Субӧт

Субӧт — недельын пекнича да вежалун коласся лун.

Аркмӧм

Лун нимыс босьтӧм роч кылісь.

Мӧдік кыввезын

Комиӧн этӧ недель лунсӧ шуӧны кык нёж: субӧта да пывсянлун. Субӧта кылыс пырис роч кыв пыр латинскӧй кылісь. Коми кыв диалекттэзын пантасьлӧны эттшӧм варианттэз: субот, субӧт.
А пывсянлун нимыс йитӧм комиэз олӧмся традициякӧт пывсьыны уджалан недель бӧрын (мӧдік лунӧ позьӧ жӧ, но эта лунӧн колӧ). Сэтшӧм жӧ вежӧртаса Lördag скандинавскӧй кыв («пывсян лун»).

Еврейскӧй кыв шабба́т (ивритын שַׁבָּת шаба́т) традиционнӧя (Иосиф Флавий кадсянь)) йитчӧм швт (שבת) кыввужкӧт, кӧдалӧн вежӧртасыс —"шоччисьны, дугдыны". Библия сьӧрті, Еныс аркмӧтіс муюгытсӧ квать лунӧн, а сизимӧт лунӧ «дугдіс» ассис быдӧс уджжесӧ. «Лун» кывсӧ позьӧ вежӧртны кыдз веськыда, сідз и условнӧя: «сюрс во кыдз ӧтік лун» и с.о. Иудаизмын субӧт — недельын медбӧрья, сизимӧт лун, кӧр Тор да Танах тшӧктӧны дугдісьны уджись, кӧсйӧммезісь, да чулӧтны «вежа собрание».

Ӧння наука сьӧрті, субӧт нимыслӧн «дугдыны» кадакывкӧт йитӧтсӧ лыддьӧны отир ӧмись этимологияӧн. Ӧння кадӧ чайтӧны, мый субӧта нимсӧ еврейес босьтӧмась вавилонскӧй плен дырни аккадскӧй sebūtu «тӧлісь дырся сизимӧт лун» да šapattu, šabattu «тӧлісь дырся дасвитӧт лун, тыр тӧлісь» кыввезісь контаминацияӧн.

Субӧтлӧн еврейскӧй нимыс паськаліс Римскӧй империя да Европаӧт латинскӧй да греческӧй кыввез пыр ӧтлаӧн христианствокӧт. Греческӧй σάμβατον да латинскӧй sabbatum кыввезісь лун нимыс пырис роч да мӧдік славянскӧй кыввезӧ: чешскӧйӧ, словацкӧйӧ, польскӧйӧ, словенскӧйӧ — sobota (латинскӧй кылісь); беларускӧйӧ, сербскӧйӧ, украинскӧйӧ — субота (греческӧй кылісь).

Эттшӧм жӧ традицияыс и романскӧй кыввезын: итальянскӧйын — sabato, французскӧйын — samedi, испанскӧйын да португальскӧйын — sábado, румынскӧйын — sâmbătă. Этадз жӧ аркмӧма армянскӧй — (շաբաթ — šapʰatʿ), грузинскӧй (შაბათი — шабати), венгерскӧй (szombat), башкирскӧй (шәмбе), таджикскӧй (шанбе), татарскӧй (шимбә), казахскӧй (сенбі), аварскӧй (щамат) да чувашскӧй (Шăматкун — «шăмат лун») кыввезын.

Римскӧй империяын эта луныс вӧлі сиӧм Сатурнлӧ, этасянь мунӧ луныслӧн нимыс уна европейскӧй кыввезын. Европаын сизимлуна недельын сизим классическӧй планетакӧт луннэсӧ ӧтлаӧтӧм пондӧтчӧ эллинистическӧй кадсянь . Римскӧй империяын I да III сёво коласын эта традицияыс вужьясис, кыкъямыслуна римскӧй недельсӧ вежис сизимлуна асыввывся недель. Недель луннэзлӧн енкӧт лӧсялана ассоциацияыс, сідзкӧ, абу веськыт, луннэсӧ шуӧмась еннэс нима планетаэз сьӧрті.

Сідз субӧтлӧн латинскӧй нимнас вӧлі dies Saturni («Сатурн лун»), сія пырис важ английскӧй кылӧ кыдз Saeternesdaeg (ӧння английскӧй кылын — Saturday). Вестфалияса, Улыс Саксонияса германскӧй сёрниэзын да асыввывся фризскӧй кылын, кытӧн ёна тӧдчис латинскӧй кыв, субӧт шусьӧ Satertag, сія лоӧ ӧтівужья голландскӧй Zaterdag кывкӧт.

Скандинавскӧй муэзын субӧтсӧ шуӧны lørdag, lørdag, laurdag. Нимыс аркмӧма важ скандинавскӧй laugr / laug кылісь — «купайтчӧм», сідз Lördag — кык кыввужъя кыв, кӧдалӧн вежӧртасыс лоӧ «пывсян лун». Эта нимыс аркмӧм кресення одзын пывсьӧм традиция сьӧрті, кӧда христианствоӧ пырӧм бӧрын пондіс лыддиссьны гажӧн.

Субӧтсӧ официальнӧя шуӧны Samstag быдӧс немецкӧй кывья странаэзын: Австрияын, Лихтенштейнын, немецкӧй кывья Швейцария торын, лунвывся да рытвывся Германияын. Кылыс аркмӧма важ немецкӧй sambaztac кылісь, а сія аскадӧ аркмӧма греческӧйись Σάββατο, мый пырӧм иврит שבת (шаббат) кылісь. Германияын эм и мӧдік ним — Sonnabend, сія аркмӧма важ вывся немецкӧй unnunaband кылісь, и топыта йитчӧма важ английскӧй sunnanæfen кывкӧт. Эта кылыслӧн веськыт вежӧртасыс «Шонді лун одзвыв (ӧння английскӧйын sunday)», мӧдінёж, «Кресення одзся лун». Sonnabend нимнас сёрнитӧны ойвыв да асыввывся Германияын, да сія вӧлі официальнӧй нимӧн ГДР-ын.

Рытвывся фризскӧй кылын субӧтлӧн эмӧсь кык ним: saterdei (Сатурн лун) — «вӧрся фризскӧй кыв» да sneon — «муся фризскӧй кыв», мӧд вариантыс аркмӧма snjoen кылісь: sunne — «шонді» да joen — «одз».

Кельтскӧй кыввезын субӧт луныс сиӧм Сатурнлӧ: ирландскӧйын — Satharn али dia Sathuirn, шотландскӧйын — Disathairne, уэльскӧйын — dydd Sadwrn, бретонскӧйын — Sadorn али disadorn.

Корейскӧй кылын субӧтсӧ шуӧны 토요일 (то-йо-ил — «му лун») али китайскӧй иероглиф 土 — «му» йитӧмӧн , но позьӧ йитны и 토성 (To-Sung 土星) иероглиффескӧт, вежӧртасныс лоӧ «Сатурн».

«Субӧт» японскӧй кывсянь веськыта вуджӧтӧмӧн лоӧ «му лун».

Индияын субӧтыс шусьӧ Шанивар, Шани ним сьӧрті. Эта ведийскӧй ен, и сылӧн планетаыс Сатурн. Таиландын субӧтсӧ шуӧны сани и сія йитӧм Сатурн планетакӧд.

Ӧння маори кылын субӧтыслӧн нимыс «Рахорои», веськыта кӧ вуджӧдны «миськасян лун». Сія английскӧй колонизация кадся кольччӧмтор, кӧр пыртӧм христиантвоӧ маориэс песласьлісӧ, мед ашынас, кресенняас, мунны вичкуӧ. Маориэслӧн эм и мӧдік лун ним — «Хаттареи».

Ыстӧттэз