Гуляева Людмила Петровна
| Гуляева Людмила Петровна | |
|---|---|
 | |
| Чужан лун: | 1952 во одзтулыс 12 лун (74 года) |
| Чужанін: | |
| Канму | |
| Удж | велӧтісь, гижись |
Гуляева Людмила Петровна (1952 во одзтулыс 12 лун, Ӧнтипинчи) — коми-пермяцкӧй кыв да литература велӧтісь, гижись. Питю Ӧньӧ да Михаил Лихачёв нима литературнӧй премияэзлӧн лауреат.
Олантуй
Чужис 1952 во одзтулыс 12 лунӧ Юсьва районісь Ларинын (Ӧнтипинчи сельсовет). Велӧтчис Ӧнтипинчи кыкьямыс класса да Юсьва шӧрӧт школаын. 1969—1974 воэзӧ велӧтчис Перем педагогика институтын коми-роч юкӧтын, помаліс сійӧ кыдз коми да роч кыввез велӧтісь. Помалӧм бӧрын 2 во сьӧрна уджаліс Мелюкинчи школаын, да сэсся 4 во сьӧрна Ӧнтипинчи школаын[1].
1981 восянь 30 во сьӧрна уджаліс Крохалёвчи шӧрӧт школаын, 18 во ныись директораліс школанас[2]. Петіс пенсия вылӧ 2011 воӧ.
Гижан удж
Кывбуррез пондіс гижны школаын велӧтчикӧ. Ыджыт отсӧт зорамӧм понда сетісӧ Василий Климов да Леонид Никитин[1]. Медодзза кывбурыс вӧлі публикуйтӧм «Ленин туй вылӧт» газетаын 1973 воӧ. Медодзза кывбурреза ӧктӧт — «Оланын биок» — вӧлі лэдзӧм 1991 воӧ[1].
Гижӧ кывбуррез да проза. Быдӧссӧ Людмила Гуляевалӧн лэдзӧмӧсь 4 небӧг, куимыс ны коласісь кывбур ӧктӧттэз. «Гажа кад» нима небӧгӧ пыртӧмӧсь учӧт челядь понда висьттэз.
Кывбуррез да висьттэс петавлісӧ «Бичирок» да «Иньва» ӧктӧттэзын, «Силькан» журналын, «Зарниа рӧммез», «Пармалӧн надея», «Ӧтік му — ӧтік кыв» да уна мӧдік уна автора ӧктӧттэзын.
Кывбуррес вуджӧтӧмӧсь роч, коми (зыряна), удмурт, мари да эстонскӧй кыввез вылӧ[1].
2019 восянь Россиялӧн гижиссез Союзӧ пырись[3].
2022 воӧ Людмила Гуляева вӧлі текст авторӧн «Коми-пермяцкӧй кыв сьӧрті ӧтласа диктант» понда, вӧлі босьтӧм «Атаман» нима висьтісь тор[4].
Небӧггес
- Людмила Гуляева. Оланын биок. — Кудымкар: Пермское книжное издательство, Коми-Пермяцкое отделение, 1991. — 79 с.
- Людмила Гуляева. Годдэз и каддэз. — Кудымкар: Коми-Пермяцкое книжное издательство, 2001. — 224 с.
- Людмила Гуляева. Гажа кад. — Кудымкар: Коми-Пермяцкое книжное издательство, 2007. — 104 с.
- Людмила Гуляева. Арся думаэз. — Кудымкар: ПРОО "Общество радетелей коми-пермяцкого языка и культуры "Югӧр", 2017. — 295 с. — ISBN 978-5-91983-044-3.
Донтан пассэз
- Михаил Лихачёв нима литературнӧй премиялӧн лауреат «Гажа кад» небӧг понда (2008);
- Юсьва районлӧн Почётнӧй гражданин (2015);
- Питю Ӧньӧ нима литературнӧй премиялӧн лауреат «Арся думаэз» небӧг понда (2019).
Ас олӧм
Нывкася гижсяныс — Баяндина[2]. Олӧ Крохалёвчиын.
Зоныс — Евгений Гуляев, «Рифей-Пермь» телекомпаниялӧн редактор.
Пасйӧттэз
- ↑ 1 2 3 4 Писатели Коми-Пермяцкого округа // Гуляева Людмила Петровна. Коми-Пермяцкая центральная национальная библиотека им. М. П. Лихачёва. Видзӧтӧм 11 Одзар 2025.
- ↑ 1 2 Сегодня день рождения Людмилы Петровны Гуляевой, Почётного гражданина Юсьвинского района. Официальный сайт Юсьвинского муниципального округа (2024-03-12). Видзӧтӧм 11 Одзар 2025.
- ↑ Два коми-пермяцких автора приняты в Союз писателей России. Коми-Пермяцкая центральная национальная библиотека им. М. П. Лихачёва (2019-01-22). Видзӧтӧм 11 Одзар 2025.
- ↑ Этнокультурная акция "Всеобщий диктант по коми-пермяцкому языку" - 2022 г.. Коми-Пермяцкая центральная национальная библиотека им. М. П. Лихачёва (2022-02-17). Видзӧтӧм 11 Одзар 2025.
