Теплоухов Александр Александрович
| Теплоухов Александр Александрович | |
|---|---|
| Чужан лун: | 1849 во одзар 11 лун |
| Чужанін: | |
| Кулан лун: | 1908 во одзтулыс 29 лун (58 лет) |
| Куланін: | |
| Канму | |
| Удж | вӧрвӧдитісь |
Теплоухов Александр Александрович (1849—1908) — вӧрвӧдитісь, вӧрвӧдитӧм туялісь, ботаника туялісь.
Олантуй
Чужис 1849 во одзар 11 лунӧ (важмоза гожумпом 30 лунӧ) Ильинскӧйын[1]. 1863 воӧ помаліс кык класса училище Ильинскӧйын да муніс велӧтчыны Пермскӧй зонкапӧлӧс гимназияӧ. 1867-1869 воэзӧ велӧтчис Московскӧй мувӧдитӧм школаын. Помалӧм бӧрсянь вӧлі ыстӧм уджавны кӧрткеран заводдэзӧ Добрянкаӧ да Кынӧ, сэтчин сія велӧтчис куреньӧн уджалӧмӧ. Сэсся уджаліс Строгановвез Пермскӧй именнёись Очёрскӧй да Иньвенскӧй округгезын.
1872 воӧ муніс велӧтчыны вӧрвӧдитӧмӧ Саксонияӧ, Тарандт вӧр академияӧ. Бертӧм бӧрас видзӧтіс куреннез быдӧс Строгановвез заводдэзын. 1878 воӧдз уджаліс лесничӧй отсасисьӧн Очёрскӧй округын. 1878-1884 воэзын уджаліс лесничӧйӧн Добрянскӧй округын, сэсся — 1905 воӧдз — лесничӧйӧн Ильинскӧй округын[2].
Ӧтлаын пӧрисьжык воныскӧт — Фёдор Теплоуховкӧт — садитіс вӧр Строгановвез Пермскӧй майоратын, кӧдна лыддьиссисӧ медбур вӧрвӧдитӧм образеццезӧн.
Ӧктіс Урал быдмассэзісь ыджыт гербарий.
Куліс 1908 во одзтулыс 29 лунӧ (важмоза одзтулыс 16 лунӧ). Дзебӧм вичку шойнаын Ильинскӧйын .
Увтыр
Александр Теплоуховлӧн да Розамунда Крутчлӧн зон, Фёдор Теплоуховлӧн вон. Василий Волеговлӧн вежапи. Иньыс — Елизавета Теплоухова (нывкася гижсяныс — Медвецкая), Ильинскӧй кык класса училищеись велӧтісь. Нылӧн вӧлісӧ нёль кага: Надежда (1881–1972), Анатолий (1885–1940), Сергей (1888–1934), Маргарита (1890 –1915 вося сёрӧнжык).
Пасйӧттэз
- ↑ Килунин, М. Ю. Александр Александрович Теплоухов: личность, семья, работа / М. Ю. Килунин // Генеалогия и архивы : Материалы шестой Всероссийской научно-практической конференции, Челябинск, 18 мая 2024 года. – Челябинск: [б.и.], 2024. – С. 369-371.
- ↑ Теплоухов Александр Александрович / Электронная энциклопедия "Ильинский время, события, люди"