Баяндин Пётр Алексеевич
| Баяндин Пётр Алексеевич | |
|---|---|
 | |
| Чужан лун | 1916 во одзтӧв 14 лун |
| Чужанін | Рудак, Соликамскӧй уезд, Пермскӧй губерния, Российскӧй империя |
| Кулан лун | 1980 во одзтӧв 2 лун |
| Куланін | Рудак, Юсьва район, Коми-Пермяцкӧй национальнӧй округ, РСФСР, СССР |
| Киндор |
 СССР |
| Званнё | капитан |
| Тышккез/войнаэз | Великӧй Отечественнӧй война |
| Донтан пассэз |
   |
Баяндин Пётр Алексеевич (1916 во одзтӧв 14 лун, Рудак, Соликамскӧй уезд, Пермскӧй губерния, Российскӧй империя — 1980 во одзтӧв 2 лун, Рудак, Юсьва район, Коми-Пермяцкӧй национальнӧй округ, РСФСР, СССР) — военнӧй, Великӧй Отечественнӧй войнаын участник, петкӧтӧм Советскӧй Союзлӧн Герой званнё дынӧдз.
Олантуй
Чужис 1916 вося одзтӧв 14 лунӧ Рудакын[1]. 1937 во аршӧр 15 лунӧ вӧлі босьтӧм РККА-ӧ[2].
Великӧй Отечественнӧй война пондӧтчикӧ кысъяліс 9 армияись 81 стрелковӧй дивизияын, воюйтіс Юго-Западнӧй фронтын. 1941 во гожумпом 14 лунӧ вӧлі ӧддьӧн дойдӧм. Госпиталь бӧрын, 1942 вося гожумшӧр 10 лунӧ, бертіс фронт вылӧ да 1942 во одзтӧлӧдз вӧлі 47 армияись взвод командирӧн, воюйтіс Северо-Кавказскӧй фронтын.[2]
1944 вося тӧвшӧр 24 лунсянь кысъяліс Кировоградскӧй Богдан Хмельницкий нима ордена 409 стрелковӧй дивизияись 684 стрелковӧй полкын 2 Украинскӧй фронтын. Вӧлі 3 стрелковӧй батальон командир вежлісьӧн, старшӧй лейтенант.[2]
1944 вося арӧн батальоныс воюйтіс Венгрияын, Будапешт дынын. Аршӧр 9 лунӧ, асъяпонӧн, Баядиныс разведчиккез группаӧн вуджис Тисса ю, кытӧн бӧрйис атака места да вӧджжаліс враглісь лыйсян поззэз. Асывнас 7 стрелковӧй рота юралӧмӧн вились вуджис юсӧ да атакуйтіс фашисттэсӧ шульга флангсянь, кысянь нія эз видзчисьӧ. Сы коста 3 батальӧнісь кык рота атакуйтісӧ врагсӧ веськыт флангсянь. Одзлань капитан Баяндинлӧн батальоныс 3 часӧн вашӧтіс врагсӧ 7 км ылынаӧ да разис фронт линиясӧ 10 км паськытаӧдз.[2] Ашынас, аршӧр 10 лунӧ, врагыс вайӧтіс виль выннэз да кутчис дорйыны Вижень нима кӧрттуй станция. Баяндиныс аслас 9 ротаӧн гӧгӧртіс врагсӧ да атакуйтіс, уничтожитіс да босьтіс пленӧ 70 мымда враг солдат да офицер. Эта подвиг понда 684 полклӧн командир подполковник Табакарь аршӧр 28 лунӧ петкӧтіс капитан Баяндинсӧ Советскӧй Союзлӧн Герой званнё дынӧдз[2][3]. Сы туйӧ вӧлі ошкӧм Гӧрд Дӧрапас орденӧн.[3]
1944 во одзтӧлӧ Баяндиныс аслас батальӧнӧн вуджисӧ танк паныталана гу, проволока йӧр да минируйтӧм мутор, вермисӧ дорйисян врагсӧ да вашӧтісӧ 3 км ылынаӧ, уничтожитісӧ унажык врагсӧ. Сы понда 1944 во одзтӧв 31 лунӧ Баяндиныс вӧлі ошкӧм Отечественнӧй войнася I тшупӧта орденӧн.[3]
1945 во тулысӧн 2 Украинскӧй фронтісь войскаэс, кытӧн кысъяліс Баяндиныслӧн батальӧныс, мездісӧ Венгрия, Чехословакиялісь ыджыт тор, Австриясь асыввывся тор ӧтлаын юркарнас — Венанас. Победа лунсӧ Баяндиныс панталіс Чехословакияын, кытӧн паныталіс американскӧй войскаэзлісь асывланьӧ мунӧм.[2]
Война бӧрын кольччис армияын. Демобилизуйтчис 1956 во одзгожум 22 лунӧ[4].
Демобилизация бӧрын бертіс гортас. Кузь олан уджаліс заготконтораын[1]. Иньыскӧт быдтісӧ зон да кык ныв[1].
Куліс 1980 во одзтӧв 2 лунӧ.[1] Дзебӧм Антипина шойнаын.
Донтан пассэз
- Гӧрд Кӧдзув орден (09.05.1944)[3]
- Гӧрд Дӧрапас орден (12.12.1944)[3]
- Отечественнӧй войнася I тшупӧта орден (31.12.1944)[3]
Морт йылісь
- Коньшин, А. Е. Боевой путь капитана Баяндина // Парма. — 2020. — 22 февраля.
- Алексеев, В. А. Боевые подвиги пермяков. Том 1. — Оса: ООО «Росстани-на-Каме», 2022. — С. 19. — 156 с. ISBN 5-88441-032-8
Пасйӧттэз
- ↑ 1 2 3 4 Баяндин Пётр Алексеевич Народная энциклопедия деревень Юсьвинского района Пермского края (видзӧтан кад 24.03.2025)
- ↑ 1 2 3 4 5 6 Коньшин, А. Е. Боевой путь капитана Баяндина // Парма. — 2020. — 22 февраля.
- ↑ 1 2 3 4 5 6 В. А. Алексеев. Боевые подвиги пермяков. Том 1. —Оса: ООО «Росстани-на-Каме», 2022. — С. 19. — 156 с. ISBN 5-88441-032-8
- ↑ Баяндин Петр Алексеевич. Учетно-послужная картотека. Память народа (видзӧтан кад 24.03.2025)