Пекнича

Афродита статуялӧн римскӧй копияись фрагмент; Радейтӧм ен, кӧдакӧт уна кыввезын йитӧм эта лун нимыс

Пекнича (рочӧн пятница)— недельын чӧтверг да субӧт коласся лун. 8601 ISO стандарт сьӧрті, пекнича — неделяс витӧт лун.

Аркмӧм

Лун нимыс пырис роч кылісь.

Мӧдік кыввезын

Комиӧ (кз. пекнича) эта лун нимыс босьтӧм веськыта роч кылісь.

Унажык славянскӧй кыввезын, ны лыдын и рочыс, пекнича нимыс аркмӧма «пять» лыданимись, сідз кыдз пекнича лыддиссис недельын витӧт лунӧн (кресення бӧрын): беларусскӧй — пятніца, болгарскӧй — петък, чешскӧй — pátek, польскӧй — piątek, сербскӧй — петак, хорватскӧй — petak, словенскӧй — petek, словацкӧй — piatok, украинскӧй — п’ятниця. Венгерскӧй кылын péntek кыв босьтӧм славянскӧй кыввезісь. Мукӧд финн-йӧгра кыввезын нимыс босьтӧм роч кылісь: карельскӧй piätinččä, комиӧн пекнича, мокшаӧн пяденця.

Иудейскӧй да христианскӧй религиознӧй традицияэза муэзын пекнича одзӧ кольччӧ кватьӧт лунӧн. Португальскӧй кылын эм sexta-feira кыв — «литургическӧй недельлӧн кватьӧт лун», мый аркмӧма католическӧй латынь нимсянь feria VI, кӧдӧ гижӧны религиознӧй тексттэзын, кытӧн эз позь касьтывны языческӧй еннэзлісь ниммесӧ. Кыдз «Кватьӧт лун» пекнича тӧдса квакер чукӧрын, кӧда оз шу пекничасӧ традиционнӧй английскӧй нимнас сы язычествокӧт йитчӧм кузя.

Саудовскӧй Аравияын да Иранын, а сідзжӧ уна мӧдік ислам муэзын недель пондӧтчӧ субӧтӧн да помасьӧ пекничаӧн.

Важ римляналӧн пекничаыс вӧлі сиӧм Венералӧ (грек кылісь калька — Афродитес хемера). Этӧ традициясӧ босьтісӧ и важ германеццез, да ӧтлаӧтісӧ Венерасӧ асланыс Фрейя енкӧт. Пекничалӧн Friday английскӧй нимыс аркмӧма важ английскӧй Frīġedæġ кылісь, мый вежӧртсьӧ «Фриггалӧн лун» скандинавскӧй мифологияись Фригга енлӧн ним сьӧрті (важ исл. Frigg — муса), Один енлӧн инь, радейтӧм, гӧтрасьӧм да кагачужтӧм ен. Фрейя нимсянь аркмӧмась пекнича ниммез мӧдік германскӧй кыввезын: Freitag ӧння немецкӧй кылын, Vrijdag голландскӧй кылын, frjá-dagr важ исландскӧй кылын. Кывлӧн ӧння формаыс шведскӧй, норвежскӧй да датскӧй кыввезын — fredag.

Унажык романскӧй кыввезын нимыс аркмӧма dies Veneris латинскӧй кылісь, «Венералӧн лун»: vendredi французскӧй кылын, venerdì итальянскӧйын, viernes испанскӧйын, divendres каталанскӧйын, vennari корсиканскӧйын, vineri румынскӧйын. Сідзжӧ петӧ валлийскӧй кылын dydd Gwener.

Пекничалӧн греческӧй нимыс — Παρασκευή — аркмӧма παρασκευάζω «лӧсьӧтны, лӧсьӧтчыны» кадакывсянь. Сія вежӧртсьӧ кыдз субӧт да вежалун порйӧтӧм кежӧ лӧсьӧтчӧм. პარასკევი (параскеви) грузинскӧй кылӧ босьтӧм греческӧйись.

Христианскӧй традиция сьӧрті, пекнича — видз лун, Исус Кристос крест вылын мучитчӧм касьтылан лун. Сыкӧт йитӧмӧсь лун ниммес Европася мукӧд кыввезын: ирландскӧйын Dé hAoine, гэльскӧйын Di-Haoine да исландскӧйын föstudagur «видз лун».

Важ еврейскӧй кылын и ӧння ивритын пекнича шусьӧ יום שישי Yom Shishi «кватьӧт лун», сідз кыдз мый недельлӧн медодзза луныс — кресення.

Арабскӧй кылын «пекнича» — «Jum’a-tul-Mubarak», аркмӧма «аль-джума» (мусульманскӧй юрбитӧмлӧн) нимись. Казахскӧй (жұма), башкирскӧй (йома) да татарскӧй (җомга) кыввез босьтӧмӧсь арабскӧйись.

Индияын унажык кыввезын пекнича — Шукравар, шуӧм Шукра енлӧн ним сьӧрті, этадз жӧ шуӧны Венера планетасӧ санскритын.

«Пекнича» японскӧй кылын веськыта вуджӧтӧмӧн лоӧ — «зарни лун» (япон 金曜日 кинъё:би). Кыдз и неделись мӧдік лун ниммес, сія аркмӧма «сизим кодзулісь» (японскӧйӧн 七曜 ситиё:) ӧтік — Венера (япон 金星 кинсэй, «Венера планета», «зарни планета») да 曜日 ё: би — «недель лун».