Пельнянь

Босьтöм Рувикиись
Пистик пизись да пистикись керӧм пельняннез.

Пельнянь (комиӧн у.л. пельняннез, рочӧн пельмени) — перем коми, коми да удмурт отирлӧн традиционнӧй быдлунся, вежалунся да касьтісян сёян, пель кодь формаа парӧга уль дырвидзана няньтор, кӧдӧ колӧ пуны, пӧжны нето пражитны. Пырис роч сёян-юанӧ, кӧда пырйӧт паськыта тӧдса мирын.

Ним аркмӧм

[вильмӧтны | править код]

Сёян нимыс «пельнянь» аркмӧм ӧтперем кылын кык кывторись «пель» да «нянь», вежӧртаснас лоӧ «пель кодь нянь»[1]. Комиэзлӧн да удмурттэзлӧн сёяныс сідзжӧ шусьӧ «пельнянь». Роч кылас пырис ойвыв роч диалекттэз пырйӧт кыдз «пельмянь», «пельмень» да мукӧдлаын вуджіс «пермянь», «пермень» формаэзӧ «Перем» кывкӧт контаминацияӧн[2][3].

Аркмӧм

[вильмӧтны | править код]

Комиэз лыддьӧны пельняннесӧ ӧддьӧн важся сёянӧн, сідз кыдз сія ӧння кадӧдз касьтісян да вежалунся сёян.[4] Медыджыт роч сёян-юан туялісь Вильям Похлёбкин сьӧрті, пельняннес пырисӧ роч сёян-юанӧ Уралісь XIV — XV сёвоэзӧ[5].

Перемись история туялісь Павел Корчагин лыддьӧ пельняннесӧ XVII сёво пондӧтчикӧ Ыджыт туй вылын аркмӧм сёянӧн[6][7]. Сы сьӧрті, пельняннесӧ керлӧмась кузь туйӧ муніссез понда да вузавлӧмась. Пельнянь керӧмыс вӧлӧма тодиль уджӧн, сы кузя аркмӧмась Пельменников, Пельменев да ны кодь гижсяннэз[5]. Сэтшӧм гижсяннэс пантасьлӧны важ докуменнтэзын 1679 восянь[6]. Одзжык Ыджыт туй вывся олӧминнэзас абу олӧмась сэтшӧм гижсяннэза морттэс. Корчагин чайтӧ, пельнянь керан идеясӧ комиэс босьтӧмась кундюм сёянісь да вежӧмась азмоза[6].

Традицияын

[вильмӧтны | править код]

Комиэзлӧн пельняннес — колана сёян гӧтрасьӧм пызан вылын[8][9], Семик[10], касьтісяннэз[11] да дзебсян коста, тӧвся вежалуннэз — Розосво, Светтё, Василей рыт да Крещеннё коста[4][12].

Пельняннесӧ видзӧны профетика символӧн[13]. Сідз, ӧнӧдз Василей рытӧн да мӧдік Светтё костся рыттэзӧ пельняннез пувтӧн пуктывлісӧ ны коласӧ пельнянь, кӧдаын парӧг туйӧ изӧм сов. Кинлӧ пызан саяс сюрас сэтшӧм пельняньыс, сы оланыс лоас долыт. Гӧтрасьӧм коста мукӧдлаын XX шӧрӧдз пельняняс пуктывлісӧ том ичмоньлісь гардӧм юрси, кинлӧ нывкаэс коласісь сія сюрас, сія чожа мыйись айкаалас.[8] Усис кӧ пельнянь вӧтӧ — «кулӧм»[13].

Масс-культураын да урбанистикаын

[вильмӧтны | править код]
2020 во гожумпом 14 лунӧ Кудымкарын скульптор Валентина Ракишева, Кудымкарлӧн юралісь Наталья Стоянова да Коми округлӧн юралісь Виктор Рычков осьтісӧ Кудым-Ош аллеяын «Ойпельлӧ пельнянь» арт-объект.
  • 2020 воын Кудымкарын, Кудым-Ош аллеяӧ, сувтӧтісӧ «Ойпельлӧ пельнянь» нима мраморісь керӧм арт-объект, скульпторыс — Валентина Ракишева.[14]
  • Пельняньлӧ памятниккез эмӧсь Ижевскын (2004)[15], Миассын (2018)[16].
  • Удмуртияын 2015 восянь чулӧтсьӧ «Пельнянь лун» (удм. Пельняньлэн калыккуспо нуналыз) нима этногастрономия фестиваль.[17]
  • Коми-Пермяцкӧй округын чулӧтсьӧны «Пельнянь керан рыт» акцияэз.[18][19]

Керӧм

[вильмӧтны | править код]

Кӧвдас[вильмӧтны | править код]

Керсьӧ чочком пизись, шӧмтӧм нянись, 1-2 кольтьӧн да ваӧн. Кӧвдасыс колӧ чорыт.[20]

Парӧг[вильмӧтны | править код]

Пельнянь парӧгыс вермас лоны быдберся кодь — пода яй, кай, кӧс, уль нето сола тшак, чери, кушман, азь, пистик да пикан.[20]

Яя пельняннез[вильмӧтны | править код]

Парӧгыс керсьӧ мӧс да порсь яйись шӧриӧн. Яйсӧ масьтны ӧрокын. Сыӧ пуктыны 3-4 пань мымда ва нето йӧв. Сэтчӧ содтыны масьтӧм лук, сов, кӧрви кӧ — сьӧд гормӧг, быдӧс сорлавны.[20]

Сьӧлаись пельняннэз[вильмӧтны | править код]

Сьӧла яйсӧ вартыштны пуовӧй доранӧн ӧтлаын лыэзнас, сэсся масьтны ӧрокын. Сӧдтыны чеснӧг, лук, гормӧг, уль кольть, быдӧс сорлавны. Лоас кӧ парӧгыс сукӧв, колӧ содтыны ва нето йӧв. Сьӧла яйыс юӧ уна васӧ.[20]

Порсь яй нето гос да капустаись пельняннез[вильмӧтны | править код]

Порсь яйсӧ да уль нето сола капуста масьтны да сорлавны. Содтыны масьтӧм лук. Позьӧ порсь яйыс туйӧ пуктыны порсь гос.[20]

Уль капустаись пельняннез[вильмӧтны | править код]

Капуста юрсӧ вундавны, сыбӧрын посньӧтны ӧрокын. Капуста васӧ кисьтны (сыись позьӧ пуны шыд). Масьтӧм капустаас пуктыны посньӧтӧм лук, уль кольть, сов да сорлавны быдӧс. Кольть туйӧ позьӧ пуктыны нӧк.[20]

Азя пельняннез[вильмӧтны | править код]

Тӧвнас кераласӧ кынмӧм азьсӧ, пыртасӧ керкуӧ, сылӧтасӧ. Гырись корсӧ масьтӧны ӧрйын. Сідз кыдз азьыс солавтӧм, сійӧ масьтікас солалӧны. Эттшӧм пельняннесӧ пуӧны да сейӧны нӧкӧн нето сылӧтӧм виӧн, кӧслуннэзӧ — быдмас виӧн.[20]

Картошкаись пельняннез[вильмӧтны | править код]

Картошка парӧга пельняннесӧ керӧны Юрла районын. Ны формаыс невна мӧдкодь — пельняннесӧ кӧстӧны ӧддьӧнжык да пельӧссэсӧ ӧтлаӧтӧны, мед петіс гӧгрӧс кӧдь. Эттшӧм пельняннесӧ Юрлаас шуӧны «ушки». Парӧгыс понда масьтӧны пуӧм картошка, сыӧ содтӧны йӧв, нӧк да кольть.[20]

Кушманісь пельняннез[вильмӧтны | править код]

Кушмансӧ ниртны, васӧ рудзӧтны. Пуктыны рудзалӧм кушманас нӧк, масьтӧм лук, сов да сорлавны. Кушманісь пельняннес пусьӧны 5 минута дырна. Нійӧ сёйӧны чизымӧн нето нӧкӧн, сылӧтӧм виӧн.[20]

Кӧс тшакись пельняннез[вильмӧтны | править код]

Кӧс тшаксӧ кӧтӧтӧны рытсянь. Асывнас васӧ кисьтны (сыись позьӧ пуны шыд). Тшаксӧ масьтны ӧрокын ӧтлаын 2-3 лук юрӧн, солавны, содтыны невна гӧрд гормӧг, сорлавны. Эттшӧм пельняннесӧ унажыкыс сёйӧ пельнянь ваӧн, кыдз шыд.[20]

Сола тшакись пельняннез[вильмӧтны | править код]

Тшаксӧ пуктыны бекӧрӧ, рудзӧтны, масьтыны ӧрокын лук сорӧн, содтыны уль кольть. Энӧ пельняннезӧн бур юны ырӧш.[20]

Уль тшакись пельняннез[вильмӧтны | править код]

Уль тшаксӧ пуны, масьтны ӧрокын лук сорӧн, пуктыны уль кольть, пань мымда нӧк, солавны, сорлавны. Энӧ пельняннесӧ сёйӧны нӧкӧн нето чизымӧн.[20]

Чериись пельняннез[вильмӧтны | править код]

Лӧсялӧ ёкыш, кельчи, ёді, ком. Черисӧ весӧтны, быдӧс лыэсӧ кыскавны. Масьтыны лук нето чеснӧг сорӧн, содтыны йӧв да солавны, сорлавны. Сейӧны чериись пельняннесӧ сылӧтӧм виӧн, гожумӧн комидз сорӧн.[20]

Пистикись пельняннез[вильмӧтны | править код]

Пистиксӧ масьтыны ӧрокын, содтыны уль кольть, нӧк, ниртӧм чеснӧг.[20]

Пиканісь пельняннез[вильмӧтны | править код]

Пикансӧ миськавны да пуны, пуӧмсӧ масьтыны ӧрокын, солавны, сотдыны гормӧг, уль кольть нето нӧк.[20]

Пасйӧттэз

[вильмӧтны | править код]
  1. ↑ Краткий этимологический словарь коми языка : Словарь / В. И. Лыткин, Е. С. Гуляев ; Под редакцией В.И. Лыткина. – 2 издание. – Москва : Академический научно-издательский, производственно-полиграфический и книгораспространительский центр Российской академии наук "Издательство "Наука", 1970. – 386 с. – С. 219.
  2. ↑ Пельмень // Этимологический словарь русского языка = Russisches etymologisches Wörterbuch : в 4 т. / авт.-сост. М. Фасмер ; пер. с нем. и доп. чл.‑кор. АН СССР О. Н. Трубачёва. — Изд. 2-е, стер. — М. : Прогресс, 1987. — Т. III : Муза — Сят. — С. 230.
  3. ↑ Кривощекова-Гантман А. С. Коми-пермяцкие заимствования в русских говорах Верхнего Прикамья // Этимологические исследования 1981. С. 59.
  4. ↑ 1 2 Круглый год праздников, обрядов и обычаев коми-пермяков / В. В. Климов, Г. Н. Чагин; [идея Л. Ратеговой]. — Изд. 2-е, доп.. — Кудымкар : Коми-Пермяцкий этнокультурный центр, 2018. — 303 с. — ISBN 978-5-85383-726-3
  5. ↑ 1 2 Корчагин П. А. Коми-Пермяцкое мясо-тестяное блюдо эпохи складывания Всероссийского рынка, или антропология пельменя // Вестник Пермского федерального исследовательского центра. — 2015. — № 4.
  6. ↑ 1 2 3 Корчагин П. А. Пельмени. Откуда уши растут // Вестник Пермского федерального исследовательского центра. — 2016. — № 3.
  7. ↑ Пермский историк уверен: пельмени придумали 400 лет назад в Прикамье. Приводим интересные доводы. 20 января 2023 59.ru
  8. ↑ 1 2 Голева Татьяна Геннадьевна. Терминология и содержание ритуалов коми-пермяцкой свадьбы // Вестник археологии, антропологии и этнографии. — 2017. — № 3 (38).
  9. ↑ Мальцева, О. Н. Коми-пермяцкий свадебный стол: традиции и новации / О. Н. Мальцева // L итоговая студенческая научная конференция Удмуртского государственного университета : материалы всероссийской конференции, Ижевск, 18–21 апреля 2022 года. – Ижевск: Издательский дом "Удмуртский университет", 2022. – С. 388-390. – EDN QHJBRC.
  10. ↑ Чугаева С. В. Семик - день поминовения умерших у коми-пермяков // Вестник Воронежского государственного университета. Серия: Лингвистика и межкультурная коммуникация. — 2010. — № 1.
  11. ↑ Чугаева Светлана Валентиновна. Трапеза в поминальной обрядности коми-пермяков // Вестник Чувашского университета. — 2009. — № 1.
  12. ↑ Климов В. В. Олан вужжез = Корни бытия: этнографические заметки о коми-пермяках; на коми-перм. и рус. яз. — Кудымкар: Коми-Перм. кн. изд-во, 2007. — 368 с. — ISBN 5-87901-110-0
  13. ↑ 1 2 Свалова Екатерина Николаевна. Запреты и предписания в речевой культуре пермского старообрядчества // Вестник Пермского университета. Российская и зарубежная филология. — 2019. — № 3.
  14. ↑ В Кудымкаре торжественно открыли памятник пельменю. 15.08.2020. Вести-Пермь
  15. ↑ Павел Самсонов (Ижевск). В Ижевске установили памятник пельменю. 09.12.2004 Российская газета
  16. ↑ Светлана Добрынина (Челябинская область). В Миассе открыли памятник пельменю. 05.01.2018 Российская газета
  17. ↑ В Ижевске пройдет фестиваль «Всемирный день пельменя». 08 Февраля 2023. Администрация города Ижевска
  18. ↑ В трёх сельских клубах Юсьвинского округа пройдёт вечер лепки пельменей. 16.02.2021. Парма-Новости
  19. ↑ Село Архангельское приглашает мужчин лепить пельмени. 14.02.2018 Парма-Новости
  20. ↑ 1 2 3 4 5 6 7 8 9 10 11 12 13 14 15 Коми-пермяцкая кухня [Сб. рецептов / Сост. А. Долдина; Ред.: В. Коколева, Л. Косова]. — Кудымкар : Коми-Пермяц. кн. изд-во, 1998. — 508, [3] с. ил.; 21. — ISBN 5-87901-033-3. — С. 377-383.
Босьтӧма "https://koi.ruwiki.ru/w/index.php?title=Пельнянь&oldid=105637"-ись