Коми-Пермяцкӧй этнокультурнӧй центр
| Коми-Пермяцкӧй этнокультурнӧй центр | |
|---|---|
| Коми-Пермяцкий этноцентр | |
 | |
| Юраліссез | |
| директор | Носкова Мария Валентиновна |
| Аркмӧтӧм | |
| Аркмӧтан кад | 2010 во тулысшӧр 12 лун |
| Отрасль | культура |
| Сайт | etnokpo.ru |
Коми-Пермяцкӧй этнокультурнӧй центр (рочӧн Коми-Пермяцкий этнокультурный центр) — Кудымкарын уджалана культура учрежденнё, кӧда нуӧтӧ удж коми-пермяцкӧй отирлісь традиционнӧй культура видзан, зорӧтан да паськӧтан сьӧрті. Лоӧ методическӧй шӧринӧн, культурно-массовӧй мероприяттёэз чулӧтісьӧн, нуӧтӧ велӧтан, концертнӧй, туристическӧй, туялан да небӧг лэдзан удж. Учрежденнёас торья юкӧтӧн пырӧ «Шондібан» ансамбль.
Быдса нимыс рочӧн — Государственное краевое бюджетное учреждение культуры «Коми-Пермяцкий этнокультурный центр». Учредительыс — Пермскӧй крайлӧн культура министерство.
История
Аркмӧтӧм 2010 воӧ вит учрежденнё ӧтлаӧтӧмӧн — Коми-Пермяцкӧй книжнӧй издательство, Окружнӧй челядьлӧ содтӧт велӧтан шӧрин, Коми-Пермяцкӧй киноцентр, Коми-Пермяцкӧй национальнӧй культураэзлӧн шӧрин да Коми-Пермяцкӧй сьылан да йӧктан «Шондібан» ансамбль[1][2][3].
Удж
Велӧтан удж
Коми-Пермяцкӧй этнокультурнӧй центрын уджалӧны челядь понда творческӧй кружоккез да студияэз да ыджыттэз понда клубнӧй формированнёэз[4][5]. Приоритетын традиционнӧй уджжезӧ велӧтӧм — дӧра серӧтӧм, кыйӧм, бан керӧтӧм, пу керӧтӧм.
Шоччӧтан да велӧтан удж
Этноцентрын уджалӧны профессиональнӧй творческӧй объединеннёэз «Пармалӧн гижиссез», «Пармалӧн серпасаліссез», Коми-Пермяцкӧй округись кипода отирлӧн чукӧр.
Небӧг лэдзӧм
Туялан да небӧг лэдзана сектор фиксируйтӧ культурнӧй эмбур объекттэз, лэдзӧ художественнӧй литература коми-пермяцкӧй кыв вылын, научно-популярнӧй да методическӧй литература коми-пермяцкӧй да роч кыввез вылын[6].
Культура мыччалана удж
Этноцентрыс чулӧтӧ кипода уджжеза да серапаса выставкаэз. Пыр уджалӧны экспозиция «Шабді музей», пуись скульптураэзапарк «Ловья пу», литературнӧй ком «Бордтыв», социальнӧй кинозал «Синбур».
Этноцентрлӧн уджаліссез да ансамбльлӧн артисттэз мыччалӧны коми-пермяцкӧй культура регион пасьта, быдӧс Россия да йӧзкостся форуммезын.
Фестиваллез да вежалуннэз
Коми-Пермяцкӧй этнокультурнӧй центр чулӧтӧ этшшӧм паськыт фестиваллез, конкурссэз, форуммез да акцияэз:
- Тӧвся обряддэзлӧн краевӧй фестиваль «Василей рыт», быд во тӧвшӧрӧн;
- Коми-пермяцкӧй кыв сьӧрті ӧтласа диктант, быд во тӧвпомӧн;
- Челядьлӧ да том отир коласся коми-пермяцкӧй кыв вылын лыддьӧтіссезлӧн «Ловья говк» конкурс, быд во, финал тулыспомӧн;
- «Мастеррезлӧн кар», быд во гожумшӧрӧн;
- Челядь понда «Чачасин» нима фестиваль, быд во тулысшӧрӧн;
- «Суседко ордын» семьяэзлӧн фестиваль, быд во одзарӧн;
- Коми-пермяцкӧй сьыланкыввезлӧн «Гора кай» нима фестиваль, быд во;
- «Дзулимпиада», во сьӧрна;
- «Коми мир» форум, кык воӧ ӧтпырись;
- Финн-йӧгра литературнӧй фестиваль «Ловлӧн бикыв», кык воӧ ӧтпырись;
- «Ловья пу» пуись скульптураэз сьӧрті фестиваль-конкурс, кык воӧ ӧтпырись;
- Инклюзивнӧй фестиваль «Енбиа енӧшка», во сьӧрна;
- «Уна рӧма Камадор», быд во арпомӧн.
Донтан пассэз
- 2018 воӧ «Шондібан» ансамбль лоис Гран-при да зарни медаль босьтісьӧн Болгарияын фольклор сьӧрті мирлӧн VIII чемпионат вылын[7].
- 2022 воӧ Коми-Пермяцкӧй этнокультурнӧй центр лоис лауреатӧн Российскӧй Федерация регионнэзын уджалана йӧзкостся творчество керкуэзлӧн юӧртан удж сьӧрті смотрын «Издательскӧй проекттэз» номинацияын П. И. Субботин-Пермяклӧн «Набойка Пермяцкого края» альбом-каталог лэдзӧм понда[8].
- 2023 воӧ «Коми-пермяцкӧй кокошник» коллекция босьтіс 1 места «Россияын олісь йӧззэзлӧн национальнӧй юрвевт» велӧтан смотр-конкурсын[9].
- 2025 воӧ Коми-Пермяцкӧй этнокультурнӧй центрлӧн коллектив вӧлі ошкӧм Пермскӧй край зорӧтӧмӧ пай пуктӧм понда касьтылан пасӧн да коми-пермяцкӧй кыв да культура видзӧмӧ, зорӧтӧмӧ да паськӧтӧмӧ ыджыт пай пуктӧм понда Пермскӧй крайлӧн губернаторсянь Почётнӧй грамотаӧн.
Пасйӧттэз
- ↑ О центре рус.. Видзӧтӧм 6 Арпом 2025.
- ↑ Государственное краевое бюджетное учреждение культуры "Коми-Пермяцкий этнокультурный центр" // Фонд № Р-312 рус.. Видзӧтӧм 6 Арпом 2025.
- ↑ Коми-Пермяцкий этнокультурный центр рус.. Видзӧтӧм 6 Арпом 2025.
- ↑ Детские творческие объединения рус.. Видзӧтӧм 6 Арпом 2025.
- ↑ Клубные формирования рус.. Видзӧтӧм 6 Арпом 2025.
- ↑ Издательская деятельность рус.. Видзӧтӧм 6 Арпом 2025.
- ↑ "Shondiban" Komi-Permyan Ensemble for songs and dances | Russia | Europe | Members | WAFF англ.. Видзӧтӧм 6 Арпом 2025.
- ↑ Константин Седегов. Коми-Пермяцкий этноцентр стал лауреатом Всероссийского смотра, Парма-Новости (26 Одзтӧв 2022). Дата обращения: 6 Арпом 2025.
- ↑ Константин Седегов. Коми-пермяцкие кокошники завоевали первое место на всероссийском конкурсе | Парма-Новости, Парма-Новости (10 Одзтулыс 2023). Дата обращения: 6 Арпом 2025.