Агишев Иван Иванович

Босьтöм Рувикиись
РУВИКИ-ын эмӧсь статьяэз мӧдік морттэз йылісь гижсянӧн Агишев.
Агишев Иван Иванович
Агишев Иван Иванович Память народа.jpg
Чужан лун 1913 во гожумпом 2 лун
Чужанін Купрос, Соликамскӧй уезд, Пермскӧй губерния, Российскӧй империя
Кулан лун 1970 во тӧвпом 6 лун
Куланін Перем, РСФСР, СССР
Киндор  СССР
Званнё подполковник
Сраженнёэз/войнаэз Советско-финляндскӧй война
Великӧй Отечественнӧй война
Донтан пассэз
Гӧрд Дӧрапас орден Александр Невский нима орден Отечественнӧй войнася I тшупӧта орден медаль «За боевые заслуги» медаль «За победу над Германией в Великой Отечественной войне 1941—1945 гг.» медаль «За освобождение Варшавы»

Агишев Иван Иванович (1913 во гожумпом 2 лун, Купрос, Соликамскӧй уезд, Пермскӧй губерния, Российскӧй империя — 1970 во тӧвпом 6 лун, Перем, РСФСР, СССР) — военнӧй, Великӧй Отечественнӧй войнаын участник, петкӧтӧм Советскӧй Союзлӧн Герой званнё дынӧдз.

Олантуй

[вильмӧтны | править код]

Чужис 1913 во гожумпом 2 лунӧ Купросын[1][2]. Помаліс Купрос школаын вит класс. Уджаліс гортся колхозын.[1]1936 во тулыспом 15 лунӧ вӧлі босьтӧм Гӧрд Армияӧ[3]. Кысъяліс Белоруссияын. Демобилизуйтчис 1938 воӧ да недыр мыйись вӧлі вились босьтӧм армияӧ, участвуйтіс Советско-финляндскӧй войнаын. 1940 во одзтулысӧн демобилизуйтчис лейтенант званнёын.[1]

Великӧй Отечественнӧй война коста[вильмӧтны | править код]

Великӧй Отечественнӧй война пондӧтчикӧн вӧлі вились мобилизуйтӧм армияӧ. Помаліс Свердловскись команднӧй состав лӧсьӧтан курссэз старшӧй лейтенант званнёӧн. 1941 во гожумпомсянь воюйтіс Западнӧй фронт вылын. 1941 во гожумпом 14 лунӧ вӧлі дойдӧм, госпиталяс эз куйлы.[1]

Участвуйтіс Курскӧй битваын. 1943 во одзтулыс 27 лунӧ вӧлі ӧддьӧн дойдӧм. Госпиталь бӧрын, 1944 во тӧвшӧрӧ, вӧлі ыстӧм Белорусскӧй фронт вылӧ, вӧлі пуктӧм 70 армияись 76 Гвардейскӧй Черниговскӧй дивизия 237 стрелковӧй полкись 1 стрелковӧй батальонӧ адьютантӧн.[1][4]

1944 во гожумпомӧ Рытвыв Буг ю форсируйтӧм коста Агишевыс организуйтіс морт состав, военнӧй техника, боеприпассэз да батальонлісь обоз вуджӧм враг артиллерийскӧй, пулемётнӧй да ружейнӧй лыйсьӧм дырни. Сы понда вӧлі петкӧтӧм Александр Невский нима орденӧн ошкӧмӧдз, сы туйӧ вӧлі ошкӧм Отечественнӧй войнася I тшупӧта орденӧн[5] да пуктӧм юравны 1 стрелковӧй батальоннас.[1]

1945 во тӧвшӧр 26 лунӧ Польшаись Кульм нима кар босьтӧм дырни Агишевыс организуйтіс ойся бой. Сы батальоныс кужис босьтны враглісь траншеяэз Кляммер посадын. Сэсся вермасьтӧг колис враглісь опорнӧй пункттэсӧ да ататкуйтіс Нойгут Обераусмас. Сэтчин батальӧныс уничтожитіс враглісь батальоннӧй штаб. Ашынас батальоныс вермис пырны Кульм карӧ, босьтісӧ враглісь сёян да берсятор складдэз, а ӧтік рота босьтіс туй, кӧда муніс Шенау нима посадӧ. Эта керӧмыс отсаліс чожа босьтны ас кипод увтӧ быдсӧн карсӧ. Тӧвпом 2 лунӧ Агишевыслӧн батальоныс форсируйтіс Шварцвассер ю да босьтіс ас кипод увтӧ стратегическӧй плацдарм, видзис сійӧ тӧвпом 6 лунӧдз, падмӧтіс враглісь 16 контратака. Эта отсаліс дивизияись мӧдік подраздленнёэзлӧ вуджны юсӧ. Тӧвпом 12 ойӧ батальоныс босьтіс Суль-новко деревня да шоссе, мед врагыс эз вермы пышшыны Шенау посадӧ да Швец карӧ. 1945 во тӧвшӧр-одзтулысӧ батальоныс участвуйтіс 32000 морта враг группировка уничтожитӧмын, Сопот кар мездӧмын, Балтика саридз дорӧ петӧмын, 80000 морта Данцигся враг группировка ликвидацияын. Батальоныс уничтожитіс 400 мымда враг солдат, босьтіс пленӧ 100 мымда морт, 14 пулемёт, 75 мм батарея да сёян складдэз. Агишевсӧ пекӧтісӧ Советскӧй Союзлӧн Герой званнё дынӧдз, но сы туйӧ сія вӧлі ошкӧм Гӧрд Дӧрапас орденӧн.[5]

1945 во тулысшӧр 25-30 луннэзӧ Агишевлӧн батальоныс Штеттин нима кар дынын бойезын уничтожитіс 200 мымда враг солдат да офицер, босьтіс пленӧ 100 враг, босьтіс ас кипод увтӧ Тернов-Нейбранденбург туй. Эта понда Агишевыс вӧлі ошкӧм Александр Невский нима орденӧн.[5]

1945 во тулыспом 9 лунӧ батальоныс панталіс Харзевинкель карын.[1]

Война бӧрын[вильмӧтны | править код]

1945 во гожумпом 6 лунӧ 76 гвардейскӧй Черниговскӧй стрелковӧй дивизияись часттез вӧлісӧ ыстӧмӧсь Германиясис Калуга областьӧ, а сэсся дилоцируйтӧмӧсь Новгородӧ. 1947 во тулысӧн вӧлісӧ ыстӧмӧсь Псковӧ, кытӧн лоисӧ 15 ВД корпусісь 76 ВД дивизияӧн. Агишевыс мӧдӧма кольччыны кысъявны аслас полкын, но реорганизацияэз кузя мунӧм запасӧ майор званнёӧн. Запасӧ петӧм бӧрын локтіс семьянас овны Кудымкарӧ, уджаліс УРС-ын.[1]

1952 воӧ вились муніс кысъявны армияӧ. Вӧлі строительнӧй воинскӧй частись, кӧда лэбтіс Печора ю вылын виль кӧрттуй, батальон командирӧн. 1954 воӧ велӧтчис команднӧй состав бурсьӧтан курссэз вылын да сылӧ сетісӧ подполковник званнё. Велӧтчӧм бӧрын бертіс аслас частьӧ, но не недыр мыйись частьсӧ пӧдналісӧ. Агишевыс вӧлі ыстӧм кысъявны Вологдаӧ строитан формированнёэз снабженнё сьӧрті юралісь вежлісьӧн. 1960 воӧ демобилизуйтчис.[1]

Семьянас локтіс овны Перемӧ. Уджаліс «Пермлеспром» трестын материально-техническӧй снабженнё сьӧрті юралісьӧн.[1]

Куліс 1970 во тӧвпом 6 лунӧ.

Донтан пассэз

[вильмӧтны | править код]
  • Отечественнӧй войнася I тшупӧта орден (06.08.1944)[4][5]
  • Гӧрд Дӧрапас орден (07.03.1945)[4][5]
  • «Варшава мездӧм понда» медаль (09.05.1945)[4][5]
  • «1941-1945 воэзся Великӧй Отчественнӧй войнаын Германия вермӧм понда» (09.05.1945)[4][5]
  • Александр Невский нима орден (30.05.1945)[4][5]
  • «Боевӧй заслугаэз понда» медаль (30.12.1956)[4][5]

Пасйӧттэз

[вильмӧтны | править код]
  1. ↑ 1 2 3 4 5 6 7 8 9 10 Агишев Иван Иванович. Купрос Народная энциклопедия деревень Юсьвинского района Пермского края (видзӧтан кад 24.03.2025)
  2. ↑ Коньшин А. Е. Он мог быть Героем Советского Союза // Парма. 2020, 9 апреля.
  3. ↑ Агишев Иван Иванович. Учетно-послужная картотека Память народа (видзӧтан кад 24.03.2025)
  4. ↑ 1 2 3 4 5 6 7 Агишев Иван Иванович. 1913 г.р. Память народа (видзӧтан кад 24.03.2025)
  5. ↑ 1 2 3 4 5 6 7 8 9 В. А. Алексеев. Боевые подвиги пермяков. Том 1. — Оса: ООО «Росстани-на-Каме», 2022. — С. 11. — 156 с. ISBN 5-88441-032-8

Ыстӧттэз

[вильмӧтны | править код]
Босьтӧма "https://koi.ruwiki.ru/w/index.php?title=Агишев_Иван_Иванович&oldid=130236"-ись