Чӧтверг

Зевс статуялӧн римскӧй копия, енлӧн, кӧда нимсянь уна кылӧ паськаліс гым ен да сы планеталӧ сиӧм "четверг" нимсетан традицияыс

Чӧтверг (рочӧн четверг) — неделяс нёльӧт лун, среда да пекнича коласын. 8601 ISO стандарт сьӧрті, четверг лыддиссьӧ недельлӧн нёльӧт лунӧн, а сідзжӧ лунӧн, кӧдасянь пондӧтчӧ неделлеслӧн нумерация: вося медодзза недельӧн лыддьӧны сійӧ, кӧдаын эм вося медодзза чӧтверг.

Аркмӧм

Чӧтверг кылыс пырис роч кылісь.

Мӧдік кыввезын

Комиӧн эмӧсь кык термин эта лун понда: четверг — пырӧма веськыта роч кылісь (коми диалекттэзын — тшекверк, четьверк) да чудьлун — неологизм. Виль терминсӧ вӧзйӧ кыв туялісь Ӧньӧ Лав. Сы шуӧмӧн:

«Чудьлун аркмӧм кык кылісь: чудь да лун. Лун – вежӧртана. Мыля чудь? Чудьнас роччес кӧркӧ шуисӧ финн-йӧграсӧ, а коми мифологияын шуӧны коми язычниккезӧс (важжесӧ), важын кулӧм йӧзлісь ловвесӧ (ӧні ортасьӧны, мыччасьӧны отирлӧ). Перем комиэс сьӧрті кӧ, чуддэс петӧны Ыджыт четвергӧ... Чудь — миян важся коми эскӧмлӧн кольччӧмтор. Эта кузя вӧзйи сины этӧ лунсӧ важ коми эскӧмлӧ. Сэсся мунӧ пекнича — мусульманалӧ, субӧт — еврейезлӧ, вежалун — христианалӧ вежа луннэз. Мед и коми чудьлӧн лоас аслас лун. Эта киндза, "чудь"(лун) да "четь"(верг) кыввес вачкисьӧны одзза торнаныс, поди, эта вермис отсыштны, эттшӧм неологизмсӧ кӧ быль пыртісӧ гижӧт кылӧ».

Роч кылын четверг нимыс аркмӧма «четыре» лыданимись, сідз кыдз четверг — недельын нёльӧт лун (кресення бӧрын). Этанёж аркмӧм лун нимыс мӧдік славянскӧй кыввезын (словак — štvrtok, чех — čtvrtek, хорват да босния — četvrtak, поляк — czwartek, болгар — четвъртък, серб — четвртак, украина — четвер, беларус — чацвер ). Венгерскӧй кылӧ сідзжӧ вуджӧма славянскӧй нимыс — csütörtök.

Кыдзи "нёльӧд" лун чӧтверг шуӧны китай (星期四) да эстонскӧй (neljapäev) кыввезын.

Иудейскӧй да христианскӧй традицияэзын чӧтверг лыддиссьӧ неделься витӧт лунӧн, мый мыччасьӧ греческӧй кылын: Πέμπτη («пемпти») — «витӧт», ивритын: יום חמישי («Йом Хамиши» — «Витӧт Лун»). Сідзжӧ португальскӧй кылын, романскӧй вужья мӧдік кыввезсянь торйӧн, эм quinta-feira кыв, кӧда вежӧртсьӧ «литургическӧй недельлӧн витӧт лун», да аркмӧма традиционнӧй католическӧй нимсянь — «Feria Quinta», кӧда гижӧм религиознӧй тексттэзӧ, кытӧн эз позь касьтывны языческӧй еннэзлісь ниммесӧ.

Кыдз «Витӧд лун» чӧтверг тӧдса квакер чукӧрын, кӧда оз шу чӧтвергсӧ традиционнӧй английскӧй нимнас сы язычествокӧт йитчӧм кузя.

«Витӧт лунӧн» чӧтверг шусьӧ исландскӧй, арабскӧй да индонезийскӧй кыввезын.

Армянскӧй (Հինգշաբթի — hингшабти́), грузинскӧй (ხუთშაბათი — хутшабати), башкирскӧй (кесаҙна), таджикскӧй (панҷшанбе) да татарскӧй (пәнҗешәмбе) кыввезын лоӧ «субӧтсянь вит (лун)».

Важ греккезлӧн чӧтверг вӧлі сиӧм Зевслӧ, кӧда римляналӧн лӧсяліс Юпитерлӧ (итал. Giovedì), скандинаввезлӧн - Торлӧ (англий. Thursday), континентальнӧй германеццезлӧн - Доннарлӧ (немец. Donnerstag). Славяналӧн эта луныс сідзжӧ вӧлі сиӧм гым енлӧ — Перунлӧ. Полабскӧй нимыс чӧтверглӧн вӧлі Peräunedån «Перулӧн лун», кӧть и вермас лоны калькаӧн немецкӧй Donnerstag кылісь.

Унажык ӧння романскӧй кыввезын нимыс кольччӧма римскӧй енӧж да гым ен Юпитер ним сьӧрті. Важ римляналӧн чӧтверг шусис Iovis Dies — «Йовлӧн лун»: латинскӧй кыв вылын Юпитер кывлӧн асалан либӧ босьтан падежжэзын формаыс вӧлі Iovis/Jovis, и этадз вуджис романскӧй кыввезӧ кыдз чӧтверглӧн ним: итальянскӧй — giovedì, испанскӧй — jueves, французскӧй — jeudi, каталанскӧй — dijous, румынскӧй — joi. Сідзжӧ петӧ валлийскӧй кылын — dydd Iau.

Сы кузя мый римскӧй ен Юпитерыс вӧлі ӧткодялӧм германскӧй енкӧт, кӧдалӧн вӧлісӧ лӧсялана функцияэз, то унажык германскӧй кыввезас чӧтверг нимыс петӧ гым ен нимись: датскӧйын, норвежскӧйын да шведскӧйын — Torsdag, фарерскӧйын — Tórsdagur, немецкӧйын — Donnerstag, голландскӧйын — Donderdag. Финскӧй кылӧ сідзжӧ вуджӧма германскӧй ним —Torstai.

Ӧння английскӧй нимыс, Torstai, аркмӧма важ английскӧй Þunresdæg — «Тунорлӧн лун» (-n-ӧштӧмӧн ойвывся диалектын, важ исландскӧй Þorsdagr, мый лоӧ «Торлӧн лун»). Английскӧй Thunor да скандинавскӧй Thor аркмӧмась Thunraz нимись, кыдз шуисӧ прагерманскӧй гым енӧс.

Индияын унажык кыввезын чӧтвергсӧ шуӧны ગુજરાતી - Гурувар: «вара» — «лун» и «Гуру» - «велӧтісь», сійӧн петӧ еннэзсӧ велӧтісь да Юпитер планетаӧн веськӧтлісь Брихаспатилісь синбаныс.

Урду кыв вылын чӧтверг — Jumeraate, мый лоӧ «пекнича одзвыв».

«Четверг», японскӧй кыв вылісь веськыта вуджӧтӧмӧн, - «пу лун» (木曜日).