Кулиг
| Кулиг | |
|---|---|
 | |
| Продукттэз | |
| Мыйись керӧм | |
Кулиг (кулик) ― коми традиционнӧй быдлунся да вежалунся сёянтор, осьта парӧга пӧжас.
Керӧм
Кулиггесӧ керӧны шӧмтӧм нянись да берся парӧгись. Важжыкнас лыддиссьӧ рися кулиг, няня кулиг да анькытш кулиг. Ӧння кадӧ унажыксӧ керӧны картошка парӧгӧн.[1]
Кулиггесӧ шуӧны сідзжӧ сера дора[1] пӧжасӧн, сідз кыдз дорресӧ позьӧ быдкодя чеплявны, кӧставны да содтыны нянись керӧм серрез.
Картошкаӧн кулиггез
Рудзӧговӧй нето шогдіовӧй пизись лӧсьӧтны шӧмтӧм нянь, нӧитны чорытӧдз. Янсӧтлыны неыджыт торрезӧ, керны кӧвдассэз, вӧснита быгрӧтны 12-15 см пасьтаӧдз. Кӧрыш шӧрас пуктыны картошкаись керӧм парӧг, паськӧтны сійӧ кӧрышыс вылӧт, кӧрыш дорресӧ лэбтыштны, ляпкӧтышнты. Мед чожжыка да басӧкжыка пожасис, парӧгсӧ мавтыштны вартӧм кольтьӧн. Пӧжавны горын нето духовкаын. Сыбӧрын мавтны виӧн. Парӧгсӧ лӧсьӧтны этадз: картошка пуны, нырны, сыӧ пуктыны йӧв, уль кольть, сорлавны.[1]
Рися кулиггез
Парӧгсӧ керӧны рисись. Рисьсӧ колӧ посньӧтны, сорлавны нӧкӧн, уль кольтьӧн сідз, мед эз вӧв кизер да эз паськав. Парӧгсӧ пуктӧны кӧрыш шӧрӧ, паськӧтӧны да кӧрыш дорресӧ лэбтӧны.[1]
Анькытша кулиггез
Быгрӧтны шӧмтӧм нянись кӧрышшез. Парӧгсӧ керны этадз: анькытш пизь сорлавны йӧлӧн коколлезтӧг. Парӧгсӧ пуктыны кӧрыш шӧрӧ, паськӧтыштны, дорресӧ лэбтыны да ляпкӧтны. Парӧг вевдӧрсӧ мавтыштны вартӧм кольтьӧн.[1]
Няня кулиггез
Сьӧд нето чочком пизись вӧснит кӧрышшез вылӧ тэчны нянь да дорресӧ кӧставны. Няньсӧ керны этадз: нӧк да кольть сорлавны пизьӧн коколлезтӧг, мед вӧлі сук кодь, эз кизьрась.[1]
Традицияэзын
Кулигыс, кыдз и шыдӧса шаньга, ӧддьӧнжыксӧ вежалунся да касьтісян сёян. [2][3]
Пасйӧттэз
- ↑ 1 2 3 4 5 6 Коми-пермяцкая кухня [Сб. рецептов / Сост. А. Долдина; Ред.: В. Коколева, Л. Косова]. — Кудымкар : Коми-Пермяц. кн. изд-во, 1998. — 508, [3] с. ил.; 21. — ISBN 5-87901-033-3. — С. 320-323.
- ↑ Голева, Т. Г. Виды традиционной выпечки у коми-пермяков / Т. Г. Голева // Гуманитарные исследования. История и филология. – 2021. – № 4. – С. 17-29.
- ↑ Чугаева, С. В. Трапеза в поминальной обрядности коми-пермяков / С. В. Чугаева // Вестник Чувашского университета. – 2009. – № 1. – С. 98-102.