Вепссэз

Экспертиза РАН

Чулӧтӧм экспертиза
Россиялӧн наукаэз академияӧн

Унажык

РНА-лӧн экспертиза

Чулӧтӧм экспертиза
Россиялӧн наукаэз академияӧн

Унажык

Вепссэз
Ӧння кадся асним	vepsläižed, vepsä, lüdinikad
Отир лыд	4900 мымда
Олӧмин	Российскӧй Федерация: 4534 (2021 во), 8240 (2002 во)  Карелия: 3423 (2010 во), 4870 (2002 во) Ленинград область : 1380 (2010 во), 2019 (2002 во) Вологда область : 412 (2010 во), 426 (2002 во)  Санкт-Петербург: 318 (2002 во) Мурманск область : 128 (2002 во) Кемерово область : 83 (2002 во)  Украина: 281 (2001 во)  Эстония: 55 (2021 во)  Беларусь: 12 (1999 во)  Латвия: 4 (2022 во)
Археологическӧй культура	Дьяковскӧй культура
Кыв	вепс кыв, роч кыв
Религия	унажыксӧ Роч православнӧй вичку
Пырӧ	финн-йӧгра йӧз, балтика финн йӧз
Ӧтувтырья отир	кареллэз (людиккез), балтика финнэз
Вужжез	весь, заволочскӧй чудь
Медиафайлы на РУВИКИ.Медиа

Вепссэз (вепс. vepsläižed; рочӧн вепсы, официальнӧй нимыс 1917 воӧдз рочӧн чудь) — балтика дорся финн кывья фин-йӧгра отир группаись етша лыда йӧз. Вепссэз олӧны унажыксӧ Карелия Республикаись Онега да Ладога тыэз гӧгӧрын, да сідзжӧ Ленинград да Вологда областтезын. Ӧтса вепс отира вологодскӧй посад — Вепсскӧй национальнӧй посад.

Вепссес юксьӧны куим группа вылӧ: ойвыв, шӧрӧт да лунвыв. Кӧть и диалекттэзас абу ӧткодьӧсь, этна группаэзісь отир лӧн вермӧны кокнита сёрнитны ӧтамӧдкӧт чужан кывйӧн.

Лингвистическӧя балтика финнэз коласын матісьжык йӧзӧн вепссэзлӧ людиккез да кареллэз. Ӧння кадӧ быдӧс вепссэс баитӧны рочӧн да унаӧн ассимилируйтчисӧ ни. 2006 восянь йӧзыс пыртӧм Российскӧй Федерациялӧн Ойвыв, Сибирь да Ылі Асыввыв вужотир нимлёдзӧ.

Ниммез да этногруппаэз

Асниммезныс — vepsä, vepsläižed, bepsä, bepsaažed, lüdinikad, lüdilaižed, tägalaižed. 1917 воӧдз «вепссэс» официальнӧя шусисӧ «чудьӧн». Этноним «вепс» паськаліс ӧння кадӧ ни. Деревняэзын роч сёрниын сідзжӧ вӧвлі «чухаррез» нето «кайван» ниммез, кӧдна вӧлісӧ серӧм нето нёрсян характераа.

Вепсскӧй национальнӧй волостьлӧн дӧрапас

Вепссэс торйӧтчӧны куим этнографическӧй группа вылӧ:

• ойвыв (онега) вепссэз — Онега ты рытвыв-лунвыв вадорын (Карелия лунвылын (кӧркӧся Вепсскӧй национальнӧй волость Шёлтозеро посадын юркарӧн) Ленинград областькӧт визир вылын);
• шӧрӧт (оятьса) вепссэз — Оять ю катытын да шӧрын, Капша да Паша юэз петаннэз дын (Ленинград область ойвыв-асыввылын да Вологда областись ойвыв-рытвылын);
• лунвыв вепссэз — Вепсскӧй вылынінлӧн лунвыв кырылаинын (Ленинград область асыввылын да Вологда область ойвыв-рытвылын).

Кыв да гижӧт кыв

Вдз. сідзжӧ: Вепс кыв

Генезис да история

Ӧння кадӧдз туяліссез эзӧ вермӧ тӧдсьӧтны, кыдз аркмис вепс этнос. Чайтсьӧ, мый аркмӧм сьӧрті вепссэс йитчӧмӧсь мӧдік балтикабердся финн кывья отир аркмӧтӧмӧн да мый нія янсӧтчисӧ ны дынісь миян эрася I сюрсво мӧдӧдза джыннас, олісӧ Оять, Свирь, Паша юэз дорын. Да сюрсво пом кежӧ овмӧтчисӧ Ладога, Онега да Белое тыэз коласӧ. X—XIII сёвоэзся курганкодь шойнаэз позьӧ ни тодилявны кыдз важ вепсскӧйез.

Лыддиссьӧ, мый медоддзаись вепссэз вӧлісӧ касьтылӧмӧсь миян эрася VI сёвоӧ (остготскӧй историк Иордан гижӧ vasinabroncas йӧз йылісь, кӧда вӧлі готскӧй король Германрих кипод увтын. Адам Бременскӧй гижӧ wzzi нима ойвывся отир йылісь. Арабскӧй историческӧй традиция, Ибн Фадлансянь (X сёво), касьтывлӧ вису этноним.

Роч летописсез IX сёвосянь шуӧны, тыдалӧ, сійӧ жӧ отирсӧ весьӧн. Роч писцовӧй небӧггез, вежаморттэз олӧм йылісь гижӧттэз да мӧдік юӧр ӧшмӧссэз унажыксӧ тӧдӧны важся вепссэсӧ чудь нимӧн. Вепссэзлӧн одзза история сьӧрті медшӧр юӧр ӧшмӧссэзӧн лоӧны важ роч летописсезісь чудь да весь йӧззэз йылісь юӧррез, кӧднӧ наука лыддьӧ ны предоккезӧн. Кадкостся воэз йылісь висьтасын летописец Нестор юӧртӧ чудь да весь йылісь, мый «чудьыс пукалӧ Варяжскӧй саридз дынын» (сідз славяна шувлісӧ Балтика саридзсӧ). «Варяггез сідзжӧ пукалӧны Варяжскӧй саридз дорын, но эстӧн нія пришваэз… а Белоозеро дорын пукалӧ весь, кӧдна татӧн медозза оліссез…» «Кадкостся воэз йылісь висьтасын» варяггезлӧн корӧм йылісь висьтасьӧмыс пондӧтчӧ летописьлӧн дженытик юӧртӧмсянь: «6367 (859) воӧ саридз сайися варяггез босьтлісӧ вот чудьлісь, словеналісь, мерялісь, весьлісь да кривиччезлісь».

Финн-йӧгра отир миян эрася I—II срв. кадвежын.

IX—XI сёвоэзӧ важ весь культура вӧлі ни зорамӧм. Весьыс пырис ойвыв вӧр зонаись мувӧдитіссез типӧ, кӧда ӧддьӧн паськаліс сія кадӧ овмӧс комплекснӧй характер кузя. X—XI сёвоэзӧ весьыс мыччиссьӧ ни кыдз тӧдчана этническӧй ӧтса — одзза феодальнӧй йӧз, абу увтыр нето да увтыррезлӧн чукӧр.

Важся вепссэз орсісӧ ыджыт роль Важ Рочму аркмӧтӧмын. Летописсез сьӧрті, нія славянакӧт — словена да кривиччезкӧт — ӧтлаын аркмӧтісӧ военно-политическӧй союз, кӧда пуктіс подув канму аркмӧтӧмлӧ. Вепссэзлӧн сэтшӧм союзӧ пырӧмыс аркмис ны Ыджыт Волгася вузасян туй вылын олӧм кузя — Ладога да Онега тыэз коласын, эта туйкостыс орсіс ыджыт роль визирсайся вузасьӧмын.

Славяна паськыт колонизация тӧдчӧмӧн вежис регионлісь этническӧй карта. Но традиционнӧй олан ареалын — тыэз коласын — вепссэз кужисӧ видзны да одзлань зорӧтны ассиныс культура да паськӧтны сійӧ ордчча отир вылӧ. Сэтшӧм ӧтолӧмыс тӧдчана региональнӧй топонимикаын да роч кыв диалекттэзын.

Феодальнӧй да религиознӧй дзескӧтӧм вынсялӧм кузя вепссэс кошшисӧ сыись мездӧтчӧм мӧдіклаӧ овмӧтчӧмӧн. Вепссэз, кыдз висьталіс Д. В. Бубрих, лӧсьӧтісӧ роч канмулісь паськалӧм Ойвыв отаинын.

Онега да Ладога тыэз коласын (асланыс медшӧр этническӧй территорияын) вепссэз олісӧ 1 сюрсво пондӧтчикӧн, жагӧник мунісӧ асывланьӧ. Кынымкӧ группа вепссезісь ӧтлаасисӧ мӧдік этноссэзкӧт — шуам, ХІІ-ХV сёвозӧ вепссэз, кӧдна мунісӧ Свирь юсянь ойвывланьынжыкӧ, пырисӧ карел этнослӧн чукӧррезӧ — людиккезӧ да ливвиккезӧ. Ойвывся вепссэс лоӧны сёрӧнжык локтӧм увтыррезісь йӧзӧн, кӧдна абу на сорласьӧмась кареллэзкӧт.

Гиморецкӧй погост. Енмам чужӧм нима вичкулӧн (1659 во) эм сідз шуана «пульсируйтісь» вичку юр (вылісь кыкьямыс дораыс пырӧ улісь осьтаӧ, кӧда оссьӧ дзоридз моз) — вепс керкулэбтанлӧн ассяматор.

Вепссэзлӧн ойвыв-асыввылӧ — Обонежьеӧ да Заволочьеӧ — мунӧмсянь аркмисӧ вепс группаэз, кӧдна роч историческӧй источниккезын ӧтувтӧмӧн шусьӧны заволочскӧй чудьӧн. Этна группаэзісь медӧддьӧн асыввывсяэс участвуйтісӧ рытвыв комиэз аркмӧтӧмын. Мӧдіккес вӧлісӧ ассимилируйтӧмӧсь славяна колонизация коста.

Вепссэзісь ыджытжык тор XIII—XV сёвоэзӧ олісӧ Новгород муись Обонежскӧй рядын, да сыбӧрын Обонежскӧй пятинаын. Новгородсӧ Москва канму бердӧ ӧтлаӧтӧм бӧрын вепссэс вӧлісӧ пыртӧмӧсь канмуся (гӧра) крестьяна лыдӧ. ХVІІІ сёво пондӧтчикӧ ойвывся вепссэс вӧлісӧ крепитӧмӧсь Олонецкӧй (Петровскӧй) металлургическӧй да оружейнӧй заводдэз бердӧ, а оятскӧйез — Лодейнопольскӧй верфь бердӧ.

1719 вося медодзза ревизия сьӧрті вепссэс вӧлісӧ 8,3 сюрс морт.

ХVІІІ сёвоӧ этнограффез эзӧ гижӧ вепссэз йылісь. Н. Карамзин гижис аслас «Россия канмулӧн история» нима небӧгын, мый «весь, меря, мурома пӧртчисӧ славянаӧ» да ӧшисӧ. Вились «осьтіс» вепссэсӧ да нылісь кывсӧ этнограф А. М. Шёгрен 1824—1829 воэзӧ, кӧр адззис нылісь нёль группа Белоозеро, Тихвин, Лодейное поле да Вытегра гӧгӧр да арталіс, мый нія аркмисӧ летописсезісь тӧдса весь йӧзісь.

Медодз тӧдмаліс вепссэзлісь лыдсӧ академик П. И. Кёппен. Сы арталӧм сьӧрті, 1848 воӧ Европейскӧй Россияын олӧмась 15 617 вепс, ны лыдын Олонецкӧй губернияын — 8550, Новгородскӧйын — 7067.

1897 воӧ Россияпасьтся отирлыддьӧм сьӧрті вепссэзлӧн лыдыс вӧлі 25 820 морт, ны лыдын 7,3 сюрс олісӧ Асыввыв Карелияын, Свирь ю ойвылын. 1897 воӧ вепссез вӧлісӧ 7,2 % Тихвинскӧй уездісь да 2,3 % Новгород губернияись Белозерскӧй уездісь.

XIX сёво помын вепссэз коласісь куимӧт тор — медодз, айпӧлӧс — тӧдісӧ роч сёрни. Олонецкӧй губернияын 1906 вося обзорын тӧдчӧтӧм, мый вепссэз ассимиляция вылӧ «тодиль влияйтӧ школа, кытӧн челядь велӧтчӧны баитны рочӧн». Роч кывлӧн паськалӧмыс тӧдсис вепссэз вылӧ ны етша лыд да абутӧм гижӧт кыв кузя.

1926 вося отирлыддьӧм сьӧрті, вепссезлӧн лыдыс ӧддьӧн содіс да лоис 32 773 морт (99,2 % олісӧ деревняэзын, 94,7 % национальность да чужан кыв ӧтлаасисӧ). Виль административнӧй юкӧм сьӧрті, вепссэз пырисӧ Карельскӧй АССР-ӧ да Череповец да Ленинград областьэзӧ (ӧтлаасисӧ 1927 воӧ), 1937 воӧ Ленинград областьын вепссэзлӧн муэзлісь тор вуджӧтісӧ сы кадӧ аркмӧтӧм Вологда областьӧ. Отирсӧ быдкодь регионнэз коласын янсӧтӧмыс тӧдсис сы зортӧм вылӧ.

1920—1930 воэзӧ, кӧр отирыс олісӧ компактнӧя, вӧлісӧ аркмӧтӧмӧсь вепсскӧй национальнӧй районнэз (Ленинград областьын Винницкӧй (1931—1937) да Карельскӧй АССР-ын Шелтозерскӧй (1927—1956), а сідзжӧ вепсскӧй сельсоветтэз да колхоззэз. 1930-ӧт воэз пондӧтчикӧ одзшколаын пондісӧ велӧтны вепс кыв да уна велӧтан предметтэз эта кыв вылын, вӧлісӧ лӧсьӧтӧмӧсь вепс кыв велӧтан небӧггез латинскӧй графикаӧн.

1937 воӧ вепс кыв вылын велӧтӧмыс школаэзын вӧлі дугдӧтӧм да быдсӧн вуджӧтӧм роч кыв вылӧ. Кыкдас воӧн карся вепссэз унаӧн вуджисӧ кык кывсянь дзир роч кылӧ. Сія жӧ 1937 воӧ Винницкӧй национальнӧй районлісь вӧлі бырӧтӧм национальнӧй статус, да 1957 воӧ вӧлі игналӧм Шелтозерскӧй район Карелияын.

1950-ӧт воэзсянь, кӧр вынсялісӧ миграционнӧй процессэз, вепссэз урбанизируйтчисӧ да нылӧн лоисӧ унажык экзогамнӧй гӧтрасьӧммез, Карелияын вепссэз пондісӧ ассимилируйтчыны ӧддьӧнжык. Вологда да Ленинград областтезын сыӧдз вайӧтіс власттезлӧн политика. 1970 да 1979 воэзся отирлыддьӧммез коста Вологда да Ленинград областтезын гижиссез юраліссез тшӧктӧм сьӧрті гижисӧ вепссэсӧ роччезӧн. Сія жӧ кадӧ власттез гижисӧ вепссэсӧ «роччезӧн» и паспорттэзӧ. 1983 воӧ роч национальностьӧн паспорттэз вӧлісӧ 63,5 % вепссэзлӧн, ны коласісь 54,1 % вӧлісӧ гижӧмӧсь роччезӧн власттез инициатива сьӧрті. Сідзжӧ унаись пондылісӧ овмӧтны вепссэсӧ мӧдіклаӧ — шуам, кӧр Вологда обкомлӧн эз пет вуджӧтны шимозерскӧй вепссэсӧ Ошта районӧ, вӧлі вынсьӧтӧм политика, кӧда сьӧрті пӧдналісӧ больницаэз, школаэз, почта. Сы кузя 1959 во кежӧ шимозерскӧй вепссэз колисӧ районсӧ да вуджисӧ Ленинград областись Подпорожскӧй да Винницкӧй районнэзӧ, а сідзжӧ мӧдік регионнэзӧ.

Вепссэзісь джын мымда овмӧтчисӧ каррезӧ. 1989 вося отирлыддьӧм сьӧрті СССР-ын олісӧ 12,1 сюрс вепс, но дзир 52 % ны коласісь шуисӧ вепс кывсӧ чужан кывйӧн.

1989 воӧ пондӧтчис вепсскӧй гижӧт кыв ловзьӧтӧм, петісӧ оригинальнӧй гижӧттэз да вуджӧтӧммез.

Вепссезлісь ДНШ-сӧ туялӧм мыччаліс, мый Y-ДНШ сьӧрті нылӧн доминируйтӧны Y-хромосомаа гаплогруппа N1a1 (38,5 %) да Y-хромосомаа гаплогруппа R1a (35,9 %). Куимӧтӧн лоӧ Y-хромосомаа гаплогруппа N(xN3)-M231 (17,9 %), нёльӧтӧн — Y-хромосомаа гаплогруппа I-M170 (5,1 %), витӧтӧн — Y-хромосома гаплогруппа R1b-M173/M269 (2,9 %). МтДНШ сьӧрті унажыкыс H митохондриальнӧй гаплогруппа (57,6 %), мӧдӧдззаӧн лоӧ U5 митохондриальнӧй гаплогруппа (16,8 %).

СССР-ын да Российскӧй Федерацияын вепссэз лыдлӧн динамика

Республикаэз да областтез	1926	1937	1939	1959	1970	1979	1989	2002	2010
СССР	32 785	29 842	31 679	16 374	8281	8094	12 501	...	...
РСФСР / Российскӧй Федерация	32 784	29 585	31 449	16 170	8057	7550	12 142	8240	5936
Карелия	8587	9007	9388	7179	6323	5864	5954	4870	3423
Ленинград область	12857	15 146	15 571	8026	650	774	4273	2019	1380
Вологда область	0	5432	4976	117	282	65	728	426	412
Череповец губерния	11328	-	-	-	-	-	-	-	-
Санкт-Петербург / Ленинград	5	0	198	0	154	208	368	318	271
мӧдік регионнэз	7	0	1316	848	648	639	819	607	450
мӧдік союзнӧй республикаэз	1	257	237	204	224	544	359	…	…

Ӧння кадся олӧмин да лыд

Ӧтласа лыдыс Россияын — 5936 морт 2010 вося отирлыддьӧм сьӧрті (8240 морт 2002 вося отирлыддьӧм сьӧрті, 1989 воӧ — 12 142 морт; 1959 воӧ — 16 170 мымда).

Карелияын олӧны 4870 вепс (2002 во, 1989 воӧ — 5954 морт), мый лоӧ вепс йӧзыс ӧтласа лыдісь джынся унажык. XX сёво шӧрӧдз вепссэс олісӧ Карелия асыв-лунвылын, унажыксӧ Онега ты рытвыв вадор пӧлӧн Шокша деревнясянь лунвыв да асыв-лунвывланьынжык. 1957 воӧдз вӧлӧм Шёлтозерскӧй районын 1926-ӧт воӧ вепссэс вӧлісӧ 95 % быдӧс отирсис. Одзланься миграционнӧй процессэз кузя Карелия юркарын ӧддьӧн содіс вепссэзлӧн концентрация. 1926 воӧ кӧ Петрозаводскын олісӧ 1,2 % карельскӧй вепссез, то 1939 во кежӧ лыдыс вӧлі содӧм 25,2 %-ӧдз да содӧм одзлань дугдывтӧг (1970 воӧ — 44,1 %, 1989 воӧ — 51,7 %). 2002 вося отирлыддьӧм сьӧрті Петрозаводскын олісӧ ни 55,7 % Карелияись вепссэз. Вепссэзлӧн юркарӧ овмӧтчан процесс лоӧ ыджыт катализаторӧн популяциялӧн одзлань дзугсьӧм понда — Петрозаводскын вепссэс аркмӧтӧны дзир 1,0 % карын олісь лыдын, и сэтшӧм олӧмыс дырни нія фактическӧя чожа мыйись ассимилируйтчасӧ локтан кадӧ.

1994 воӧ Карелияись Прионежскӧй районісь территорияын вӧлі аркмӧтӧм Вепсскӧй национальнӧй волость. Вепсскӧй национальнӧй волостьын оліссез олісӧ 14 оланаинын, кӧдна вӧлі ӧтлаӧтӧмӧсь куим национальнӧй вепсскӧй сельсоветӧ. Вӧвлӧм волостьлӧн шӧринӧн — Шёлтозеро посад — иналӧ Петрозаводсксянь 84 км ылынаын. 2006 во тӧвшӧр 1 лунӧ муниципальнӧй реформа коста национальнӧй волостьыс вӧлі пӧдналӧм. Ӧння кадӧ Карелия Республикаын эмӧсь куим вепсскӧй посадму: Шёлтозерскӧй, Рыборецкӧй да Шокшинскӧй.

Вепссэзлӧн этническӧй территорияись медыджыт ыжда сьӧрті тор иналӧ Ленинград обласьтын куим административнӧй районлӧн (Подпорожскӧй, Тихвинскӧй да Бокситогорскӧй) визираинын. 2002 вося отирлыддьӧм сьӧрті областьын вӧлісӧ 2019 вепс, 1989 воӧ — 4273 вепс.

Канмуся статистика сьӧрті Федеральнӧй службалӧн Карелия Республикаын территориальнӧй органлӧн «Карелиастат» юӧр сьӧрті, 2024 во тӧвшӧр 1 лун кежӧ республикаын оліссезлӧн лыдыс лоис 523,8 сюрс морт (2022 воӧ шӧрӧта — 527,8 сюрс морт), ны лыдісь 79,9 % олісӧ карын, 20,1 % — посаддэзын. Унажыкыс — Карелия Республикаын — 2 471 морт, сідзжӧ етшажыкӧн Ленинград обласьтын — 925 морт, Вологда обласьтын — 509 морт, Санкт-Петербургын — 254 морт.

Россияын вепссэзлӧн овмӧтчӧм каррез да посаддэз сьӧрті %-ын, 2010 вося отирлыддьӧм.

Ленинград область районнэзын вепс отирлӧн лыд 1989-2010 воэзӧ

Районнэз	1989	2002	2010
Ленинград область	4273	2019	1380
Подпорожскӧй район	2957	1226	909
Подпорожье кар	312	120	79
берся карся оланаиннэз	118	71	75
посад отир	2527	1035	755
Тихвинскӧй район	305	242	133
Тихвин кар	99	85	57
посадся отир	206	157	76
Бокситогорскӧй район	513	204	108
карся отир	71	22	14
посадся отир	442	182	94
Лодейнопольскӧй район	192	76	35
Лодейное Поле кар	78	39	20
удж посёлок Свирьстрой	13	5	0
посадся отир	101	32	15
мӧдік районнэз	306	271	195

Ленинград областьын вепссэзлӧн традиционнӧй овмӧтчан ареал куйлӧ таблицаын мыччалӧм нёль асыввыв районлӧн визираинын да аркмӧ вит торись, кӧдна йитӧмӧсь ӧтамӧдкӧт умӧля . География сьӧрті сія Оять ю бассейн, Вепсскӧй вылынін вывся ваюкан (Vepsän ülüz), Паша, Курба, Колпь да Лидь юэзлӧн петаннэз.

Вологда областись Бабаевскӧй районын олӧны 426 вепс. Национальнӧй вепсскӧй посад статусаӧн лоӧ Куйскӧй посадму (Кийно (Kuja) да Никонова Гора (Pondala) деревняэз).

XX сёво пондӧтчикӧ да коллективизация кадӧ вепссэз мунісь отирись неыджыт группаэз кольччисӧ Кемерово областьын да Иркутск областьлӧн Усть-Ордынскӧй Бурятскӧй округын. Кемерово областьын 2002 вося отирлыддьӧмын вӧлі пасйӧм 83 вепс.

Вӧвлӧм административнӧй районнэз ниммез сьӧрті, а сідзжӧ юэз да тыэз сьӧрті, вепссес янсӧтчӧны уна группаэз вылӧ: шелтозерскӧйез (прионежскӧйез) Карелияын, шимозерскӧйез да белозерскӧйез Вологда областьын, винницкӧйез (оятскӧйез), шугозерскӧйез да ефимовскӧйез Ленинград областьын.

Сідзжӧ 281 вепс вӧлі пасйӧма 2001 вося Украинапасьтся отирлыддьӧмын. Белоруссияын 1999 воӧ олӧмась 12 вепс.

Вепссэзлӧн волыд структураыс характеризуйтсьӧ уна пӧрисьмӧмӧн, мый лоӧ типичнӧйӧн активнӧя ассимилируйтчан йӧзлӧ. Сідз, Карелияын олісь вепссэзлӧн пӧрись морттэзлӧн пайыс локтӧ 35,1 % отир лыдыс сьӧрті (айморттэзлӧн — 21,7 %, иньморттэз — 44,1 %). Шӧрӧт волыдыс 47,8 во (Карелияись роччезлӧн — 34,0 во). Ленинград областьын отирлӧн пӧрисьмӧмыс эшӧ тӧдчанаджык: пенсионнӧй волыда отир лоӧны 55,9 % вепссэз (айморттэзлӧн — 40,4 %, иньморттэзлӧн — 66,0 %), шӧрӧт волыдыс сибалӧ 62,9 воӧдз (роччезлӧн — 39,4 во).

Кыввез — урал кыв увтырлӧн финн-йӧгра группаись вепс кыв да роч кыв.

Вепс кывсӧ 2009 воӧ ЮНЕСКО пыртіс Мирын ӧшан кыввезлӧн атласӧ кыдз «чожа ӧшана кыв».

Унажыкыс эскисьыс — православнӧй христиана.

Уджалӧны Вепс культуралӧн чукӧр Петрозаводскын, кӧдалӧ Карелияись юралан органнэз сетӧны ыджыт отсӧт, да Вепс чукӧр Санкт-Петербургын.

Вепссэзлӧн лыд оланаиннэзӧт 2002 воӧ:

• Карелия:
  • Петрозаводск кар — 2698
  • Шёлтозеро посад — 385
  • Рыбрека посад — 322
  • Кварцитный посёлок — 183
  • Кондопога кар — 155
  • Шокша посад — 119
• Ленинград область:
  • Винницы посад — 309
  • Подпорожье кар — 118
  • Курба посёлок — 111
  • Лукинская деревня — 101
• Санкт-Петербург:
  • Санкт-Петербург кар — 318

Традиционнӧй уджжез

1930-ӧт воэз шӧрӧдз вепссэс олісӧ ыджыт, 3-4 поколеннёа семьяэзӧн. Быдӧс олӧмнас семьяас веськӧтліс сылӧн юралісь — медпӧрись айморт, дед нето ай — ižand («кӧзяин»). Сылӧн иньыс — emäg («кӧзяйка») — видзӧтіс пода (вӧввез киння) да гортыс сьӧрын, лӧсьӧтіс сёян, кыйсис да вурис паськӧм.

Унажыксӧ вепсскӧй крестьянинлӧн оланыс вӧлі йитӧм мувӧдитӧмӧн. Вепссэс быдтісӧ рудзӧг, ид, зӧр, анькытш, бобиэз да етшажык шогді да картов. Техническӧй культураэзісь быдтісӧ шабді, таг, карчись — сёртни. Сёрӧнжык пондісӧ быдтыны лук, калига, кушман, капуста, морков, картов. Подавӧдитӧмыс орсіс отсалан роль. Сія эз вӧв паськыт, сідз кыдз эз тырмӧ турунаиннэс. Быдтісӧ мӧссэз, вӧввез, баляэз. Шӧрӧт овмӧсын вӧлі вӧв, 2-3 мӧс, баляэз. Ойвывся вепссэзлӧн ыджыт горттэзын видзисӧ 4-6 вӧв да гӧняйтана вӧвгоз, 12 мӧс, баля табун. Оятьдорся вепсскӧй деревняэзын (Пёлдуши, Бахарево) XIX сёво помын племеннӧй пода быдтӧм, сійӧ матісь деревняэзісь небӧм да Петербургӧ вузалӧм понда ветлӧм лоис торья уджӧн да сетіс отирыслӧ ыджыт шедтӧс.

Чери кыйӧм, да сідзжӧ тшак да ягӧд ӧктӧм вӧлісӧ ыджыт тӧдчӧтаӧсь гортын сёйӧм понда.

XVIII сёвося мӧд джынсянь паськаліс удж вылӧ ветлӧм — вӧр заптӧм да кылӧтӧм, Свирь, Нева да мӧдік юэз вылын бурлачитӧм. Оять ю дорын вӧлі зорамӧм сёйись дозмук керӧм. Советскӧй кадӧ ойвывся вепссэзлӧн зорамис декоративнӧй строительнӧй из промышленнӧя заптӧм, подавӧдитӧм лоис яй да йӧв веськӧла.

Айморт уджӧн вӧлі пуись, банісь быдберся керӧм, бадь да коз вужжезісь кыйӧм. Нія керисӧ пуовӧй бекӧрпань, уджаннэз — кыйсяннэз, печканнэз, рамаэз да мӧдіккез. Пуись керӧмторыс вӧлісӧ мичмӧтӧмӧсь серавундалӧмӧн.

Инькаэс кыйсисӧ, вурисӧ паськӧм да серӧтчисӧ.

Традиционнӧй керку

Вепссэзлӧн традиционнӧй оланін да материальнӧй культура вачкисьӧны ойвывся роччез вылӧ; торьялӧммез: Т-формаа олана жырыс йитӧм кык сувда картакӧт; сідз шуана финскӧй пызан (фасад дынын, абу ыбӧс дорся пельӧсын).

Традиционнӧй паськӧм

Инькаэзлӧн традиционнӧй паськӧмлӧн ассяма — унажыксӧ юбка комплект (юбка да ковта), сідзжӧ сарапаннэз.

Традиционнӧй сёян-юан

Традиционнӧй сёян: шома нянь, чериняннез, курник пирӧг, «калиткаэз» — рудзӧг пизись керӧм шаньгаэз; чериись керӧм сёяннэз.

Юаннэз: сур (olud), няня квас.

Рудзӧг нянь вӧлі вепсскӧй пызан вылын медшӧр сёянӧн. Челядьсӧ учӧтсянь вердісӧ рудзӧг няньӧн, кӧдӧ пазӧтісӧ йӧлӧ. Рудзӧг пизись керисӧ медрадейтана пӧжассэз — калиткаэз (kalitkad), кӧрышшез (korostad), чериняннез (kalakurnik). Вепсскӧй пӧжассэз коласын тӧдса вид — зять понда пирӧггез. Кӧрышсӧ сы понда быргӧтісӧ шогді нянись, сы пуктісӧ парӧг тэсись, шыдӧсісь да сакарись. Пирӧггесӧ жаритісӧ виын. Зять понда пирӧггесӧ керисӧ сваттэз локтік кежӧ; да чӧскыт пирӧггезӧн тёщаыс гӧститӧтліс том зятьсӧ гӧтрасьӧм бӧрсянь иньыс ордӧ медодззаись вовлікӧ.

Тыэз да юэз дорын олісь вепссэзлӧн рационас ыджыт пай вӧлі черилӧн. Сыись во сьӧрна пувлісӧ черива, солалісӧ да косьтывлісӧ горрезын. Черисис керӧм меддонтана сёянӧн вӧлі чернянь.

Яйыс вӧвлі вепссэз пызаннэз вылӧ вель шоча. Подасӧ начкывлісӧ сёр арӧн, яйсӧ солалісӧ кӧньӧссэзӧ. Заптісӧ сійӧ солалӧмӧн да косьтӧмӧн. Каттьӧм кыйӧтӧ сола яйсӧ одз тулысӧн ӧшӧтлісӧ тодиль сы понда керӧм керку одзӧ потш вылӧ. Гожумӧн кайӧтлісӧ вӧскӧ да видзисӧ сэтчин кык во сьӧрна

Традиционнӧй олӧм да ритуаллэз

1917 воӧдз кольччисӧ архаичнӧй социальнӧй институттэз — посадся община (суйм) да ыджыт семья.

Семейнӧй обряддэз ӧткодьӧсь ойвывся роччезкӧт; эмӧсь этшшӧм ассяматоррез: ойся корасьӧм, гӧтрасьӧм церемония дырни томгозъя ритуальнӧй черинянь сёйӧм; кык типа дзебсян — бӧрдӧмӧн да кулӧмсӧ «гажӧтӧмӧн».

Религия

XI—XII сёвоэзӧ вепссэз коласын паськаліс православнӧй эскӧм, но сы дырйи дыр кежӧ кольччисӧ одззася эскӧммез — шуам, суседкоӧ (pert’ižand), видзисӧ амулеттэз (ӧтікӧн ны коласісь вӧлі сирлӧн ан); шогаліссез кошшисӧ отсӧт тӧдіссезлісь (noid).

Уна вепс культура туяліссез тодилялӧны, мый вепссезлӧн тӧдчӧ христианскӧй да одззася эскӧм ӧтлаасьӧм. Меддонтанаӧн вепссезлӧн вӧлі Вӧрись — mecižand. Сійӧ сідзжӧ шуӧны mecanuk, mecanmez’, mechiine, korbhiine. Сія олӧ иньыскӧт — mecanak, mecanemäg, а мукӧд коста и челядьыскӧт. Вӧрисьыс йылісь висьтассьӧ, мый сія ыджыт мыгӧра кузь айморт, кӧда пасьтасьӧм шульга вевттьӧса да йиасьӧм гӧрд кушакӧн. Медодз вӧрӧ пырикӧ колӧ пуктыны сылӧ гӧснеч mechiine, гижӧ В. Н. Майнов, «эд сія шудтӧ оз сет да пыртас сэтшӧм дзибьяинӧ, кытісь он ни пет». Вӧраліссезлӧ коліс медодзза кустӧ шульга киӧн чапкыны кынымкӧ зӧр тусь, поснит сьӧм, но не ыргӧнісь, бордгӧннэз, «мый мыччаліс, мый гӧснечсӧ вайис сія, кин эм му вылын, му пытшкын да енӧжын». Вӧрын, медбы не лӧгӧтны «кӧзяинсӧ», эз позь видчыны, жугдыны кай поззэз, кӧдзывкаррез, ковтӧг керавны пуэз.

Кин эз кывзісь, сы вылӧ сія лэдзліс шог, шуӧм сьӧрті мортыс вермис «сюрны умӧль коктуй вылӧ» да ӧшны. Вӧр йылісь кыдз ловья мир йылісь чайтӧм мыччалӧ пословица «Kut mecha, muga i mecaspää (mecaspäi)»— «Кыдз вӧр дынӧ, сідз и вӧрыссянь».

Вепс муыс XV сёво помын — XVI сёво понын лоис паськыта тӧдса Вежа Александр Свирскийлӧн уджӧн, кӧда, кыдз висьталӧны мукӧд туяліссез, вӧлі вепс. Сы вепс увтырын чужӧм йылісь гижӧм и мукӧд небӧгын, кӧдна лэдзӧмӧсь Роч православнӧй вичкуӧн отирӧс велӧтӧм могись.

Гора нима вепссэз

• Александр Свирский — православнӧй вежа морт, игумен.
• Николай Абрамов — вепс поэт, журналист, вуджӧтісь да актёр.
• Иван Голунов — туялісь журналист.
• Марк Горбачёв — советскӧй канму уджалісь.
• Нина Зайцева — литератор, филология доктор.
• Иона Яшезерский — православнӧй вежа морт.
• Анна Лисицына — партизанка, Советскӧй Союзлӧн Герой.
• Рюрик Лонин — вепсскӧй фольклор чукӧртісь, Шелтозеро вепс этнография музейлӧн аркмӧтісь, гижись (гижис рочӧн да вепсӧн), вепс культура туялісь да пропагандист.
• Степан Макарьев — советскӧй этнограф, фольклорист, гортладор история туялісь.
• Иван Манькин — советскӧй партийнӧй да канму уджалісь.
• Андрей Матвеев — Олнонецкӧй губерниясянь Учредительнӧй собраннёын депутат (1917).
• Анатолий Петухов — вепс гижись. Гижис рочӧн да вепс кыввезӧн, медодзза вепс кывья профессиональнӧй гижись.
• Марк Пименов — 1 гильдияись купец, Петрозаводск карлӧн юралісь, меценат.
• Василий Пулькин — литератор, педагог.
• Раиса Лардот — финскӧй гижись.
• Зинаида Строгальщикова — история кандидат, КРОО «Общество вепсской культуры» правленнё юралісь, ӦНО вужотир пыруджалана форумӧ пырись.

Вепссэзлӧн фольклор

Фольклорлӧн эпическӧй жанррез коласын интерес петкӧтӧны историческӧй эпосісь торрез — медодзза оліссез йылісь преданнёэз, сідз шуана паннэз йылісь, да сідзжӧ чудь йылісь. Зорамӧ модянкывья эпос (волшебнӧй, бытовӧй, сатирическӧй сказкиэз). Ӧнӧдз видзсьӧны обрядовӧй фольклорись мукӧд жанррез — шуам, дзебсян герьянкыввез. Паськыта тӧдсаӧсь быдкодь пословицаэз, поговоркаэз, борда кыввез.

Шелтозероись вепс этнография сьӧрті музей

Вепсскӧй музыкальнӧй фольклор мотиввез сьӧрті профессиональнӧй композиторрез гижисӧ шылад: В. Тормис «Вепсскӧй тӧв», Р. Пергамент «Вепсскӧй рапсодия», Л. Вишкарёв «Вепсскӧй сюита», А. Холанд «Вепсскӧй тема вылӧ фантазия».

2006 воӧ Карелия Республикаись «Кантеле» сьылан да йӧктан национальнӧй ансамбль лӧсьӧтіс «Вепсскӧй фантазияэз» программа.

2008 воӧ вӧлі аркмӧтӧм вепсскӧй фолк-группа «Noid», кӧда репертураын традиционнӧй вепсскӧй ӧннямоз аранжируйтӧм сьыланкыввез.

Национальнӧй вепсскӧй фестиваллез да форуммез

Быд во Вепс культура котырись активисттэз чулӧтӧны быдкодь конкурссэз да вежалуннэз:

• Вепсскӧй вежалун «Elonpu» (Олан пу) чулалӧтьсӧ быд во Ленинград областись Винница посадын да Карелияись Шёлтозеро посадын.
• 2012 во одзгожум 17 лунӧ Ленинград областись Шугозеро посадын чулаліс медодзза вепсскӧй культура сьӧрті региональнӧй вежалун «Vepsän purde» (Вепс ӧшмӧс).
• Конкурс-фестиваль «Вепсская сказка» Рыбрекаын.
• Челядь понда сьылан фестиваль «Песенный клубок» Шёлтозероын.
• «Päiväižen päiv» (Шонділӧн лун) вежалун Шокшаын.
• «Kalarand» (Черивадор) вежалун Рыбрекаын.

Вепс кывья букварь

Топонимика

• Вепсскӧй улица:
  • Вепсскӧй улица Санкт-Петербургын
  • Вепсскӧй улица (Ошта посад, Вологда область)
  • Вепсскӧй улица (Симаново, Вологда область)
  • Вепсскӧй улица (Тихвин кар, Ленинград область)
  • Вепсскӧй мунан (Петрозаводск, Карелия)
• Череповесь (ӧні Череповец кар, Вологода область)

Пасйӧттэз

Литература

• Богданов Н. И. К истории вепсов. По матер. топонимики. — Изв. Карело-Фин. филиала АН СССР, 1951, № 2, с. 24—31 с карт.
• Богданов Н. И. Народность вепсы и их язык. — Тр. Карел. филиала АН СССР, 1958, вып. 12, с. 63—75.
• Вепсы // Народы России. Атлас культур и религий. — М.: Дизайн. Информация. Картография, 2010. — 320 с. — ISBN 978-5-287-00718-8.
• Винокурова И. Ю. Календарные обычаи, обряды и праздники вепсов (конец XIX — начало XX веков). — СПб., 1994. — 122 с.
• Винокурова И. Ю. Традиционные праздники вепсов Прионежья (конец XIX — начало XX в.). — Петрозаводск: ПетрГУ, 1996. — 139 с.: ил.
• Клементьев Е. И. Вепсы: современная этноязыковая ситуация // Прибалтийско-финское языкознание. — Петрозаводск, 2003.
• Королькова Л. В. Люди леса. — СПб.: Любавич, 2013. — 412 с.
• Косменко А. П. Народное изобразительное искусство вепсов / Отв. ред. И. П. Работнова. — Л.: Наука, 1984. — 200 с.
• Кочкуркина С. И. Сокровища древних вепсов. — Карелия, 1990. — 126 с. — ISBN 5-7545-0388-1.
• Майнов В. Н. Приоятская чудь. (Весь — Вепсы) // Древняя и новая Россия. 1877, т. 2. № 5, с. 38—53; № 6, с. 133—143.
• Макарьев С. А. Вепсы. Этнографич. очерк. — Л.: Кирья, тип. «Кирьяпая», 1932. — 40 с.
• Макарьев С. А. Вепсский фольклор // АКНЦ. Ф. 26.
• Малиновская 3. П. Из материалов по этнографии вепсов, в кн.: Западнофинский сб. Л., 1930
• Патрушев В. С. Финно-угры России. Йошкар-Ола, 1992
• Пименов В. В. Вепсы. Очерк этнич. истории и генезиса культуры. — М.; Л.: Наука, 1965. — 264 с.
• Проблемы истории и культуры вепсской народности: [Сб. ст. / Отв. ред. В. В. Пименов]. — Петрозаводск, 1989. — 171 с.
• Рябинин Е. А. Финно-угорские племена в составе Древней Руси. Спб., 1997.
• Строгальщикова З. И. Вепсы. Очерки истории и культуры. Документирование языка, — СПб.: ООО "Издательский дом «Инкери», 2014 во — 264 с.: ил.
• Вепсы : [арх. 3 Тӧвшӧр 2023] / З. И. Строгальщикова; Н. И. Жуланова // Большая российская энциклопедия [Электронный ресурс]. — 2020.

Ыстӧттэз

• Вепсы., «Этнонациональные общности России»
• Вепсы., ЭтноПетербург. РФ
• История и культура вепсов.
• Вепсский праздник — «Древо Жизни», проходит каждый год в селе Винницы Ленинградской области.
• Историко-этнографические данные: Вепсы.
• Шелтозерский вепсский этнографический музей им. Р. П.Лонина.
• Вепсы. Краткая историческая справка. Карелия Республикалӧн официальнӧй сервер
• Вепсский край на сайте Введено-Оятского монастыря.
• Центр национальных культур и народного творчества Республики Карелия.
• Сайт «Коренные народы Карелии».
• Дмитрий Наумов Дорога от язычества к христианству. Редакция газеты "Карелия".
• Сергей Хохлов Вотчина Вира. Отдел комплексных научных исследований Карельского научного центра Российской академии наук.
• Музей вепсской культуры и быта «Вепсская изба» («Vepsoiden Pert`»). Частное собрание В. А. Кипрушкина