Сигудӧк
| Сигудӧк | |
|---|---|
 Сигудӧк, XX сёво пондӧтчӧм. Коми-Пермяцкӧй гортладор туялана музей | |
| Классификация | Сиа шылад орсаннэз |
Сигудӧк — коми да коми-пермяккезлӧн сиа шылад орсаннэз. Коми-пермяккезлӧн олӧмись ӧшис XIX сёво шӧрсянь 1900-ӧт воэзӧдз.
Этимология
Орсаныслӧн нимыс аркмӧм кык кылісь: коми кывья «си» да рочись локтӧм «гудӧк» (рочӧн «гудок» нимӧн шусьӧ важся скрипка кодь шылад орсан).
История да гижалӧм
Коми-пермяккезӧн керана да орсана сигудӧккез йылісь абу бура тӧдса. Сэтшӧм нимӧн тӧдсаӧсь кык инструмент — куим сиа скрипка кодь шылад орсан да сигудӧк пӧв. Нія пондісӧ ӧшны оланісь XIX сёво шӧрын, кӧр отирын паськалісӧ балалайкаэз да быдберся гармонняэз[1].
Медодззаись сигудӧкыс вылӧ вачкисяна коми-пермяккезлӧн шылад инструмент касьтывсьӧ 1847 вося В. Хлопин «О Пермякахъ» нима статьяын (петіс «Москвитянин» журналын), сія жӧ сэсся лэдзӧм 1864 вося «Материалы для географии и статистики России, собранные офицерами Генерального штаба. Пермская губерния» Х. Мозель ӧктӧм небӧгын[2]:
…Из музыкальных инструментов наиболее употребительны: дудки, сопелки, гармоники и скрыпки или что-то вроде них, о трех струнах. В некоторых местах, употребляется еще инструмент вроде гуслей, о 20 медных и железных струнах, на которых играют обеими руками, держа его на коленях, причем обыкновенно притопывают ногой…
Коми шылад туялісь Прометей Чисталёв 1968 воӧ вовліс Коми-Пермяцкӧй округӧ экспедицияӧн, кӧда коста вӧлі ӧктӧм уна материал коми-пермяккез шылад йылісь. Сідз, Юксьӧвись оліссез касьтылісӧ, мый одзжык инькаэс орслывлӧмась аскерӧм сигудӧкӧн. Путорнас вӧлӧма дзав да сы вылӧт нюжӧтлӧмась сиэсӧ. Орслӧмась сійӧн, кыдз балалайкаӧн.
Сідзжӧ эмӧсь торья даннӧйез, мый скрипка кодь сигудӧкӧн XX сёво одзын эшӧ орслӧмась Юсьва гӧгӧр.
Коми-Пермяцкӧй округись ӧтка важся сигудӧк эм Коми-Пермяцкӧй гортладор туялана музей фондын.
Вились оланӧ пыртӧм
Сигудӧксӧ вились пыртісӧ оланӧ коми-пермяцкӧй культураӧ 1990-ӧт воэзӧ «Шондібан» сьылан-йӧктан ансамбль аркмӧттӧн. Сы понда небисӧ сигудӧксӧ Коми Республикаись.
2000-ӧт воэзӧ коми-пермяккезлісь важ инструменттэз, ны лыдын и сигудӧк, кутчис реконструируйтны Сергей Зубов, Пермскӧй крайлӧн Народнӧй мастер пу керӧтӧм сьӧрті.
2015 воӧ Архангельскӧй школаись велӧтчись Святослав Кривощёков вермис Пермскӧй крайись технология сьӧрті олимпиада аскерӧм сигудӧкӧн (велӧтісьнас вӧлі Николай Калин, Пермскӧй крайлӧн Народнӧй мастер)[3]. Сы сигудӧкыс кольччис Архангельскӧйись «Пӧлянок» ансамбльӧ.
Пасйӧттэз
- ↑ Клещина Л. Д. Народные инструменты коми-пермяков // Пэлян — поющая трава коми-пермяков. — Кудымкар: ГКБУК «Коми-Пермяцкий этнокультурный центр», 2017. — С. 25-37. — 68 с. — ISBN 978-5-91983-039-9
- ↑ Мозель, Христиан Иванович. Материалы для географии и статистики России, собранные офицерами Генерального штаба. Пермская губерния. Ч. 2 / сост. Ген. штаба подполк. Х. Мозель. — Санкт-Петербург : тип. Ф. Персона, 1864.
- ↑ Константин Седегов. Школьник из Юсьвинского района вырезал из старой доски древний музыкальный инструмент Парма-Новости (30.07.2015)