Черинянь
| Черинянь | |
|---|---|
 | |
| Продукттэз | |
| Мыйись керӧм | |
Черинянь — коми отирлӧн касьтісян да вежалунcя сёян. Пӧжалӧм нельпельӧса шӧма няньын чери.
Керӧм
Черинянь керсьӧ шӧма нянись да чериись. Уль черисӧ колӧ весӧтны, гывйыштны да солавны пытшксяняс да вевдӧрсяняс. Кӧрышыс вермас керсьыны кыдз сьӧд пизись, сідз и чочкомись. Няньсӧ кӧтӧны ваӧн, ырӧшӧн да шӧммӧтӧны майӧлӧн, ӧння кадӧ унажыксӧ дрожжиӧн. Няньсӧ пуктӧны под вылӧ да паськӧтӧны. Увтісь кӧрыш вылас позьӧ пуктыны шӧма капуста нето лук, уль картошка торрез нето рис да кольть. Сы вылӧ пуктіссьӧ чериыс торрезӧн нето быдсӧн. Черисӧ вевттьӧны мӧдік кӧрышӧн, дорресӧ чеплялӧны, да сюйыштӧны пӧжасьны.
Одзза кадӧ чериняняс пуктывлісӧ горт юэзісь чери — ар, бурдзигыль, пескан, ёкыш, кельчи, ёді, ком, сирпинь, сын, муткыль, тыпыв[1]. Ӧння кадӧ пуктӧны унажыксӧ босьтӧм чери[2] — скумбрия, горбуша, селёдка, мойва да мӧдік.
Традицияын
Черинянь — тодиль касьтісян[3] да дзебсян[4] сёян, вежалунся сёян. Касьтісян черинянь оз позь вундавны, вевдӧрись кӧрышсӧ колӧ осьтны. Касьтісян чериняньсӧ уналаын оз позь керны сирпинись да муткылись, сідз кыд нія яйсёись чериэз[3]. Отирын лыддиссьӧ, мый муткыльыс сёйӧ вӧйӧм морттэзӧс, а сирпиньыс — ёрдӧм, сідз кыдз сылӧн юрлыас эм перна кодь лы[3]. Юсьвинскӧй районын перна кодь лыыс кузя сирпиньыс лыддиссьӧ медлӧсялана касьтісян кеж чериӧн[3].
Одзза кадӧ чериняньыс вӧлі колана и гӧтрасьӧм коста. Чериыс вермис лоны кӧть кытшӧм, но унажыксӧ солалӧм[5].
Вежалунся чериняньсӧ позьӧ вундавны.
Чериняньыс пыр керсьӧ нёльпельӧсаӧн.[1]
Рецепттэз
Ароккезісь черинянь
Ароккесӧ весӧтны, миськавны. Чериняняс лӧсьӧтны посньӧтӧм лук, сорлавны уль кольтьӧн. Медодз сӧчӧн шӧрас пуктыны луксӧ да невна кольтьсӧ, вӧлісь черисӧ. Подыс кӧ учӧт, позьӧ черисӧ пуктыны кык да куимпӧвсӧн. Вевдӧрас бӧра пуктыны кольччӧм луксӧ да кольтьсӧ. Сӧчӧн дорресӧ лэбтыны чери вевдӧрас, шӧрӧттяс ӧтлаӧтны, кынымиськӧ бытшкыны, да пуктыны горпод вылӧ. Пӧжассьӧм пирӧгсӧ кыскыны, мавтны виӧн, каттьыштны чышкӧтӧ, мед небзьыштіс. Сыбӧрын пымнас сёйны.[1]
Ёкышись черинянь
Юись кыйӧм черисӧ весӧтны, миськавны. Уль сӧчӧн вылас пуктыны солалӧм капуста, лук, чери. Чери вевдӧрас бӧра капуста да лук. Сӧчӧнсӧ кӧстыны. Бытшкавны вевдӧрсӧ. Мавтны уль кольтьӧн. Пӧжавны горпод вылын нето духовкаын противень вылын, видзӧтны, медбы чериыс бура пӧжассис.[1]
Сиг чериись черинянь
Эта чериняньыс керсьӧ сола чериись. Нянь кӧрыш вылӧ пуктыны масьтӧм лук нето листтэзӧн уль картошка, ны вылӧ — черисӧ, сійӧ пуктыны быдсӧн и миськавтӧг, сола ванас. Вевдӧрас бӧра пуктыны лук. Сӧчӧн дорресӧ йитӧтны чери вевдӧрӧттяс, пӧжавны. Черинянь кӧрышыс петӧ бур кӧра, сола кодь.[1]
Кулинарнӧй черинянь
800 г чери, 2-3 лук юр, 40 г ви, сов, сьӧд гормӧг, 1 лаврушка кор. Кӧрышыс сдобнӧй, шӧма. Черисӧ весӧтны, лысэсӧ кыскавны, вундавны тороккезӧн, солавны, пуктыны гормӧг. Янын жаритны постнӧй виын лук. Черинянь позьӧ пожавны капустаӧн нетӧ рисӧн. Солалӧм да шӧма капуста колӧ пӧжны лукӧн. Риссӧ пуны, ӧтлаӧтны жаритӧм лукнас. Кӧрыш вылас тэчны мымдакӧ парӧгсӧ, вӧлись черисӧ, вевдӧрас тэчны кольччӧм парӧгсӧ, киськалыштны гормӧгӧн, пуктыны лаврушка кор, вевттьыны мӧдік сӧчӧнӧн. Корка вевдӧрас керны осьтаоккез, мед пожассикас петіс руыс. Пуктыны пирӧгсӧ шонытінӧ, мед лэбис. Пӧжавны духовкаын 40 минута дырна. Пӧжалӧм пирӧгсӧ мавтны сылӧтӧм виӧн и вевттьыны чышкӧтӧн.[1]
Культураын
- Коми Республикаын чулӧтьсӧ «Черинянь гаж» нима фестиваль.[6]
Пасйӧттэз
- ↑ 1 2 3 4 5 6 Коми-пермяцкая кухня [Сб. рецептов / Сост. А. Долдина; Ред.: В. Коколева, Л. Косова]. — Кудымкар : Коми-Пермяц. кн. изд-во, 1998. — 508, [3] с. ил.; 21. — ISBN 5-87901-033-3. — С. 313-314.
- ↑ Голева, Т. Г. Виды традиционной выпечки у коми-пермяков / Т. Г. Голева // Гуманитарные исследования. История и филология. – 2021. – № 4. – С. 17-29.
- ↑ 1 2 3 4 Чугаева, С. В. Трапеза в поминальной обрядности коми-пермяков / С. В. Чугаева // Вестник Чувашского университета. – 2009. – № 1. – С. 98-102.
- ↑ Королева, С. Ю. Обряд "проводов души" с ритуальным заместителем умершего (материалы русско-коми-пермяцкого пограничья) / С. Ю. Королева // Антропологический форум. – 2014. – № 23. – С. 52-76.
- ↑ Мальцева, О. Н. Коми-пермяцкий свадебный стол: традиции и новации / О. Н. Мальцева // L итоговая студенческая научная конференция Удмуртского государственного университета : материалы всероссийской конференции, Ижевск, 18–21 апреля 2022 года. – Ижевск: Издательский дом "Удмуртский университет", 2022. – С. 388-390.
- ↑ Праздник рыбного пирога «Черинянь гаж». Культурная карта Республики Коми
Ыстӧттэз
Коми-пермяцкий пирог с щукой – Черинянь сирпинись. Видео. Парма-Новости