Горань (орсан)
Горань — коми отирлӧн уна морта орсан. Горань нимӧн шусьӧны куим орсан, кӧднӧн орсӧны челядь да томпӧлӧс.
Ним йылісь
Коми орсаннэз туялісь Надежда Мальцева сьӧрті, ӧння кадӧ комиэзлӧ тӧдтӧм кыв «горань» аркмӧм кык коми кывторись — «гор» да «ань». «Горань» кыв медодзза вежӧртаснас сія пуктӧ «иньпӧв би ен»[1]. Сёрӧнжык вежӧртасыс вежсис, «гораньыс» лоис ловья морт, инька, кӧда керӧ сёян.[2]
Коми фольклорист да гижись Василий Климов сьӧрті, орсаныслӧн «горань» нимыс аркмӧм «гор» (кыдз шы) кылісь.[3]
Орсӧм
Горань
Орсіссес адззӧны волькытін да сувтӧны кытшӧн. Ӧтік мортлӧ — «гораньлӧ»— кӧрталӧны чышьянӧн синнэсӧ, бергӧтлӧны сійӧ ас гӧгӧрас да шувлӧны:
Пич-пач, Горань,
Чибу-чань, Горань,
Кытчӧ туйтӧ талин?
Кытчӧ нывтӧ сетін?
Баня бӧрын кулӧм баля,
Мун, сійӧ сёй,
Менӧ эн сёй!
Сэсся шовкӧтӧны киэзӧн да пышшӧны-котӧртӧны. Кӧрталӧм сина «гораньыс» кутасьӧ: кин шедас, лоӧ «гораньӧн». [4] Шуӧмлӧн мӧдік вариант:
Чельчи-пельчи, тарасовчи!
Кытчӧ ныртӧ сетін, сэтчӧ туйтӧ талин.
Менӧ эн сёй, кулӧм баляӧс сёй
Важ баня дынісь!
Горань («зӧр сёйны»)
Кудымкарскӧй районын горань орсаннас шусьӧ и мӧдік орсан, сы мӧд нимыс «зӧр сёйны»[4]. Орсӧны сійӧн томпӧлӧс, не учӧт челядь.
Орсаныс понда колӧ юрвот. Орсіссес бӧрйӧны галитісьӧс — «вӧлӧс». Пуктӧны сы одззӧ «зӧрӧн» юрвот. «Вӧлыс» сувтӧ бӧрӧн орсіссес дынӧ да мышкыртчӧ юрвотыс дынӧ. Орсіссес ӧтікӧн сьӧрсьӧн-бӧрьсӧн вачкалӧны «вӧлыс» мышк кузя. «Вӧлыслӧ» колӧ тӧдны, кин сылӧ вачкис. «Вӧлыс» «сёйӧ зӧрсӧ», кытчӧдз оз тӧд, кин вачкис. Тӧдас — вежсьӧны местаэзнаныс.
Василий Климов гижӧ «зӧр сёйны» нима орсаныс йылісь:
Пукалісь морт видзӧ ӧлӧдзас шапка, кытчӧ чужӧмсӧ дзебӧ «зӧр сёйись». Эта коста сія кисӧ пуктӧ кадж вылас, кырымнас вывлань. Сы гӧгӧр сулалӧны вит-квать морт. Ны коласісь кинкӧ вачкӧ долоньнас «зӧр сейисьыс» ки кузя, «зӧр сейись» перыта лэбтӧ юрсӧ да бергӧтчӧ opciccec ладорӧ. А быд орсісьыс сы чужӧм одзӧ мыччӧ вывлань лэбтӧм певсӧ. Ежели «зӧр сейисьыс» тӧдас, кин вачкис, мышкыртчас вачкисьыс. Овлӧ и нечестнӧй орсӧм: мукӧдпыр кортӧм гӧсьлӧ тэчасӧ сымда, что сія и орсансис чапкисьӧ.[3]
Горань (куру)
Горань орсанӧн шусьӧ и эттшӧм орсан, кӧдӧн тӧвся рыттэзӧн орслӧма тӧмпӧлӧс. Мӧд нимыс — куру. Василий Климов гижӧ сы йылісь этадз:
Вевттьӧм сина нывка куталӧ ciйö мортсӧ, кода шувлӧ «Куру!» Кин шедас да лоас тӧдӧм, кӧрталасӧ синнэз сылісь. Ежели куталісь зонкалӧ шедас нывка, зонкаыс сійӧ тӧдмалӧ не только чужӧм да юр сьӧрті, но и малалӧ быдлаӧт, эта дырн ырбыльтӧ, мый тӧд вылас усяс.[3]
Пасйӧттэз
- ↑ Мальцева Надежда Александровна. Отражение языческих представлений коми-пермяков в народной игре «Горань» // Ежегодник финно-угорских исследований. — 2013. — № 2.
- ↑ Лыткин, В. И. Краткий этимологический словарь коми языка : Словарь / В. И. Лыткин, Е. С. Гуляев ; Под редакцией В.И. Лыткина. – 2 издание. – Москва : Академический научно-издательский, производственно-полиграфический и книгораспространительский центр Российской академии наук "Издательство "Наука", 1970. – 386 с. – С. 78.
- ↑ 1 2 3 Климов В. В. Олан вужжез = Корни бытия: этнографические заметки о коми-пермяках; на коми-перм. и рус. яз. — Кудымкар: Коми-Перм. кн. изд-во, 2007. — 368 с. — С. 138-139. ISBN 5-87901-110-0
- ↑ 1 2 Сиг, падей да горань: коми-пермяккезлöн орсаннэз (Сиг, падей и горань: игры коми-пермяков) / Авторы-составители: Н. А. Мальцева, Т. Н. Меркушева, Н. А. Пушкина. ‒ Кудымкар: ПРОО «Общество радетелей коми-пермяцкого языка и культуры «Югöр», 2021. ‒ 118 с. ‒ С. 50, 80.