Кува (Кудымкар район)

Босьтöм Рувикиись
Эта терминлӧн эмӧсь мӧдік вежӧртассэз, вдз. Кува.
Посад
Кува
Кувинская заводская контора КПОГА 2021.jpg
59°07′34″ с. ш. 54°10′18″ в. д.HGЯO
Канму  Российскӧй Федерация
Федерациялӧн субъект Пермскӧй край
Район Кудымкар муниципальнӧй округ
История да география
Аркмӧм 1853
Медодзза касьтылӧм 1716
Одззася ниммес Щукин горт
Кувинский завод
Час от UTC+5:00[d]
Оліссез
Отир 1158 морт (2010)
Цифра идентификаторрез
619558
ОКТМО код 57821404291
ОКАТО код (2014 воӧдз) 57121000272
ГКГН-ын номер 0345842
Кува на карте
Кува
Кува
Кува на карте
Кува
Кува

Кувá (рочӧн Кува)— посад Кудымкар районын. Аркмӧтӧм кыдз Строгановвезлӧн  (перм.рус. посад-завод 1853 воӧ. Посадыс паськыта тӧдса кыдз лесоводдэз Теплоуховвезлӧн опытнӧй хозяйство, посад дынын быдмӧны Уралын медкузь лысъя пуэз да эм геоглиф «Софья».

География

Посадыс пуксьӧм Кува ю веськыт вадорын, Кӧчкар ю ваӧмын. Район шӧринӧдз — Кудымкарӧдз — 38 км ылына[1]. Район шӧринкӧт йитӧм автомашина туйӧн (Кудымкар — Белоёв — асфальта, Белоёвсянь Куваӧдз торыс — вевдӧм гравийӧн).

Кува посадлӧн эмблема

Отир лыд

2010 вося Россияпасьтся отир лыддьӧм сьӧрті, посадас олісӧ 1158 морт (483 айморт да 675 иньморт)[2]. 2024 воӧ Куваын (Важ Пашняӧн ӧтлаӧн) олісӧ 1175 морт[3].

История

Кувинскӧй завод аркмӧттӧдз Кува да Кӧчкар ӧтлаасянінын вӧлі Щукин горт. Медодззаись сія касьтывсьӧ Соликамскӧй уездлӧн Ландратскӧй книгаэзын (1716 во)и Отёв посад Ревизскӧй сказкаын (1720 во), кытӧн фигурируйтӧ «Кува ю сайын горт» нимӧн. 1782 во кежӧ документтэзын кольччӧ кыкпӧвса ним — «Кува ю сайын горт (Щукин)». Ревизнӧй учёт сьӧрті, Щукин гортас оліссезлӧн лыдыс перыта содіс: 1720 воӧ татӧн олӧмась 19 айморт, 1782 воӧ — 30 морт, а завод строитӧм одзын (XVIII сёво помын) Щукинын лыддиссьӧмась ни 74 морт.

Кувинскӧй завод

1840 воӧ граф С. Г. Строгановлӧн крепостнӧй крестьяна Трифон Гилёв да Мирон Спирин адззисӧ кӧрт руда Высокораменье гӧгӧрись[4].

Кувинскӧй чугунсылӧтан завод. Сылӧтан цех ойладорсянь. XX сёво пондӧтчӧм

И. Я. Кривощёков аслас Кудымкар йылісь летописьын гижис[4]:

…Иньвенскӧй крайлӧн эмаліссез Строгановвез, пермяккезӧс сьӧлӧмсянь велӧтӧм понда, 1842 восянь пондӧтчӧмӧн нуӧтісӧ разведкаэз Иньва да Кува юэз катыттэзын кӧрт рудаэз вылӧ завод строитӧм да крайын промышленность зорӧтӧм могись, мый тыдалӧ граф Сергей Григорьевич Строганов кыввезісь, кӧднӧ сія висьталіс заводсӧ осьтікӧ: "Кувинскӧй завод сувтӧтӧм дырни менам тӧдвылын вӧлісӧ кык мог: медодз — сетны пермскӧй именнёись крестьяналӧ, унажыксӧ иньвенсалӧ, именнё пытшкын сьӧм шедтан. Ӧтік кылӧн кӧ висьтавны, ме кӧсйи, медбы заводыс вӧлі бурӧн, а не сьӧкытӧн миян именнёись отир понда.

1845-1846 воэзӧ вӧлісӧ чулӧтӧмӧсь руда петаннэз туялӧм да нылісь промышленнӧй потенциалсӧ донъялӧм. 1853 воӧ пондӧтчис ыджыт строитӧм: лэбтісис чугунсылӧтан завод, аркмис заводскӧй посёлок да лэбтісис заводскӧй прудлӧн помӧт. Уджалісь вынӧн вӧлісӧ крепостнӧйез, а 1861 вося реформа бӧрын — медалӧм уджаліссез.

Кувинскӧй заводлӧн план. П. Вологдин. 1867

Заводыс специализируйтчис чугун сылӧтӧмын шпатовӧй железняккезісь (сферосидериттэзісь), кӧдна вӧлісӧ дзирӧсь да кокнита сылӧтанаӧсь. Рудасӧ гарйисӧ 50-ся унажык рудниккезын, кӧдна вӧлісӧ заводсянь16-80 км ылынаын. Сылӧтӧм понда уджалісӧ кык домна гор:

  • Натальевскӧй (1856 воӧ лэдзӧм, 64,02 м3 ыжда, дзирыт пӧльтӧм);
  • Сергиевскӧй (1860 воӧ лэдзӧм, 54,9 м3 ыжда, кӧдзыт пӧльтӧм).

Шлаксӧ видзисӧ туйез вевдӧм понда, а чугунсӧ ыстісӧ Добрянскӧй да Очёрскӧй заводдэзӧ.

1861 воӧ вӧлі аркмӧтӧм Соликамскӧй уездлӧн Кувинскӧй волость, кытчӧ пырисӧ 3 сельскӧй общество: Кувинскӧй, Козьминскӧй да Мальцевскӧй.

1909 во кежӧ руднӧй база бырсис — заводыс эз ло рентабельнӧй да дугдіс уджавны.

Кувинскӧй завод коста Куваын уджалісӧ: зонкапӧлӧс училище (1865, пӧртӧма кык классаӧ 1872 воӧ), , нывкапӧлӧс училище (1865), Иоанно-Предтеченскӧй вичку (1858, жугдӧм 1919 воӧ Гражданскӧй война коста), заводскӧй больница (1855), земскӧй больничнӧй пункт, Семейнӧй рыттэзлӧн общество, Ссудо-сберегательнӧй касса.

Иоанно-Предтеченскӧй вичку. 1889 во

Советскӧй кадӧ

Октябрьскӧй революция бӧрын посад лоис Кувинскӧй сельсоветлӧн административнӧй шӧринӧн[1].

1926 воӧ кӧркӧся заводскӧй больницаын вӧлі осьтӧм шоччисян керку, кӧда вӧлі санаторно-профилактическӧй учрежденнёэзлӧн Свердловскӧй управление увтын (ӧні Кувинскӧй лагерь).

1930 воӧ «Строитель будущего» нима товариществоись аркмис Будённый нима колхоз (1951 во одзтулыссянь — 4 сельхозартель ӧтлаасьӧм бӧрын — Ворошилов нима, 1957 восянь — «Заря», 1962 восянь — «Кува»), 1969 воӧ сыись вӧлі аркмӧтӧм «Кувинскӧй» совхоз.

1930—1950 воэзӧ посадас уджаліс промартель «Ударник».

1940 воӧ посадас вӧлі осьтӧм пельтӧмалӧм отир понда школа (ӧні — ОВЗ челядь понда школа-интернат). 1941 воӧ оссис госпиталь — Великӧй Отечественнӧй войнася ветераннэзӧс бурдӧтӧм понда (Великӧй Отечественнӧй война бӧрын уджаліс кыдз инвалиддэзлӧн да пӧрись отирлӧн керку, пӧдналӧм 2011 воӧ).

1963 во гожумшӧр 1 лун кежӧ посадас олісӧ 1552 морт.

2006 во тӧвшӧрӧдз Кува посад вӧлі Кува сельсоветлӧн шӧринӧн. Кудымкар районлӧн административно-территориальнӧй юкӧм реформируйтӧм коста вӧлі пыртӧм Белоёв посадмуӧ (2020 восянь абу). 2020 восянь — Кудымкарскӧй муниципальнӧй округлӧн территориальнӧй шӧрин.

Экономика

Посадас уджалӧ Уралын медваж потребительскӧй обществоэз коласісь ӧтік — Кувинскӧй потребительскӧй общество (1872)[5][6], ӧні — Кувинскӧй сельскӧй потребительскӧй общество[7], кӧда керӧ яя полуфабрикаттэз да нянь. Сідзжӧ отирыс уджалӧны вӧр заптӧмын. 2022 воӧдз уджаліс «Кувинскӧй» СПК[8].

Социальнӧй сфера

Посадас уджалӧны эттшӧм велӧтан да культура учрежденнёэз:

  • Кува шӧрӧт школа (рочӧн МБОУ «Кувинская средняя общеобразовательная школа»[9]);
  • Кува школа-интернат (рочӧн МБОУ «Кувинская общеобразовательная школа-интернат для обучающихся с ограниченными возможностями здоровья»)[10];
  • Кува гортладор туялана «Исток» нима музей (рочӧн МБУ "Кувинский краеведческий музей «Исток»[11]);
  • Клуб (рочӧн Кувинский сельский дом культуры (структурное подразделение МБУК «Культурно-деловой Центр» г. Кудымкара)[12]);
  • Библиотека (рочӧн Кувинская сельская библиотека им. Ф. Ф. Павленкова (структурное подразделение МКУ «Кудымкарская централизованная библиотечная система»)[13];
  • Кувинскӧй лагерь (рочӧн МАУ «Кувинский загородный лагерь»)[14].

Эмӧсь врачебнӧй амбулатория («Коми-Пермяцкӧй округлӧн больница»-лӧн юкӧт)[15], Сбербанклӧн, Россиялӧн Почта юкӧттэз.

Сингажӧтаннэз да тӧдчаніннэз

  • Кувинскӧй заводӧн юралісьлӧн Григорий Яковлевич Вологдинлӧн керку[16];
  • Кувинскӧй заводлӧн контора (1855 во), региональнӧй тӧдчӧта архитектура памятник; пырӧ Пермскӧй крайлӧн культура эмбур объекттэз реестрӧ[4]. Керкуас уджалӧ Кува гортладор туялана «Исток» нима музей;
  • Парк «Софья» — аркмӧтӧм 1883 воӧ 3,9 га ыждаа, быдмӧны пожуммез да кыдззез «София» геоглифӧн[17]. Паркыс садитӧм графиня Софья Владимировна Строганова  (перм.рус. донтӧмӧн;
  • Пожумаин (рочӧн ООПТ «Кувинский бор») — А. А. Теплоуховӧн 1907 воӧ лӧсьӧтӧм парк. 2009 вося туялӧм сьӧрті, паркын быдмӧны Уралын медкузь пуэз (Сукачёв нима ньыв — 41.8 м, пожум — 41.4 м, кӧз — 37.8 м)[18][19];
  • Кувинскӧй чугунсылӧтан заводлӧн рудниккез (ӧтік лунся экскурсияэз да куим лунся подӧн ветлӧммез чулӧтӧ «Исток» музей);
  • Кувинскӧй пруд да вадортуй.

Гора нима отир

  • Екатерина Плотникова (1936—2002), Московскӧй областнӧй да Горьковскӧй филармонияэзісь солистка, Российскӧй Федерациялӧн Заслуженнӧй артистка (1997);
  • Сергей Вологдин (1874—1926), советскӧй металловед, Вологдин увтырись;
  • Виктор Вологдин  (перм.рус. (1883—1950), советскӧй инженер, электросваркаӧн пыжстроитӧмын пионер, Вологдин увтырись;
  • Евгений Чазов  (перм.рус. (1929—2021), медицина доктор, СССР-лӧн отирлысин видзӧм министр. Мамыс сьӧрті — Кувинскӧй заводісь мастеровӧйлӧн Илья Чазовлӧн нучок. Великой Отечественнӧй война коста оліс Куваас[20][21].

Пасйӧттэз

  1. ↑ 1 2 Пермская область. Административно-территориальное деление. — Пермское книжное издательство, 1963.
  2. ↑ численность населения городских округов, муниципальных районов, городских и сельских поселений, городских населённых пунктов, сельских населённых пунктов Пермского края по итогам Всероссийской переписи населения 2010 года рус.. Территориальный орган Федеральной службы государственной статистики по Пермскому краю.
  3. ↑ Проект "Устройство зоны отдыха и прогулок близ с. Кува".
  4. ↑ 1 2 3 Контора заводская, с. Кува // База данных "Памятники, памятные знаки, исторические здания и места Коми-Пермяцкого округа" рус.. Коми-Пермяцкий окружной государственный архив. Видзӧтӧм 17 Гожумшӧр 2025.
  5. ↑ К 150-летию  Кувинского потребительского общества. Иньвенский край (2022-06-23). Видзӧтӧм 17 Гожумшӧр 2025.
  6. ↑ Тедеева З. Р., Радостева Э. М. История развития кооперации и кооперативного движения в Пермском крае // Актуальные проблемы гуманитарных и естественных наук. — 2013. — № 7—1.
  7. ↑ Кувинское сельпо. РБК Компании. Видзӧтӧм 17 Гожумшӧр 2025.
  8. ↑ СПК "Кувинский", ИНН 8101000467. www.list-org.com. Видзӧтӧм 17 Гожумшӧр 2025.
  9. ↑ МБОУ "Кувинская СОШ": Главная страница. Дата обращения: 17 Гожумшӧр 2025.
  10. ↑ МБОУ "Кувинская ОШИ для обучающихся с ОВЗ": Главная страница. Дата обращения: 17 Гожумшӧр 2025.
  11. ↑ Кувинский краеведческий музей «Исток» рус.. Культура.РФ. Видзӧтӧм 17 Гожумшӧр 2025.
  12. ↑ МБУК «Культурно-Деловой Центр» г. Кудымкара - Кувинский сельский дом культуры рус.. Видзӧтӧм 17 Гожумшӧр 2025.
  13. ↑ Кувинская сельская библиотека им. Ф.Ф. Павленкова. Культура.РФ. Видзӧтӧм 17 Гожумшӧр 2025.
  14. ↑ Кувинский загородный лагерь: Главная страница. Дата обращения: 17 Гожумшӧр 2025.
  15. ↑ Кувинское отделение общей врачебной практики. ГБУЗ ПК «Больница Коми-Пермяцкого округа». Видзӧтӧм 17 Гожумшӧр 2025.
  16. ↑ Подборка №78. К 150-летию С. П. Вологдина. Коми-Пермяцкий окружной государственный архив (2024-08-16). Видзӧтӧм 17 Гожумшӧр 2025.
  17. ↑ М. Рогозин. Лесные парки Кудымкарского района - Мекка для специалистов лесного дела и ландшафтных дизайнеров // Парма : газета. — 2013. — 28 Арпом (№ 94). — С. 4.
  18. ↑ Рогозин М. В. Высочайшие деревья Пермского края // Вестник Пермского университета. Серия: Биология. — 2014. — № 3.
  19. ↑ Ирина Дульцева. Высочайшие деревья Урала - в Кудымкарском районе // Парма : газета. — 2013. — 5 Одзтӧв (№ 96). — С. 4.
  20. ↑ Чазов Евгений. История.РФ. Видзӧтӧм 17 Гожумшӧр 2025.
  21. ↑ Чазовы. История Кувы (2023-02-14). Видзӧтӧм 17 Гожумшӧр 2025.

Ыстӧттэз

Босьтӧма "https://koi.ruwiki.ru/w/index.php?title=Кува_(Кудымкар_район)&oldid=216103"-ись