Тшакьяшыд
| Тшакьяшыд | |
|---|---|
 | |
| Продукттэз | |
| Мыйись керӧм | |
 Медиафайлы на РУВИКИ.Медиа | |
Тшакьяшыд — тшакӧн пуӧм шыд. Тшакыс вермас лоны уль, сола, кӧс нето маринуйтӧм. Тшакьяшыдыс лыддиссьӧ традиционнӧй сёянӧн Европаын. Коми комас лоӧ сідз жӧ традиционнӧй быдлунся сёян.
Керӧм
Тшакьяшыдсӧ пуӧны кӧс, уль, сола тшакись, вермас лоны йӧвсора, пизьсора да кольтьӧн[1]. Позьӧ содтыны картошка, лук, чеснӧг. Тшакьяшыдсӧ пуӧны кузь во — гожумӧн уль тшакись, тӧлӧн сола нето кӧс тшакись.
Тшакьяшыдыс — быдлунся сёян.
Коми рецепттэз
Кӧс тшакись тшакьяшыд
Косьтӧм тшак (мӧстшак, гӧрдтшак, масляккез) кӧтӧтны, медодз дзирыт ваӧн, сэсся кӧдзытӧн. Васӧ кисьтны. Тшаксӧ пуктыны пизьӧтӧм ваӧ да видзыштны. Сэсся кыскыны да масьтыны ӧрокын. Тшак васӧ пизьӧтны. Дзирыт тшак ваас лэдзны масьтӧм тшаксӧ, пуны 10-15 минута дырна да содтыны вундалӧм картошка, лук, чеснӧг, да недыр пуыштны. Тшак ваыс кӧ етша, то содтыны сӧстӧм ва да пизьӧтны.[1]
Ниндулись тшакьяшыд
Ниндуллесӧ весӧтны, миссьӧтны, ой кеж пуктыны кӧдзыт ваӧ, мед курзьӧмыс чулаліс. Васӧ колӧ вежлыны. Тшаксӧ посньӧтны, пуктыны дзирыт ваӧ, солавны, пуны 30 минута дырна. Сэтчӧ содтыны картошка, лук да пӧжны ӧдъя горын кык-куим час дырна. Пуны чугункаын нето кашникын веттьӧмӧн.[1]
Мӧстшакись тшакьяшыд
Костьӧм тшаксӧ кӧтӧтны рытсянь, сыбӧрын пуны, кытчӧдз оз небзьы. Сы коста весӧтны кык-куим картошка, ӧтік морков, кык-куим лук юр, лэдзны посьӧтӧмӧн и ӧтлаын тшакнас пуны джын час дырна. Позьӧ пуктыны картошка туйӧ сӧчӧн торрез нето проса. Медбӧрын пуктыны укроп. Панялӧны нӧкӧн.[1]
Кольтьӧн тшакьяшыд
250 г мымда уль тшак бытшӧмика миськавны кӧдзыт ваын, поснитика вундавны пуртӧн да тэчны кӧртбекӧрӧ. Сэтчӧ содтыны куим пань мӧс нето постнӧй ви. Тшаксӧ пӧжны виас, кытчӧдз сія оз небзьы. Сыбӧрын содтыны кык пань манка да невна жаритны, пуктыны литр да джын мымда ва, сэтчӧ содтыны вундалӧм укроп, пизьӧтны. Кык кольть бытшӧмика нӧитны торья дозын да жагӧника пӧрӧтны пым шыдас. Пуны куим-нёль минута дырна.[1]
Пизьӧн тшакьяшыд
Тшаксӧ пуны неуна ваын. Позьӧ кӧть кытшӧм тшак — косьтӧм нето солалӧм. Торйын пуны вит-квать посньӧтӧм лук юр. Ӧтлаӧтны пуӧм тшакнас, содтыны пизёк, сорлавны, солавны, лэдзны укроп да пизьӧтны. Сёйикас шыдас лэдзны шӧриӧтӧм пуӧм кольть, порцияӧ джын кольтьӧн.[1]
Сола тшакись тшакьяшыд
Сола тшак (ягсер, ниндуль, гӧстшак) масьтыны ӧрокын да лэдзны пым ваӧ, пуны 10-15 минута дырна. Сэсся содтыны посньӧтӧм картошка, лук, чеснӧг да нежыр пуны. Ештан вотӧдз содтыны стакан йӧв нето пань мымда постнӧй ви да бӧра пизьӧтыштны. Пуны кӧ тшакьяшыдсӧ йӧвтӧг, то сёйны позьӧ нӧкӧн.[1]
Йӧвсора тшакьяшыд
Тшакьяшыдсӧ пуӧны уль тшакись (масляк, ягсер, туйдортшак, уртшак). Тшаксӧ весӧтны, миськавны, вундавны да пуны джын час дырна. Сыбӧрын тшакья ваас содтыны ваыс мымда йӧв, солыштны, пизьӧтны, сэтчӧ лэдзны комидз. Эта тшакьяшыд одзгожумся сёян.[1]
Чуманын тшакьяшыд
Турункеран коста сёян. Тшаксӧ пуӧны чуманокын бипур весьтын. Васӧ солалӧны да содтӧны нянь торрез.[1]
Культураын
- Верх-Юсьваын «Ай да рыжик» фестиваль вылын быдӧс локтӧм отирсӧ вердӧны берся тшакьяшыддэзӧн.[2]
Пасйӧттэз
- ↑ 1 2 3 4 5 6 7 8 9 Коми-пермяцкая кухня [Сб. рецептов / Сост. А. Долдина; Ред.: В. Коколева, Л. Косова]. — Кудымкар : Коми-Пермяц. кн. изд-во, 1998. — 508, [3] с. ил.; 21. — ISBN 5-87901-033-3. — С. 364-366.
- ↑ "Ай да рыжик": Верх-Юсьва собрала около полутора тысяч поклонников солнечного гриба. 12.09.2023. Вести-Пермь