Ыджыт йылісь сёрни
Ыджыт йылісь сёрни (рочӧн Разговоры о важном) — внекласснӧй уроккез, кӧдна чулӧтсьӧны Россияись велӧтан учрежденнёэзын да кӧдна коста висьтассьӧ канму история, традицияэз да культурнӧй наследие йылісь. Пыртӧмӧсь велӧтчан программаӧ 2022 воӧ. Медодзза уроксӧ чулӧтіс Россиялӧн президент Владимир Путин 2022 одзар 1 лунӧ Калининградын. 2025 восянь чулӧтсьӧ Россияпасьтся «Ыджыт йылісь сёрни» премия, кӧдаӧн бӧрйӧны сы дисциплина сьӧрті медбур велӧтіссезӧс да велӧтан практикаэз.
История
Школьнӧй программаӧ обязательнӧй внекласснӧй урок пыртӧм йылісь юӧртісӧ 2022 во одзгожум 20 лунӧ «Знание» обществолӧн заседаннё коста. Велӧтчан во пондӧтчиккеж Россиялӧн велӧтан министерство лӧсьӧтіс велӧтіссез понда методическӧй рекомендацияэз[1]. Россияын уджалісӧ виль дисциплинаӧ велӧтіссезӧс лӧсьӧтан 700 площадка[2].
«Ыджыт йылісь сёрни» медодзза урок чулӧтіс Россиялӧн президент Владимир Путин 2022 во одзар 1 лунӧ Калининградӧ уджалан ветлӧм коста. Осьта урок вылӧ вӧлісӧ корӧмӧсь наукаын, культураын да спортын олимпиадаэзын да конкурссэзын вермиссез, кӧдна вовлісӧ Калининградӧ Россияись быдкодь каррезсянь. Урок эз вӧв кӧсйӧм ӧтік темалӧ; участниккез висьтасисӧ президентлӧ ны понда тӧдчана лоӧмторрез йылісь и юасисӧ наука, история, экология да мӧдік темаэз сьӧрті. Уроклісь стенограммаыс йӧзӧтӧм Россия Президентлӧн сайтын[3].
Россия пасьта школаэзын «Ыджыт йылісь сёрни» медодзза урок чулаліс велӧтчан во медодзза вильлунӧ, одзар 5 лунӧ. Урок темаӧн лоис Тӧдӧммез лун. Темаэз лӧсьӧтӧмӧсь одзлань быд недель кежӧ велӧтчан во помӧдз, ны коласын историческӧй лоӧмторрез, гора нима морттэзлісь биографияэз, Россиялӧн донтан луннэз, социальнӧй тӧдчӧта проекттэз да мӧдік[4].
Уроккез понда материалсӧ лӧсьӧтіс Россия велӧтчан академиялӧн велӧтчӧм зорӧтан стратегия институт[5]. Темаэсӧ да уроккез понда планнэсӧ бӧрйисӧ туялан уджжез, педагогическӧй литература да нормативно-правовӧй документтэз сьӧрті[6]. Проектсӧ реализуйтӧ Челядь кад, семья да быдтӧм сьӧрті туялан институт.
2024 восянь «Ыджыт йылісь сёрни» уроккесӧ пондісӧ чулӧтны челядьсаддэзісь 5 вося пӧрисьжык кагаэз понда. Сэтшӧм вӧзйӧмӧн петісӧ детсаддэзісь воспитателлез, кӧдна учӧт школьниккез понда методика сьӧрті чулӧтісӧ уроксӧ пӧрисьжык детсадовсалӧ да казялісӧ челядьлісь интерес[7]. 2025 тӧвшӧрӧ Россияын медодззаись урок вӧлі пыртӧм челядьсаддэзын Вологдаын[8].
Уроклӧн структура
Заняттёэсӧ ковсьӧ чулӧтны недельӧ ӧтпырись, вильлунӧ медодзза урокӧн. Урокыс обязательнӧй быдӧс 1-11 классэзся велӧтчиссезлӧ . Быд урок пондӧтчӧ Россия гимн сьылӧмсянь нето кывзӧмсянь да канму дӧрапас лэбтӧмсянь.
Быд урок понда лӧсьӧтӧмӧсь методическӧй материаллэз. Нія юксьӧны 5 категория вылӧ велӧтчиссез волыд сьӧрті: 1-сянь 2-ӧдз, 3-сянь 4-ӧдз, 5-сянь 7-ӧдз, 8-сянь 9-ӧдз, 10-сянь 11-ӧдз. Эмӧсь сідзжӧ материаллэз, кӧдна лӧсьӧтӧмась шӧрӧт профессиональнӧй велӧтан колледждэз понда[9].
Быд категорияӧ пырӧны сценарий да методическӧй материаллэз, видеороликкез, презентация да плакат, кӧдӧ позьӧ используйтны урок понда заставкаӧн. Ыджытжык велӧтчиссез понда сідзжӧ лӧсьӧтӧмӧсь содтӧт материаллэз. Чайтсьӧ, мый школьниккез видзӧтасӧ видео, керасӧ интерактивнӧй заданнё да помаласӧ уроксӧ дискуссияӧн. Велӧтісь асмыв вылӧ кольччӧ, используйтны я вӧзйӧм сценарийсӧ да материалсӧ нето чулӧтны уроксӧ мӧдік форматын[4].
Уна темаэз сьӧрті гижӧны видео федеральнӧй спикеррезкӧт, кӧдна лоӧны эксперттэзӧн бӧрйӧм темаэзын. Сідз, «Россиялӧн легендаэз» тема сьӧрті баитіс Госдума председательлӧн вежлісь Пётр Толстой, волонтёр лун сьӧрті — «Старость в радость» нима фонд аркмӧтісь Елизавета Олескина, «Россия — ён камну» тема сьӧрті — олимпийскӧй чемпион Максим Траньков. Видеоэс гижӧмӧсь диалог формаын: спикеррез сетӧны очакыв челядь юалӧмторлӧ[4].
Уроккес понда материаллэсӧ пуктӧны «Ыджыт йылісь сёрни» официальнӧй сайтӧ. Кыскыны позьӧ быдӧс материаллэсӧ, тшӧтш и одзза воэзся архивнӧйесӧ.
Премия
2025 во кежӧ Россияын вӧлісӧ чулӧтӧмӧсь «Ыджыт йылісь сёрни» сьӧрті 105 заняттё, ныын участвуйтісӧ 20 миллионся унажык велӧтчиссь. Федеральнӧй спикеррезӧн вӧлісӧ общественнӧй уджаліссез да федеральнӧй ведомствоэзісь 120 морт. Велӧтчан материаллэз лӧсьӧтӧмын участвуйтісӧ Россияись ведущӧй компанияэз: Российскӧй кӧрттуйез, Росатом, Сбербанк, Первӧй канал, Артек, Российскӧй военно-историческӧй общество да мӧдіккез.
Проектлӧн социальнӧй тӧдчӧм могись вӧлі арталӧм аркмӧтны быд вося «Ыджыт йылісь сёрни» россияпасьтся премия. Премияас аркмӧтӧмӧсь нёль номинация:
- Вося медбур интервью;
- Видеоанонссэз медбур нуӧтісь;
- Партнёррезсянь медбур заняттё;
- Медбур орсісь (серия) «Первые. Разговоры о важном» нима сериалын.
Педагоггез понда вӧлі аркмӧтӧм тодиль номинация «Ыджыт сёрни лӧсьӧттӧн». Нія вермӧны участвуйтны конкурсас авторскӧй уроккез планнэзӧн, методическӧй материаллэзӧн, уроккез костся дискуссияэзлісь видеоэзӧн.
Жюриӧ пырӧны Быдтӧм, семья да челядь кад институтісь уджаліссез, Россияпасьтся аймам комитетлӧн представителлез да «Быдтыны мортӧс» конкурслӧн финалисттэз[10].
Пасйӧттэз
- ↑ «Разговоры о важном» в школе: что это и какие темы обсуждаются, Коммерсантъ (11 Тӧвшӧр 2024). Дата обращения: 22 Тулыспом 2025.
- ↑ Кравцов: «Разговоры о важном» позволят интересно рассказать о ценностях и истории России рус..
- ↑ Открытый урок «Разговор о важном», Президент России. Дата обращения: 22 Тулыспом 2025.
- ↑ 1 2 3 Разговоры о важном.
- ↑ Разговоры о важном. Методические рекомендации.
- ↑ Классный час "Разговоры о важном" 2025-2026: что это такое, программа, темы уроков, Комсомольская правда. Дата обращения: 22 Тулыспом 2025.
- ↑ Путин поддержал идею проводить "Разговоры о важном" в детских садах, РИА Новости (3 Аршӧр 2024). Дата обращения: 22 Тулыспом 2025.
- ↑ Власти Вологды первыми в стране ввели еженедельные «Разговоры о важном» в детсадах, Известия (21 Тӧвшӧр 2025). Дата обращения: 22 Тулыспом 2025.
- ↑ Разговоры о важном в колледже: как организовать внеурочные занятия для СПО рус..
- ↑ Старт первой Всероссийской премии «Разговоры о важном» (12 мая 2025).
|
Эта материаллӧн правовидзисьыс АНО «Интернет-энциклопедия «РУВИКИ». Материалсӧ позьӧ босьтны мӧдік сайттэз понда АНО «Интернет-энциклопедия «РУВИКИ» юӧртӧмӧн. |