Ратегова Людмила Петровна
| Ратегова Людмила Петровна | |
|---|---|
 | |
| Чужан лун: | 1951 во тӧвпом 20 лун (75 лет) |
| Чужанін: | |
| Канму | |
| Удж | издатель, филолог |
Ратегова Людмила Петровна (1951 во тӧвпом 20 лун, Гаинчи, Кӧч посадму) — коми кыв да культура зорӧтісь, небӧглэдзись, «Югӧр» чукӧр аркмӧтісь да юралісь.
Олантуй
Люддмила Ратегова чужис 1951 во тӧвпом 20 лунӧ Кӧчладор районісь Гаинчиын. Помаліс Казісь кыкьямыс класса школа да пырис велӧтчыны Кудымкар педагогика училищеӧ. Сы помалӧм бӧрын велӧтчис Перем педагогика институтісь коми-роч юкӧтын. 1977—1982 воэзӧ велӧтчис А. Герцен нима Ленинград педагогика институтын да уджаліс коми-роч юкӧтын велӧтісь-ассистентӧн Антонина Кривощёкова-Гантман кипод увтын[1][2][3].
1982 воӧ локтіс Кудымкарӧ. Уджаліс Велӧтіссезӧс бурмӧтан институтын методистӧн, коми-пермяцкӧй кыв да литература кабинетӧн веськӧтлісьӧн. Ӧткоста кык во сьӧрна уджаліс Кудымкар педагогика училищеын роч кыв да литература велӧтісьӧн.
1987 воӧ локтіс уджавны Пермскӧй книжнӧй издательствоӧ старшӧй редакторӧн, юраліс сы округись юкӧтӧн. Юкӧтсӧ 1993 воӧ Коми-Пермяцкӧй небӧглэдзанінӧ реорганизуйтӧм бӧрын директораліс сійӧн 2009 воӧдз, небӧглэдзанін пӧднавтӧдз.
2014—2017 воэзӧ уджаліс «Иньвенскӧй край» газета редакцияын, вӧлі редактор вежлісьӧн да «Кама кытшын» газетаын корреспондентӧн.
Донтан пассэз да премияэз
- Коми-Пермяцкӧй округлӧн делоэз сьӧрті Министерство премиялӧн лауреат «Небӧг лэдзӧм да библиотечнӧй удж» номинацияын (2008, 2009, 2010, 2014, 2016);
- М. А. Шолохов нима касьтылан медаль (рочӧн «За гуманизм и служение России», 2005)[4].
Асторья олан
Айкаыс — коми гижись Тимофей Фадеев. Зоныс — метеоролог Сергей Фадеев.
Пасйӧттэз
- ↑ Личный фонд Ратеговой Людмилы Петровны (1951 г.р.), экс-директора Коми-Пермяцкого книжного издательства. Архивы Прикамья. Видзӧтӧм 20 Аршӧр 2025.
- ↑ Людмила Ратегова // Наши земляки. Кочевский муниципальный округ. Видзӧтӧм 20 Аршӧр 2025.
- ↑ Ратегова Людмила Петровна. Коми-Пермяцкая центральная национальная библиотека им. М. П. Лихачёва (2023-01-03). Видзӧтӧм 20 Аршӧр 2025.
- ↑ Ратегова Людмила Петровна. Коми-Пермяцкий окружной государственный архив. Видзӧтӧм 20 Аршӧр 2025.