Шондібан (ансамбль)

Босьтöм Рувикиись
Эта терминлӧн эмӧсь мӧдік вежӧртассэз, вдз. Шондібан.
Шондібан
«Шондібан» Кривощёков нима паркын Кудымкарын 2023 воӧ.
Шондібан в парке Кривощёкова в Кудымкаре.png
Медшӧр информация
Жанр фольклор
Воэз 1991 — ӧнӧдз
Канму
Аркмӧтанін Кудымкар
Кыввез коми, роч
Юралісь Надежда Мусатова
(2023 восянь)
etnokpo.ru/shondiban

Коми-Пермяцкӧй сьылан-йӧктан ансамбль «Шондібан» (рочӧн Коми-Пермяцкий ансамбль песни и танца «Шондібан» (Лик солнца) — ӧтка профессиональнӧй сьылан-йӧктан ансамбль Коми-Пермяцкӧй округын. Репертуарас пырӧ быд жанра коми-пермяцкӧй шылад, унажыксӧ вильмӧтӧм фольклор, роч да финн-йӧгра отиркостса фольклор да эстрада шылад. VIII Мирпасьта конкурс «World Folk» вермись (2018).

История

Медодзза сьылан-йӧктан ансамбль

Александра Щербинина да Андрей Зубовлӧн дуэт. 1930-ӧт воэз, Кудымкар.

1925 воӧ, Коми-Пемяцкӧй национальнӧй округ аркмӧтӧм бӧрын, композитор Анатолий Будрин ӧктіс национальнӧй хор, кӧда сьыліс сы шылада сьыланкыввез[1]. Хорас сьылісӧ да орсісӧ коми-пермяцкӧй культураись тӧдчана отир: коми-пермяцкӧй литература чужтісь Питю Ӧньӧ (Андрей Зубов), коми кыв зорӧтіссез Анна Спорова, Зинаида Тетюева.

1932 воӧ хорыс участвуйтіс Союзпасьтса асуджалана искусство сьӧрті олимпиадаын, кӧда чулаліс Москваын. 1937 во одзгожумӧ хорыс Коми-Пермяцкӧй округлӧн делегацияӧн ветліс Свердловскӧ, кытӧн вӧлі чулӧтӧм коми-пермяцкӧй искусство недель. Смотрыс коста асьнысӧ бура мыччалісӧ хорыслӧн солисттэз Андрей Зубов да Александра Щербинина. Щербининаыслӧ вӧлі вӧзйӧм ӧктыны коми-пермяцкӧй профессиональнӧй сьылан ансамбль. Кык во бӧрті, Коми-Пермяцкӧй округисполком 1939 во арпом 3 лунся постановленнёӧн вӧлі аркмӧтӧм Коми-пермяцкӧй сьылан-йӧктан ансамбль. Сы медодзза составын вӧлісӧ 17 морт. Нёль тӧлісьӧн Александра Щербининаыс керис концертнӧй программа да ансамбльыс ветліс сійӧн Молотовскӧй областьӧт. Гастроллес бӧрын Щербининаыс муніс ансамбльсис. 1940 воӧ ансамбльыс дугдывліс уджавны[2].

Вились ансамбльыс бертіс удж бердӧ 1941 воӧ. 20 во сьӧрна ансамбльнас директоралісӧ Любовь Баяндина (Анатолий Баяндинлӧн сой), Спиридон Можаев, В. В. Попов, Е. И. Мелюхина, В. Н. Тарантов да мд., быдӧссӧ 13-а. Художественнӧй юраліссезнас вӧлісӧ Ю. П. Чернышев, З. Е. Бухских, Б. З. Райский, Александр Клещин, Ф. С. Васильев да мд[3].

1940-50-ӧт воэзся репертуарӧ пырисӧ СССР-ын олісь йӧззэзлӧн йӧктаннэз да сьыланнэз, советскӧй сьыланкыввез, Гражданскӧй да Великӧй Отечественнӧй войнаэз костся сьыланнэз. Национальнӧй торыс вӧлі учӧт. Александр Клещин пыртіс ансамбльыс репертуарӧ ассис сьыланкыввез «Парма», «Ой тэ, Иньва», «Гӧтрасьӧм», сюитаэз «Вӧр кондовӧй», «Пера-богатырь». Ансамбльыскӧт уджалісӧ гижиссез Степан Караваев, Михаил Вавилин, композиторрез С. И. Голигин, Н. Чечулин.

Ансамбляс солисттэзӧн уджалісӧ Екатерина Плотникова, Анатолий Баяндин, Юрий Крыжановский, Анна Кудымова-Маняк, Георгий Зеленский да мд.

1959 воӧ ансамбльыс вӧлі пӧдналӧм[1][3].

«Шондібан» нима сьылан-йӧктан ансамбль

Коми-Пермяцкӧй сьылан-йӧктан ансамбль аркмӧтӧм йылісь решеннё. 1991 во

Ансамбльыс вӧлі аркмӧтӧм Коми-Пермяцкӧй автономнӧй округлӧн народнӧй депутаттэз совет президиумӧн ла исполкомӧн 1991 во одзгожум 17 лунся № 92 решеннё сьӧрті кыдз Коми-Пермяцкӧй сьылан да йӧктан ансамбль. Сэтшӧм инициативанас петісӧ округись культураын уджаліссез да окрисполкомись культура юкӧтӧн юралісь Анатолий Фирсов. Организационнӧй уджсӧ нуӧтіс Надежда Минуллина, Коми-Пермяцкӧй автономнӧй округ администрацияись культура управленнёӧн юралісь[3][4].

Ансамбльлӧн медодзза директорӧн вӧлі пуктӧм Сергей Мешавкин, хормейстерӧн — Валентина Денисенко, балетмейстерӧн — Айна Гесь. 1991 во одзтӧв 16 лунсянь художественнӧй юралісьӧн вӧлі пуктӧм Александр Клещин[4].

Ансамбльыс вӧлі аркмӧтӧм Кудымкар педагогика училищеись музыкальнӧй юкӧт да Перем культура училище помаліссезісь. Коллективыс вӧлі юкӧм хорӧ, йӧктан да оркестр группаэзӧ. Медодзза концертыс чулаліс 1992 во гожумпомӧ Кудымкар КДЦ-ын. Программаас вӧлісӧ пыртӧмӧсь коми-пермяккез оланісь кык тематическӧй картина: «Нывлӧн тӧждісьӧм» да «Иньва дорын». Ныӧ вӧлісӧ босьтӧмӧсь важся коми сьыланыввез да роч кывья уральскӧй сьыланкыввез[4][3].

Ансамбльлӧн медодзза концерт коста. 1992 во
Афиша Москвалісь 850 во порйӧтӧм кеж. 1997 во

1992—1997 воэзӧ ансамбльыс директорӧн уджаліс Аркадий Лобанов, кӧда пуктіс ыджыт пай коллектив материально-техническӧя вынсьӧтӧмӧ[3]. Одзлань директоралісӧ ансамбльнас Яна Яновская (1997—2001), Нина Васькина (2002—2008). Художественнӧй юраліссезӧн вӧлісӧ Евгений Фирсов (1993—2000), Елена Воробьёва (2000 восянь)[4].

2005 во тӧвшӧр 21 лунӧ Коми-Пермяцкӧй автономнӧй округлӧн администрация юралісьлӧн № 12 постановленнё сьӧрті «Шондібан» ансамбльлӧ вӧлі сетӧм округ тӧдчӧта культура учрежденнёлӧн статус. Коми-Пермяцкӧй автономнӧй округ да Пермскӧй область ӧтлаӧтӧм бӧрын 2007 во одзгожум 19 лунся № 137 постановленнё сьӧрті учрежденнёыс лоис край статуса[4].

2009 во арпом 24 лунӧ Пермскӧй крайлӧн канмуся учрежденнёэзӧн юралан агентство №СЭД-51-01-01-245 тшӧктӧтӧн ансамбльыс вӧлі реорганизуйтӧм. 2010 во тулысшӧр 12 лунсянь сія пырӧ торья юкӧтӧн Коми-Пермяцкӧй этнокультурнӧй центрӧ[5].

2023 во тӧвшӧр 16 лунсянь «Шондібан» ансамбльӧн юралӧ Надежда Мусатова[6][7]. 2024 восянь балетмейстерӧн вились уджалӧ Айна Гесь.

Репертуар

Ансамбльлӧн репертуарӧ пыртӧмӧсь сьыланкыввез да йӧктаннэз, кӧдна мыччалӧны коми-пермяккезлісь культура. Нія ӧктӧмӧсь вокально-хореографическӧй композицияэзӧ. Медтӧдчанаэзӧн ныись лоӧны «Важ кадлӧн ловья говк», «Яг дорын», «Печкӧм помеч», «Гажа нывкаэз», «Турун вежан лун», «Семик да Троича», кӧднаын мыччассьӧны важся обряддэз да вежалуннэз. Паськыта тӧдсаӧсь лирико-эпическӧй композицияэз «Парма» да «Чужан му». Медтӧдчана йӧктан номеррез — «Басӧк нывка», «Тупи-тап», «Вышитчись зонка», «Кыя ме нинкӧмок».

Сідзжӧ коллективлӧн репертуарӧ пырӧны казачӧй сьыланнэз, роч да финн-йӧгра отирлӧн сьыланнэз.

Ассяма шы сьылӧмлӧ сетӧны шылад инструменттэз: пӧляннэз, быдкодь сяркан да буксан, пу барабан да тарскан, сигудӧк.

Репертуарыс вежсьӧ быд во, содӧ виль программаэзӧн.

Медбӧрья кадся программаэз

«Отир да чуддэз» орсан программаись сцена. 2024 во
  • 2023 — «Гӧтрасьны, дак гӧтрасьны» (В. Климов пьеса сьӧрті), комиӧн;
  • 2024 — «Там, в степи широкой», роч кывья казачӧй программа;
  • 2024 — «О ней», роч да коми кывья программа, пыртӧмӧсь А. Клещинлӧн романссэз, Псковись роччезлӧн фольклорнӧй сьыланкыввез, коми фольклорнӧй сьыланкыввез;
  • 2024 — «Отир да чуддэз, или Рождество, девки, пришло», комиӧн, пыртӧм Ыджыт Кочаись фольклор;
  • 2025 — «Вот оз ло война», комиӧн да рочӧн, кӧсйӧм Великӧй Отечественнӧй войнаын Победалісь 80 во порйӧтӧмлӧ;
  • 2025 — «KOMI GAZA RЬT», коми сьыланкыввез вильмоза.

Концертнӧй да мӧдік удж

«Шондібанлӧн» концерт «Россия» нима выставка-форум вылын. Москва, ВДНХ. 2024 во

30 вося дыржык уджалӧм сьӧрна ансамбльыс уна гастролируйтіс Россияын да визир сайын. Гастроллес чулалісӧ быдӧс Пермскӧй край пасьта, Москваын, Нижегородскӧй областьын, Санкт-Петербургын, Карелияын, Архангельск областьын да Ненецкӧй автономнӧй округын, Коми Республикаын, Удмуртияын, Марий Элын, Мордовияын, Чувашияын, Киров областьын, Свердловск областьын, Тюмень областьын да Ханты-Мансийскӧй автономнӧй округын, Крым Республикаын, Краснодар крайын, Саратов областьын. Визир сайӧ ансамбльыс ветліс концерттэзӧн Францияӧ, Финляндияӧ, Болгарияӧ, Испанияӧ, Венгрияӧ[4][7]. Ансамбльыс мыччалӧ Коми-Пермяцкӧй округлісь да коми отирлісь культура мирпасьта да Россия пасьтса фестиваллез да форуммез вылын. Сідз, кольӧм 10 воӧ, ансамбльыс участвуйтіс «Русское поле» нима IV славянскӧй искусствоа фестивальын (Москва, 2015), «Небесная ярмарка» нима XV мирпасьта фестиальын (Кунгур, 2016), Куимӧт Панъевропейскӧй Фестивальнӧй марафонын  (перм.рус.(Хельсинки, 2017), «Добровидение»  (перм.рус. нима VIII мирпасьта сьылан-йӧктан фестиваль осьтан церемонияын (Санкт-Петербург, 2023). 2023—2024 воэзӧ «Шондібан» ансамбльыс куимись мыччаліс концерттэз да чулӧтіс сьылана-йӧктана интерактиввез «Россия» нима ВДНХ вывся мирпасьта выставкаын  (перм.рус.[7].

Ансамблись специалисттэз ӧктӧны да туялӧны Коми округись роч да коми фольклор. Сідз, 2011 воӧ балетмейстер Елена Воробьёва лэдзис небӧг коми йӧктаннэз йылісь[8]. Надежда Мусатова кипод увтісь петісӧ кык небӧг — Кукушкаись гӧтрасьӧм костся шылад йылісь да Ыджыт Кочаись роч кывья сьыланкыввез йылісь.

Ансамблись йӧктісь Ольга Рачёва юралӧ Коми-Пермяцкӧй этнокультурнӧй центрись «Томпӧлӧс» нима челядь понда йӧктан ансамбльӧн[9].

Ансамблись артисттэз чулӧтӧны мастер-классэз челядь да туристтэз понда[7].

Конкурссэзын вермӧммез

«Шондібан» вермис фольклор сьӧрті мир чемпионатын. Болгария, 2018 во
  • «Bravo Turku» нима мирпасьта искусство конкурс-фестивальын I тшупӧта диплом (Финляндия, 2012);
  • «Ӧтлаын ми — Россия» (рочӧн «Вместе мы — Россия») Россия пасьтся фестиваль-конкурс вылын «Сьылан ансамбль» номинацияын I тшупӧта диплом (Чебоксары, 2013);
  • «Народные истоки» нима мирпасьта национальнӧй культураэз да фольклор сьӧрті фестиваль-конкурсісь «Фольклор» да «Хореография» номинацияэын 1 тшупӧта лауреат, спецприз отир традицияэз видзӧм понда (Сочи, 2015);
  • «Interfolk» нима мирпасьта фольклор фестивальын 1 тшупӧта лауреат (Санкт-Петербург, 2017);
  • «World Folk» нима VIII фольклор сьӧрті мир чемпионат — Гран-при да зарниа медаль (Болгария, 2018).

Пасйӧттэз

  1. ↑ 1 2 Каменских М. С. Первый национальный: коми-пермяки в национальной политике России ХХ - начале XXI века.. — СПб.: Маматов, 2021. — С. 80. — 312 с. — ISBN 978-5-91076-243-9.
  2. ↑ Виктор Рычков Коми-Пермяцкий национальный ансамбль песни и пляски: страницы истории (1939-1959 гг.) (2013-09-26). Видзӧтӧм 23 Гожумшӧр 2025.
  3. ↑ 1 2 3 4 5 Коми-Пермяцкий автономный округ на рубеже веков / сост. Л. П. Ратегова. — Кудымкар: Коми-Пермяцкое книжное издательство, 2000. — С. 215. — 392 с. — ISBN 5-87901-051-1.
  4. ↑ 1 2 3 4 5 6 Государственное краевое учреждение культуры "Коми-Пермяцкий ансамбль "Шондибан". Историческая справка. Коми-Пермяцкий окружной государственный архив. Видзӧтӧм 22 Гожумшӧр 2025.
  5. ↑ 10 лет с момента создания Коми-Пермяцкого этнокультурного центра. Коми-Пермяцкий окружной государственный архив (2019-11-29). Видзӧтӧм 22 Гожумшӧр 2025.
  6. ↑ Константин Седегов. Надежда Мусатова стала художественным руководителем ансамбля Шондiбан, Парма-Новости (27 Тӧвшӧр 2023). Дата обращения: 23 Гожумшӧр 2025.
  7. ↑ 1 2 3 4 Коми-Пермяцкий ансамбль песни и танца «Шондiбан». Коми-Пермяцкий этнокультурный центр. Видзӧтӧм 23 Гожумшӧр 2025.
  8. ↑ Коми-пермяцкие танцы // Новые поступления. Коми-Пермяцкий окружной государственный архив. Видзӧтӧм 23 Гожумшӧр 2025.
  9. ↑ Коми-пермяки победили в конкурсе-показе национальных костюмов. Министерство по делам Коми-Пермяцкого округа Пермского края (2025-06-24). Видзӧтӧм 23 Гожумшӧр 2025.

Ыстӧттэз

Босьтӧма "https://koi.ruwiki.ru/w/index.php?title=Шондібан_(ансамбль)&oldid=216421"-ись