И. Я. Кривощёков нима культура да шоччисян парк
| И. Я. Кривощёков нима культура да шоччисян парк | |
|---|---|
 | |
| Информация | |
| Тип | культура да шоччисян парк |
| Аркмӧтан кад | 1892 |
| Иналӧм | |
| 59°00′45″ с. ш. 54°39′18″ в. д.HGЯO | |
| Страна | |
| Субъект РФ | Пермский край |
| Кар | Кудымкар |
 | |
И. Я. Кривощёков нима культура да шоччисян парк (рочӧн Парк культуры и отдыха имени И. Я. Кривощёкова) — Кудымкарын медшӧр культура да шоччисян парк. Аркмӧтӧм 1892 воӧ картограф И. Я. Кривощёковӧн.
Иналӧм
Паркыс иналӧ Кудымкар шӧрын, дзескӧтӧм М. Горький нима, Советскӧй, Октябрьскӧй, Калинин нима улицаэзӧн. Парккӧт ордчӧн сулалӧны культуралӧн да историялӧн памятниккез: Кудымкар важся кар, Строгановвезлӧн окружнӧй правленнёлӧн керку, зонкапӧлӧс понда кыккласса училищелӧн керку[1]. Парк комплексӧ пырӧ Никольскӧй вичку.
История
Паркыс вӧлі аркмӧтӧм 1892 воӧ картограф, географ да краевед Иван Яковлевич Кривощёков инициатива сьӧрті. Сія чулӧтіс эксперимент быдмассэз акклиматизируйтӧм сьӧрті, арнас садитіс Никольскӧй вичку дынся Торговӧй площадь гӧгӧр лунвывся пуэз да быдмассэз, кӧдна вайис Казанись, мувӧдитан школа питомникись: сьӧд венгерскӧй боярышник, барбарис, татарскӧй ыжман, алтайскӧй жельнӧг, поснит корья акация, сирень, крыжовник, веймутовӧй пожум, лавра корья ыржапу, чочком ловпуэз и мд. Быдӧссӧ вӧлі садитӧм 64 вид[1]. Уна быдмассэз эзӧ вермӧ видзсьыны тӧлӧн да кулісӧ. Садитан уджжез да вӧджжӧтӧм сьӧрті И. Я. Кривощёков гижис туялана удж (рочӧн «Опыт акклиматизации лесных и садовых растений в с. Кудымкор Соликамского уезда»)[2]:
Быдмассэсӧ ме босьті Казань мувӧдитан школа питомникись, 1892 вося арӧн. Тӧвнас кежас видзсьӧмась покрышкаэзтӧг, кӧдна сайӧвтӧмӧсь вӧлӧмась только садӧн ой ладорсянь. Медодзза тӧлыс нылӧ Кудымкарын вӧлі дзир тодиль. Ӧддьӧн зэра да кузь ар да 1893 во тӧвшӧр 18 лунӧдз лымтӧм, сэк жӧ одзтӧв 4-18 луннэз коста сулаліс дугдывтӧг 25-34 градуса кӧдзыт; усьны да пыдынасьны лым пондӧтчис тӧвшӧр18 лунсянь; но одзтлыс 9 лунӧ вына шондӧтӧм бӧра вашӧтіс лымсӧ вылын местаэзісь, а одзтулыс 15-20 луннэзӧ кӧдздӧтіс бӧра 15-20 градусӧдз. Вот эттшӧм дырни ковсис пондӧтны Иньва дорын олансӧ менам кусттэзлӧ да пуэзлӧ[2].
1930 воӧ, кӧр Никольскӧй вичкусӧ пӧдналісӧ да сы керкуын осьтісӧ клуб, посадсӧ карӧ пӧртӧм понда керисӧ виль планируйтӧм. Сідз, «Кудымкар посад карӧ пӧртӧм йылісь» юалӧм сьӧрті 1930 вося материаллэзын коммунальнӧй хозяйство линия сьӧрті вӧлі аркмӧтӧм культура да шоччисян парк лӧсьӧтӧм. Парксӧ пондӧтісӧ жугдыны 1932 воӧ. Торговӧй площадьлӧн лунвыв-асыввыв юкӧн, Торговӧй улицасянь (оні М. Горький нима) Иньва дорӧдз, вӧлі сетӧм отир керкуэз лэбтӧм понда.
1930—1950 воэзӧ паркын вӧлісӧ гожумся сценаӧн концертнӧй площадка, гожумся кинотеатр, И. Сталинлӧ памятник. 1943 воӧ вичку керкуас пырис Коми-Пермяцкӧй гортладор туялана музей. 1960 воӧ паркыс вӧлі вуджӧтӧм хозрасчётӧ Кудымкарскӧй горисполкомлӧн культура юкӧт увтӧ. Уджалісь йӧзлӧн депутаттэзлӧн карся Советлӧн 1962 во арпом 20 лунся № 240 постановленнё сьӧрті паркыс вӧлі шуӧм «И. Я. Кривощёков нима культура да шоччисян парк»[2].
1990-ӧт воэзӧдз паркас вӧлісӧ каруселлез, аттракционнэз (сералан жыр, автодром), гожумся кинотеатр, йӧктан площадка, эстрада, ресторан, Советскӧй Союзлӧн Геройезлӧ — коми-пермяккезлӧ сиӧм аллея (1968)[2].
2007 воӧ «Кудымкар — Пермскӧй крайлӧн культура центр» программа сьӧрті паркыс вӧлі вильмӧтӧм, сувтӧтісӧ лабиччез да беседкаэз[2].
2017—2018 воэзӧ, кӧр Кудымкарлӧ тырис 80 во, паркыс вӧлі реконструируйтӧм вились. Сы дырни вӧлі пуктӧм 4,5 сюрсся унажык м2 тротуарнӧй плитка туйез вылӧ да площадкаэз вылӧ, садитӧмӧсь 200-ся унажык кустарниккез да пуэз (туяэз, кустовӧй розаэз, пузыреплодниккез, барбариссэз, лещина, тыпуэз, клённэз, сирпуэз, каштаннэз, нинпуэз, ясеннез), керӧм территория планируйтӧм да садитӧм газон[3][4]. Паркын сулалӧны гожумся эстрада, искусственнӧй вевттьӧса челядьлӧн орсанін, ӧтӧрся тренажёррезӧн спортплощадка, «Ме радейта Кудымкар» стела, «Сизим сьӧлӧм» арт-объект, а сідзжӧ И. Я. Кривощёковлӧн бронзаись бюст[2][4].
Сингажӧтаннэз
- Вежа Николай нима вичку, Пермскӧй крайлӧн архитектура памятник;
- Иван Яковлевич Кривощёковлӧн бюст;
- Арт-объект «Сизим сьӧлӧм».
Мероприяттёэз
Паркын быд во чулалӧны Никольскӧй ярмарка (одзтӧв 19 лунӧ, тулыспом 24 лунӧ)[5][6], финн-йӧгра литература «Ловлӧн бикыв» фестивалься концерт, Кар лун (гожумшӧрся мӧдӧдзза субӧтӧ) мероприяттёэз.
Пасйӧттэз
- ↑ 1 2 Парк культуры и отдыха им. И.Я. Кривощёкова. Коми-Пермяцкий окружной государственный архив.
- ↑ 1 2 3 4 5 6 130 лет назад Иван Яковлевич Кривощёков заложил парк в Кудымкаре, Коми-Пермяцкий краеведческий музей им. П.И. Субботина-Пермяка (28 Аршӧр 2022). Дата обращения: 10 Гожумшӧр 2025.
- ↑ В Кудымкаре накануне юбилея города открылся обновлённый парк, Новый компаньон (6 Гожумшӧр 2018). Дата обращения: 10 Гожумшӧр 2025.
- ↑ 1 2 Алексей Романов В Кудымкаре после реконструкции открыли центральный парк отдыха | Новости Перми. Новости Перми (2018-07-06).
- ↑ Константин Седегов. Форум «Коми мир» и Никольская ярмарка в Кудымкаре собрали более 20 тысяч зрителей, Парма-Новости (27 Тулыспом 2025). Дата обращения: 10 Гожумшӧр 2025.
- ↑ Валерия Останина, Яна Яновская, Елена Истомина. Как в Кудымкар губернатор приезжал, Парма-Новости (28 Одзтӧв 2024). Дата обращения: 10 Гожумшӧр 2025.