Пармалӧн сьӧлӧм (фильм)

Босьтöм Рувикиись
Сердце Пармы
Постер фильма
Жанр фэнтези элементтэза историческӧй драма
Режиссёр Антон Мегердичев
Продюсеррез
  • Влад Ряшин
  • Игорь Толстунов
  • Дарья Лаврова
  • Антон Златопольский
Подув Алексей Ивановлӧн
«Пармалӧн сьӧлӧм»
роман сьӧрті
Сценарийлӧн
авторрез
  • Сергей Бодров-ай
  • Илья Тилькин
  • Ксения Датнова
Одзись роллезын
  • Александр Кузнецов
  • Евгений Миронов
  • Фёдор Бондарчук
  • Сергей Пускепалис
  • Елена Ербакова
Оператор Сергей Астахов
Композитор Игорь Вдовин
Кинокомпанияэз
  • Star Media
  • Профит
  • Россия-1
  • «Фонд кино» отсӧтӧн
Дистрибьютор Централ Партнершип
Кузя 159 мин
Бюджет 714 350 100 ₽[1]
Сьӧм ӧктӧт 933 млн ₽[1]
Канму  Российскӧй Федерация
Кыввез роч кыв, перем коми кыв, манси кыв
Во 2022
Кинопоиск 1045585
IMDb ID 10749948


«Пармалӧн сьӧлӧм» (рочӧн «Се́рдце Па́рмы») — режиссёр Антон Мегердичевлӧн российскӧй фильм фэнтези элементтэзӧн историческӧй драма жанрын[2][3][4][5][6][7], кӧда лоӧ Алексей Ивановлӧн ӧтнимья романлӧн экранизациӧн. Паськыт прокатас фильмыс петіс 2022 во аршӧр 6 лунӧ[8].

Сюжет

Вичку тшупись Васька Калина висьтасьӧ, кыдз XV сёво шӧрын роч Пармаӧн, Перем муэзӧн, юраліс князь Ермолай, кӧда ыстіс Ухват кипод увтын новгородскӧй ошкуйезӧс Из сайӧ. Ны коласын вӧлі и Калина. Сэтчинісь отир эзӧ пыртччӧ Кристоса эскомӧ, а кеймисӧ асланыс еннэзлӧ, да медӧддьӧн донтісӧ Шонділісь ныв — Сорни най. Ермолайыслӧн могыс — босьтны вежа идолсӧ — Зарни аньсӧ — да, символсӧ босьтӧм бӧрын, кӧдӧ сьӧлӧмтӧны татісь отир, босьтны ас кипод увтӧ быдӧс Перемсӧ, торйӧтчыны Москва дынісь да канавны московскӧй князь моз.

Отрядыс, кӧдӧ ыстіс князь, видзӧтӧ ритуал сьӧрын, кӧдӧ чулӧтӧ вогул шаман. Сы коста воиннэз лӧсьӧтчӧны сетны козинӧн куим рочӧс, кӧднӧ нія босьтісӧ пленӧ, но Ухватыс, юралісьыс, оз лысьт дорйыны нійӧ. Сылӧн могыс — Зарни аньлӧн статуя. Лӧсялана кадӧ нія вийӧны ритуалсис кынымкӧ участникӧс, а сідзжӧ кӧинӧс, кӧда вӧлӧм пӧрччӧм мортӧн, да босьтӧны сьӧраныс идолсӧ.

Вогуллэзлӧн хакан Асыка вӧтчӧ епископ Питирим сьӧрӧ, кутӧ сійӧ да сэсся ӧшӧтӧ ыджыт крест вылӧ.

Емдін карын Ермолай князь гӧгралӧ базар, юасьӧв керӧ чериаліссезлісь, бура я чериассьӧ, велӧтӧ кӧньӧс керисьӧс, видзӧтӧ, кыдз мунӧ лэбтӧмыс. Карас локтӧ том Тичерть, кӧда висьтасьӧ, мый мынтас воттэсӧ кучиккезӧн айыс туйӧ — Чердынісь ӧксу Танег понда. Сотник Полюд сарказмӧн висьталӧ, мый сія кодуль да важын ни юис быдӧс ассис эмбурсӧ, да мый ӧні ныӧн каналӧ князь Ермолай. Князьыс чайтӧ гӧтравны ассис зонсӧ Мишкаӧс ӧксу нылыскӧт.

Полюд юӧртӧ князьлӧ, мый ыстӧм отрядісь ловйӧн кольччис дзир ӧткаӧн Ухват, кӧда вӧлі садьтӧм, а мӧддэс вийсисӧ. Нопьяс Ухватыслӧн эм Зарни ань. Сорни найыс, кӧда одзжык оліс медодзза эпизодын вийӧм пӧрччӧм инькаын, пырӧ Тичертьӧ, кӧда лоӧ ламияӧн. Одзжык гӧганьыс висьтасьӧ, мый ламияыс — кӧин, Сорни най морт мыгӧра. Кӧр ламияыс кулӧ, еныс пырӧ мӧдік иньмортӧ.

Хакан Асыка вежаинын кеймӧм коста висьтасьӧ памлӧ аслас планнэз йылісь: бертӧтны Зарни аньсӧ да вашӧтны роччесӧ, сідз кыдз нія перем да манси увтыррезлӧ ассиныс христианскӧй енсӧ, кӧда понда, Асыка шуӧмӧн, абу «не му, не отир, не важжес». Сія чайтӧ, мый роччес кузя еннэзныс дугдасӧ отсасьны да увтыррес ӧшасӧ.

Емдін вылӧ Асыка кипод увтын уськӧтчӧны вогуллэз. Нылӧн могыс — Зарни ань. Асыка пырӧ карас йӧра вылӧ верзьӧмӧн. Карас вогуллэс вийисӧ дзик быдӧннысӧ, ны лыдын и князь Ермолайӧс, кӧда повтӧг дорйис отирсӧ. Танег ӧксу кулӧмыс одзын корӧ Мишкасӧ гӧтрасьны Тичертьыскӧт да перьялӧ сылӧ Чердын ӧксуму. Сотник Полюд ештӧ мездыны Мишкасӧ да Тичертьсӧ кырйыв вывсянь нійӧ чапкӧмӧн да ны сьӧрӧ чеччӧвтӧмӧн. Усикас Мишкалӧн чегӧ ныр. Тичертьыс пӧрччӧ вӧрканьӧ да пышшӧ. Полюд нуӧтӧ Мишкасӧ Чердынӧ, кытӧн сійӧ пуктӧны Ыджыт Перемлӧн ӧксуӧн.

Чулалӧны воэз. Тичертьыс олӧ гӧганьыскӧт, кӧда чайтӧ, мый сылӧ колӧ гӧтрасьны хакан Асыкаыскӧт. Гӧтрасьӧмыс коста Тичертьыс вынӧн чапкӧ ас дынсис Асыкасӧ, гӧганьыс кулӧ, сыбӧрын Тичертьыс сувтӧтӧ хакансӧ сы морттэзӧн синнэзнысӧ пӧртмалӧмӧн. Сёрӧнжык Асыка пантасьӧ Тичертьыскӧт, кӧда висьталӧ сылӧ, мый Сорни найыс тшӧктӧ, мед Асыкаыс эз вӧрӧт Михаилсӧ. Тичерть кӧсйисьӧ Асыкаыслӧ сувтны сы паныт.

Ыджыт Перемись ӧксуэз да батюррез озӧ полӧ том Михаиллісь да озӧ бы вештӧ воттэсӧ, а ӧксуыс оз бы кисьт вир. Но Москва тшкӧтӧ сылӧ видзны окытсӧ. Михаил ӧксуыс мирнӧя вайӧтӧ пермяккезлісь муэсӧ ас кипод увтӧ. Сія ветлӧ Афкулаись шибан мурза Мансур дынӧ пыжйӧн, кӧдӧ кыскӧны роч веррез. Бурлаккез коласын и Васька Калина, кӧда висьталӧ, мый колӧ грӧзитны шибанлӧ норасьӧмӧн сы вылӧ, мый сія гусялӧ Казанлӧн ханлӧ ӧктӧм воттэзісь ыджытжык торсӧ. Мансур сетӧ кыв сетны Казанлӧ хараджись да ясакись тор Москвалӧ, лэдзны роч пыжжесӧ мунны да мездӧтны роч верресӧ. Михаилыс дынӧ ӧтлаасис Исур, Мансурыслӧн зоныс. Гортас мунтӧн Михаиллӧн отрядыс сувтчӧ Вежа кыдз дынӧ, кытӧн чулаліс перемсалӧн гӧтрасьӧм. Сэтчин Михаилыс панталіс Тичертьсӧ.

Нывкаыс лоӧ Михаилыслӧн иньӧн, ӧксу иньӧс и чужтӧ Матвей зонӧс. Михаилыс юасьӧ батюрреслісь, колӧ я лэдзны епископ Ионаӧс  (перм.рус., да шуӧ, мый сэтшӧмыс бур идея. Иона локтӧ карас, медодз ветлӧ вичкуӧ, адззӧ, мый вичкуыс «сэрпӧтӧм» идоллэзӧн да оз лӧсяв юрбитӧм чулӧтӧм понда. Сія тшӧктӧ Калинаыслӧ лӧсьӧтны виль вичкулісь проект, медодз — модельӧн.

Епископ Иона пыртӧ вичкуас быдӧннысӧ, тшӧтш и Матвейсӧ, ӧксуыслісь зонсӧ. Ламияыс оз пыртччы Кристоса вичкуас шуӧмӧн: «менам еннэз бура тӧждісьӧны ме понда». Епископ грӧзитчӧ пыртны инькасӧ вынті, но сія, кӧрткыв шуӧмӧн пышшӧ. Ӧксуыс уськӧтчӧ сы сьӧрӧ да оз вермы вӧтны, сідз кыдз Тичеыс пӧртчис вӧрканьӧ. Епископыс каитчӧ сы шогья, мый пондыліс пыртны Кристоса вичкуӧ вынӧн, не кылӧн. Васька Калина адззӧ ламиясӧ да шуӧ сылӧ бертны гортас. Епископ юӧртӧ Москваӧ, великӧй князь Иван Васильевичлӧ  (перм.рус., мый Михаилыс олӧ пыртчытӧм инькӧт, да мый видзӧ надея, мый великӧй князьыс кужас вежӧравны нійӧ. Иван ыстіс видзӧтны Михаил сьӧрын дяк Данилаӧс.

Иван тшӧктӧ Асыкасӧ сетчыны. Хакан ритуал коста вийӧ юӧрвайисьсӧ, кӧда юӧртіс сы йылісь. Вештісьӧм могись Иван тшӧктӧ Михаиллӧ босьтны пленӧ Асыкасӧ да вайӧтны сійӧ Москваӧ. Тичертьыс быдтӧ кагаэзнысӧ. Михаил мунӧ тышкӧн Асыка паныт Из сайӧ. Дяк Данила, кӧда кольччис инькаэзкӧт, адъялӧ Тичертьсӧ да мӧдӧ сійӧ репйыны, но сія вӧрканьӧ пӧрччӧмӧн сетӧ сылӧ паныт. Ойнас Михаилыс босьтӧ Пелымсӧ да кутӧ пленӧ Асыкасӧ. Сія ойӧ Чердынын чарньӧв кузя усьӧ роч вичку вылісь крест, да епископ Иона сыын умӧльӧ адззӧмӧн тӧвчик коста ӧтнас лэбтӧ вчику вылас мӧдік крест, кӧда дивоӧн мездӧ Михаилсӧ Асыкакӧт тышкасьӧмись, Исур кужӧ уськӧтны йӧра вылӧ верзьӧм Асыкасӧ. Сы коста Тичертьыс некинкӧт оз вовлісь, сійӧ лыддьӧны тунӧн.

Москваись воевода Фёдор Пёстрый сетӧ Михаиллӧ Иванлісь тшӧктӧмсӧ участвуйтны Казан понда тышкын, но сія, сідз кыдз вогуллэскӧт тышкын ӧштіс уна воинӧс, оз мун. Иван тшӧктӧм сьӧрті Фёдор Пёстрый юралӧ Чердын тышкӧн. Ӧксуэз да батюррезісь дзик некин оз лок Михаил дынӧ отсӧтӧн. Михаил мездӧтӧ Асыкасӧ, но сыкӧт пышшӧ Тичертьыс. Ионаыс мыччалӧ Михаиллӧ кагаэзӧс, кӧднӧ вийисӧ аймамныс вичкуӧ пыртӧм бӧрын. Эта йылісь баитӧмӧн сія корӧ ӧксусӧ лэдзны Перем муэзӧ Москва локтӧм. Но Фёдор Пёстрыйыс мунӧ перемса муэзӧт отирӧс вийлӧмӧн. Иона корӧ сійӧ паздыны нылісь вежаиннэсӧ, но отирсӧ не вӧрзьӧтны.

Москвалӧн войско уськӧтчӧ Чердын вылӧ пушкаэзӧн. Тышкасьны петӧ ӧтлаын Калина. Медбӧрья минутаӧ Михаиллӧ отсӧтӧн локтӧ Асыкалӧн войско. Бойын Москва дор участвуйтӧ дяк Данила, кӧдӧ Михаилыс вермӧ, но жалейтӧмӧн лэдзӧ. Ойся шоччисян кадӧ Асыка вӧзйӧ Михаиллӧ мунны сыкӧт и шуӧ, мый ламияыс сылӧн, инькаыс (Тичертьыс) Михаилыслӧн, а Пармаыс нылӧн кыкнанныслӧн. Михаил шуӧ паныт, мый Пармаыс важын ни Рочму, а сія роч князь, сійӧн кольччас аслас му вылын. Михаил Асыка корӧм сьӧрті ойнас нуӧтӧ отирсӧ карсис. Кольччӧны Михаил да сыкӧт Полюд, Исур да кык батюр. Данила мӧдіс тӧдмавны, кытӧн Тичертьыс, да корис Фёдорсӧ не вийны Михаилсӧ. Дорйӧтсӧ, кытӧн нія пукалӧны, москваса босьтӧны штурмӧн. Москваса лыйсьӧны арбалеттэзӧн, вийӧны Полюдсӧ. Данилаыс сайӧвтӧ асьнас князьсӧ да кулӧ. Михаилӧс кутӧны пленӧ да ыстӧны Москваӧ великӧй князь Иван дынӧ.

Москваын тюрьмаын Иван баитчӧ Михаилыскӧт, висьталӧ, мый еныс бӧрйӧм Рочмусӧ да отирсӧ, кӧдна кольччисӧ быль эскомлӧн ӧтса дорйисьӧн, сійӧн сія, великӧй князь, лӧсьӧтчӧ керны Рочмусӧ ыджыт канмуӧн да сорлавны быдӧс отирсӧ, керны ӧтік йӧзӧн да «медбы, кӧр Москваыслӧ пондасӧ враггез грӧзитны, чердынсалӧн сьӧлӧмныс сайкалас, да кӧр Чердын вылӧ уськӧтчасӧ, москваса узьтӧм лоас». Михаилыс пырӧ великӧй князьыс кипод увтӧ. Сія бертӧ Перем муэзӧ, локтӧ Покчаӧ, кытӧн пантасьӧ ловйӧн кольччӧм Калинакӧт. Покчаӧ вӧлі вуджӧтӧм Ыджыт Перемлӧн юркар, сэтчин юралӧ Фёдор да олӧны Михаиллӧн челядь.

Фильм помын Михаил ӧксуыс гӧрӧ ыб Чердын тышканінын. Сылӧ отсалӧны Матвей зоныс, Анна нылыс да Чердынын оліссез. Ны дынӧ локтӧ Асыка кипод увтся отряд, кӧда кольлалӧ Тичертьсӧ. Асыка мунӧ, а Тичерть кольччӧ семьяыскӧт. Медбӧрья кадррезын Зарни ань сотчӧ, мездӧтӧ инькалісь лов ассянис.

Роллезын

Актёр Роль
Александр Кузнецов Михаил Ыджыт Перемлӧн ӧксу Михаил
Ярослав Белобородов Михаил князь Михаил челядьувья
Евгений Миронов Иона епископ Иона
Фёдор Бондарчук Иван III Москвалӧн великӧй князь Иван III
Елена Ербакова Тичерть ӧксу инь-ламия Тичерть
Милена Софронова Тичерть ӧксу ныв Тичерть челядьувья
Валентин Цзин Асыка Пелымлӧн кан Асыка
Сергей Пускепалис Полюд перемса воевода Полюд
Владимир Свирский Васька Калина вичку тшупись Васька Калина
Виталий Кищенко Фёдор Пёстрый, князь Палецкий москвася воевода Фёдор Пёстрый, князь Палецкий
Александр Горбатов Ермолай Ыджыт Перем ӧксу Ермолай
Илья Маланин Мичкин Урӧслӧн ӧксу Мичкин
Софья Шуткина Ротэ Урӧсісь ӧксулӧн инь Ротэ
Алексей Кравченко Качаим Изкарлӧн ӧксу Качаим
Рамиль Сабитов Мансур Афкулаись шибан Мансур
Ислам Зафесов Исур перемса воевода Исур
Владимир Любимцев Бурмот перемса воевода Бурмот
Амаду Мамадаков Танега Чердынлӧн ӧксу Танега
Николай Галлямов Матвей Ыджыт Перемлӧн ӧксу Матвей
Арсений Тычинин Матвей ӧксу Матвей челядьувья
Эмилия Беккер Анна Ыджыт Перем ӧксулӧн ныв Анна
Борис Романов Василий II Тёмный Москвалӧн великӧй князь Василий II Тёмный
Дмитрий Куличков Ухват ошкуй Ухват
Андрей Титков Ероха ошкуй Ероха
Михаил Евланов Данила Венец москвася дяк Данила Венец
Александр Хван пам
Алексей Розин Питирим епископ Питирим
Роза Хайруллина Айчель гӧгань Айчель
Елена Панова Табарга гӧгань Табарга Полюдлӧн инь
Игорь Кулачко Савва сотник Савва
Сергей Колесников Дионисий монах Дионисий
Мирослава Михайлова Маша Маша
Камила Отарова Пассер Пассер
Юрий Ильин митрополит
Вадим Дзюба видзӧтісь тюрмаын
Софья Эрнст Аксинья
Алексей Усольцев Ничейка
Илья Хвостиков ён дяк
Иван Породнов москвася ратник
Актёр Николай Наумов да пондӧтчись актёр татара воинын рольын

Керӧм

2005 воӧ экранизация понда позьӧс небис «Централ Партнершип» нима компания, режиссёрӧн вӧлі пуктӧм «Бригада» сериаллӧн режиссёр Алексей Сидоров. 2008 во гожумшӧрӧн лоис тӧдса, мый компанияыс оз лӧсьӧтчы снимайтны фильмсӧ. 2014 воӧ Star Media компания небис Алексей Ивановлісь  (перм.рус. романсӧ экранизация понда позьӧс. Картиналӧн режиссёрӧн медодз вӧлі шуӧм Сергей Бодров. Сёрӧнжык сія кидсис фильмсӧ керӧмись уна мӧдік удж кузя, но кольччис сценаристӧн.

Москва областись Раменскӧй карся округлӧн Щеголево деревняын[9] да Пермскӧй крайись Усьва посёлокын[10] вӧлісӧ керӧмӧсь декорацияэз: пуись да изись каррез, дорйӧттэз, кока керкуэз.

Фильмсӧ пондӧтісӧ снимайтны 2019 вося гожумшӧрӧ[11] да помалісӧ 2020 вося тӧвпомӧн февральын[12].

Быдӧссӧ снимайтӧм коста проектас участвуйтісӧ 2000 морт, ны коласын снимайтісь группа — 150 морт[13]. Статисттэз, кӧднӧ ӧктісӧ Усьва дынся оліссез коласісь[13], кытӧн чулулісӧ съёмкаэз, эзӧ шырӧ тошшезнысӧ кад сьӧрна, медбы снимайтчыны и гожумся, и тӧвся блоккезын[12][13].

Вавывся Урӧс карісь оліссезӧс орсіссез понда паськомыс вӧлӧ вурӧм чери кучикись[12].

Зарни ань — Сорни най статуя видзсьӧ Ханты-Мансийскын вӧрва да морт музейын, да уна ханты лыддьӧны, мый сія былькодь. Мӧдіккес чайтӧны, мый Сорни-Най бура дзебӧм тайгаын, да шаманнэс новйӧтӧны сійӧ ӧтіклаісь мӧдіклаӧ. Кино снимайтӧм понда идолсӧ керисӧ музейись экспонат сьӧрті[14].

Усьваын чулалӧм съёмкаэз бӧрын проектлӧн продюсеррез эзӧ разьӧ декорацияэсӧ, а колисӧ лэбтӧм карсӧ кыдз историко-туристическӧй объект. Масштаба декорация «Чердын» вӧлі дон босьттӧг сетӧм карся администрациялӧ. Карлӧн декорацияэз местын мӧдӧны керны видзӧтанін да сувтӧтны QR-кода юӧртан пӧввез, кӧднаӧт позяс пырны сайтӧ, кытӧн висьтассьӧ Губахалӧн сингажӧтаннэз да проект снимайтӧм йылісь[12].

2022 во гожумшӧр 14 лунӧ «Россия-1» телеканаллӧн пресс-служба йӧзӧтіс интернетын фильмлісь медодзза трейлер[15].

2022 во гожумпом 26 лун фильм мыччалӧмнас оссис 44-ӧт Москвася йӧзкостся кинофестивальлӧн программа[16][17].

Донъялӧм

Фильмыс шедтіс критиккезлісь буркодь донъялӧм[18]. Сійӧ шуисӧ бурӧн Афиша[19], Film.ru[20], Коммерсантъ[21], Правила жизни[22] нима изданнёэз, умӧльӧн— РБК Daily[23] да Кино Mail.ru[24] нима изданнёэз. «Мир фантастики» нима портал шуис фильмсӧ медбур российскӧй фильмӧн 2022 воӧ[25].

Премияэз

  • 2023 — «Золотой Орёл» нима премия «Шыгор режиссёрлӧн медбур удж» номинацияын — Ростислав Алимов
  • 2023 — «Золотой Орёл» нима премия «Паськӧм сьӧрті серпасалісьлӧн медбур удж» номинацияын — Екатерина Дыминская
  • 2023 — «Золотой Орёл» нима премия «Сувтӧтісь серпасалісьлӧн медбур удж» номинацияын — Владимир Трапезников, Павел Новиков
  • 2023 — «Золотой Орёл» нима премия «Мӧдӧдзза плана айпӧв роль медбур орсӧм» номинацияын — Евгений Миронов
  • 2024 — «Ника» нима премия серпасаліссез медбур удж понда — Павел Новиков да Владимир Трапезников
  • 2024 — «Ника» нима премия айпӧв роль медбур орсӧм понда — Сергей Пускепалис[26]

Пасйӧттэз

  1. ↑ 1 2 Сердце Пармы. ЕАИС Фонд кино. Видзӧтӧм 3 Одзтулыс 2026.
  2. ↑ Евгений Дергунов ​«Сердце пармы»: объяснение концовки и чем фильм отличается от книги Алексея Иванова. СоюзКино (2022-10-06). Видзӧтӧм 3 Одзтулыс 2026.
  3. ↑ Алексей Ионов ​«Сердце пармы»: фэнтези о строительстве империи на крови. Мир фантастики (2022-10-27). Видзӧтӧм 3 Одзтулыс 2026.
  4. ↑ Кристина Худенкo // Delfi.lv Писатель Алексей Иванов: русской души и русского духа нет. ИноСМИ (2018-05-26). Видзӧтӧм 3 Одзтулыс 2026.
  5. ↑ Летом в Прикамье начнется строительство декораций для съемок фильма «Сердце Пармы». Сайт губернатора и правительства Пермского края (2018-03-20). Видзӧтӧм 3 Одзтулыс 2026.
  6. ↑ Анна Иванова Режиссер «Движения вверх» взялся за экранизацию исторического романа Алексея Иванова «Сердце пармы». ВокругТВ (2019-07-17). Видзӧтӧм 3 Одзтулыс 2026.
  7. ↑ Антон Мегердичев создаст новый фильм «Сердце Пармы». Ревизор (2018-03-04). Видзӧтӧм 3 Одзтулыс 2026.
  8. ↑ Виолетта Палий Обзор изменений графика релизов России за неделю с 31 января по 6 февраля. Kinometro.ru (2022-02-06). Видзӧтӧм 3 Одзтулыс 2026.
  9. ↑ История с мистикой: завершились съёмки «Сердца Пармы». Вести (2020-02-22). Видзӧтӧм 3 Одзтулыс 2026.
  10. ↑ Ольга Якунчева, Тимофей Калмаков Казнь вогула и один день со съёмок «Сердца Пармы» в Губахе. 59.ru (2019-12-24). Видзӧтӧм 3 Одзтулыс 2026.
  11. ↑ Сусанна Альперина Антон Мегердичев приступил к съёмкам «Сердца пармы». Российская газета (2019-07-16). Видзӧтӧм 3 Одзтулыс 2026.
  12. ↑ 1 2 3 4 «Сердце Пармы»: Как Кузнецов, Бондарчук и Миронов снимались в экранизации романа Алексея Иванова. КиноРепортер (2020-04-22). Видзӧтӧм 3 Одзтулыс 2026.
  13. ↑ 1 2 3 Ольга Кныш Сердце Пармы — фильм 2020: дата выхода, актёры, трейлер. KinofilmPro (2019-04-19). Видзӧтӧм 3 Одзтулыс 2026.
  14. ↑ «Сердце пармы»: о фильме. Сюжет, герои, костюмы, интересные факты. Вести (2022-10-07). Видзӧтӧм 3 Одзтулыс 2026.
  15. ↑ Эпическая экшн-драма «Сердце пармы» выйдет в кинотеатрах в октябре. ТАСС (2022-07-14). Видзӧтӧм 3 Одзтулыс 2026.
  16. ↑ Сусанна Альперина Московский кинофестиваль открылся премьерой фильма "Сердце пармы". Российская газета (2022-08-27). Видзӧтӧм 3 Одзтулыс 2026.
  17. ↑ «Настоящий смотр невозможно отменить». Открылся 44-й Московский международный кинофестиваль. Мослента (2022-08-27). Видзӧтӧм 3 Одзтулыс 2026.
  18. ↑ Рецензии на фильм Сердце пармы (2022), отзывы. Видзӧтӧм 3 Одзтулыс 2026.
  19. ↑ Евгений Ткачев «Сердце пармы»: североуральское фэнтези с Александром Кузнецовым, сражающее наповал. Афиша Daily (2022-08-30). Видзӧтӧм 3 Одзтулыс 2026.
  20. ↑ Настасья Горбачевская Рецензия на фильм «Сердце пармы» — сказочный блокбастер об объединении пермских народов. Film.ru (2022-08-29). Видзӧтӧм 3 Одзтулыс 2026.
  21. ↑ Юлия Шагельман Последний довод князей. На экраны выходит «Сердце Пармы» Антона Мегердичева. Коммерсантъ (2022-10-05). Видзӧтӧм 3 Одзтулыс 2026.
  22. ↑ Егор Москвитин «Сердце пармы» — русское «Храброе сердце», которое начинает биться лишь в финальной схватке. Правила жизни (2022-10-08). Видзӧтӧм 3 Одзтулыс 2026.
  23. ↑ Тимур Алиев «Кузнецов играет Кузнецова». Рецензия на фильм «Сердце пармы». Какой получилась экранизация романа Алексея Иванова. РБК Life (2022-10-09). Видзӧтӧм 3 Одзтулыс 2026.
  24. ↑ Сердце пармы (2022). Kino.mail.ru. Видзӧтӧм 3 Одзтулыс 2026.
  25. ↑ Александр Гагинский, Игорь Хованский, Евгений Пекло, Дмитрий Шепелёв Лучшие фильмы 2022: фантастика, фэнтези и приключения — по версии «Мира фантастики». Мир фантастики (2022-12-27). Видзӧтӧм 3 Одзтулыс 2026.
  26. ↑ Фильм «Сердце пармы» получил две статуэтки премии «Ника», Properm.ru (4 Гожумшӧр 2024). Дата обращения: 3 Одзтулыс 2026.
Босьтӧма "https://koi.ruwiki.ru/w/index.php?title=Пармалӧн_сьӧлӧм_(фильм)&oldid=211984"-ись