Кривощёкова-Гантман Антонина Семёновна
| Кривощёкова-Гантман Антонина Семёновна | |
|---|---|
 | |
| Чужан лун | 1921 во гожумпом 17 лун |
| Чужанін | |
| Кулан лун | 1995 во тулыспом 31 лун (73 года) |
| Канму | |
| Наука юкӧн | филология[d], топонимика[d] и коми-пермяцкӧй кыв |
| Уджаланін | |
| Велӧтчанін | |
| Учёнӧй тшупӧт | кандидат филологических наук[d] (1952 во) |
| Научнӧй юралісь | Дмитрий Владимирович Бубрих[d] |
Кривощёкова-Гантман Антонина Семёновна (1921 во гожумпом 17 лун, Виджӧв — 1995 во тулыспом 31 лун) — коми лингвист, доцент. Туяліс перем коми кыв, унажыксӧ ономастика. Филология кандидат.
Олантуй
Чужис 1921 во гожумпом 17 лунö Виджӧлын Семён Михайлович да Мария Фёдоровна Кривощёковвез семьяын. 1935 воö помалiс Архангельскöй сизимкласса школа, 1938 воö – Кудымкарскöй педагогика училище. Педучилище помалöм бöрын уджалiс Кудымкарскöй №1 челядь садын воспитательöн.
1930 воö пырис велӧтчыны А. А. Жданов нима Ленинградскöй государственнöй университетö восточнöй факультетлöн финно-угорскöй отделеннё вылö. Велöтчöмсӧ падмӧтіс Великöй Отечественнöй война. 1941-1942 воэзö уджалiс медицинскӧй сестраöн блокаднöй Ленинградын.
1942 воö бертiс Коми-Пермяцкӧй округö, кутчисис велöтны история уроккез Кудымкарскöй шӧрӧт №2 школаö. Война бöрын, 1945 воö, мунiс велöтчыны Ленинградö.
1947-1950 воэзын велӧтчис аспирантураын. 1962 во тӧвпом 23 лунӧ дорйис филология кандидат диссертация (рочӧн «Словарный состав и словоизменение иньвенского диалекта коми-пермяцкого языка»). Сія вöлi медодзза диссертация коми-пермяцкöй кыв материал вылын.
Аспирантура помалöм бöрын А. С. Гантман бертiс Коми-Пермяцкöй округö, пондöтчис уджавны методистöн Коми-Пермяцкöй окружнöй велöтiссезлiсь удж бурсьöтан институтын. Сыбöрын заведуйтiс роч да коми-пермяцкöй кыввез сьöртi кафедраöн. 1952 воö вуджис уджавны Кудымкарскöй учительскöй институтö, кытöн уджалiс 1955 воöдз. Сы кадӧ лöсьöтiс учебнöй планнэз да программаэз, школьнöй небöггез, методическöй пособиеэз велӧтіссез понда.
1955 восянь оліс Перемын. Ассис олансö пыр кежö йитiс Пермскöй педагогическöй институткöт: медперво уджалiс старшöй преподавательöн, сыбöрын - роч кыв сьöртi кафедра вылын доцентöн. Антонина Семёновна вöлi организаторöн коми-пермяцко-русскöй отделеннёлӧн.
Кулiс 1995 во тулыспом 31 лунö Перемын. Дзебӧм Перемын.
Туялан удж
Туяліс ономастика, уджаліс кывчукӧррез да велӧтчан небӧггез лэдзӧмын. А. С.Кривощёкова-Гантман автор сэтшöм уджжезлöн: «Коми-пермяцкий язык» (1961), «Коми-пермяцко-русский словарь» (ӧтлаын Р. М. Баталовакӧт, 1985), «Географические названия Верхнего Прикамья» (1983) и с. о.
Небӧггес да публикацияэс
- Кривощёкова-Гантман А. С. да кин да. Коми-пермяцкий язык. Пермь, 1961
- Кривощёкова-Гантман А. С. Откуда эти названия?. Пермь, 1973
- Баталова Р. М., Кривощёкова-Гантман А. С. Коми-пермяцко-русский словарь. М, 1985
- Кривощёкова-Гантман А. С. Географические названия Верхнего Прикамья. Пермь, 1983
- Баталова Р. М., Кривощёкова-Гантман А. С. Коми-пермяцко-русский орфографический словарь. Кудымкар, 1992
- Кривощёкова-Гантман А. С. Собрание сочинений в 2 тт. Пермь, 2006
Донтан пассэз
Педагоггезӧс велӧтӧм-лӧсьӧтӧм понда да ассис наука удж пуктӧм понда наградитӧм «Отличник народного просвещения РСФСР» значокӧн да сизим медальӧн.