Коми-Пермяцкӧй национальнӧй округ аркмӧтӧм
Коми-Пермяцкӧй национальнӧй округ аркмӧтӧм — СССР-ын национально-государственнӧй строитӧм сьӧрті 1918—1925 воэзся процесс, кӧда бӧртасӧн лоис СССР-ын медодзза национальнӧй округ статуса административнӧй тор аркмӧтӧм.
Коми-Пермяцкӧй национальнӧй округ вӧлі аркмӧтӧм национально-государственнӧй строительство политика сьӧрті, кӧдӧ нуӧтіс Советскӧй власть 1917 во бӧрын. Административнӧй юксьӧм СССР-ын вӧлі чулӧтӧм 1920-ӧт воэзӧ. Сэк быдсӧн вежсис важ системаыс: уезддэз да губерняэз туйӧ лоисӧ районнэз, областтез; РСФСР-ись национальнӧй (абу роч) олана территорияэзын — автономнӧй областтез. Лэбис юасьӧм автономияэз аркмӧтӧм йылісь ны йӧззэз понда, кӧдна вӧлісӧ етшаӧн мед аркмӧтны автономнӧй область.[1]
1922 во гожумшӧр 21 лунӧ Кудымкарын, кӧда сэк вӧлі посадӧн, чулаліс Пермскӧй да Вятскӧй губерняэзісь коми-пермяккезлӧн-коммунисттэзлӧн конференция. Конференция висьталіс коми-пермяцкӧй населеннёлӧн кык губерняись кынымкӧ уезд вылӧ торйӧтчӧм венӧм йылісь да сувтӧтіс Пермяцкӧй административно-хозяйственнӧй управление организуйтӧм йылісь вопрос. Конференция вылын делегаттэзлісь Яков Кривощёков да Фёдор Тараканов докладдэз кывзӧм бӧрын Пермскӧй губернскӧй исполнительнӧй комитет лыддис коми-пермяцкӧй автономия лӧсьӧтӧмсӧ абу туянаӧн.[2][3][4]
Одзлань видзӧтны автономия аркӧтӧмсӧ вӧлі тшӧктӧм Пермскӧй губернскӧй исполнительнӧй комитет дынся административнӧй комиссиялӧ. Коми-пермяккезлісь автономия лӧсьӧтӧм йылісь идея киння, баитісӧ сідзжӧ коми-пермяккезӧн олан муэз 1921 воӧ аркмӧтӧм Коми (Зыряна) Автономнӧй область дынӧ ӧтлаӧтан проект йылісь. Но сія вӧлі вештӧм административнӧй комиссияӧн 1923 во гожумпомӧ[5], сійӧн мый коми-пермяцкӧй муэс Уралісь административнӧя янсӧтӧмсӧ лыддисӧ ковтӧмӧн, медодз экономическӧй причинаэз кузя.[3]
1923 во арпӧмӧ, кӧр нуӧтісӧ вились аркмӧтӧм Уральскӧй областьлӧ районируйтӧм (кытчӧ пырисӧ вӧвлӧм Пермскӧй, Екатеринбургскӧй, Челябинскӧй да Тюменскӧй губернияэзлӧн муэз), коми-пермяккезлӧн представителлез шыасисӧ Пермскӧй губернскӧй исполкомись президиумӧ. Нія вӧзйисӧ область составын лӧсьӧтны Коми-Пермяцкӧй национальнӧй округ, кӧда бы лоис СССР-ын учӧт народдэз автономиялӧн виль форма примерӧн.[3]
Губернскӧй исполком сетіс юалӧмсӧ центральнӧй правительственнӧй органнэзлӧ, да 1924 во гожумпом 11 лунӧ ВЦИК Президиум лӧсьӧтіс комиссия, кӧда юалӧмсӧ тӧдмалӧм могись локтіс Кудымкарӧ. Деревняэзын да посаддэзын комиссиялӧн инициатива сьӧрті нуӧтсисӧ собраннёэз да сельскӧй сходдэз, кӧдна вылын висьтасисӧ желаннёэз кыдз Уральскӧй областьын национальнӧй округ организуйтӧм понда, сідз и коми-пермяцкӧй территорияэз Коми Автономнӧй областьӧ (Зырянскӧй) пырӧм понда.
Комиссия тӧдсасис ыджыт фактическӧй материалӧн, специалисттэзлӧн кывкӧртӧттэзӧн, лӧсьӧтіс этӧ юалӧм сьӧрті видзӧтӧммезӧн вежсьӧм. Уральскӧй областись веськӧтлісь уджаліссез сьӧрті ВЦИК Президиумлӧн комиссия шуис буржык решеннёӧн Уральскӧй областьын Коми-Пермяцкӧй округ аркмӧтӧм, нежели коми-пермяцкӧй территорияэз Коми Автономнӧй областьӧ (Зырянаӧ) сетӧм.[2]
1924 во аршӧр 24 лунӧ комиссия выводдэз сьӧрті ВЦИК Президиум признайтіс позянаӧн округ аркмӧтӧмсӧ, а 1925 во одзтӧв 15 лунӧ сэтшӧм жӧ решение примитіс РКП(б) ЦК Секретариат. 1925 во тӧвпом 26 лунӧ ВЦИК Президиум постановляйтіс: «Лыддьыны целесообразнӧйӧн торйӧтны Пермяцкӧй край торья национальнӧй округӧ… эта округсӧ непосредственнӧ подчинитӧмӧн Уральскӧй областнӧй исполкомлӧ».
Округыслӧн ыждаыс вӧлі 25,2 сюрс квадратнӧй километр, отирыс — 148 626 морт, ны коласісь 75 % — коми-пермяккез, мӧддэс унажыксӧ — роччез.
Сія вӧлі СССР-ын медодзза национальнӧй округ. 1929 воӧ Коми-Пермяцкӧй округ пример сьӧрті вӧлі аркмӧтӧм Ненецкӧй национальнӧй округ, а сёрӧнжык и мӧдік национальнӧй округгез.
Пасйӧттэз
- ↑ М. С. Каменских. Национальные округа в системе российского федерализма Пермский государственный архив социально-политической истории
- ↑ 1 2 95 лет назад был образован Коми-Пермяцкий национальный округ (26 февраля 2020) Государственный архив Пермского края
- ↑ 1 2 3 Каменских М. С. Первый национальный: коми-пермяки в национальной политике России ХХ — начале XXI века. — СПб.: Маматов, 2021. — 312 с. : ил. ISBN 978-5-91076-243-9
- ↑ Тараканов Ф. Г. Как это было // Наш край. 1986. № 6. С. 17.
- ↑ Коньшин А. Е. История коми-пермяцкого народа 1917—1940 гг. — Кудымкар, 2004. — 344 с.