Редикар (важся кар)
Редика́р (рочӧн Редико́рское городи́ще, Редикарское городище, городище Редикар) — Родановскӧй археологическӧй культураись важся кар. Вӧлі олана VIII-XV сёвоэзын. Федеральнӧй статуса археология памятник[1].
Инас
Важся карыс иналӧ Пермскӧй крайись Чердынскӧй район Редикор посадсянь 0,3 км ылынаын, Висер ю вылын веськыт вадӧрас. Паськытаыс — 3,5 сюрс м². Ойвывсянь тӧдчӧны ӧнӧдз кык мудйӧт[2].
Ним аркмӧм
Редикар нимыс аркмӧм кык кывторись: медодззаыс тӧдтӧм этимологияа «реди» кыв, сія ӧтлаӧтӧм коми «кар» кывторкӧт[3]. А. С. Кривощёкова-Гантман сьӧрті -кар (-кор) компонентыс перем ӧткывья вежӧртаснас вӧлі «йӧрйӧм оланаин», «увтыр оланаин»[3]. «Кар» кывторья топомниммес ӧддьӧн важӧсь, аркмӧмӧсь ананьинскӧй да ломоватовскӧй археологическӧй культураэз кадӧ. Ӧнӧдз Пермскӧй крайын эмӧсь оланаиннэз, кӧдналӧн ниммес аркмӧтӧмӧсь сія компонентӧн (Кудымкар, Канкар, Дӧйкар, Важкар, Изкар, Анюшкар, Крымкар, Пыскар, Майкар). Коми-Пермяцкӧй округын эмӧсь оліссезтӧм важ оланаиннэз (Дзугыркар, Кочкар, Зырянкар, Чумкар, Курӧгкар да с.о.)[3].
Туялӧм
Туялӧм история
Карыс вӧлі осьтӧм 1894 воӧ. Сы вылын уджалісӧ А. Н. Береженцев да А.А. Спицын. 1954 воӧ кважся карсӧ туяліс И.А. Лунегов. Сэсся сы вылын уджалісӧ В.Ю. Лещенко (1968) да В.А. Оборин (1971). 1996 воӧ туялан удж нуӧтіс Камскӧй археолого-этнографическӧй экспедиция[4].
Реконструкция
Редикарсис XIX сёво помӧ адззиса уна эзысись да ыргӧнісь керӧм доззэз, сикытшшез[5]. 1968 воӧ В.Ю. Лещенко осьтіс 44 м² пасьта гарйӧс. Культура отсис адззисӧ вартӧм бивидзаннэз, гуэз да куим шойгу (ӧтыс ӧткаа, кыкыс гозъяаӧсь). Шойнагуэз вӧлісӧ берсятортӧмӧсь. Ӧтас вӧлі кӧртісь керӧм ньӧвьёсь, кӧдӧ туялісьыс датируйтіс XIV сёвоӧн[2]. 1971 вося гарйӧс дырни петісӧ торья адззӧссэз: ыргӧнісь керӧм юрпӧв мичӧтан, тывкӧрт, 3 сьӧктан, ёгпеш, лыись керӧм пурт ороп да перна. Этнӧ адззӧсэссӧ датируйтісӧ XIV-XVI сёвоэзӧн[2]. 1996 воӧ сідзжӧ петісӧ торья адззӧссэз[4].
А.М. Белавин да В.А. Оборин сьӧрті Редикарыс эз вӧв пырся оланаинӧн[4]. Ны версия сьӧрті, Редикарыс вӧлӧма дзебсисянӧн, кеймисянӧн да кӧртвартанӧн. Отирыс сэтӧн абу пыр олӧмась. П. А. Корчагин версия сьӧрті, Редикарыс вермас лоны летописсезісь Уросӧн[2].
Пасйӧттэз
- ↑ [Редикор I, городище] Сведения из Единого государственного реестра объектов культурного наследия (памятников истории и культуры) народов Российской Федерации
- ↑ 1 2 3 4 Корчагин, П. А. О локализации летописного Уроса. Редикорское городище / П. А. Корчагин // XV Бадеровские чтения по археологии Урала и Поволжья : Материалы всероссийской научно-практической конференции, Пермь, 09–12 февраля 2016 года. – Пермь: Пермский государственный национальный исследовательский университет, 2016. – С. 189-197.
- ↑ 1 2 3 Кривощекова-Гантман А. С. Откуда эти названия? Пермь: Перм. кн. изд-во, 1973. 109 с. — С. 31.
- ↑ 1 2 3 Белавин, А. М. Редикарский археологический комплекс (по материалам раскопок 1996 г.) / А. М. Белавин // Труды Камской археолого-этнографической экспедиции. – 2007. – № 4. – С. 023-050.
- ↑ Кривощеков, И. Я. Словарь географическо-статистический Чердынского уезда Пермской губернии : с приложением карты бассейна р. Камы и иллюстрациями / И. Я. Кривощеков. - Пермь : Чердын. уезд. земство, 1914. - [2], II, [2], 819, [2] с., [5] л. ил., карт. - С. 657.