Чужанін дорйись лун

Босьтöм Рувикиись
Чужанін дорйись лун
Орден Красной Звезды.jpg
Аркмӧтӧм 1922 воӧ
Чулӧтӧны быд во
Лун Тӧвпом 23 лун
Йитӧм Гӧрд Армия медодзза бойезӧн германскӧй войскаэз паныт 1918 вося тӧвпомӧ
Логотип РУВИКИ.Медиа Медиафайлы на РУВИКИ.Медиа

«Чужанін дорйись лун» (рочӧн «День защитника Отечества») — донтан лун, кӧда чулӧтсьӧ быд во тӧвпом 23 лунӧ Россияын да СССР-ся кӧркӧся республикаэзын. 1922 восянь СССР-ын донтан луныс чулӧтсис быд во кыдз Гӧрд Армия лун, 1946 восянь — Советскӧй Армия лун, 1949 восянь 1992 воӧдз — Советскӧй Армия да Военно-морскӧй флот лун. Тӧвпом 23 луныс вӧлі уджалан лун дӧс советскӧй граждана понда, военнослужащӧйез киння[1].

СССР разьсьӧм бӧрын донтан луныс порйӧтсьӧ Россияын кыдз Чужанін дорйись лун да пырӧ Россия воинскӧй слава луннэз лыдӧ. Чужанін дорйись луныс — дорйӧм сфераись иньпӧлӧс да айпӧлӧс удж донтан лун[2].

Донтан лун аркмӧтӧм

Российскӧй империяын Октябрьскӧй революция вотӧдз арпом 26 лунӧ чулӧтсис Георгиевскӧй кавалеррез донтан лун. Порйӧтӧмыс вӧлі пуктӧм орденсӧ 1769 воӧ аркмӧтан лунӧ. Паськытжык порйӧтӧмыс, кӧда бы вӧлі кӧсйӧм Чужанін быдӧс дорйиссезлӧ, Россияын эз вӧв[3].

Аркмӧтан одзын

1918 во тӧвшӧр 15 лунӧ (вильмоза тӧвшӧр 28 лунӧ) Советскӧй Россиялӧн народнӧй комиссаррез совет лэдзис декрет Гӧрд Армия (рочӧн Рабоче-крестьянская Красная армия, дженыта РККА) аркмӧтӧм йылісь (публикуйтӧм 1918 вося тӧвпом 2 лунӧ большевиккез правительстволӧн официальнӧй публикайтан органын[4]). Фронт вылын пондӧтчисӧ ӧктыны виль армия, кӧдаись формируйтісӧ гӧрд армияся ротаэз, кӧднӧ ӧктісӧ полккезӧ[5].

Тӧвпом 18 лунӧ германскӧй да австро-венгерскӧй войскаэз ӧдззӧтчисӧ быдсӧн Асыввывся фронтӧт. Тӧвпом 21 лунӧ вӧлі аркмӧтӧм Петроградын Революционнӧй дорьян комитет (рочӧн Комитет революционной обороны), кӧдӧн юраліс Яков Свердлов. Тӧвпом 22 лунся рытӧ Петроградӧ Владимир Ленин корӧм кузя Могилёвись локтіс кӧркӧся генерал Михаил Бонч-Бруевич, Верховнӧй главнокомандующӧй штабӧн юралісь, кӧда кутчис юравны Советскӧй Россия визирсайся врагсянь дорйӧмӧн. Ленинкӧт совещаннё бӧрын Бонч-Бруевичыс кутчис уджавны Смольнӧйын, кытӧн овмӧтчис Ленин кабинеткӧт ордчча жырын[6].

Наступленнёсӧ Ревель, Псков да Нарва вылӧ нуӧтісӧ 8-ӧт германскӧй армиялӧн войскоэз, кӧдна вӧлісӧ ӧктӧмӧсь квать дивизияись да кынымкӧ мӧдік частись. Псков направленнё вылын наступленнё дырни германскӧй ладорлӧн выннэс вӧлісӧ 5 полк[7]. Немеццез наступайтісӧ доброволеццезісь неыджыт «летучӧй» отряддэзӧн, кӧдна, «паныталӧм пантавтӧг мунісӧ поезддэзӧн, автомашинаясӧн да доддезӧн ылӧ одзлань жагвыв сибӧтчись главнӧй выннэзсянь»[8]. Немеццезлӧн одзлань мунан перытаыс лункӧлӧ лоис 50 км-ӧдз[9]. Пинск — Двинск — Рига линия дынсянь мунӧм бӧрын, немеццез медодзза неделься дырни босьтісӧ Минск, Полоцк, Псков, Ревель.

Тӧвпом 23 лунӧ ыджыт каррезын чулалісӧ массовӧй митинггез, оссис Гӧрд Армияӧ добровлеццез гижӧм, да тӧвпом 25 лунӧ фронт вылӧ мунісӧ медодзза Гӧрд Армияись отряддэз[10].

Тӧвпом 23 лун бӧрын гӧрд отряддэз пондісӧ панытавны германскӧй войскоэз. Валка карын немецкӧй часттез пырисӧ бойӧ латышскӧй стрелоккеза отрядкӧт. Газета «Правда» тӧвпом 24 лунӧ гижис: «Валкаын мунӧ немецкӧй ударниккезлӧн бой 300 морта латышскӧй отрядкӧт». Вӧлісӧ бойез Псков дынын, Ревель дынын, Гдов районын[7][10].

  • Гӧрд Армия аркмӧтӧм йылісь СНК декрет В. И. Ленин кырӧввезӧн.

    Гӧрд Армия аркмӧтӧм йылісь СНК декрет В. И. Ленин кырӧввезӧн.

  • Генерал фон Эйхгорн оккупируйтӧм Минскын, 1918 вося тӧвпом

    Генерал фон Эйхгорн оккупируйтӧм Минскын, 1918 вося тӧвпом

  • Германской империялӧн войскаэз. Киев, 1918 во одзтулысӧ

    Германской империялӧн войскаэз. Киев, 1918 во одзтулысӧ

  • Немец: «Россия панталӧ миянӧс сывтырья» (одесскӧй журналісь серпас, 1918 вося одзтулысӧ нето тулысшӧрӧ

    Немец: «Россия панталӧ миянӧс сывтырья» (одесскӧй журналісь серпас, 1918 вося одзтулысӧ нето тулысшӧрӧ

  • «Социалистическое отечество в опасности!» нима СНК декрета листовка, 1918 во тӧвпом 18 лунӧ

    «Социалистическое отечество в опасности!» нима СНК декрета листовка, 1918 во тӧвпом 18 лунӧ

Тӧвпом 23 лунӧ асылӧ германскӧй курьер ваис Совнаркомыслӧ ультиматум; чайтӧм понда вӧлі сетӧм 48 час[11]. РСДРП(б) ЦК заседаннё коста Ленин, чорыт паныталӧм вылӧ видзӧттӧг, пуктіс ЦК-лісь членнэсӧ примитны ультиматум. Ленин корис гижсьыны мирӧ германскӧй условиеэз сьӧрті. Сія лыддис, мый главнӧйыс — «быдпӧлӧс потеряэз донӧн видзны дісӧ пролетарскӧй властьлӧн, кӧда эм ни»[12][13][14]. Тӧпом 24 лунӧ ойнас сія вӧлі примитӧм. Но бойез мунісӧ одзтӧв 3 лунӧ мирнӧй договор кырымпасавтӧдз[7].

Тӧвшӧр 26 лунӧ РСФСР народнӧй комиссаррезлӧн Совет бурсьӧтіс решеннё вуджӧтны быдӧс юралан органнэсӧ Москваӧ.

1918 во одзтулыс 3 лунӧ вӧлі кырымпасалӧм Брестскӧй мир германскӧй условиеэз сьӧрті.

Московскӧй даРочму патриарх Тихон 1918 во одзтулыс 5 (18) лунӧ аслас посланнёын чорыта осудитіс Брестскӧй мир: «Ӧні пӧдналӧм мир, кӧда сьӧрті торйӧтчӧны миян дынісь быдса областтез, кытӧн олӧны православнӧй отир, и сетчӧны эскӧм сьӧрті тӧдтӧм враг воля вылӧ, а православнӧй отирлісь уна дас миллионнэз сюрӧны ыджыт духовнӧй соблазн условиеэзӧ асланыс эскӧм понда, … мир, кӧда сетӧ миянлісь отирнымӧс да роч му сьӧкыт кабалаӧ, — сэтшӧм мир оз сет отирлӧ колана шоччисьӧм да лӧнь. Православнӧй вичкулӧ жӧ ваяс ыджыт урон да горё, а Чужанінлӧ бертӧттӧм ӧшӧм»[15].

Донтан лун аркмӧтӧм

1919 во тӧвшӧр 19 лунӧ РККА Высшӧй военнӧй инспекциялӧн председатель Николай Подвойский ыстӧ ВЦИК-ӧ вӧзйӧм порӧтны РККА аркмӧтан лун тӧвшӧр 28 лунӧ:

Тӧвшӧр 28 лунӧ тырӧ во сія лунсянь, кӧр Народнӧй Комиссаррезлӧн Совет лэдзис Декрет Рабоче-крестьянскӧй Гӧрд Армия аркмӧтӧм йылісь. Бур бы вӧлі порйӧтны Гӧрд Армия аркмӧтан лун тӧвшӧр 28 лунӧ, декрет лэдзан лун кежӧ.

Сылӧн корӧмыс локтӧ сёрӧн да видзӧтсьӧ дзир тӧвшӧр 23 лунӧ. Сійӧн ВЦИК-ыс оз видзӧт сёрмӧм вӧзйӧмсӧ. Но сёжӧ тӧвшӧр 24 лунӧ Моссоветлӧн Президиум видзӧтӧ «Гӧрд Армия аркмӧтӧмсянь во кежӧ донтан лун лӧсьӧтӧм йылісь» юасьӧм да ӧтлаӧтӧ донтан лунсӧ Гӧрд козин лункӧт (тӧвпом 17 лунӧ). Гӧрд козинлісь лунсӧ планируйтісӧ кыдз ассяма буркеран акция, кӧр отирлӧ коліс козьнавны красноармееццез понда козиннэз. Но сійӧн, мый тӧвпом 17 луныс лоис понедельникӧ, Гӧрд козинлісь лунсӧ да, сідзкӧ, РККА-лісь годовщинасӧ вуджӧтісӧ медматісь вежалунӧ, мӧднёж шуны, тӧвпом 23 лунӧ. «Правда» газета юӧртіс:

Гӧрд козинлісь лунсӧ Россия пасьта чулӧтӧмсӧ вуджӧтӧмась тӧвпом 23 лунӧ. Эта лунӧ каррезын да фронт вылын лоас аркмӧтӧм Гӧрд Армия аркмӧтан лун порйӧтӧм, кӧда тырис тӧвшӧр 28 лунӧ.

Сыбӧрын донтан лунсӧ вунӧтісӧ кынымкӧ во кежӧ да бӧр лӧсьӧтісӧ 1922 воӧ. Сы вося тӧвшӧр 27 лунӧ вӧлі йӧзӧтӧм ВЦИК Президиумлӧн постановленнё Гӧрд Армиялісь 4 во порйӧтӧм йылісь, кытӧн висьтавсис[16]:

Советтэзлӧн IX Всероссийскӧй съездлӧн Гӧрд Армия йылісь постановленнё сьӧрті ВЦИК Президиум петкӧтӧ исполкоммез син одзӧ локтан Гӧрд Армия аркмӧтан лун (тӧвпом 23 лун).

Гӧрд Армия аркмӧтан лун порйӧтӧм афиша. Псков, 1919 тӧвпом 23 лун[17].

Тӧвпом 23 лунлӧн одзтас

1923 воӧ паськыта порйӧтсис РККА-лӧн 5 вося юбилей, да тӧвпом 23 лунлӧн донтӧмыс лоис союзпасьтся. Республика Реввоенсовет 1923 во тӧвпом 5 лунся приказын, кӧдӧ кырымпасаліс Л. Д. Троцкий, донтан лунынслӧн одзтасӧн гижӧм этадз: «1918 во тӧвпом 23 лунӧ враггез давленнё увтын уджалісь да крестьянскӧй правительство юӧртіс, мый колӧ лӧсьӧтны вооружённӧй вын»[9]. Сія жӧ воӧ «Военная мысль да революция» нима журналын петіс, мый тӧвпом 23 лунӧ вӧлі формируйтӧма первӧй медодзза Гӧрд Армияись часть, кӧда участвуйтіс бойезын ой-рытвыв ладорын.

1933 воӧ К. Е. Ворошилов (Троцкийлӧн политическӧй панытісь) РККА 15 вося пӧрйӧтӧм коста висьталіс[18]:

Сідзту шуны, РККА юбилейлісь донтан лунсӧ тӧвпом 23 лун кежӧ лӧсьӧтӧмыс ӧддьӧн случайнӧй, да сьӧкыт висьтавны, оз лӧсяв историческӧй датаэзкӧт.

Сы дырйи, постсталинскӧй кадӧ генерал-майор профессор С. Ф. Найда тодиляліс, мый Сӧветскӧй армиялісь чужан лун чулӧтӧм понда подувнас лоис сія, мый тӧвпом 23 лунӧ Петроградын пондӧтчис гӧрдармейскӧй отряддэз формируйтӧм В. И. Ленин корӧм сьӧрті "Социалистическое Отечество в опасности! " нима декретын[19].

Чужанін дорйись лун канмуэзӧт

Чужанін дорйись луныс чулӧтсьӧ мукӧд канмуын, кӧда вӧлі СССР-ын.

СССР кадся почта маркаэз, кӧдна вӧлісӧ лэдзӧмӧсь 1968 во тӧвпом 23 лунӧ СССР ВС 50 во кеж.

Чужанін дорйись лун Россияын

РФ Верховнӧй Советлӧн дорйӧм да опастӧмалӧм сьӧрті комитетлӧн инициатива сьӧрті донтан лунлӧ виль ним вӧлі сетӧм РФ Верховнӧй Сӧвет Президиум 1993 во тӧвпом 8 лунся № 4423 «Российскӧй Федерацияын тӧдчана лун — Чужанін дорйиссезлӧн лун — лӧсьӧтӧм йылісь» постановленнёӧн.

2002 восянь РФ ФС Государственнӧй думалӧн постановленнё сьӧрті тӧвпом 23 луныс Россияын лоӧ донтан лунӧн, кӧда абу уджалана, да этӧ лунсӧ чулӧтӧны кыдз «Чужанін дорйись лун» «Россияын воинскӧй слава луннэз да касьтылан луннэз йылісь» 1995 одзтулыс13 лунся 32-ФЗ No-а РФ Федеральнӧй закон сьӧрті[20]. Эта закон сьӧрті, «Чужанін дорйись лун» лоӧ Российскӧй Федерацияын Россиялӧн воинскӧй слава лунӧн.

2006 во одзтулыс 24 лунӧ Госдума пуктіс кидтыны законісь донтан лун официальнӧй гижалӧмись сэтшӧм кыввез "Гӧрд Армиялӧн Германияын кайзерскӧй войскоэз вылын победа лун (1918 во) ", да сідзжӧ гижны эта законын ним йылісь «дорйись» кыв ӧтка лыдын (сы сьӧрті, кыдз сія праздник сэк кежӧ шусис ни РФ-лӧн Удж кодекс ст. 112 сьӧрті).

Постсоветскӧй Россияын тӧвпом 23 лун — унаотира донтан лун, кӧдӧ пӧрйӧтӧны и уджалан коллективтэзын, и школаэзын, и семьяэзын. Но юалӧм вылӧ, кытшӧм йӧзӧс колӧ эта лунӧ вежалунавны, абу консенсуса ответ. Эмӧсь куим видзӧтӧм: мый вежалунаны колӧ дзир профессиональнӧй военнӧйезӧс; мый вежалунавны уолӧ быдӧннысӧ, кинлӧн сідз нето мӧднёж вӧлі йитӧт армиякӧт, Великӧй Отечественнӧй война ветераннэзӧс; дам мый сія донтан лун быдӧс российскӧй айпӧлӧс гражданнэзлӧн, ны лыдын учӧт зонкаоккез да кин эз кысъяв армияын[21].

Чужанін дорйись лун, Москва, Александровскӧй сад, 2008 во тӧвпом 23 лун. Россиялӧн Президент Владимир Путин пуктӧ венок Тӧдтӧм солдат шойгу вылӧ.

Москваын донтан лунся традицияӧн лоӧ Кремль дынын торжественнӧй церемония, Тӧдтӧм Солдат шойгу дынӧ веноккез пуктӧм. Александровскӧй садӧ локтӧны Россиялӧн Президент, Федеральнӧй Собраннём кыкнан палатаись юраліссез, военнӧй руководство, политическӧй партияэзісь юраліссез, вичкуись священноначальство[22]. Минута чӧлӧм бӧрын орсӧ государственнӧй гимн, сыбӧрын торжественнӧй маршӧн мунӧ почётнӧй карауллӧн рота. Тодиль массовӧй мероприяттёэз чулӧтӧны и политическӧй партияэз[23].

Рытнас канму юраліссез вовлӧны видзӧтны Чужанін дорйись лунлӧ сиӧм вежалунс концерт. Сідзжӧ рытнас Москваын да Россияись уна мӧдік каррезын керӧны вежалунся салют[24][25].

Псковын чулӧтсьӧны концерт, кӧда сиӧм Чужанін дорйись лунлӧ, да сідзжӧ парад Гӧрд Армия медодзза бойезлӧ памятник дынын[26][27][28]. Параддэз сія лунӧ чулӧтсьӧны Россияын мӧдік каррезын[29]. Чулӧтсьӧны 1918 во тӧвпомся вӧлӧмлӧн реконструкцияэз[30][31].

Псков дынся бойезлӧн реконструкция. Псков, 2018 во тӧвпом 23 лунӧ.

Севастопольын мунӧ митинг, кӧда кӧсйӧм Чужанін дорйись лунлӧ да Отир воля лунлӧ, кӧда вӧлі аркмӧтӧм 2014 воын вӧлӧм сьӧрті. Сэк тӧвпом 23 лунӧ Севастополь шӧрын уна сюрс морт петісӧ митингӧн Россиякӧт ӧтлаасьӧм понда[32][33][34].

Россия граждана понда Чужанін дорйись луныс — ыджыт да тӧдчана дата. «Общественное мнение» нима фондӧн керӧм опрос сьӧрті, кӧдӧ чулӧтісӧ 2013 во тӧвпомӧ, сідз висьталӧны юасьӧм отирись 77 %[35].

Тӧвпом 23 лун — Чужанін дорйись лун — пуктӧм шоччисяна донтан лунӧн ДНР-ын да ЛНР-ын[36][37][38][39].

Чужанін дорйиссез да Вооружённӧй Выннэз лун Белоруссияын

Белорусскӧй да российскӧй военнослужащӧйез ӧтлаын чулӧтӧны Чужанін дорйись лунлӧ кӧсйӧм порйӧтӧммез[40][41]. Белоруссия ВС-лӧн 100 вося юбилейӧн йитӧм 2018 во тӧвпом 23 лунӧ Гродноын муніс парад, кытӧн участвуйтіс авиация[42], а сідзжӧ юркарын — герой-кар Минскын, крепость-герой Брестын, Витебск, Гомель, Гродно да Могилёв каррезын керӧмась куимдас залпа вежалунся салют[43][44].

Чужанін дорйись лун Кыргызстанын

Кыргыстанын донтан лун кежӧ лӧсьӧтчӧм. Бишкек, 2018 во тулыспомӧ.

Киргизияын Чужанін дорйись лунсӧ чулӧтӧны быд во тӧвпом 23 лунӧ. Сія луныс лоис шоччисяна донтан лунӧн 2004 воӧ бурсьӧтӧм Кыргызстан Республика Удж кодекс сьӧрті (113 статья). Киргизияын Вооружённӧй Выннэзлісь донтан лун чулӧтсьӧ тулыспом 29 лунӧ и лоӧ уджалан лунӧн.

Бишкекын эта лунӧ мэрия керку одзся отаинын мунӧ Бишкек гарнизонісь личнӧй состав торжественнӧя стройӧтӧм, сыбӧрын военнослужащӧйез оркестр орсӧм дырни мунӧны парадӧн юркарся медшӧр отаин «Ала-Тоо» дынӧдз[45][46].

Чужанін дорйись лун Казахстанын

Казахстанын Чужанін дорйись лунсӧ чулӧтӧны тулыспом 7 лунӧ. Датаыс йитӧм сыкӧт, мый 1992 воӧ тулыспом 7 лунӧ Казахстанісь президент (кӧда вӧлі медвылісь главнокомандующӧйӧн) Нурсултан Назарбаев кырымпасаліс национальнӧй вооружённӧй выннэз аркмӧтӧм йылісь указ.

Тӧвпом 23 луныс Казахстанас абу официальнӧй донтан лун, но сія кольччис лунӧн, кӧр айпӧлӧс буркывтӧны да вежалуналӧны, козьналӧны козиннэз[47].

Дорйись лун да Таджикистанлӧн Вооружённӧй выннэз аркмӧтан лун

«Чужанін дорйись лун» кеж лӧсьӧтчӧм Таджикистанын. Душанбе, 2018 во тӧвпом 13 лун.

Таджикистанын тӧвпом 23 лунӧ чулӧтӧны Дорйись лун да Вооружённӧй выннэз аркмӧтан лун[48].

1992 во тӧвшӧрӧ Таджикистанлӧн президент указӧн вӧлі аркмӧтӧм Таджикистан Республикалӧн дорйӧм комитет, кӧда кпиод увтӧ пырисӧ канмуын дислоцируйтӧм часттез да соединеннёэз, военкоматтэз, штаббез, гражданскӧй обороналӧн учрежденнёэз да формированнёэз, вуззэзлӧн военнӧй кафедраэз, военно-юридическӧй органнэз, обеспеченнё да обслуживайтӧм сьӧрті часттез. Вӧлі пондӧтӧм национальнӧй гвардия аркмӧтан процесс. 1992 во одзтӧв 18 лунӧ РТ-ись Верховнӧй Совет Президиум указ сьӧрті вӧлі аркмӧтӧм Таджикистанлӧн дорйӧм сьӧрті министерство, да сія лоис национальнӧй Вооруженнӧй Выннэз аркмӧтан процесс пондӧтӧмӧн. Медодзза подразделеннёэз, часттез да соединеннёэз вӧлісӧ формируйтӧмӧсь Народнӧй фронт отряддэз база вылын.

1993 во тӧвпом 23 лунӧ СССР разьсьӧм бӧрся гражданскӧй война коста медодззаись Душанбеын вӧлі чулӧтӧм Вооружённӧй Выннэзлӧн военнӧй парад. Сійӧн, мый историческӧя тӧвпом 23 лунсӧ чулӧтісӧ кыдз Вооружённӧй Выннэзлӧн лун, канмуӧн юраліссез пуктісӧ этӧ лунсӧ Таджикистанлӧн Вооружённӧй Выннэз аркмӧтан лунӧн[49].

Чужанін дорйись лун Лунвывся Осетияын

Тӧвпом 23 лун Лунвывся Осетияын лоӧ официальнӧй донтан лунӧн да шоччисян лунӧн. Тӧвпом 23 лунӧ Лунвывся Осетияись юраліссез да общественность касьтылӧны ветераннэзӧс, кӧдна кысъялісӧ Великӧй Отечественнӧй война воэзӧ Советскӧй Армияын, да сідзжӧ быдӧннысӧ, кин сувтісӧ Лунвывся Осетия дор 1990-ӧт воэзӧ, да одзлань видзӧны дорйӧмсӧ. Касьтылӧны буркывтӧмӧн кыдз дорйӧм министерствоись, ОМОН-ись, мӧдік подразделеннёэзісь военнослужащӧйезӧс, сідз и МВД-ись уджаліссезӧс. Лунвывся Южнӧй Осетия пасьта неделя сьӧрна мунӧны касьтылан рыттэз да сы дорйись отиркӧт пантасьӧммез.

Тӧвпом 23 лун Абхазияын

Тӧвпом 23 лун Абхазияын чулӧтӧны, но сія абу официальнӧй донтан лун. Эта лунӧ Абхазия Республикалӧн дорйӧм министерствоись военнослужащӧйез ӧтлаын 7-ӧт российскӧй военнӧй базаись военнослужащӧйезкӧт, кӧдна дислоцируйтӧмӧсь Абхазияын, да РФ ФСБ-лӧн РА-ын Пограничнӧй управленнёись пограничниккезкӧт пуктӧны веноккез да дзоридззез Сухумын Махаджир вадӧртуй вывся Тӧдтӧм Солдатлӧ памятник дынӧ. Сідзжӧ пуктӧны веноккесӧ Абхазияын 1992—1993 воэзся Отечественнӧй войнаын вийсьӧммезлӧ да российскӧй миротвореццезлӧ, кӧдна вийсисӧ кысъӧм дырни грузино-абхазскӧй конфликт зонаын. Абхазскӧй да российскӧй военнӧйез пуктӧны дзоридззез Слава Паркын да вийсьӧм миротвореццезлӧ обелиск дынӧ[50].

Тӧвпом 23 лун Арменияын

Арменияын эта луныс абу канму статуса донтан лун. Но тӧвпом 23 лунӧ Ереванын да Гюмриын чулӧтсьӧны мероприяттёэз Чужанін дорйись лун кеж. Арменияись дорйӧм сьӧрті министр, Вооружённӧй выннэз Главнӧй штаблӧн начальник, Арменияын РФ-лӧн чрезвычайнӧй да полномочнӧй посол, Арменияись да Россияись Вооружённӧй выннэзлӧн ыджыт чина офицеррез да военнослужащӧйез, дипломатическӧй ведомствоэзлӧн представителлез вовлӧны Ереванісь Победа паркӧ. Нія тэчӧны веноккез Тӧдтӧм Солдатлӧ памятник дынӧ. Сыбӧрын паркын параднӧй стройӧн мунӧны армянскӧй да российскӧй военнослужащӧйез.

Гюмри карын «Дом Москвы» нима культурно-деловӧй центр Москва правительстволӧн внешнеэкономическӧй да международнӧй йитӧттэз департамент отсӧтӧн тӧвпом 23 лун кежӧ чулӧтӧ военно-патриотическӧй концерт, кытӧн сьылӧны тӧдса армянскӧй сьыліссез да музыканттэз. Карся драмтеатрын ӧксьӧны карись оліссез, Гюмриын дислоцируйтӧм 102-ӧт российскӧй военнӧй базаись военнослужащӧйез[51].

Тӧвпом 23 лун Латвияын

Латвия ас суверенитет босьтӧм бӧрын тӧвпом 23 луныс дугдіс лоны официальнӧй донтан лунӧн[52]. Кӧть и одззамоз сійӧ порйӧтӧны Латвияын олісь Великӧй Отечественнӧй войнаын участниккез, СССР армияись кӧркӧся военнӧйез, вооружённӧй конфликттэзын участниккез, советскӧй высшӧй военно-учебнӧй велӧтчанӧннэз помаліссез. Сідз, Даугавпилсын традиция сьӧрті эта лунӧ Дубровин нима паркын мемориал дынӧ ӧксьӧны карын олісь отир, мед касьтывны кар понда бойезын вийсьӧм военнӧйезӧс. Ригаын тӧвпом 23 лунӧ пуктӧны веноккез Латвия да Рига мездіссезлӧ Пардаугаваись памятник дынӧ[53].

Тӧвпом 23 лун Эстонияын

Сія лунӧ Российскӧй Федерация да Республика Беларусь посольствоэзын уджаліссез, Эстонияись ветеранскӧй да общественнӧй организацияэзісь отир участвуйтӧны Таллиннісь Воинскӧй шойнаын Воин-мездісь (Бронзовӧй солдат) памятник дынӧ веноккез да дзоридззез пуктан церемонияын[54].

Чужанін дорись лун Днестрдынся Молдавскӧй Республикаын

ДМР-ын Чужанін дорйись лун лоӧ канму статуса донтан лунӧн да чулӧтсьӧ тӧвпом 23 лунӧ. Медыджыт вежалунся мероприяттёэс чулӧтсьӧны Тираспольын. Ныын участвуйтӧны президент да силовӧй кысъӧттэзісь юраліссез[55].

Пасйӧттэз

  1. ↑ День защитников Отечества рус..
  2. ↑ Поздравление Владимира Путина по случаю Дня защитника Отечества (2024-02-23).
  3. ↑ Константин Медведев 23 февраля - День защитника Отечества. Чем важен этот праздник для нас?.
  4. ↑ Газета Временного рабочего и крестьянского правительства. — 20 января (2 февраля) 1918. — № 13 (58). — С. 1.
  5. ↑ Черепанов А. И. «Под Псковом и Нарвой». — М. : Воениздат, 1956. — С. 18.
  6. ↑ Ганин А. В. И. Г. Пехливанов — один из первых историографов Первой балканской войны. Архивная копия от 19 Одзтулыс 2015 на Wayback Machine // promacedonia.org
  7. ↑ 1 2 3 Николаев П. А. Интервенция Германии // Интервенция на Северо-Западе России 1917—1920 гг. — Российская академия наук, Институт российской истории, Санкт-Петербургский филиал. — СПб.: «Наука», 1995. — С. 93—99.
  8. ↑ Черепанов А. И. Под Псковом и Нарвой. — М. : «Воениздат», 1956. — С. 71.
  9. ↑ 1 2 Гривенко В. Историческое переосмысление 23 февраля Архивная копия от 19 Тӧвпом 2007 на Wayback Machine // Независимое военное обозрение : интернет-газета // nvo.ng.ru (16 февраля 2007 года)
  10. ↑ 1 2 Кораблёв Ю. Защита Республики. Как создавалась Рабоче-крестьянская Красная армия. // Переписка на исторические темы: диалог ведёт читатель. — М.: Политиздат, 1989. — С. 160—161.
  11. ↑ Kotkin, 2014, с. 256.
  12. ↑ Барсенков А. С., Вдовин А. И. История России. 1917—2004 гг. : учеб. пос. для вузов. — М., 2005. — С. 62.
  13. ↑ Ленин В. И. Мир или война (напечатано 23 февраля 1918 г.) // Полн. собр. соч. — Т. 35. — С. 368.
  14. ↑ Войтиков С. С. Развитие взглядов высшего руководства Советской России на военное строительство в ноябре 1917 — марте 1918 г. // Вопросы истории : журнал. — № 10. — 2007.
  15. ↑ Послание Патриарха Московского и всея России Тихона по поводу заключения Брестского мира. 5 (18) марта 1918 года.
  16. ↑ Историческая справка о дне 23 февраля. Архивная копия от 25 Тӧвшӧр 2020 на Wayback Machine // happy-year.narod.ru
  17. ↑ С историей формирования Красной армии можно ознакомиться на выставке в Пскове. Архивная копия от 14 Тулысшӧр 2021 на Wayback Machine // pln-pskov.ru
  18. ↑ Максим Хрусталёв. «Несокрушимая и легендарная». — Исторические корни Дня защитника Отечества. Архивная копия от 7 Гожумпом 2017 на Wayback Machine // km.ru (23 февраля 2010 года)
  19. ↑ Найда С. Ф. Почему день Советской армии и Военно-морского флота празднуется 23 февраля? // Военно-исторический журнал. — 1964. — № 5. — С.115—117.
  20. ↑ Федеральный закон Российской Федерации № 32-ФЗ от 13 марта 1995 года «О днях воинской славы (победных днях) России». Архивная копия от 26 Арпом 2021 на Wayback Machine Официальный сайт Президента Российской Федерации // kremlin.ru
  21. ↑ Кого нужно поздравлять 23 февраля? Аргументы и факты (22 февраля 2017).
  22. ↑ В День защитника Отечества Святейший Патриарх Кирилл возложил венок к могиле Неизвестного солдата у Кремлёвской стены.
  23. ↑ 23 февраля 2018 года. Москва. Шествие КПРФ.
  24. ↑ Полная программа мероприятий на 23 февраля в Волгограде.
  25. ↑ Москва отметила День защитника Отечества красочным салютом
  26. ↑ В Пскове состоялся торжественный концерт, приуроченный к 100-летию Красной армии и Дню защитника Отечества.
  27. ↑ 23 февраля 2016 года на площади у стелы в Крестах состоялся парад войск в честь Дня защитника Отечества.
  28. ↑ Парад в Крестах 23 февраля 2017 года.
  29. ↑ Парад в День защитника Отечества в Омске.
  30. ↑ Масштабная историческая реконструкция к столетию образования РККА состоялась в Пскове (ВИДЕО).
  31. ↑ Празднование Дня защитника Отечества в Псковской области.
  32. ↑ На митинге в Севастополе без единого украинского флага выбрали нового мэра, гражданина РФ — СМИ. Интерфакс-Украина.
  33. ↑ Двойной праздник: в Севастополе отметили 23 Февраля и День народной воли.
  34. ↑ Выпуск «Севинформбюро» от 23 февраля 2018 года
  35. ↑ О российской армии и 23 февраля.
  36. ↑ День защитника Отечества 2018 в Донецке.
  37. ↑ Глава ДНР объявил 23 февраля выходным днём.
  38. ↑ В ЛНР подписан указ о праздновании 23 февраля.
  39. ↑ ЛНР отметила День защитника Отечества награждением отличившихся, митингами и салютом (ФОТО).
  40. ↑ Российские и белорусские десантники на лыжах отметили 100-летие Красной армии. Архивная копия от 22 Тӧвпом 2018 на Wayback Machine Телеканал «РЕН ТВ» // ren.tv (22 февраля 2018 года)
  41. ↑ Ярослав Мирнов. В Пскове прошёл парад, посвящённый Дню защитника Отечества. — Участниками марша стали десантники из Пскова и Белоруссии, лётчики, спецназовцы и сотрудники УФСИН. Архивная копия от 25 Тӧвпом 2018 на Wayback Machine Газета «Комсомольская правда» (Псков) // pskov.kp.ru
  42. ↑ ВИДЕО. Военный парад к 100-летию Вооружённых Сил Республики Беларусь. Гродно, 23 февраля 2018 года. Архивная копия от 29 Гожумпом 2020 на Wayback Machine // youtube.com (пользователь — «Телеканал Гродно Плюс»; опубликовано 24 февраля 2018 года)
  43. ↑ Военный парад в Гродно прошёл с участием авиации. Архивная копия от 24 Тӧвпом 2018 на Wayback Machine «Белорусское телеграфное агентство» (БЕЛТА) // belta.by (24 февраля 2018 года)
  44. ↑ Приказ министра обороны Республики Беларусь от 7 февраля 2018 года № 170 «О праздновании Дня защитников Отечества и 100‑летнего юбилея Вооружённых Сил Республики Беларусь». Архивная копия от 24 Тӧвпом 2018 на Wayback Machine Белорусская военная газета «Во славу Родины» // vsr.mil.by (23 февраля 2018 года)
  45. ↑ Военный парад прошёл в Киргизии в День защитника Отечества. Архивная копия от 31 Одзтӧв 2013 на Wayback Machine РИА «Новости» // ria.ru (23 февраля 2012 года)
  46. ↑ В центре Бишкека военные устроили марш по случаю 23 февраля (видео). // mir24.tv (23 февраля 2013 года) Архивная копия от 30 Одзтӧв 2013 на Wayback Machine
  47. ↑ 23 февраля или 7 мая? Информационная система ПАРАГРАФ.
  48. ↑ Парад в Душанбе 23 февраля 2013 года (видео) Архивная копия от 30 Одзтӧв 2013 на Wayback Machine
  49. ↑ 23 февраля — День защитника и День образования Вооружённых Сил Таджикистана Архивная копия от 31 Одзтӧв 2013 на Wayback Machine
  50. ↑ 23 февраля — День защитника Отечества в Абхазии Архивная копия от 30 Одзтӧв 2013 на Wayback Machine
  51. ↑ День защитника Отечества отметили в Армении.
  52. ↑ 23 февраля в Латвии: не «День защитника отечества», но «Мужской день» и для многих — праздник.
  53. ↑ В Риге отметили 23 февраля.
  54. ↑ 23 февраля: День защитника Отечества на Воинском кладбище в Таллине.
  55. ↑ Военно-спортивный праздник, посвящённый Дню защитника Отечества — 23/02/18.
Босьтӧма "https://koi.ruwiki.ru/w/index.php?title=Чужанін_дорйись_лун&oldid=212779"-ись