Сиг (орсан)

Челядь орсӧны сигӧн.

Сиг — коми отирлӧн уна морта тӧвся орсан.

Орсан йылісь

Сиг орсаннас орсӧны важ кадсянь тӧв коста. Сы йылісь медодззаись гижис Николай Рогов 1860 воӧ. Сы сьӧрті, сы кадӧ сигыс вӧлӧма челядь орсан, но важся каддэзӧ сигнас орслывлӧмась и пӧриссез.

Орсаныс шусьӧ «сиг», сідз кыдз орсан атрибуттэз — нинкӧммез да мӧдік важ кӧмкӧт — лыддиссьӧны «сола чериӧн».

Ӧння кадӧ тӧдсаӧсь кык вариант.

Орсӧм

Сиг орсан йылісь серпас «Сиг, падей да горань» небӧгись.

1 вариант

Атрибуттэз: 40-50 см кузя бедь, ӧтдорас кӧртпель, 2 метр кузя гез, важ нинкӧммез да мӧдік кӧмкӧт.

Паськыт волькытінӧ вешталӧны лым. Аркмӧм лымчукӧр шӧрӧ мӧртӧны бедь. Лымсӧ киськалӧны ваӧн, мед кынмис да бура видзис бедьсӧ. Сы гӧгӧр тэчӧны важ нинкӧммез да мӧдік кӧмкӧт — нія бытьтӧ сиг чери. Бедьыс бердӧ кӧрталӧны гез. Лыддисянӧн бӧрйӧны галитісьӧс.

Орсіссезлӧн мог — коккезнаныс чужьялӧмӧн «пышшӧтны» унажык кӧмкӧтсӧ. Галитісьлӧн мог — не сетны орсіссеслӧ «пышшӧтны черисӧ». Эта понда сія видзсьӧ гез пом бердӧ, котрасьӧ лымчукӧрыс гӧгӧр да кинас павкӧтлӧ орсіссесӧ. Павкӧтас кӧ кинӧскӧ, сэк сія орсісьыс пондӧ галитны. «Пышшӧтасӧ» кӧ орсіссес быдӧс «черисӧ», сэк галитісьыс кольччӧ. Сійӧ пуксьӧтӧны креста киез вылӧ, чапкалӧны вывланьӧ да шувлӧны: «Идъя-зӧрья-рудзӧга, масленича сора». Сэсся пондӧтчӧ виль орсӧм.

2 вариант

Атрибуттэз: 3 метр кузя зор, 3-4 метр кузя гез, важ нинкӧммез.

Паськыт волькытінын ӧктӧны лымчукӧр. Сыӧ мӧртӧны зорсӧ, сы помӧ кӧрталӧм гез. Гезыс колӧ сы кузя, мед павкис муӧдззас да невна кыскасис. Лымчукӧрсӧ киськалӧны ваӧн, мед зорыс кынмис.

Кӧр зорыс кынмас, сэк позьӧ орсны. Зорыс гӧгӧр кырӧвтӧны-керӧны кытш, сэтчӧ тэчӧны нинкӧммез. Мед бӧрйыны галитісьӧс, ӧтік нинкӧм пуктӧны гез вылӧ да шупкыштӧны. Кин вылӧ сія усяс, лоӧ галитісь — «вузасись», мӧдік орсіссес — «босьтасиссез».

«Босьтасиссес» чужьялӧмӧн «гусялӧны» нинкӧммесӧ. «Вузасисьыс» куталӧ орсіссесӧ: кинӧ павкас гезнас нето кинас, сія лоӧ «вузасисьӧн». Петіс кӧ орсіссеслӧ «гусявны» быдӧс нинкӧммесӧ, галитісьыс бӧра кольччӧ «вузасьны». Сідз орсаныс мунӧ одзлань.

Лыддьӧтан

• Рогов, Н. А. Материалы для описания быта пермяков [Текст] / [соч.] Рогова. ‒ Москва : тип. Грачева и К°, 1860. ‒ [2], 127 с.
• Сиг, падей да горань: коми-пермяккезлöн орсаннэз (Сиг, падей и горань: игры коми-пермяков) / Авторы-составители: Н. А. Мальцева, Т. Н. Меркушева, Н. А. Пушкина. ‒ Кудымкар: ПРОО «Общество радетелей коми-пермяцкого языка и культуры «Югöр», 2021. ‒ 118 с.

Пасйӧттэз

Ыстӧттэз

Сиг орсан йылісь — Этнографическая электронная энциклопедия «Традиционная культура народов европейского северо-востока России»‎