Проллавер

Проллавер (Пролаврей, Провавер, Пров, рочӧн — День святых Флора и Лавра) — перем коми отирлӧн ыджыт вежалун, кӧда коста йӧзалӧны пороз. Йитӧм христианскӧй вичкуся вежалунӧн — Фрол да Лавр касьтыланӧн^[1]. Чулӧтсьӧ гожумпом 31 лунӧ. Важ календарьыс сьӧрті — гожумпом 18 лунӧ.

Этнография сьӧрті

Комиэслӧн, кыдз и роччеслӧн, Проллаверыс лыддиссьӧ вӧв лунӧн. XIX сёво шӧрын вежалуныс чулӧтсис уналаын. Иньвенса эта лунӧ миссьӧтісӧ вӧввезнысӧ юэзын да гывйӧтісӧ вичкуэз дын вежаваӧн^[2]. Вӧввесӧ эз позь уджӧтны, коліс шоччӧтны. Гортвичкуся вежалунӧн Проллаверсӧ видзисӧ Бутылёваын, Таранинаын, Юньгаын, Ленинскын, Мелехинаын, Белоеваын, Подъячойын, Новожиловаын, Панинын, Большая Половинаын^[3].

Ӧння кадӧ

Ӧння кадӧ Проллаверсӧ чулӧтӧны Ыджыт Кочаын^[4]. 1990-ӧт воэзын Кочёвскӧй районын коми культурасӧ пондісӧ зорӧтны район отсӧтӧт. Сідз Зыряноваын вились чулӧтісӧ Ваын сулалӧм, Кукушкаын — Стрӧча, Ыджыт Кочаын — Турун вежан лун. Сія жӧ кадӧ Екатеринбургись М.В. Малаховыслісь статьяэсӧ Ыджыт Кочаас ваис Н. Трушников. «Мича асыв» фольклорнӧй ансамбльлӧн юралісь Андрей Гагарин ӧктіс отирись информация Проллавер йылісь да статьяэс отсӧтӧн керис вежалуныслісь реконструкция^[3]. Медодззаись Проллаверсӧ пороз йӧзалӧмӧн чулӧтісӧ 1999 воӧ гожумпом 29 лунӧ, сэсся — 2000 во гожумпом 27 лунӧ, 2009 во гожумпом 30 лунӧ. Эна луннэс вӧлісӧ вежалуннэзӧн. Проллаверсӧ ӧтлаӧтлісӧ Ыджыт Кочалӧн 420 вося юбилей порйӧтӧмкӧт, посад лун да «Олан-вöлан, коми отир!» фестиваль чулӧтӧмкӧт^[3]. 2018 воӧ Проллаверсӧ чулӧтісӧ гожумпом 31 лунӧ. Вежалуныс муніс Пермскӧй крайлӧн культура сьӧрті Министерство отсӧтӧн, сійӧ пыртісӧ «59 регионлӧн 59 фестиваль» программаӧ^[5].

Ыстӧттэз

[1] Голева Т. Г. Жертвоприношения животных в честь православных святых у коми-пермяков // Этнографическое обозрение – 2021. – №2 C. 144-160 [Электронный ресурс]. URL: http://ras.jes.su/ethnorev/s086954150014812-3-1 (дата обращения: 16.08.2024). DOI: 10.31857/S086954150014812-3

[2] Климов В. В., Чагин Г. Н. Круглый год праздников, обрядов и обычаев коми-пермяков. - Кудымкар: Коми-Пермяцкий этнокультурный центр, 2018.

[:0-3] ¹ ² ³ Голева, Т. Г. (2020). Жертвенный обряд коми-пермяков в селе Большая Коча. Вестник Пермского федерального исследовательского центра, 3, 85-96.

[4] Пантюхин Д.А. Коми-пермяцкий праздник Проллавер с обрядом Быкобой // Этнографическое обозрение. 2012. № 1. С. 85-101

[5] Объявлены победители проекта "59 фестивалей 59 региона" на 2018 год // Сайт программы "59 фестивалей 59 региона"

[1]

[2]

[3]

[4]

[5]