьӧ кыдз тульскӧй помещик (Хохловка ю Скорнев посадлӧн эмалісь). Вӧлі аслас горт Тула карын.
• Андрей Великопермский, князь (сёрӧнжык касьтывсьӧ сы зон Владимир).
• Владимир Андреевич Великопермскӧй, князь.
• Пётр Владимирович Великопермскӧй, князь.
• Леонтий (Лев) Великопермскӧй, князь — боярскӧй зон? (1562—1563). 1563 воӧ сійӧ ыстісӧ царскӧй грамотаӧн пристав дынӧ литовскӧй посланник Лобан Ильич Львов дынӧ.
• Константин Великопермскӧй, князь (1550?).
• Александр Константинович Великопермскӧй, князь — зон боярскӧй (1586), Медынись помещик.
• Исаак Александрович Великопермскӧй, князь — Москваын олісь (1603, 1604).
• Фёдор Великопермскӧй, князь — боряскӧй зон? (1600?).
• Матвей Фёдорович Великопермский, князь — московскӧй дворянин, поляккезкӧт война одзын дорйис Кремлись Дмитриевскӧй воротаэз 1633 воӧ, московскӧй дворянин (быр. 1636). 1641 воӧ вӧлі ыстӧм Верхотурьеӧ указӧн видзӧтны сы сьӧрын, медбы сія эз пышшы калмыккез дынӧ, и видзны сійӧ куим копейкаӧн лунӧн. Вӧлі пуктӧм политическӧя абутӧмтӧмӧн, сідз кыдз верхотурскӧй воевода князь Н. Ф. Мещерский шуис сійӧ кыдзкӧ «гусясисьӧн да бокӧ талисьӧн». Но князь Великопермскӧйыс лыддис сійӧ умӧлькылӧн да сетіс Мещерскийлӧ челобитнӧй. 1645 во одзтӧв 21 лунӧ Верхотурьяись воевода М. Ф. Стрешнев лыддьӧтіс Москваись ыстӧм грамота, кытӧн вӧлі пуктӧ лэдзны юркарӧ олісь опальнӧй князь Матвей Великопермскӧйӧс. Князь Матвейыс иньдӧтчис туйӧ, да 1646 во тӧвшӧр 18 лунӧ ни локтіс Сибирскӧй приказӧ да юӧртіс аслас локтӧм йылісь.
• Борис Матвеевич Великопермскӧй, Матвей Борис, князь — ярославскӧй помещик (Верховскӧй станісь Юрьевское нима посадлӧн эмалісь, 1678—1710), кысъяліс драгунскӧй полкын (1701—1710).
• Андрей Борисович Великопермскӧй, Борис Андрей, князь — ярославскӧй помещиклӧн зон (чуж. 1701). 1710 воӧ оліс «Москваын боярин князь Борис Иванович Прозоровский ордын».
• Анастасия Великопермскӧй, княжна.
• Анна Великопермскӧй, княжна.
• Ксения Великопермскӧй, княжна.
• Евдокия (Авдотья) Великопермскӧй, Иван Семёнлӧн инь. Дыр айкатӧмаліс, куліс 1626 вося сёрӧнжык. Сы коста оліс аслас поместьеын Тула уездын.
• Анна Великопермскӧй, Матвей Борислӧн инь. 1700—1710 воэзӧ ӧтлаын айкаыскӧт эмаліс Ярославль уездлӧн Верховскӧй станісь Юрьевское нима посад.

Пасйӧттэз

Литература

• Бординских Г. А. Великопермские князья и оксы // Бординских Г. А. Тайны истории Перми Великой. — Соликамск, 1994. — С. 22—29.
• Бординских Г. А. Великопермские князья и оксы // Бординских Г. А. Пермь Великая — Terra incognita: [Рассказы по истории]. — СПб.: Маматов, 2014. — С. 55—64.
• Журнал "Родина": Пермь Великая..
• Вершинин Е. В. И ещё раз о князьях вымских и великопермских // Проблемы истории России. — Вып. 3: Новгород. Русь: Ист. простр-во и культур. наследие. — Екатеринбург, 2000. — С. 285—305.
• Вершинин Е. В. Статус князей Вымских и Великопермских как правителей: (Адм. аспект присоед. Сев. Приуралья к Русскому гос-ву) // Культурное наследие Азиатской России: Материалы. I Урало-Сиб. ист. конгр. — Тобольск, 1997.
• Голубцов В. В. Князья Великопермские, Пермские и Вымские, (1463—1641 гг.) // Тр. / Перм. учен. архив. комис. — Пермь, 1892. — Вып. 1.
• Келембет С. Н. Происхождение князей Пермско-Вымских, Великопермских и Косицких // Древ. Русь: Вопр. медиевистики. — 2017. — № 4 (70). — С. 53—57.
• Корчагин П. А. Из ранней истории Перми Великой: Князья Пермские и Вымские / Павел Корчагин // Филолог. — 2010. — Вып. 13; 2011. — Вып. 14.
• Корчагин П. А. Очерки ранней истории Перми Великой: Князья Пермские и Вымские // Вестн. / Перм. ун-т. Сер.: История. — 2011. — № 1 (15). — С. 114—124.
• Мухин В. В. Ещё раз о пермских князьях // Чердынь и Урал в историческом и культурном наследии России. — Пермь, 1999. — С. 104—106.
• Оборин В. А. О присоединении Перми Великой к Русскому государству в XV веке // Исследования по истории Урала. — Пермь, 1976. — Вып. IV. — С. 3—15. — (Уч. записки / ПГУ; № 348).
• Оборин В. А. Пермские князья: Кто они? // Страницы истории Урала. — Пермь, 1995. — С. 11—19.
• Чагин Г. Н. Власть и управление в Перми Великой, XIV—XVI вв. // Судебник Ивана III: Становл. самодержав. гос-ва на Руси. — СПб., 2004.
• Чагин Г. Н. Пермь Великая и первые века её христианизации // Вестн. / Правосл. Св.-Тихон. гуманит. ун-т. Сер. 2: История. История Рус. правосл. церкви. — 2011. — № 5 (42).
• Вологодско-Пермская летопись. — М.; Л. Изд-во АН СССР, 1959. — (Полн. собр. рус. летописей; Т. 26).
• Вычегодско-Вымская (Мисаило-Евтихиевская) летопись // Историко-филологический сборник / Коми филиал АН СССР. — Сыктывкар, 1958. — Вып. 4. — С. 257—271]..
• Вычегодско-Вымская (Мисаило-Евтихиевская) летопись // Родники Пармы. — Сыктывкар, 1989.
• [Иванов П. И.] Алфавитный указатель фамилий и лиц, упоминаемых в боярских книгах, хранящихся в I-м отделении Московского архива Министерства юстиции… — М., 1853. — Великопермский, кн., Матвей Фёдоров: С. 60.
• Савёлов Л. М. Родословные записи. — Вып. 2: [В — Г]. — М., 1908. — Великопермские: С. 38.

Ыстӧттэз

• Великопермский. Список в Центре генеалогических исследований
• Великопермская. Список в Центре генеалогических исследований