Василей рыт
| Василей рыт | |
|---|---|
 | |
| Лун | Тӧвшӧр 13 лун |
 Медиафайлы на РУВИКИ.Медиа | |
Василей рыт (Василий рыт, рочӧн Васильев вечер) — коми отирлӧн вежалун, Важ Виль во одзза рыт. Вежалунсӧ порйӧтӧны православнӧй йӧз да славяна кывья католиккез. Нимыс аркмӧм Вежа Василий ним сьӧрті.
Чулӧтӧм
Ӧння кадӧ Василей рыт чулӧтсьӧ тӧвшӧр 13 лунӧ[1], важмоза чулӧтсьывліс одзтӧв 31 лунӧ, Виль во одзза лунӧ. Вежалуныс абу уна отира, сійӧ порйӧтӧны горттэзын.[1]
Сёян-юан
Вежалуныслӧн эм тодиль сёян — юркок (баля да порсь).[1] Сійӧн Василей рытыс шусьӧ юркок вильӧтан рытӧн. Пӧжӧм яйсис торйӧтӧны лыэсӧ. Пызан вылӧ сідзжӧ пуктӧны няняшыд, пельняннез, чериняннез, кулиггез да берся шаньга, сур да ырӧш. Быдӧссӧ колӧ 12 сёян.[2]
Вошшӧтӧм да мӧдік ритуаллэз
Юркок вильӧтікӧ касьтылӧны важжесӧ.[1]
Василий рытӧ керкуын оліссез корисӧ енлісь бур да вашӧтісӧ умӧльсӧ. Василий Климовлӧ Кӧс районын висьтасьӧмась:
«Василий рытӧ, кӧр звездаэз мыччисьӧны, ми быдӧнным петам керкуись, босьтам беддез, шаттез да и шувлам: «Виль год локтӧ, тырдоз вайӧтӧ: балялӧ — дзаля, вӧвлӧ — чань, мӧслӧ — кукань, порсьлӧ — порсьпиян, курӧглӧ — тип, кенаклӧ — зон». Этадз гӧгӧртам кыкись, а куимӧтпырьяс шуам: «Новый год пришёл, чуд, вон пошёл! Чуд, вон пошёл!» Эттшӧм ритуал бӧрсянь беддесӧ сувтӧтӧны керку пельӧсӧ, шаттесӧ нето понуль уввез тэчӧны картаӧ, сарайӧ, ыбӧссэз вевдӧрӧ, вӧлись пырӧны сёйны юркок. Кӧр вильӧтчасӧ, лыэсӧ чукӧртӧны ӧтлаӧ, петкӧтӧны гидӧ да пуктоны ыбӧс дорись пельӧсӧ, назём увтас. Эта лоӧ: кыдз лыэс куйлӧны ӧтлаын, сідз и подаыс гожумбыт лоас ӧтлаын да узьлыны пондас эстӧн».[2]
Кӧс районын одзза кадӧ чулӧтлӧмась пода йылӧм понда отажык обряд, кӧдкоста ӧксьывлӧмась морттэс быд керкуись да ветлӧтӧмась ӧтӧрӧт.[2]
Орсӧм
Василей рытӧ, кыдз и Светтё коста, томпӧлӧс уна орсӧны гораньӧн, вермасьӧны мыр шедтанын, сьылӧны да йӧктӧны.[1]
Йӧзын
Роч отирын
Роччеслӧн эта вежалуныс шусьӧ Васильев вечер, Шӧрись да Лунвыв Россияын (Тверскӧй, Ярославскӧй, Московскӧй, Тульскӧй Рязанскӧй, Нижегородскӧй, мукӧдлаын Воронежын, Белгородын да Курскын) шусьӧ Овсень.[3] Роч Ойвылас — Жирная кутья нето Щедруха. Роччес лӧсьӧтлісӧ рыт кежас тодиль сёян — порсьпиян[4], сія символизируйтіс бур му чужтӧм да пода йылӧм локтан воӧ. Василей рытас вежалун пызан вылас тэчисӧ медбур сёян: пирӧггез, колбаса, яй, кутья, кашаэз, юисӧ пиво, вина да водка. Эта рытӧ уна орсісӧ да колядуйтісӧ. Шӧрись Россияын сьылісӧ тодиль сьыланкыввез.
Асыввыв славяналӧн
Рытвыв Полесьеын эта рытыс шусис Куготы, Гаготы нетоАгатуха.[5] Сэтшӧм нимыс аркмӧм сысянь, мый сія рытӧ ковсьывлӧма чапкыны ӧшымӧсӧ каша, сы коста гадайтчӧмась да чирзӧмась ӧшымӧсас: «Ку-гу-гу!». Мӧдік туяліссез сьӧрті, «Агатуха» нимыс аркмӧм серавны кадакывсянь — гагатать. Рытыскӧт йитӧмӧсь гӧтрасьӧм йылісь табуэз, поверрёэз. Сёяныс вӧлі уна, но кӧслунся. Рытнас уна орсісӧ да сьылісӧ тодиль сьыланкыввез. Белоруссезлӧн вӧлі рытся Щедра нима персонаж — мӧдӧтчӧм нывка, украинеццезлӧн кык персонаж — «Василь» да «Маланка».[6]
Масс-культураын
- Коми-Пермяцкӧй этнокультурнӧй центр чулӧтӧ «Василей рыт» нима тӧвся коми-пермяцкӧй культура фестиваль.[7]
- Василей лунӧ, тӧвшӧр 13 лунӧ, Коми Республикаын, Кулӧмдінын, 1993 восянь чулӧтьсӧ «Василей» нима сьылан фестиваль.[8]
Пасйӧттэз
- ↑ 1 2 3 4 5 Круглый год праздников, обрядов и обычаев коми-пермяков / В. В. Климов, Г. Н. Чагин; [идея Л. Ратеговой]. — Изд. 2-е, доп.. — Кудымкар : Коми-Пермяцкий этнокультурный центр, 2018. — 303 с. — С.105-106. — ISBN 978-5-85383-726-3
- ↑ 1 2 3 Климов В. В. Олан вужжез = Корни бытия: этнографические заметки о коми-пермяках; на коми-перм. и рус. яз. — Кудымкар: Коми-Перм. кн. изд-во, 2007. — 368 с. — С. 104. — ISBN 5-87901-110-0
- ↑ Овсень / Л. Н. Виноградова // Славянские древности: Этнолингвистический словарь : в 5 т. / под общ. ред. Н. И. Толстого; Институт славяноведения РАН. — М. : Межд. отношения, 2004. — Т. 3: К (Круг) — П (Перепёлка). — С. 500—501. — ISBN 5-7133-1207-0.
- ↑ Кесаретский поросёнок // Российский этнографический музей
- ↑ Лозка А. Ю. Беларускі народны каляндар. — Мн.: Полымя, 2002. — 238 с. — ISBN 98507-0298-2.
- ↑ Василий / Толстая С. M. // Славянские древности: Этнолингвистический словарь : в 5 т. / под общ. ред. Н. И. Толстого; Институт славяноведения РАН. — М. : Межд. отношения, 1995. — Т. 1: А (Август) — Г (Гусь). — С. 291–292. — ISBN 5-7133-0704-2.
- ↑ В Этнокультурном центре пройдёт фестиваль «Василей рыт». 10.01.2023. Парма-Новости
- ↑ Республиканский фестиваль «Василей». Культура РФ