Гортся удж

Босьтöм Рувикиись
Гортся удж
Велӧтчись керӧ гортся удж
Велӧтчись керӧ гортся удж
Иналӧм велӧтӧм

Гортся удж (рочӧн Дома́шнее зада́ние нето дома́шняя рабо́та) — заданнё, кӧдӧ велӧтісь сетӧ велӧтчиссезлӧ, медбы нія керисӧ сійӧ гортын. Сэтшӧм практикаыс используйтсьӧ материалсӧ тӧдвылӧ пуктӧм понда[1][2].

История

Гортся уджӧн велӧтӧмлӧн медодзза формаэз вӧлісӧ ни важ мирын: Важ Египетын, Грецияын да Римын велӧтӧм ӧтлаӧтлісӧ школаын уроккез гортся уджӧн[1].

XVІІІ сёвоӧ Вежа Римскӧй империя «народнӧй школаэзын» паськаліс чорытжык класс-урока система, кытчӧ пырисӧ заданнёэз ас удж понда; эта модельыс паськаліс Европа пасьта и вӧлі примитӧма Россияын. Рытвыв учёнӧйез лыддьӧны, мый гортся уджлісь ӧння формасӧ популяризируйтіс американскӧй реформатор Хорас Манн  (перм.рус.: сы инициатива сьӧрті XIX сёво шӧрын США-ын велӧтчиссезлӧ пондісӧ сетны гортся удж[1][2].

XX сёвоӧ гортся удж бердӧ видзӧтӧмыс лоис дискуссияа: США-ын велӧтіссез лыддисӧ, мый челядьӧс уроккез киння уджтӧмӧм умӧльсьӧтӧ ны лысин, мыйсянь мукӧд штаттэзын недыр кежӧ вӧлі тшкӧтӧм учӧт класссэзын не сетны гортся удж. Мӧдӧдзза мировӧй война бӧрын американскӧй велӧтчиссезлӧн гортся уджыс содіс экономическӧй проблемаэз да политическӧй волнуйтчӧммез кузя, то чинліс общество давленнё увтын, кӧда лыддис, мый гортся уджыс пӧдтӧ творчество. Критика вылӧ видзӧттӧг, ХХІ сёвоӧ гортся уджсӧ керны США-ись велӧтчиссезлӧ колӧ кыкпӧв дыржык (4,5 час) 1990-ӧт воэзся[3]; эта дырни заданнёэзлӧн ыждаыс вермӧ вежсьыны штат сьӧрті, а мукӧд школаэзын гортся удж оз сетсьы[4][5].

Финляндияын да унажык скандинавскӧй странаэзын гортся уджсӧ керӧны етшажык, ыджыт тӧдчӧт сетӧны уроккезлӧн критическӧй мывкыд зорӧтӧмлӧ; челядь лыддьӧны да уджалӧны уроккез сьӧрті проекттэз вылын. Японияын уджыс шӧркодь, но веськӧвтӧм асуджалӧм да практика зорӧтӧм вылӧ. Италия, Ирландия, Польша да Испания пырӧны сэтшӧм канмуэз лыдӧ, кытӧн гортся удж керӧмыс недельнас кыссьӧ 6-10 час. Сэтшӧм жӧ кад Китайын — сэтчин велӧтчиссес, гортся удж киння, велӧтчӧны репетиторрезкӧт[4][5].

Россияын

Гортся удж йылісь медодз касьтывсьӧ XVII сёвоӧ, кӧр Россияын пондісӧ аркмӧтны училищеэз. «Российскӧй империялӧн народнӧй училищеэзлӧн устав» (1786) пыртӧм бӧрын Фёдор Янкович  (перм.рус. вынсьӧтіс классно-урочнӧй система: гортся удж лоис колана компонентӧн велӧтчан уджын, но вӧлі унажыксӧ механическӧй велӧтчӧмӧн да зубритӧмӧн. Сідз видзсис XX сёво пондӧтчӧмӧдз, кӧр методисттэз пондісӧ вежны уроккезлісь пытшкӧссӧ; гортся удж керӧмыс лоис инструментӧн, мед уськӧтны тӧдвылӧ материалсӧ да тӧдӧммесӧ применяйтӧм понда[6].

Постсоветскӧй кадӧ гортся уджыс кольччис. XXI сёво пондӧтчикӧ сія вӧлі лыддьӧм уджанӧн, кӧда отсӧтӧн позьӧ видзны тӧдвылын материал да лӧсьӧтчыны экзаменнэз кежӧ; электроннӧй дневниккез да онлайн-платформаэз локтӧм бӧрын вежсис сы формаыс. Ӧтік кадӧ содіс нагрузка: витӧт да кватьӧт классын велӧтчиссез керлісӧ гортся уджсӧ не ӧтік предмет сьӧрті кык-куим часӧн, старшӧй классын велӧтчиссез — эшӧ дыржык[4][7].

2020 воэз пондӧтчикӧ бӧра пондісӧ баитны гортся удж колӧм йылісь. Велӧтіссез да общественнӧй уджаліссез висьталісӧ, мый ӧння технологияэз отсалӧны керны заданнёэсӧ формальнӧя текст генераторрез отсӧтӧн. Государственнӧй Думаись председатель Вячеслав Володин  (перм.рус. 2025 во гожумпомӧн висьталіс, мый гортся уджсӧ колӧ дугдыны «вывті уна удж» понда и сійӧн, мый аркмӧтӧм мывкуд зорӧтӧмӧн сія пӧртчӧ «кадсӧ ӧштӧмӧ». Сэк жӧ сія тӧдчӧтіс, мый исследовательскӧй да творческӧй заданнёэз формируйтӧны критическӧй чайтӧм, сійӧн вопроссӧ колӧ обсудитны[8].

2025 вося одзар 1 лунсянь вынсяліс велӧтӧм сьӧрті министерстволӧн  (перм.рус. тшӧктӧт № 704, кӧда дзескӧтӧ велӧтчан нагрузка да регламентируйтӧ гортся удж керӧм понда кадсӧ быдкодь волыда велӧтчиссезӧн. Сідз, медодз классын велӧтчиссезлӧ да 2-3-ӧт классын велӧтчиссезлӧ вӧзйӧны видзны гортся удж керӧм понда ӧтік часӧдз, 4-5-ӧт классын велӧтчиссезлӧ — кык часӧдз, 6-8-ӧт классын — 2,5 часӧдз, 9-11 классын — 3,5 часӧдз. Документыс лӧсьӧтӧм ӧтлаын Роспотребнадзоркӧт[9].

Моггез

Педагогическӧй методика сьӧрті, гортся уджлӧн медшӧр могыс — видзны тӧдвылын сійӧ, мый вӧлі велӧтӧм урок коста, петкӧтны тӧдвылӧ вились да чышкыны «пробеллез». Сэтшӧм уджыс сетӧ велӧтчиссезлӧ позьӧс тӧдмавны вежӧртӧмлісь тшупӧтсӧ отсӧттӧг, отсалӧ пуктыны тӧдвылӧ да лӧсьӧтчыны одзланься темаэз кежӧ. Сія сідзжӧ отсалӧ велӧтісьлӧ донъявны, бура я вежӧртӧм матреиалыс, да планируйтны одзланься удж[1][10].

Мӧдік моггез коласын — концентрациялӧн да темасӧ туялан кужӧмлӧн зораммӧм; велӧтчисьлӧн формируйтчӧны асуджалан да аскадӧн веськӧтлан кужӧммез[2]. Критическӧй да творческӧй мыв, велӧтіссез сьӧрті, ны лыдын зорамӧ туялана проекттэз да литература аскӧття лыддьӧм пыр[9]. Ӧння технологияэз отсӧтӧн школьниккез вермӧны бӧрйыны лӧсялана формат (лыддьӧтӧм, видео), мый отсалӧ босьтны тӧдвылӧ информациясӧ вежӧртӧмын быдкодь стиллез. Асуджалӧмыс сідзжӧ отсалӧ тӧдны асьсӧ: челядь буражык вежӧртӧны ассиныс интерессэз да велӧтчӧны планируйтны одзланься олан[1].

Госдумаись велӧтӧм сьӧрті комитетӧн юралісь Ирина Белых висьталӧм сьӧрті, мукӧд предметтэз, кыдз литература, оз позь быдсӧн велӧтны класснӧй удж сьӧрна — ыджыт произведеннёэз лыддьӧм, кӧдна зорӧтӧны челядьлісь творческӧй кужӧммез, сідзжӧ лоӧ гортся уджӧн[9].

Критика

Американскӧй психолог Харрис Куперлӧн 2000 воэз шӧрся туялӧм мыччаліс, мый гортся удж да бура велӧтчӧм коласын корреляцияыс ӧддьӧн учӧт, и бур эффект гортся уджсянь мыччалӧны унажыксӧ помалісь классэзісь велӧтчиссез[11]. 18 сюрс помалісь велӧтчись анализ мыччаліс, мый ыджыт гортся уджлӧн медыджыт причинаэз — школьнӧй программалӧн вывті уна удж да велӧтчиссезлӧн сьӧкыт материалӧн ас кежаныс разбирайтчӧм, мый унаись вайӧтӧ мотивация ӧштӧмӧдз. Мӧдік исследование, кытӧн участвуйтісӧ 4,3 сюрс велӧтчиссезлӧн, казяліс, мый челядь, кӧдна уна кад чулӧтӧны гортся удж вылӧ, активнӧйжыкӧсь уроккезын, но испытывайтӧны стресс да дзоньвидзалункӧт проблемаэз. Сэк жӧ вывті уна заданнёэз умӧльӧсь керӧны умӧля олісь семьяэзісь челядьлісь шедтӧмсӧ, мыля нылӧ оз тырмы отсӧт да условиеэз велӧтчӧм понда, а ай-мам отсӧтыс вермас вайны вред, озӧ кӧ нія тӧдӧ материалсӧ[12][13].

Российскӧй велӧтіссез гортся уджлісь ыждасӧ висьталӧны велӧтан программаэзӧн. «Велӧтісь» профсоюзӧ пырись Анна Штернберг шуӧмӧн примитӧм нормаэз тшӧктӧны велӧтчисьлӧ велӧтны «вывті уна информация», кӧдӧ гортся уджтӧг керны оз позь. Педагог висьталӧмӧн велӧтчан программасӧ колӧ вежны специалисттэз коласын паськыта дискутируйтӧмӧн. Дмитрий Лутовинов, Российскӧй Федерациялӧн велӧтан министерство дынся общественнӧй советлӧн юралісь, висьталіс, мый гортся уджлӧн ӧтласа ыждаыс «былись ыджыт», да мый гортся уджлӧн ыждаыс абу регламентруйтӧм. «Велӧтісь» профсоюзлӧн председатель Дмитрий Казаков Российскӧй Федерациялӧн велӧтан министерстволісь 2025 во одзар 1 лунся № 704 тшӧктӧм йылісь сёрнитчикӧ висьталіс, мый виль нормативвесӧ колӧ видзны кыдз рекомендацияэз, эд объективнӧя оз позь тӧдны, мый дырна кад ковсяс быд велӧтчисьлӧ гортся удж понда[9].

Пасйӧттэз

  1. ↑ 1 2 3 4 5 мый такое ДЗ (домашнее заданнё): надо ли делать, обязательно ли, зачем выполнять и для чегорус., Умскул Журнал (20 сентября 2024). Дата обращения: 24 Одзар 2025.
  2. ↑ 1 2 3 Кто придумал домашнее заданнё и зачем рус.. SportZania. Видзӧтӧм 24 Одзар 2025.
  3. ↑ Pinsker, Joe. The Cult of Homework, The Atlantic (28 Одзтулыс 2019). Дата обращения: 24 Одзар 2025.
  4. ↑ 1 2 3 Домашние задания в школе: история, международный опыт, плюсы и минусы, влияние на детей и перспективы отмены в России рус.. ОбрСоюз. Видзӧтӧм 24 Одзар 2025.
  5. ↑ 1 2 Домашнее заданнё: есть ли в нем необходимость? — Центр развития интеллекта «Пифагорка» рус.. Центр развития интеллекта «Пифагорка». Видзӧтӧм 24 Одзар 2025.
  6. ↑ Бакулина Е. А., 2010, с. 156—157.
  7. ↑ Педсовет. Домашнее заданнё вызывает стресс (19 Тулысшӧр 2008). Дата обращения: 14 Одзар 2025.
  8. ↑ Александра Озерова. Володин предложил обсудить отмену домашнего задания для школьников, РБК (9 Гожумпом 2025). Дата обращения: 24 Одзар 2025.
  9. ↑ 1 2 3 4 Маргарита Грошева, Мария Лисицына. Депутаты подготовили единые требования к домашним заданиям в школах, РБК (17 Гожумпом 2025). Дата обращения: 24 Одзар 2025.
  10. ↑ Нужна ли домашняя работа в школе?, Блог «Школы Будущего Online». Дата обращения: 24 Одзар 2025.
  11. ↑ Стресс, конфликты, переутомление, недосып: почему школам пора отказаться от домашних заданий, Chips-journal.ru (21 Тӧвпом 2020). Дата обращения: 24 Одзар 2025.
  12. ↑ Ирина Слепухина. Учеба без передышки: почему домашние задания могут вредить школьникам, Tech Insider (27 Одзгожум 2025). Дата обращения: 24 Одзар 2025.
  13. ↑ Cooper H., Robinson J. C., Patall E. A., 2006.

Литература

Босьтӧма "https://koi.ruwiki.ru/w/index.php?title=Гортся_удж&oldid=215728"-ись