Перем художествоа галерея
РФ культура министерство
| Перем художествоа галерея | |
|---|---|
 | |
| Аркмӧтан кад | 1922 |
| Инас |
 Российскӧй Федерация |
| Адрес | г. Перем, Советскӧй ул., 1 к. |
| Директор | Тавризян Юлия Борисовна |
| Сайт | permartmuseum.ru |
 |
|
 Медиафайлы на РУВИКИ.Медиа | |
| Донтан пассэз |
 |
|---|
Перем художествоа галерея (рочӧн Пермская государственная художественная галерея) — Перемын уджалана регион тӧдчӧта художествоа музей. Коллекцияас 50 000 мымда видзантор, кӧда мыччалӧ искусство важ кадсянь ӧнӧдз[1].
История
1890 воӧ Перемын вӧлі аркмӧтӧм Научно-промышленнӧй музей, кӧдаын торья юкӧтӧн 1902 воӧ оссис художествоа юкӧт. 1907 во кеж сы фондын вӧлісӧ серпасалісь Василий Верещагинлӧн да сы вон Пётр Верещагинлӧн уджжез, кӧднӧ нія козьналісӧ чужан карлӧ — Перемлӧ. Юкӧтас пырисӧ тӧдчана роч серпасаліссезлӧн (Николай Гущин, Александрда Павел Сведомскийвоннэз да мд.) уджжез, кӧда и пуктісӧ под Художествоа музейлӧ, кӧда оссис 1922 во арпом 7 лунӧ.
Музейыс коллекцияись медтӧдчана торсӧ ӧктісӧ Пермскӧй край гортладор история да культура туяліссез Александр Сыропятов да Николай Серебренников. 1920 воэзӧ регион пасьта вӧлісӧ чулӧтӧмӧсь экспедицияэз, кӧдна коста ӧктісӧ Перем еннэз, зарниӧн серӧтсьӧм да орнаментальнӧй вурсьӧм, культ быдберся да Строгановскӧй стиля енбаннэз. 1925 во кежӧ музейлӧн коллекцияын вӧлі ни 4000-ся унажык видзантор. Музейыслӧн медодзза директор Александр Сыропятов гижис: «Перемын Художествоа музей осьтӧмӧн пуктӧм пондӧтчӧм ыджыт да серьёзнӧй делолӧ, кӧдалісь тӧдчӧтсӧ сы нормальнӧя зорамӧм дырни колӧ донъявны паськыта, республика пасьта, не дзир пермскӧй масштабын…»
1920-ӧт воэзӧ музейлӧн коллекцияыс вӧлі содтӧм экспонаттэзӧн Государственнӧй музейнӧй фондісь, кӧда аркмис асторья собраннёэз национализируйтӧм бӧрын. Уна эмторрез вӧлісӧ сетӧмӧсь провинциальнӧй музейезӧ, ны лыдын и Перемӧ. 1929 воӧ канмуын медодззаись оссис Ураллӧн ӧнняся искусство сьӧрті экспозиция, кӧдаӧн вӧлі пондӧтӧм XX сёся искусство ӧктӧм. 1932 воӧ музейыс пондіс уджавны Спасо-Преображенскӧй кафедральнӧй собор керкуын, кытӧн петіс кольны Пыскорись вайӧм иконостас. 1936 воӧ музейыс лоис Перем художествоа галереяӧн. Великӧй Отечественнӧй война коста галерея керкуын видзсисӧ эвакуируйтӧм Русскӧй музейлісь коллекцияэз, сідзжӧ сэтӧн вӧлі агитационнӧй плакат керӧм кузя мастерскӧй, кӧдаӧн юраліс директор Николай Серебренников.
1960—1990 воэзӧ галереяись научнӧй сотрудниккез участвуйтісӧ экспедицияэзын, кӧдна коста вӧлісӧ ӧктӧмӧсь Пермскӧй крайлӧн отиркостся искусствоись эмторрез: енбаннэз, паськӧм, керамика, кыйӧм да пу серӧтӧм. XX сёво помын галереяыс пондіс уджавны ӧтлаын визирсайся художниккезкӧт, коллекционеррезкӧт да искусствоведдэзкӧт. XX сёвося искусство сьӧрті паськыта тӧдса немецкӧй коллекционер Юрген Вайхардт вайис козинӧн аслас коллекцияись 150-ся унажык графическӧй листтэз, Ыджыт Британияись королевскӧй искусствоэз Академияись член, серпасалісь Кирилл Соколов козьналіс галереялӧ ассис уджжезлісь тор, а сідзжӧ важ английскӧй гравюраэзлісь коллекция.
Музейлӧн иналӧм
1932—2023 воэзӧ галереяыс уджаліс Спасо-Преображенскӧй собор керкуын, кӧда лоӧ XIX сёвося архитектура памятникӧн.
2011 во одзтӧлӧн Пермскӧй крайись Росимущество кырымпасаліс Спасо-Преображенскӧй соборсӧ Перем епархия кипод увтӧ сетӧм йылісь распоряженнё.
2019 во тулысшӧрӧн лоис тӧдса, мый историко-культурнӧй экспертиза бурсьӧтіс «Шпагин завод» территория вылын, кӧда 2019 во тӧвпомӧн вуджис Пермскӧй крайлӧн эмбурӧ, галереялісь виль керку лэбтан проект[2]. Сія жӧ кадӧ, 2019 во помын, вӧлі помалӧм собор керкуись цоколь, фасад да вевт реконструируйтӧмись ыджытжык тор, сы пытшкын одззамоз кольччис уджавны художествоа галерея[3]. 2023 во помын Перем художествоа галеряыс быдсӧн муніс соборсис[4], сія вӧлі инӧтӧм кадкост кеж тодиль лӧсьӧтӧм «Телта» завод корпуссэзӧ[5].
Шпагин заводын виль керку
Перем художествоа галереялӧн архитектурнӧй комплексыс лоӧ ӧтласа ансамбльӧн, кӧда аркмӧтӧм вились лэбтӧм керкуись да куим историческӧй керкуись.
Виль керку лэбтӧм пондӧтчис 2021 во тулысӧн[6]. Проектсӧ керис SPEECH архитектура бюро, кӧдӧн юралӧ Сергей Чобан, Москва-Ситиын «Федерация» нима нёбосудзаннэза комплекслӧн автор[7].
Галереялӧн виль керкуыс лоӧ ӧтік мупытшкся этажӧн нёль сувда мувыв керкуӧн. Керкуыслӧн ӧтласа ыждаыс 21,6 сюрс м2, сія сизимись ыджытжык Спасо-Преображенскӧй кафедральнӧй соборын галереялӧн одзза ыждася[7].
Этажжез сьӧрті[6]:
- Мупытшкся этаж — техническӧй да инженернӧй жыррез;
- Улісь этаж — общественнӧй функцияэз: вестибюль, гардероб, кассаэз, музейнӧй магазин, ӧтласа верданіннэз, лыддьӧтанінӧн библиотека, велӧтан шӧрин, кадкостся выставкаэзлӧн да лекцияэзлӧн зал;
- Мӧд этажыс — пырся экспозициялӧн заллэз, нія сиӧмӧсь галерея историялӧ, важ роч искусстволӧ, Строганов династиялӧ, Рытвыв Европа искусстволӧ (XV—XIX св.) да роч искусстволӧ (XVIII—XX св.);
- Куимӧт этажыс — XX—XXІ сёвоэзся искусство, отиркостся искусстволӧн, а сідзжӧ Перем еннэза заллэз;
- Нёльӧт этажыс — фонд видзаніннэз да реставрационнӧй мастерскӧйез;
- Витӧт (мансарднӧй) этажыс — реставрационнӧй мастерскӧйез да фотолаборатория.
Вуджӧтны галереясӧ виль керкуас пондӧтісӧ 2025 вося одзгожумӧ, поавны мӧдӧны 2025 во арпомӧн[8]. Вовліссез понда галерея пондас оссьыны сьӧрсьӧн-бӧрьсӧн. Медодз, 2025 во одзарӧн, оссяс Перем еннэза зал, сыбӧрын — велӧтан шӧринісь «Дом» нима выставка[7].
Галереялӧн характеристикаэз
Уджаліссезлӧн лыдыс — 109, ны коласісь 38 — научнӧй сотрудниккез. Вовліссез лыдыс шӧркодя вонас — 113 800 морт. Галерея структураын эмӧсь архив, научнӧй библиотека, реставрационнӧй мастерскӧйез.
Коллекция
Перем художествоа галерея коллекцияэзын 50 000-ся унажык видзантор. Сэтчӧ пырӧны XV—XX сёвоэзся быдкодь художественнӧй школаэзісь, стиллезись да веськӧввезісь Россия, Рытвыв Европа искусствоись уджжез. Ны лыдын серпасалӧм, графика, скульптура, декоративно-прикладнӧй да отиркостся искусство Россияись да Европаись. Галереяын чукӧртӧм античнӧй керамикалӧн, Важ Египетлӧн, Тибетлӧн бронза сьӧрті, Японияись, Индияись, Китайись прикладнӧй искусствоись коллекцияэз. Аутентичнӧйӧн лоӧ сідз шуана Перем вӧрпа стиля берсяторья ӧктӧт.
Галереялӧн медтӧчана юкӧтын — Перем еннэза коллекция, кӧдаӧ ӧктӧмӧсь 400 мымда XVII—XX сёвоэзӧ керӧм вичкуся видзантор. Этна скульптураэс ӧктӧмӧсь Пермскӧй крайись ойвыв районнэзісь.
Сідзжӧ ӧддьӧн тӧдчана Строгановскӧй школаись енбаннэза ӧктӧт.
- Паськыта тӧдса экспонаттэз
- Денисов-Уральскийлӧн аллегорияэз;
- Никола Можайскӧй (Зеленятаись скульптура, перем еннэзісь ӧтік).
Галерея юраліссез
- 1922—1925 — А. К. Сыропятов;
- 1925—1949 — Н. Н. Серебренников;
- 1949—1976 — А. А. Наумова[9];
- 1976—2011 — Н. В. Беляева[10];
- 2011 — ӧнӧдз — Ю. Б. Тавризян[11].
Донтан пассэз
- РСФСР Медвылісь Совет Президиумсянь Почётнӧй грамота (1973)[9].
- Российскӧй Федерация Медвылісь Совет Президиумсянь Почётнӧй грамота (1992)[9].
Пасйӧттэз
- ↑ Государственное краевое бюджетное учреждение культуры "Пермская государственная художественная галерея". Видзӧтӧм 25 Гожумпом 2025.
- ↑ Проект строительства галереи на заводе Шпагина прошел историко-культурную экспертизу. Вusiness Сlass (2019-04-27). Видзӧтӧм 25 Гожумпом 2025.
- ↑ В Перми закончился ремонт художественной галереи. Комсомольская правда - Пермь (2019-12-05). Видзӧтӧм 25 Гожумпом 2025.
- ↑ Глава Пермской митрополии посетил Спасо-Преображенский собор рус.. Пермская митрополия (2024-08-07). Видзӧтӧм 25 Гожумпом 2025.
- ↑ Переезд Пермской художественной галереи. Пермская художественная галерея. Видзӧтӧм 25 Гожумпом 2025.
- ↑ 1 2 Новое здание галереи рус.. Пермская художественная галерея. Видзӧтӧм 25 Гожумпом 2025.
- ↑ 1 2 3 Валерия Жукова. Искусству стало тесно. Какой будет новая жизнь Пермской художественной галереи?, Business Class (13 Гожумпом 2025). Дата обращения: 25 Гожумпом 2025.
- ↑ Пермская художественная галерея начала готовиться к переезду в новое здание, Коммерсантъ (25 Одзгожум 2025). Дата обращения: 25 Гожумпом 2025.
- ↑ 1 2 3 История музея. Пермская художественная галерея. Видзӧтӧм 25 Гожумпом 2025.
- ↑ Президент Пермской галереи Надежда Беляева стала Почетным гражданином Пермского края, Пермская художественная галерея (25 Арпом 2021). Дата обращения: 25 Гожумпом 2025.
- ↑ Информация рус.. Пермская художественная галерея. Видзӧтӧм 25 Гожумпом 2025.
Литература
- Пермская художественная галерея. Краткий справочник. Пермь, 1967;
- Кулаков В. А. Пермская государственная художественная галерея. Альбом. М., 1976.