Max (содтӧт)

Max
Тип	компьютернӧй программа
Керись	ООО «Коммуникационная платформа»
Операционнӧй системаэз	iOS, Android, macOS, Windows
Интерфейс кыввез	английскӧй, роч да мд.
Медодзза лэдзӧм	2025 во одзтулыс 27 лун
Уджалӧм	уджалана
Сайт	max.ru

Max (стилизуйтӧм MAX) — «ВК» компаниясянь цифрӧвӧй платформа, кӧда ӧтлаӧтӧ мессенджерлісь, мини-сӧдтӧтлісь, мынтан системалісь да канмуся сервиссэзлісь функцияэз. Бета-версия, кытчӧ пырис мессенджер, вӧлі мыччалӧм 2025 во одзтулыс 27 лунӧ веб-сайтӧн да iOS, Android, macOS да Windows вылын уджалана содтӧтӧн. 2025 во гожумшӧрӧ VK корпорация юӧртіс, мый лӧсьӧтчӧ вештыны Max-сис сорасьӧммез адззӧм понда 5 млн руб.

2025 во одзар 1 лунсянь Max лоас сувтӧтӧм быдӧс виль устройствоэзӧ Россия законодательство сьӧрті. Локтан кадӧ планируйтӧны йитны «Госуслуги»-кӧт, мед вештыны штраффез, керны документтэз да мӧдік канмуся сервиссез понда.

Пыртӧм социальнӧй тӧдчӧта сервиссэза реестрӧ.

История

Юӧррез мессенджер Max лэдзӧм йылісь лӧсьӧтчӧм йылісь петісӧ 2025 во одзтулыс 25 лунӧ. Сэк СМИ инсайдеррез вылӧ ыстісьӧмӧн юӧртісӧ, мый «матісь кадӧ» сӧдтӧт магазиннэзын (App Store, Google Play) пондас петны мессенджерлӧн бета-версия, кӧдаӧн позяс вежласьны юӧррезӧн, звонитны да ыстыны 4 Гб ыждаӧдз файллэз. Вӧлі казьмӧтӧм, мый канмуын вӧлісӧ меститӧмӧсь медиасерверрез, кӧдна могмӧтісӧ онлайн-звоноккезлісь уджалӧмсӧ, да сёрнилісь бурмӧтӧм могись пыртӧмӧсь машиннӧй велӧтчан технологияэз. Тӧдчӧтісӧ, что медодзза версияӧ пырӧны инструменттэз корпоративнӧй чат-боттэз организуйтӧм понда, кӧднаӧн позьӧ лӧсьӧтны финансовӧй услугаэз, отсӧт службаэз да мӧдік продукттэз. Сідзжӧ юӧртсис, что цифрӧвӧй платформаӧ планируйтӧны пыртны мини-сӧдтӧттэз, мынтан система да госуслугаэз, а содтӧтыс вермас лоны китайскӧй WeChat-лӧн аналогӧн.

Финансӧвӧй эксперттэз сьӧрті, проектӧ инвестируйтӧмыс медодзза этапын вермис лоны 1 млрд руб.

2025 во одзтулыс 27 лунӧ платформаыс лоис содтӧтӧн iOS, Android, macOS, Windows-эзӧн уджалана устройствоэзын, а сідзжӧ веб-сайт формаын. Бета-версияӧ пырӧмась ас да группа чаттэз, сёрниа юӧррез, медиафайллэз, 4 Гб-ӧдз документтэз, стикеррез ыстӧм, аудио- да видео керӧм, чат-боттэз да мини-содтӧттэзӧн уджалӧм.

2025 во тулысшӧр 14 лунӧ вӧлі юӧртӧм аркмӧтӧм мывкуд GigaChat 2.0 Max-ӧ пыртӧм йылісь. АМ-кӧт ӧтлаасьӧмыс керсьӧ ас чатӧн, кытчӧ мортыс вермӧ ыстыны сёрниа да текста юӧррез, аудиофайллэз, серпассэз да документтэз, а сыбӧрын вештытӧг босьтны колана информация (ны лыдын кыв модельӧн ӧтуввезсис адззӧм). Бизнес-клиенттэзлӧ Max-ын позьӧ бӧрйыны АМ-лӧн версия — GigaChat 2 Pro нето GigaChat 2 MAX.

2025 вося одзгожум кежӧ российскӧй мессенджер Max-ӧн уджаліссезлӧн лыдыс лоис 1 млн мобильнӧй устройствоэзын да компьютеррезын. 2025 во гожумшӧр пондӧтчикӧ MAX-лӧн регистрируйтӧм морттэзлӧн лыдыс лоис 2 млн-ся унажык.

2025 во гожумпом 21 лунсянь Max мессенджер отсӧтӧн позяс босьтны «Госуслуги» портал вылӧ пыран код.

2025 во одзар 1 лунсянь Max-сӧ лӧсьӧтчӧны сувтӧтны Россияын быд виль мобильнӧй устройствоӧ.

Функционал

Max-сӧ позьӧ сувтӧтны мобильнӧй устройствоэзӧ (iOS, Android), персональнӧй компьютеррезӧ (Windows, macOS), а сідзжӧ веб-интерфейс пыр. Содтӧтсӧ позьӧ сувтӧтны App Store, Google Play, RuStore да AppGallery цифровӧй магазиннэзісь. Регистрацияыс чулӧтсьӧ российскӧй нето белорусскӧй телефон номер сьӧрті. Медодзза уджалӧм коста колӧ гижны ним да сувтӧтны профиляс серпас.

Интерфейсас нёль ӧшын: «Контакттэз», «Чаттэз», «Звоноккез», «Уджаннэз». Пытшкас эмӧсь функцияэз, кӧднӧн позьӧ лӧсьӧтны чаттэзлісь синбансӧ, сортируйтны нійӧ чукӧррезӧ, лӧсьӧтны йоррез да веськӧтлыны аскӧття уджалӧм.

• Max мобильнӧй содтӧтлӧн интерфейс
• 

  Медодзза оськӧв регистрация сьӧрті

• 

  Аватар бӧрйӧм регистрация коста

• 

  Max-ӧн медодзза уджалӧм

• 

  Чаттэза чукӧр

• 

  Чат-бот

• 

  Мини-содтӧт

2025 во гожумшӧр 9 лунӧ 12:46 часын Max платформаын лоисӧ позянаӧсь помтӧм групповӧй видеозвоноккез, кӧдна абу дзескӧтӧмӧсь кад да участниккезлӧн лыд сьӧрті. Медбы керны звонок, пользователлезлӧ колӧ нырыштны кнопка «Звоноккез» да аркмӧтны корӧм понда ыстӧт. Видеоконференцияэз понда эмӧсь экранлӧн демонстрация да участниккезӧс радзза мыччалӧм. Недыр мыйись лӧсьӧтчӧны содтыны чат, сетны администраторлісь позьӧссэз, нейроаватаррез, маскаэз да виртуальнӧй фоннэз.

Коммуникация

Платформаас уджалӧ юӧррезӧн стандартнӧй вежсьӧм:

• ас да группа чаттэз;
• ыстыны текста юӧррез, серпассэз, видеоэз да документтэз 4 Гб ыждаӧдз;
• сёрниа юӧррез ыстӧм;
• стикеррезӧн да эмодзи кодь реакцияэз.

Пытшкся удио- да видеоколонкаэз уджалӧны бур нето умӧль сигналын. СМИ юӧртӧм сьӧрті, звонитӧмас видзсьӧ бур йитӧт, сёрни да серпас мыччассьӧ бура.

Гижсьӧмын позьӧ сетасьны контакттэзӧн, геолокацияӧн, а сідзжӧ ыстыны сьӧм СБП-ӧт. Содтӧтлӧн медодзза версияын позьӧ ыстыны сьӧм Альфа-банкись да ВТБ-ись: Max-ын колана банксӧ бӧрйӧм бӧрын керсьӧ вуджӧтчӧм финансӧвӧй организациялӧн мобильнӧй содтӧтӧ, кытӧн колӧ помавны вуджӧтӧмсӧ.

Чат-боттэз да мини-содтӧт

Max пыр позьӧ уджавны чат-боттэзӧн да мини-содтӧттэзӧн. Сія уджалӧ Max Bot API (боттэз лӧсьӧтӧм да ныӧн юралӧм понда), Max Bridge (библиотекаэз клиентскӧй мини-содтӧттэз ӧтлаӧтӧм понда) да MasterBot — служебнӧй бот, медбы перыта йӧзӧтны да босьтны API-ключчез. Разработкасӧ позьӧ реализуйтны кыдз программаӧн, сідз и визуальнӧй конструкторрез пыр, ны лыдын BotMother, JetBot, ChatForma, SaleBot да мӧдіккез. Боттэзлӧн ниммез, Telegram моз жӧ, долженӧсь помасьны bot-ӧн (шуам, @examplebot).

Мини-содтӧттэз оссьӧны интерфейсын мессенджерын, вермӧны пыртны ассиныс графика да бизнес-логика да оссьӧны чат-боттэз пырйӧт.

Аркмӧтӧм мывкуд

2025 во тулысшӧр 14 лунсянь Max-ын реализуйтӧм АМ-платформа GigaChat 2.0-кӧт интеграция. Платформаӧ пыртӧм нейровез сетӧ генерируйтны текст да серпассэз, гижӧтны шыа юӧррез, керны видеоэзлісь, статьяэзлісь да мӧдік контент формаэзлісь дженытик висьтӧс, анализируйтны да интерпретируйтны серпассэз, уджавны документтэзкӧт, кӧдналӧн тӧрытаыс А4 формата 200 листбокӧдз.

АМ видзӧ диалог ӧткоста файллэз ыстікӧ, вермӧ лӧсьӧтны аналитикаа очакыв пыртӧм информация сьӧрті да сетӧ ыстӧттэз.

Зорӧтӧм

Платформа Max, кӧдӧ керӧ ООО «Коммуникационная платформа», кӧдалӧн аркмӧтісьнас лоӧ ООО «Компания ВК», чайтсьӧ кыдз вермана подув «супер-содтӧт» («суперапп») лӧсьӧтӧм понда, кӧдаын ӧтлаӧтӧмӧсь ӧтік интерфейсӧ уна быдлунся цифровӧй задачаэз. 2025 во тулышӧрӧдз перспективаӧн планируйтӧны реализуйтны этшшӧм функцияэз:

• паськӧтны бренддэзлӧ да кериссезлӧ отсӧт мини-содтӧттэза экосистема пыр;
• ас мынтан система лэдзӧм;
• канмуся сервиссэзкӧтт интеграция («Госуслуги» пыртӧмӧн).

Критика

Маx-ӧн уджаліссез тӧдчӧтӧны, мый абу веськыт интеграция «ВК» холдинглӧн мӧдік сервиссэзкӧт — «ВКонтакте» да «ВК Музыка». Нія сідзжӧ умӧль туйӧ видзӧны, мый абу кык фактора аутентификация да даннӧйез шифруйтӧм, сы кузя аркмӧ опастӧмалӧм да конфиденциальность йылісь тӧждӧм.

Платформаыс вӧлі панталӧм критикаӧн мессенджер Телеграмкӧт ӧткодьӧм кузя — пользователлес мыччалӧны боттэзлісь да мини-содтӧттэзлісь ӧткодь используйтӧм. Нія сідзжӧ висьталӧны, мый виль мессенджерыс абу ӧддьӧна колана, сідз кыдз эмӧсь ни мӧдік паськыта тӧдса платформаэз. Мукӧдыс чайтӧны, мый российскӧй платформаыс лӧсьӧтӧм, мед вежны визирсайся аналоггесӧ.

2025 во гожумшӧр 7 лунӧ VK пондӧтіс агрессивнӧй рекламнӧй кампания мессенджер MAX понда, кытчӧ пырӧны спецмероприяттёэз Санкт-Петербургын VK Fest вылын. Блогеррез, ны лыдын Инстасамка, активнӧя мыччӧтӧны сервиссӧ. Мессенджерлӧн рейтингез тӧдчӧмӧн абу ӧткодьӧсь: App Store-ын — 4.1, а Google Play-ын — 1.1, мый вермас лоны тӧдчӧтӧм Telegram-видзӧтіссезлӧн конкурентлісь негативнӧй реакцияӧн. MAX босьтӧ канму отсӧт да интеграция официальнӧй сервиссэзкӧт, а Telegram видзӧ аудитория бур функционалӧн. Платформаэз коласын конкурируйтӧмыс одзлань содӧ.

Пасйӧттэз