Чердын тышк
Экспертиза РАН
РНА-лӧн экспертиза
Россиялӧн наукаэз академияӧн
| Чердын тышк | |||
|---|---|---|---|
 | |||
| Датаэз | 1471—1472 воэз | ||
| Инас | Камадор | ||
| Мог | Казань канмукӧт войнаын Великӧй Московскӧй княжестволӧ Перемсянь отсӧт сеттӧм | ||
| Итог | Московскӧй княжествлӧн вермӧм. Ыджыт Перемлӧн Москва кипод увтын олӧм вынсьӧтӧм, ӧксуму территория вылын роч крепость Покча лэбтӧм | ||
| Паныталіссез | |||
|
|||
| Командующӧйез | |||
|
|||
| Выннэз | |||
|
|||
| Вийӧм отир | |||
|
|||
|
|
|||
Чердын тышк (рочӧн Чердынский поход) — 1472 вося московскӧй княззезлӧн Коммуын тышк, кӧда бӧрын Ыджыт Перем вӧлі босьтӧм Москва кипод увтӧ, да Ыджыт Перемын вӧлі лэбтӧм роч дорйисян пункт Покча.
Одзза история
XII сёво кежӧ перемса муэз вӧлісӧ Новгород республика кипод увтын. Ӧтлаын Югракӧт нія касьтывсьӧны Новгород «волосттез» 1264, 1304—1305 да 1471 вося договоррезын. XIII—XIV сёвоэзӧ Ыджыт Перемӧ Ордаӧ ветлӧм коста вовлісӧ владимиро-суздальскӧй да московскӧй княззез[1][2].
1451 воӧ Москваись великӧй князь Василий II Тёмнӧй пуктіс Важ Перемӧ аслас наместниккезӧн Ермолайӧс да сылісь Василий зонӧс, а Ермолайлӧн мӧдік зон Михаил лоис Ыджыт Перем ӧксумулӧн вассал юралісьӧн[1].
1471 вося война бӧрын Новгород сетіс Москваыслӧ быдӧс ассис асыввывся киподувтся муэсӧ, ны лыдын и Перемсӧ[1].
Сэк Иван ІІІ ыстіс Перем муэзӧ воевода, стародубскӧй князь Фёдор Пёстрӧн юралӧм увтын (Фёдор Давыдович Палецкий нето сылӧн зоныс Фёдор Фёдорович) войско, мед «мыжйыны нійӧ [пермяккесӧ да вотяккесӧ] ны абу бурсьӧтсьӧм понда» (рочӧн «воевати их [пермяков и вотяков] за их неисправление»)[1][3]. Формальнӧй могӧн вӧлі шуӧм сія, мый Чердын эз отсав Казань босьтӧмын:
«пермяккез казанса понда норовитісӧ, казанскӧй гӧссезлӧ радвыв сетлісӧ, великӧй князь вузасись отиркӧт ӧмасисӧ»[4].
Тышкалӧм
1471 вося тӧвнас Фёдор Пёстрыйлӧн отрядыс петіс Югдынісь[1]. 1472 во тулысшӧр 9 лунӧ «Пома неделься четвергӧ», московскӧй войскоэз сибалісӧ важся туйӧт Чёрная ю ӧм дынӧ, кӧда усис Веслянаӧ (Камалӧн шульга вож), и «сысянь мунісӧ пуррезӧн да вӧввезӧн» Перем муӧ, да сыбӧрын му туйӧт, верзьмӧн. Анфалов кар дынын московскӧй ратьыс торйӧтчис кык отряд вылӧ[5]:
- Отряд, кӧдӧн веськӧтліс Фёдор Пёстрый, иньдӧтчис Искарлань да Колва ю дорын вермис перемсаӧс (тышк костася дзир ӧтік бой). Сыбӧрын московскӧй отряд сотіс Искарсӧ. Колва да сылӧн Покча вож ӧтлаасянінын Фёдор Пёстрый сувтӧтіс острог и «вайӧтіс быдӧс мусӧ великӧй князь дынӧ»;
- Гаврил Нелидовлӧн отрядыс иньдӧтчис Ыджыт Перем ӧксу Михаил вылӧ. Сылӧ бойтӧг сетчисӧ Чердын, Урӧс да Покча[1].
Пленӧ сюрӧм Михаилсӧ ӧксусӧ да сылісь юрайесӧ трофейезӧн Фёдор Пёстрый ыстіс Москваӧ. Вермӧм йылісь юӧрыс юркарӧдз локтіс 1472 вося одзгожум 26 лунӧ[1].
Вийӧм отир
Фёдор Пёстрыйлӧн отрядыс ӧштіс 300 мымда мортӧс вийӧммезӧн; а пермяккезлӧн вӧлісӧ вийӧмӧсь 500 мымда морт[1].
Тышклӧн бӧртас
Тышкыс коста Перемын муын роччес лэбтісӧ дорйӧм оланаин Покча, кытчӧ «кольччис» Фёдор Пёстрый[6]. Колва дынын перемса юрайезлісь вӧлісӧ мырддьӧмӧсь трофейез, кӧднӧ Фёдор Пёстрый ыстіс Москваӧ 16 сорок низь кучик, низь пась, да куимдас ной тор, да куим панцирь, да юрвевт, да кык емдон сабля[6].
Михаил ӧксуыс кольччис юравны, но вӧлі быдсӧн Москва кипод увтын, да 1481 воӧ вийсис мансиэзкӧт тышкасьтӧн. 1505 воӧ ӧксумуыс вӧлі дзикӧдз ликвидируйтӧм, да Чердынӧ вӧлі иньдӧм Москваись наместник Василий Ковёр[1].
Кампанияыс коста Искарын вӧлі паздӧм коми вежаин, мый лоис ыджыт тшупӧтӧн регион христианизацияын[5][7].
Чердын тышклӧн жӧ стратегическӧй тӧдчӧтнас лоис сія, мый роч выннэз ойвывсянь кытшӧвтісӧ Казань канму территория да петісӧ Из дынӧ[3].
Культураын
- Чердын тышк мыччалӧм «Пармалӧн сьӧлӧм» фильмын, кӧда керӧм Алексей Иванов ӧтнимья роман сьӧрті.
Пасйӧттэз
- ↑ 1 2 3 4 5 6 7 8 9 А. В. Бакунин, А. А. Преображенский, А. С. Черкасова и др. История Урала с древнейших времён до 1861 года / отв. ред. А. А. Преображенский. — М.: Наука, 1989. — С. 139—150. — 604 с. — ISBN 5-02-009432-3.
- ↑ Корчагин П. А. Пермь. «Что в имени. . . » // Вестник Пермского федерального исследовательского центра. — 2013. — № 4.
- ↑ 1 2 Алексеев Ю. Г. Походы русских войск при Иване III / Санкт-Петербургский гос. ун-т. — Санкт-Петербург: Изд-во Санкт-Петербургского ун-та, 2009. — С. 143—146. — 462 с. — ISBN 978-5-288-04840-1.
- ↑ Оборин В. А. Заселение и освоение Урала в конце XI - начале XVII века. — Иркутск: Изд-во Иркут. ун-та, 1990. — С. 77—78. — 166 с. — ISBN 5-7430-0130-8.
- ↑ 1 2 Корчагин П. А., Шабурова Е. В. Вехи крещения и христианизации Перми Великой XV – нач. XVIII В. : археологический и искусствоведческий аспекты // Труды Камской археолого-этнографической экспедиции. — 2009. — № 6.
- ↑ 1 2 Корчагин П. А. Очерки ранней истории Перми Великой: князья пермские и вымские // Вестник Пермского университета. Серия: История. — 2011. — № 1 (15).
- ↑ Чагин Г. Н. Пермь Великая и первые века ее христианизации // Вестник Православного Свято-Тихоновского гуманитарного университета. Серия 2: История. История Русской Православной Церкви. — 2011. — № 42.
Ыджыт Перем • Важ Перем | |
|---|---|
| Каррез | |
| Важся каррез |
|
| Юралісь династияэз |
|
| Йӧззэз |
|
| Культура |
|
| Роч канмуӧ пырӧм | |
| Видзӧт сідзжӧ |
|
