Социалистическӧй Уджын Герой
| Социалистическӧй Уджын Герой | |
|---|---|
 |
|
| Канму |
 СССР |
| Тип | СССР-ын канму статуса ыджыт донтан пас |
| Статус | оз сетсьы |
| Статистика | |
| Аркмӧтӧм | 1938 во одзтӧв 27 лун |
| Медодзза сетӧм | 1939 во одзтӧв 20 лун |
| Медбӧрья сетӧм | 1991 во одзтӧв 21 лун |
| Сетӧм лыд | 20 614[1] |
| Сьӧрсьӧн | |
| Ыджытжык донтан пас | Советскӧй Союзлӧн Герой |
| Учӧтжык донтан пас | Мам-героиня[d] |
 Медиафайлы на РУВИКИ.Медиа | |
Социалистическӧй Уджын Герой (рочӧн Герой Социалистического Труда)— Советскӧй Союзын канму статуса ыджыт донтан пас, кӧдӧн ошкисӧ мортӧс сы удж понда. Сетсис 1938—1991 воэзын.
Донтан пас аркмӧтӧм
.jpg)
«Социалистическӧй Уджын Герой» званнё да званнё йылісь положеннё вӧлісӧ аркмӧтӧмӧсь СССР Верховнӧй Совет Президиум 1938 во одзтӧв 27 лунся «Ыджыт донтан пас — Социалистическӧй Уджын Герой званнё — аркмӧтӧм йылісь» (рочӧн «Об установлении высшей степени отличия — звания Героя Социалистического Труда» ) указӧн. Одзжык вӧлі Уджын Герой званнё.
Положеннёас вӧлі гижӧм: «Социалистическӧй Уджын Герой званнё лоӧ медыджыт донтан пасӧн хозяйственнӧй да культурнӧй строитӧмын да сетсьӧ морттэзлӧ, кӧдна асланыс ыджыт новаторскӧй уджӧн промышленностьын, мувӧдитӧмын, транспортын, вузасьӧмын да туялӧмын мыччалісӧ канму одзын да отсалісӧ лэбтыны народнӧй хозяйство, культура, туялӧм, СССР-лісь вын да гора ним». Положеннёыс сьӧрті, Социалистическӧй Уджын Геройлӧ сетсис Ленин нима орден да СССР Верховнӧй Совет Президиумсянь грамота.
Медодззаись донъялӧмыс чулаліс аркмӧтӧмсянь во бӧрті: 1939 во одзтӧв 20 лунӧ Социалистическӧй Уджын Герой званнёнас вӧлі ошкӧм Иосиф Сталин сы 60 во кеж да «дзир ыджыт удж Большевистскӧй партия организуйтӧм, Советскӧй государство аркмӧтӧм, СССР-ын социалистическӧй олан керӧм да Советскӧй Союзісь йӧззэз ёрталӧм понда»[2].
Сёрӧнжык СССР Верховнӧй Совет Президиум 1940 во тулыспом 22 лунся «Социалистическӧй Уджын Геройез понда содтӧт донтан пассэз йылісь» (рочӧн «О дополнительных знаках отличия для Героев Социалистического Труда») указӧн вӧлі аркмӧтӧм тодиль донтан пас — «Чарла да доран» зарниа медаль (рочӧн золотая медаль «Серп и Молот»).
Медодз Социалистическӧй Уджын Герой званнёыс сетсис ӧтпырись, уджын виль подвигыс понда сетсис мӧдік зарниа медаль. СССР Верховнӧй Совет Президиум 1949 во одзтулыс 3 лунся указӧн вӧлі позьӧтӧм сетны Социалистическӧй Уджын Геройлӧ, мувідитӧмын уджалісьлӧ, мӧдік «Чарла да доран» зарниа медаль. Эта указӧн, кыкись Геройезлӧ ны чужанінын вермисӧ сувтӧтсьыны бронзаись керӧм бюсттэз. Мӧдік зарниа медаллесӧ сетлісӧ сідзжӧ Социалистическӧй Уджын Геройезлӧ, кӧдна уджалісӧ мӧдік уджын.
Ленин нима орденыс медодз сетсис ӧтпырись, званнёыс медодзза сетӧмыс коста.
Сёрӧнжык СССР Верховнӧй Совет Президиум 1967 во одзар 6 лунся указӧн бурсьӧтіс льготаэз Социалистическӧй Уджын Геройез, Советскӧй Союзлӧн Геройез, Слава ордена куимнан степеня кавалеррез понда. Льготаэслӧн нимлёдзыс вӧлі ыждӧтӧм Победа 30 во кеж 1975 во тулысшӧр 30 лунся указӧн, сія уджалана ӧнӧдз да бурсьӧтӧм Российскӧй Федерация законодательствоӧн, кӧть Социалистическӧй Уджын Герой званнёыс абу ни.
1973 воӧ тулыспом 14 лунся указӧн вӧлі бурсьӧтӧм Социалистическӧй Уджын Герой званнёыс йылісь положеннёыслӧн виль редакция. Сыись вӧлі кырӧвтӧм одззася «Чарла да доран» медальсӧ медунасӧ куимись позяна сетӧм, кӧда вӧлі 1940 восянь (куимись, унажык оз позь)[3]. Положеннёнас вӧлі пыртӧм Ленин нима орден сетӧм быд «Чарла да доран» медаль сетӧмкӧт. Сійӧн положеннёнас жӧ вӧлі пыртӧм, мый мортыс кӧ ӧткоста Социалистическӧй Уджын Герой да Советскӧй Союзлӧн Герой, сы чужанінын сувтӧтсьӧ бронзаись керӧм бюст, сідзжӧ кыдз сія бы вӧлі кыкись Социалистическӧй Уджын Герой. Сы киння, положеннёнас вӧлі пыртӧм льготаэз нимлёдз, кӧдна вӧлісӧ пуктӧмӧсь одзжык.
СССР Верховнӧй Совет Президиум 1988 во гожумпом 22 лунся «СССР канму донтанпассэз сетӧм окыт бурсьӧтӧм йылісь» (рочӧн «О совершенствовании порядка награждения государственными наградами СССР») постановленнёӧн вӧлі дугдӧтӧм мӧдӧдззаись «Чарла да доран» медаль сетӧм.
Куим во бӧрті, 1991 воӧ, званнёыс вӧлі дугдӧтӧм ӧтлаын СССР-ся донтанпасъя системаӧн.
Сетӧм статистика
Быдӧссӧ Социалистическӧй Уджын Герой званнёы вӧлі сетӧм 20 747-ись. 89 мортлісь званнёыс вӧлі босьтӧм бӧр, 45 мортлісь званнёыс вӧлі кидтӧм кыдз абу подула. Куим мортлісь кидтісӧ «Чарла да доран» медаль, сідз нія кольччисӧ ӧтік званнёнас. Сідз Социалистическӧй Уджын Геройеслӧн лыдыс лоӧ 20 613 морт[4], ны коласын 201 морт — кыкись да 15 — куимись. 20-ся унажык морт вӧлісӧ ошкӧмӧсь кулӧмныс бӧрын.
Ӧння кадӧ
СССР разьсьӧм бӧрын Социалистическӧй Уджын Геройезлӧ — Россия гражданалӧ 2006 во гожумшӧр 1 лунсянь[5] вештіссьӧ быдво индексируйтӧм быдтӧліся сьӧмвештӧт 26 847 руб ыжда (2021 во тӧвпом 1 лунсянь — 50 755 руб 54 копейка)[6].
2023 восянь Социалистическӧй Уджын Геройезлӧ быдтӧлісся сьӧмвештӧтыс пуктӧм 61 566,28 руб ыжда[7].
Коми-Пермяцкӧй округись Социалистическӧй Уджын Геройез
- 1961 — Дмитрий Ярусов (1914—1993), металлург, Социалистическӧй Уджын Герой.
- 1966 — Пётр Баяндин (1907—1993), хирург, РСФСР-лӧн Заслуженнӧй врач, Мурмансклӧн Почётнӧй гражданин, Социалистическӧй Уджын Герой.
- 1966 — Матвей Крохалев (1926—2008), комбайнёр, Социалистическӧй Уджын Герой, Коми-Пермяцкӧй автономнӧй округлӧн Почётнӧй гражданин.
- 1971 — Виктор Четин (1931—2019), вӧрзаптісь, Социалистическӧй Уджын Герой, Коми-Пермяцкӧй автономнӧй округлӧн Почётнӧй гражданин.
- 1971 — Таисья Полуянова (1934 —1993), куканьбыдтісь, Социалистическӧй Уджын Герой.
Пасйӧттэз
- ↑ Без учёта лиц, которые были лишены звания или в отношении которых указы о присвоении звания были отменены.
- ↑ В России будут награждать героев капиталистического труда. Top.rbc.ru. Дата обращения: 1 апреля 2013. Архивировано из оригинала 1 апреля 2013 года.
- ↑ К проекту федерального закона 247077-4 О внесении изменений в Федеральный закон О предоставлении социальных гарантий Героям Социалистического Труда и полным кавалерам ордена Трудовой Славы // Информационно-аналитические материалы Государственной Думы Архивная копия от 1 Арпом 2014 на Wayback Machine
- ↑ Статистика по Героям Социалистического Труда // Герои страны. Дата обращения: 21 апреля 2018. Архивировано 22 апреля 2018 года.
- ↑ Федеральный закон от 09.05.2006 N 67-ФЗ "О внесении изменений в Федеральный закон "О предоставлении социальных гарантий Героям Социалистического Труда и полным кавалерам ордена Трудовой Славы" (2006-05-09).
- ↑ Справочная информация: "Размер индексации выплат, пособий и компенсаций отдельным категориям граждан" (Материал подготовлен специалистами КонсультантПлюс).
- ↑ Выплаты героям России будут назначаться автоматически