Вежа Николай вичку (Кудымкар)
| Вичку | |
| Вежа Николай вичку | |
|---|---|
 | |
| 59°00′44″ с. ш. 54°39′17″ в. д.HGЯO | |
| Канму | |
| Кар |
Кудымкар Советскӧй ул., 33 к. |
| Конфессия | Православнӧй |
| Епархия | Кудымкар |
| Архитектура стиль | Роч классицизм |
| Проектлӧн автор | А. Воронихин (чайтана) |
| Аркмӧтісь | Строгановвез |
| Лэбтӧм | 1796—1800 воэз |
| Статус |
 Россия йӧззэзлӧн культура эмбур объект региональнӧй тӧдчӧта. Рег. № 591510203240005 (ЕГРОКН). Объект № 5900000521 (БД Викигида) |
| Видзалӧм | уджалана |
 |
|
 Медиафайлы на РУВИКИ.Медиа | |
Вежа Николай вичку (рочӧн Никольский собор, сідзжӧ рочӧн Церковь Николая Чудотворца, Свято-Никольский кафедральный собор) — православнӧй вичку Кудымкарын, Кудымкар епархиялӧн кафедральнӧй собор. Регион тӧдчӧта архитектура памятник. Лэбтӧм классицизм стильӧн. Сулалӧ И. Я. Кривощёков нима культура да шоччисян паркын.
История
Вичкусӧ да сы гӧгӧр приходсӧ лыддьӧны аркмӧмӧн Кудымкарын XVII сёвоӧ. Сы кадӧ вӧлі пуись керӧм Вежа Николай нима вичку. Медодззаись сія касьтывсьӧ 1715 вося переписнӧй книгаэзын, кӧднӧ лӧсьӧтіс князь Гагарин[1]. Вичкуыс вӧлі XIX сёвоӧдз. Разисӧ сійӧ 1805 воӧ епископ Иустин тшӧктӧм сьӧрті. Пӧввес да мӧдік материаллэс вӧлісӧ видзӧмӧсь виль, изісь керӧм, вичку понда[1].
Изісь вичкусӧ пондӧтісӧ лэбтыны 1796 воӧ. Сы лэбтӧм йылісь граф Александр Строгановлісь корис повереннӧй Яков Бушуев, сідз кыдз важ вичкуыс жагӧна киссис ни[1]. Лэбтыны вичкусӧ лэдзис сы кадся Вятка да Ыджыт Перемся епископ Лаврентий.
Медодз вичкуыс вӧлі кык престола: медшӧр престолыс вӧлі вежаӧтӧм Николай Мирликйскӧй нимӧн 1804 во тӧвпом 26 лунӧ, мӧдікыс — Параскева Пятница нимӧн 1804 во тӧвпом 24 лунӧ. 1812 воӧ вичкус вӧлі керӧм Севастияись нёльдас мученик нима придел[1][2].
1930 во тӧвпом 7 лунӧ Коми-Пермяцкӧй окрисполком заседаннё коста бурсьтӧм № 58 протокол сьӧрті вичкуыслӧн керкуыс вӧлі пӧдналӧм да сетӧм клуб понда[2]. 1943 воӧ кӧркӧся вичку керкуас вуджис Коми-Пермяцкӧй гортладор туялана музей[3]. 1940-ӧт воэзӧ керкуас сідзжӧ видзисӧ окружнӧй архивлісь фонддэз.
Коми-Пермяцкӧй окрисполком Президиумлӧн, Кудымкар карса да район исполкоммезлӧн ӧтласа № 137 решеннёӧн 1991 во одзар 27 лунӧ керкуыс вӧлі сетӧм вичкулӧ бӧр[3]. Музейыс уджаліс керку торас 2009 воӧдз да сэсся вуджис гостиница керкуӧ (ӧння кадся экспозицияэза керку).
2014 воӧ, Кудымкар епархия аркмӧтӧм бӧрын, Вежа Николай вичкулӧ вӧлі сетӧм кафедральнӧй собор статус[3].
Гижалӧм
Вичкуыслісь проектсӧ чайтӧны керӧм Андрей Воронихин, но документальнӧя сія абу тӧдчӧтӧм[3]. Кудымкарын медваж изісь лэбтӧм керку.
Вичкуыс лэбтӧм гӧрд кирпичись да штукатуритӧм. Сыын эмӧсь алтарьлӧн гожумся да тӧвся жыррез, колокольня, а сідзжӧ кык этажа изісь керӧм пристрой, кӧдӧ вӧлі лэбтӧм ни советскӧй кадӧ музей понда. Алтарнӧй жырыс вевттьӧм джынкуполӧн; храмовӧйыс — кыкъямыс дорыша барабан вылын; колокольняыс сідзжӧ вевттьӧм куполӧн. Куполын тӧдчана барокко стиль. Оригинальнӧй шпильыс да кресттэс ӧшисӧ 1930-ӧт воэзӧ[3].
Вичкуыслӧн керкуыс — регион тӧдчӧта эмбур объект да архитектура памятник.
Вичкуын уджаліссез
- Иерей Иаков Шестаков, кысъяліс 1891—1899 воэзӧ.
Пасйӧттэз
- ↑ 1 2 3 4 История храма | Свято-Никольский кафедральный собор, г. Кудымкар рус.. Свято-Никольский кафедральный собор, г. Кудымкар. Видзӧтӧм 28 Гожумпом 2025.
- ↑ 1 2 Кудымкарская Николаевская церковь Соликамского уезда Пермской губернии — Фонд № 5 КПОГА рус.. Коми-Пермяцкий окружной государственный архив. Видзӧтӧм 28 Гожумпом 2025.
- ↑ 1 2 3 4 5 Церковь Николая Чудотворца рус.. Коми-Пермяцкий окружной государственный архив. Видзӧтӧм 28 Гожумпом 2025.