Кишка (сёян)

Кишка
Продукттэз
Мыйись керӧм	тымус[d] яй[d] ид шыдӧс[d]

Кишка (у.л. кишкаэз) — коми отирлӧн вежалунся сёян, тымусісь да ид шыдӧсісь аскерӧм колбаса.

Традицияын

Кишкаэсӧ керӧны да заптӧны тӧв кежӧ. Сія тӧв вежалуннэзся — Розосво да Василей рытся — сёян.

Керӧм

Важмоза керӧм

Тымус да сьӧлӧм ульӧн масьтыны ӧрокын. Сэтчӧ пуктыны ид шыдӧс да солавны, сорлавны, содтыны масьтӧм порсь яй, бӧра сорлавны. Эта вотӧдз лӧсьӧтны сюввез — кузянас 40-50 см мымда — весӧтны, миськавны. Сюввес вермасӧ лоны заптомӧсь арсянь, сэк нійӧ одзжык колӧ кӧтӧтны шоныт ваын.

Вӧлись сюввезас сюйны лӧсьӧтӧм парӧгсӧ. Колӧ сюйны личыта, мед пуикас нето пӧжикас, кӧр парӧгыс пондас пӧжсьыны да паськавны, сюввес эзӧ потӧ. Сэсся колӧ петӧм колбасаэсӧ жаритыштны недыр виын да вӧлись сюйыштны ӧдъя горӧ вевттьытӧг, видзны 3-4 час дырна. Колбасаэсӧ оз ков бергӧтлыны. Позьӧ медодз пуны да сыбӧрын жаритны. Сёйӧм одзын колбасаэсӧ вундалӧны 7-10 см кузя торрез вылӧ.

1 кг тымусӧ ковсьӧ джын стакан ид шыдӧс, 200 г госа порсь яй.

Ӧння кадся керӧм

Тумыс, порсь яй, чеснӧг лэдзны мясорубка пырйӧт, солавны, содтыны ид шыдӧс, сорлавны. Сюввесӧ весӧтны, миськавны, мӧдӧртны, пуртӧн зыртны да миьскавны мӧдікпырся. Паськыт кисьтанӧт сюйны сюввезас лӧсьӧтӧм парӧгсӧ. Быд 15-20 см сантиметр кузя тыртӧм сювсӧ гӧрӧдавны, медбы вӧлісӧ колбаса тороккез. Колбасасӧ колӧ жаритны кӧртпод вылын духовкаын 1-1,5 час дырна, киськавлыны яйлинас.

Мед петіс 10 порция колӧ: ты — 500 г, мус — 400 г, сьӧлӧм — 400 г, госа порсь яй — 200 г, лук — 150 г, чеснӧг — 30 г, ид шыдӧс — 100 г, сов — 30 г.

Мӧдіклаын

Коми кишкаэз вылӧ вачиксьӧ грузинскӧй сёян-юанісь «купат» нима сёян.

Пасйӧттэз