Калин Алексей Иванович
| Калин Алексей Иванович | |
|---|---|
 | |
| Чужан лун: | 1940 во одзар 3 лун |
| Чужанін: | |
| Кулан лун: | 2016 во одзтулыс 25 лун (75 лет) |
| Куланін: | |
| Канму | |
| Удж | бурдӧтчись |
| Донтан пассэз |
 |
Калин Алексей Иванович (1940 во одзар 3 лун, Учӧт Модзга — 2016 во одзтулыс 25 лун, Кудымкар, Перем ладор) — Коми-Пермяцкӧй округын главнӧй хирург, РСФСР-лӧн Заслуженнӧй врач (1983), Кудымкарлӧн Почётнӧй гражданин, Кудымкар районлӧн Почётнӧй гражданин.
Олантуй
Чужис 1940 во одзар 3 лунӧ Учӧт Модзгаын[1]. Велӧтчис шӧрӧт школаын Купрӧсын. 1964 воӧ помаліс Пермскӧй медицинскӧй институт. Вӧлі ыстӧм уджавны Гайнаӧ врач-фтизитарӧн. 1967—1969 воэзын велӧтчис хирургия сьӧрті клиническӧй ординатураын профессор А. К. Тычинкина кипод увтын.
Помалӧм бӧрын бертіс Коми-Пермяцкӧй округӧ. 1972 воӧ осьтіс Коми округын медодзза травматологическӧй кабинет, 1973 воӧ — окружнӧй больницаын 50 койкаа травматологическӧй отделеннё. 1978 восянь Калин вӧлі Коми-Пермяцкӧй округын главнӧй хирургӧн.
1995 восянь уджаліс Кудымкарскӧй центральнӧй районнӧй больницаын врач травматолог-ортопедӧн, Юсьвинскӧй районнӧй больницаын — хирургия да травматология сьӧрті врач-консультантӧн, челядь понда реабилитационнӧй центрын Юсьваын — врач-ортопедӧн.
25 во уджаліс велӧтісьӧн Кудымкарскӧй медицинскӧй училищеын[2].
Алексей Ивановичлö уджалiкö вöлi 1983 воö сетöм званнё «РСФСР-ись Заслуженнöй врач», 1984 воö наградитöм медальöн «Ветеран труда», 1985 воö — обком президиумлöн да Пермскöй облздравлöн Почетнöй грамотаöн, неöтпырись сетлiсö благодарносттез, добросовестнöй да унавося удж понда Почетнöй грамотаэз 1999, 2009, 2010 воэзö. 2010 годö сетiсö званнё «Кудымкарлӧн Почётнӧй гражданин»[1], 2014 воӧ — Кудымкар районлӧн Почётнӧй гражданин[3].
Куліс 2016 во одзтулыс 25 лунӧ[4]. Дзебӧм Кудымкарын.
Морт йылісь
Туй кузя гожумся лагерись мунö челядьöн автобус. Шучтыдалана öшын сайын жар шондiа август. Пöжö, купайтчыштны бы кöдзыткодь ваын. Шоферыс кежö ю дорись береглань… Страшнöй катастрофа, кöдаö оз и веритчы. Окружнöй больницаись травматологическöй отделеннеö вайöтiсö 16 мортöс, быд минутаыс дона. Сiя лунö уджалiс Алексей Иванович Калин, волевöй морт, профессионал, кöда бура тöдö ассис уджсö. 20-годся практикаын эта вöлi первöй сэтшöм сьöкыт случай. Алексей Иванович видзöтiс ситуациясö да дженыта висьталiс: «некин оз ло инвалидöн». Чассэз кыссис операция, кöда йылiсь дас лун сьöрна юöртлiсö СССР-ись министррезлöн Советö, сыбöрын СССР-ись образованнелöн Министерствоö. Кудымкарö командировкаö локтiсö враччез Перемись да Москваись, но нылöн отсöтыс эз ни ков. Алексей Иванович видзис кöсйöмсö — быдöс 16 челядьыс вöлiсö ловьяöсь[5].
Донтан пассэз
- РСФСР-лӧн Заслуженнӧй врач (1983);
- Кудымкарлӧн Почётнӧй гражданин (2010);
- Кудымкар районлӧн Почётнӧй гражданин (2014)[2].
Касьтылӧм
- 2017 во одзар 12 лунӧ Кудымкарын, хирургическӧй корпус вылын, вӧлі осьтӧм мемориальнӧй пӧв[6];
- 2025 во аршӧр 22 лунӧ Кудымкарын, виль корпус дынын, вӧлі осьтӧм мемориал быдӧс Кудымкарын уджалісь Россиялӧн Заслуженнӧй враччез касьтылӧм понда. Алексей Калинлӧ вӧлі осьтӧм торья пӧв[7].
Пасйӧттэз
- ↑ 1 2 Калин Алексей Иванович // Люди Пармы. Коми-Пермяцкий окружной государственный архив. Видзӧтӧм 30 Аршӧр 2025.
- ↑ 1 2 Полвека, отданные здоровью людей. Кудымкарское медицинское училище (2025-09-03). Видзӧтӧм 30 Аршӧр 2025.
- ↑ Почетные граждане Кудымкарского муниципального района Кудымкарского муниципального округа Пермского края Иньвенский край (29.02.2024)
- ↑ Сегодня ночью умер кудымкарский хирург Алексей Калин. Парма-Новости (2016-03-25). Видзӧтӧм 30 Аршӧр 2025.
- ↑ Доктор Калин. История, кӧда лоис легендаӧн /Проект «Кудымкар — город коми-пермяков»
- ↑ Мемориальная плита на здании, где работал Калин А. И. Карточка № 328. База данных «Памятники, памятные знаки, исторические здания и места Коми-Пермяцкого округа» / Коми-Пермяцкий окружной государственный архив
- ↑ В Кудымкаре открыли мемориал, посвящённый врачам Коми округа. Парма-Новости (2025-10-22). Видзӧтӧм 30 Аршӧр 2025.