Кушман
Кушман (латин. Raphanus sativus) — кык вося быдмас, карч.
Быдмӧм
Кушманыс — быдмас культура Евразияись. Важ кадсянь сійӧ быдтӧны кыдз карч. Кушманлӧн серпас адззӧм Важ Египет кадся Карнак вичкуын, гижӧмыс Хеопс пирамида вылын. Кушмансӧ вӧдитісӧ Важ Китайын. Кушман кӧдзыссис керлісӧ ви. Важ Египетсис кушманыс сюрис Важ Грецияӧ. Аполлон ен донтан луннэзӧ сы алтарь дынӧ вайлісӧ куим карч — кушман, гӧрд кушман да морков. Кушманыс вӧлі зарниа, гӧрд кушманыс — эзысись, морковыс — ыргӧнісь [1].
Ӧння кадӧ кушмансӧ вӧдитӧны Азияын, Европаын, Австралияын да Ойвыв Америкаын.
Ним
Карчыслісь нимсӧ — кушман — кыв туяліссес лыддьӧны локтӧмӧн ӧтласа перем кылӧ (*kušman) булгарскӧй (важ чувашскӧй) кылісь.[2] «Кушман» нимӧн карчыс шусьӧ быдӧс комиэзлӧн да удмурттэзлӧн.
Ботаническӧй гижас
Вужыс кызкодь, сёяна. Вермас лоны гӧрд, чочком, гӧрдвевья лӧз, гӧрдкодь, сьӧд. Коррес кузьмӧсаӧсь, косялӧм кодь доррезаӧсь, быдӧссӧ 2-6 гоз. Дзоридзасьӧ чочкомӧн, гӧрдкодя да гӧрдвевья лӧза. Пуртӧссэс паськытӧсь, польдӧмкодьӧсь, кушӧсь, воикас небзьӧны, лоӧны няпчикаӧсь.
Кушманыс быдмӧ сьӧдмусинын, ульмӧса муын. Кӧдзӧны кушмансӧ позйӧн.
Кушмансӧ сёйӧ мупытш. Карч вылас паразитурийтӧны умӧльтшаккез Botrytis cinerea, Cercospora atro-grisea, Phoma raphanicola.[3]
Керӧтӧм
Кулинарияын
Кушмансис сёйӧны вужжесӧ да корресӧ. Комиэз керӧны масьтӧм кушман вужсис пельнянь парӧг да пирӧг парӧг, уль масьтӧм кушмансӧ сейӧны йӧлӧн нетӧ ырӧшӧн (ӧшкайӧв).[4]
Европейскӧй да роч коммезын керӧны салаттэз, окрошкаэз. Францияын пражитӧм кушманторрезісь керӧны шыд[1].
Бурдӧтчӧм
Коми отир видзӧны кушмансӧ бурдӧтчан быдмасӧн.[5] Кушман васӧ лэдзлісӧ тырӧм зырымӧн нырӧ. Ыджыт температура дырни кушман васис керӧны компрессэз морос, мышк, кымӧс да юрбӧр вылӧ. Кушман васӧ маӧн юӧны горш тырӧм коста.[5]
Ӧння кадся медицинаын кушмансӧ видзӧны сӧп да мус висяннэз, холецистит, цирроз, гастрит профилактика понда [6].
Тодиль керӧтӧмын
Кушман кӧдзыссис керӧны руави. Вӧр кушман кӧдзысас 48% ви, кӧда вермӧ лоны биолонтісянӧн. Мукӧд кушманыс бура быдмӧ кӧдзыт климатын.
Культураын
Мексикаын, Оахака-де-Хуарес карын, одзтӧв 23 лунӧ чулӧтьсӧ «Christmas La Navidad» нима Розосвося фестиваль. Сы коста кушмансис вундалӧны быдкодь религиознӧй персонажжезлісь да гора нима отирлісь фигуркаоккез, кӧдна сэсся мыччалӧны выставка вылын кар шӧрас.
Мӧдік
Кушмансӧ вӧдитӧны мошшез понда. Маыс петӧ 1 га-ись 40-50 кг. Мошвӧдитіссез понда кушманыс бур сійӧн, мый сійӧ позьӧ кӧдзны тодиль кадӧ. Кушман маыс чожа чорзьӧ, сійӧн сійӧ оз кольӧ мошшеслӧ тӧв кежас.
Пасйӧттэз
- ↑ 1 2 Ж.И. Орлова. Всё об овощах. — Москва: Агропромторг, 1986. — С. 158. — 222 с.
- ↑ Лыткин, В. И. Краткий этимологический словарь коми языка : Словарь / В. И. Лыткин, Е. С. Гуляев ; Под редакцией В.И. Лыткина. – 2 издание. – Москва : Академический научно-издательский, производственно-полиграфический и книгораспространительский центр Российской академии наук "Издательство "Наука", 1970. – 386 с. – С. 148.
- ↑ Семенов А.Я. Определитель паразитных грибов на плодах и семенах культурных растений. — Рипол Классик. — С. 22-23. — ISBN 9785458272988, ISBN 5458272986,.
- ↑ Коми-пермяцкая кухня [Сб. рецептов / Сост. А. Долдина; Ред.: В. Коколева, Л. Косова]. — Кудымкар : Коми-Пермяц. кн. изд-во, 1998. — 508, [3] с. ил.; 21. — ISBN 5-87901-033-3.
- ↑ 1 2 Мальцев, Г. И. Народное врачевание коми-пермяков / Г. И. Мальцев. – Кудымкар : Общество радетелей коми-пермяцкого языка и культуры «Югӧр», 2020. – 96 с. – С. 67. ISBN 978-5-907334-34-2.
- ↑ https://www.healingfoodreference.com/radish.html