Щелкунчик

Щелкунчик
Санкт-Петербургын Мариинскӧй театрын балетлӧн премьера 1892 во одзтӧв 6 (18) лунӧ
Композитор	Пётр Чайковский
Либреттолӧн автор	Мариус Петипа[d]
Сюжетыс босьтӧм	Э. Т. А Гофман «Щелкунчик да Шыр король» сказка сьӧрті Александр Дюма-ай
Хореограф	Лев Иванов, Мариус Петипа аркмӧтӧм сьӧрті
Бӧрья редакцияэз	Лев Иванов, Александр Горский, Фёдор Лопухов, Василий Вайнонен, Юрий Григорович
Аркмӧтан во	1892
Медодзза мыччалӧм	1892 одзтӧв 18 лун
Медодззаись мыччалӧмин	Мариинскӧй театр, Санкт-Петербург
Медиафайлы на РУВИКИ.Медиа

Императорскӧй Мариинскӧй театрын «Щелкунчик» спектаклись фрагмент, 1892: Марианна — Лидия Рубцова, Клара — Станислава Белинская, Фриц — Василий Стуколкин

1992 вося Россия почта нёль маркаа ӧктӧм, кӧсйӧм П. Чайковский «Щелкунчик» балетлӧЦФА [АО «Марка»] № 50—53

«Щелкунчик» (рочӧн «Щелку́нчик») — 71 соч., Э. Т. А. Гофман «Щелкунчик да Шыр король» сказка сьӧрті М. И. Петипа либреттоа П. И. Чайковскийлӧн кык акта балет, балетмейстер-постановщик Л. И. Иванов.

Аркмӧтӧм история

Либреттоыс вӧлі гижӧм сказка сьӧрті, кӧдӧ 1844 воын вильмоза гижис Алескандр Дюма-ай (театральнӧй энциклопедия сорасьӧмӧн шуӧ вильмоза гижӧм авторнас Дюма-зонӧс), сія жӧ воын сія петіс «Щелкунчиклӧн история» нимаӧн. Кӧть сыын вӧлі кольӧм сказкаыслӧн шӧрись сюжетыс, вуджӧтӧмыс вӧлі сы виль вариантӧн. Гофман сказксис сюжетсӧ вежӧмыс кузся либреттоыслӧн сюжетнӧй версияыс мыччассьӧ унажыксӧ символическӧя.

Лев Ивановӧн сувтӧтӧм балетыслӧн премьераыс чулаліс 1892 во одзтӧв 6 (18) лунӧ Санкт-Петербургись Мариинскӧй театрын ӧтік рытӧ Пётр Чайковский «Иоланта» операкӧт. Дирижируйтіс премьеранас Риккардо Дриго, декорацияэсӧ керисӧ Михаил Бочаров да К. Иванов, костюммес керӧмӧсь Императорскӧй театррезын директор Иван Всеволожский да Евгений Пономарёв эскиззэз сьӧрті. Одзись роллесӧ орсісӧ: Щелкунчик — Сергей Легат, фея Драже — Антониетта Дель-Эра, принц Оршад — Павел Гердт, Дроссельмейер — Тимофей Стуколкин, Марианна — Лидия Рубцова. Клара да Фриц роллесӧ орсісӧ Петербургскӧй театральнӧй училищеиын велӧтчись челядь Станислава Белинская да Василий Стуколкин (кыкнанныс петісӧ училищесис сизим во бӧрті, 1899 воын).

1892 воын вӧлі лэдзӧм А. С. Аренскийлӧн «Щелкунчик» балетісь сюита фортепиано вылын нёль киӧн орсӧм понда, кык во бӧрті сія лэдзис быдсӧн балетсис партитурасӧ.

Туяліссес пондылісӧ кодьсьӧтны балетыслісьь сюжетсӧ Чайковский рӧдня Давыдоввез оланӧн. Медодз композитор сой Александра да сы челядь — Владимир да Татьянаӧн. Балет критик Павел Ященков шуӧмӧн, Давыдоввезлӧн Каменка именнё «пӧртчис композиторыс юрын челядькадся утопическӧй чӧскыттор царствоӧ Конфитюренбургӧ, кытӧн именнёись юрань, композиторлӧн сой Александра Ильинична, лоис бур королеваӧн, а сы вит во одзті кулӧм ныв Татьяна — Клараӧн, сы „идол“… Боб „вӧзабыдтӧм принцӧн“», ачыс «царство Конфитюренбургыс, кытчӧ сюрӧны „Щелкунчиксись“ одзись геройес … вачкисьӧ наркотик пырйӧт пӧртмалӧм вылӧ», мый петӧ Давыдоввез морфин радейтӧмись, «принц-Щелкунчик, кыдз и Дезире (мый вуджӧтсьӧ кыдз „сиӧм“) „Узись басӧк нывка“ одззаын, эта быдӧс сія — радейтана да сиана племеник».

«Щелкунчикыс» видзӧ торья места П. И. Чайковский сёр произведеннёэз коласын: сія торьяссьӧ балет жанр традицияись, сыын новаторскӧя петкӧтӧмӧсь шыбаннэс. Балетас медодззись орсісӧ челестаӧн — шылад инструментӧн, кӧдӧ композитор корӧм сьӧрті вайисӧ Парижись. «Щелкунчикись» шыладысӧ шуӧны «ӧддьӧнӧв серьёзнӧйӧн да сьӧлӧмвӧрзьӧтанаӧн балет понда».

Орсӧтчиссез

Берся редакцияэзын одзись героиняыслӧн нимыс абу ӧткодь: Клара нето Мари. Гофман небӧгын сы нимыс Мари, а Клара — сы медрадейтана акань. Россияын Медодзза мирпасьта война пондӧтчиккоста (1914 во) да патриотизм лэбӧмӧн балетыслӧн сюжетыс вӧлі рочӧтӧм, одзись героинясӧ пондісӧ шуны Маша. Фрицыс кольччис ас нимаӧн, сідз кыдз сія умӧль керись персонаж. Эта традицияыс видзсьӧ ӧнӧдз.

• Штальбаум
• Сы инь

Ны челядь:

• Мари (Маша, мукӧдпырся — Клара), принцесса
• Фриц (Миша)

• Марианна
• Быдтісь
• Дроссельмейер
• Щелкунчик, принц
• Фея Драже
• Принц Оршад
• Акань
• Паяц (шут)
• Шыр король
• Кордебалет: гӧссез, рӧдня, слугаэз, маскаэз, пажжез, дзоридззез, чачаэз, солдатиккез да с. о.

Либретто

Кык торья балет прологӧн

Розосво одзын доктор Штальбаум ордӧ ӧксьӧны гӧссез. Ыджыттэскӧт локтӧны нылочкаэз аканнеэзӧн да маршируйтӧны зонкаоккез сабляэзӧн.

Медодзза тор

Доктор Штальбаумлӧн челядь, Мари да Фриц, ӧддьӧн видзчисьӧны козиннэз. Медбӧрья гӧсьыс — Дроссельмейер. Сія кужӧ ловзьӧтны чачаэз, да повзьӧтӧ сійӧн челядьсӧ. Дроссельмейерыс чӧвтӧ маскасӧ. Мариыс да Фрицыс тӧдӧны ассисныс дона вежайнысӧ. Мариыс орсӧ бы аканнезӧн, но нійӧ дзимлялӧмась ни.

Мед бурӧтны нылочкасӧ, вежайыс козьналӧ сылӧ Щелкунчикӧс. Сы дикӧдь чужӧмыс серӧмтӧтӧ нылочкасӧ. Фрицыс жугӧтӧ аканьсӧ да дзерӧтӧ Марисӧ. Нылочкаыс водтӧтӧ аканьсӧ узьны. Фрицыс ёрттэскӧт кышӧтӧны шыр маскаэсӧ да ӧдззӧны нерны Марисӧ. Порйӧтӧмыс помассьӧ, гӧссес йӧктӧны традиционнӧй гроссфатер нима йӧктан, да мунӧны горттэзаныс. Локтӧ ой, жырыс, кытӧн сулалӧ кӧзыс, тырӧ тӧлісь югытӧн.

Мариыс бертӧ да сывтыртӧ Щелкунчиксӧ. Сэтчӧ пырӧ Дроссельмейер, ӧні сія абу ни вежай, а бур волшебник. Сія ӧвтыштӧ кинас да жырыс пондӧ вежсьыны: доррес вешшӧны, кӧзыс быдмӧ, а кӧз мичӧтаннэз ловзьӧны да лоӧны солдатиккезӧн. Пырӧны шыррез Шыр королькӧт. Щелкунчикыс нуӧтӧ солдатиккесӧ бойӧ.

Щелкунчикыс да Шыр корольыс кутчӧны тышкасьны. Мариыс адззӧ, мый шыр армияыс солдатиккес армияысся ыджытжык. Сія чӧвтӧ кӧмкӧтсӧ да вижгӧ Шыр короляс. Сія повзьӧ да пышшӧ аслас войсконас. Солдатиккес армияыс вермис. Нія нуӧтӧны Марисӧ пельпоннэз выланыс Щелкунчикыс дынӧ. Сылӧн чужӧмыс пондӧ вежсьыны. Сія пӧртчӧ басӧк Принцӧ. Мариыс да ловзьӧм аканнес сюрӧны кӧдзула енӧж да зэв мича кӧз увтӧ. Ны гӧгӧр ветлӧны лымчиррез.

Мӧдӧдзза тор

Мариыс да Принцыс видзӧтӧны кӧдзула енӧжас да касьтылӧны, кыдз нійӧ ататкуйтісӧ шыррез, да кыдз Принцыс нійӧ вермис. Быдӧнныс йӧктӧны, гажӧтчӧны да порйӧтӧны шыр войско вермӧм. Испанскӧй, Араб, Китайскӧй да Роч аканнес буркывтӧны Мариысӧ ны мездӧм понда. Гӧгӧр йӧктӧны феяэз да пажжез. Локтӧ Дроссельмейер да бӧра гӧгӧр быдӧс вежӧ . Быдӧнныс лӧсьӧтчӧны Мари да Принцыс гӧтрасьӧм кеж. Мариыс саймӧ, Щелкунчикыс сы киэзын.

Большӧй театрын «Щелкунчик» балет мыччалӧм. Фото Е. Фетисовалӧн.

Интерпретацияэз

Балетылӧн эм сідз шуӧм фрейдистскӧй вариант, кӧдӧ керис Рудольф Нуреев. сы сьӧрті, Принцыскӧт йӧктӧм бӧрсянь Мариыс саймӧ, да Щелкунчикнас лоӧма томмӧм Дроссельмейер.

Мэтью Борн сувтӧтӧмын Клараыс — аймамтӧм нывка, кӧда тӧждӧ, сідз кыдз оз вермы лоны ӧтлаын аслас сьӧлӧмшӧркӧт — Щелкунчиккӧт, да адззӧ, кыдз сія йӧктӧ мӧдіккӧт. Янсӧтчӧм темаа акцент позьӧ адззыны и Морис Бежарӧн аркмӧтӧм балет версияын, сыын одзись персонаж — Бим зонка, кӧда учӧтӧн кольччис мамтӧг.

Шылад драматургия да либреттӧ кодьсьӧтӧм

Хореограффес традиционнӧя игнорируйтӧны мӧдӧдзза актісь вальс шыладісь вежсьӧм, кӧр кылӧ трагичнӧй пассаж, а «йӧктісь гозъяэс одзлань бергалӧны одзза ритмын».

Балет пытшкӧс

Пытшкӧс:

1. Увертюра
2. Медодзза тор.
   1. Медодзза мыччӧс.
      1. Кӧз мичӧтӧм да ӧзтӧм
      2. Марш
      3. Челядь галоп да аймам петӧм
      4. Йӧктан сцена
         1. Дроссельмейер петӧм
         2. Заводнӧй аканнезлӧн йӧктан (мазурка)
         3. Демоническӧй йӧктан
      5. Сцена да Гросфатер
         1. Щелкунчика-акань петӧм
         2. Шелкунчиклӧн полька
         3. Марилӧн олелян да Фрицлӧн орсаннэз
         4. Аймам да гӧссезлӧн йӧктан (Гросфатер)
      6. Сцена (Мари да Щелкунчик)
         1. Олелян
         2. Челядь ком вильмӧтӧм
         3. Кӧз быдмӧм
      7. Шыррезлӧн петӧм да тышкасьӧм
   2. Мӧдӧдзза мыччӧс.
      1. Тӧвся кӧзъяин
      2. Лымчиррезлӧн вальс
3. Мӧдӧдзза тор.
   1. Конфитюренбург чӧскыттор дворец
   2. Мари да Щелкунчиклӧн локтӧм
   3. Дивертисмент
      1. Шоколад (испанскӧй йӧктан)
      2. Кофе (араб йӧктан)
      3. Чай (китайскӧй йӧктан)
      4. Трепак (роч йӧктан; карамелись нималан)
      5. Учӧт пастуккезлӧн йӧктан (датскӧй марципан)
      6. Гигонь (Жигонь) мам да паяццез
   4. Дзоридззезлӧн вальс
   5. Па-де-де
      1. Фея Драже да принц Оршад
      2. Вариация I: тарантелла
      3. Вариация II: Фея Дражелӧн йӧктан
      4. Кода
   6. Медбӧрья вальс
   7. Апофеоз

Инструменттэз

• Пуись пӧльтаннэз:
  • 3 флейта (3-ӧт флейта = флейта-пикколо);
  • 2 гобой;
  • 1 английскӧй сюр;
  • 2 кларнет;
  • 1 бас-кларнет;
  • 2 фагот.
• Ыргӧнісь пӧльтаннэз:
  • 4 валторна;
  • 2 трубы;
  • 2 тенор-тромбона;
  • 1 бас-тромбон;
  • 1 туба.
• Вартаннэз:
  • литавраэз;
  • учӧт барабан;
  • тарелка;
  • ыджыт барабан;
  • треугольник;
  • бубен;
  • кастаньетаэз;
  • там-там;
  • сильканнэз;
  • «чача инструменттэз» (шуам, кӧк-шутнян).
• Челеста;
• 2 арфаы;
• Челядь хор
• Сигораланнэз:
  • скрипкаэз I;
  • скрипкаэз II;
  • альттэз;
  • виолончеллез;
  • контрабассэз.

Россияын медтӧдчана сувтӧтӧммез

Мариинскӧй театр

• 1892 во одзтӧв 6 (18) лун — премьера:
  • Балетмейстер: Лев Иванов
  • Дирижёр: Рикардо Дриго
  • Серпасаліссез: Михаил Бочаров да К. Иванов
  • Костюммез: Иван Всеволожский да Евгений Пономарёв;
  • Мари — Станислава Белинская
  • Фриц — Василий Стуколкин
  • Щелкунчик — Сергей Легат
  • Фея Драже — Антониетта Дель-Эра
  • Принц Оршад — Павел Гердт
  • Дроссельмейер — Тимофей Стуколкин
  • Паяц — Александр Ширяев
  • Марианна — Лидия Рубцова
• 1923 — Лев Ивановлӧн вились сувтӧтӧм нія жӧ декорацияэзын; балетмейстеррез Фёдор Лопухов да Александр Ширяев, дирижёр Александр Гаук; фея Драже — Елизавета Гердт, принц Оршад — Михаил Дудко, Дроссельмейер — Николай Солянников.
• 1929 — виль редакция; балетмейстер Фёдор Лопухов, дирижёр Александр Гаук, серпасалісь Владимир Дмитриев; Маша — Ольга Мунгалова, Щелкунчик — Пётр Гусев, Дроссельмейер — Леонид Леонтьев.
• 1934 — балетмейстер Василий Вайнонен, дирижёр Евгений Мравинский, серпасалісь Иван Селезнёв; Маша — Галина Уланова, Щелкунчик-принц — Константин Сергеев.
• 2001 — балетмейстер — Кирилл Симонов, шылад юралісь — Валерий Гергиев, декорацияэз, костюммез, либретто, сувтӧтӧм — Михаил Шемякин. Маша — Наталья Сологуб, Щелкунчик-принц — Александр Сергеев, Андриан Фадеев, Дроссельмейер — Антон Адасинский.

Большӧй театр

• 1919 — балетмейстер Александр Горский, дирижёр Н. А. Фёдоров, серпасалісь Константин Коровин; Клара — Валентина Кудрявцева, Фриц — Шокоров 2-ӧт, Щелкунчик-принц — Ефим Ефимов, Дроссельмейер — Алексей Булгаков. Эта сувтӧтӧмын сценаыс вӧлі керӧм кыдз ыджыт пызан кофейнӧй сервизӧн, кӧдаись петісӧ йӧктіссес.
• 1932 — ГАБТ дынся балет техникумлӧн спектакль; балетмейстер Л. И. Иванов, вильмӧтӧм Александр Чекрыгин да Александр Монахов, дирижёр Юрий Файер, серпасалісь Панфилов; Клара — Евгения Фарманянц, Щелкунчик — Юрий Папко, Фриц — Ю. Гербер, Дроссельмейер — Александр Чекрыгин, Фея Драже — Ольга Лепешинская.
• 1939 — балетмейстер В. И. Вайнонен, дирижёр Юрий Файер, серпасалісь Владимир Дмитриев; Маша — Марина Семёнова, Щелкунчик — Алексей Ермолаев, Дроссельмейер — Владимир Рябцев.
• 1966 во одзтулыс 12 лун — виль сувтӧтӧм; балетмейстер Юрий Григорович, дирижёр Геннадий Рождественский, серпасалісь Симон Вирсаладзе; Маша — Екатерина Максимова, Щелкунчик-принц — Владимир Васильев, Дроссельмейер — Владимир Левашев, Шыр король — Герман Ситников, Щелкунчик-акань — Елена Ватуля, Французскӧй акань — Татьяна Попко.

Медтӧдса аудиоэз

• 1960 — дирижёр Геннадий Рождественский, Большӧй театрлӧн оркестр да челядь хор, СССР.

[Д 06583-6; С 06977-80; СМ 0169-72; MEL CD 1000665]

• 1986 — дирижёр Владимир Федосеев, челядь понда хоровӧй школа «Весна», Центральнӧй телевиденнё да Союзпасьта радиолӧн ыджыт симфоническӧй оркестр.

[А10 00347 005]

• 1988 — дирижёр Евгений Светланов, челядь понда хоровӧй школа «Весна», ГАСО.

[А10 00605-8; MEL CD 1000409]

Пасйӧттэз

Литература

• Васильев И. В., Краснова Л. Е. Методология исследования хореографических трактовок литературного произведения Э.Т.А. Гофмана "Щелкунчик и мышиный король" на балетной сцене в конце XX - начале XXI столетий // Вестник Академии русского балета им. А. Я. Вагановой. — 2024. — № 1 (90).
• Гендова Марья Юрьевна. Балет «Щелкунчик» — нетривиальный способ знакомства с бытовой Рождественской культурой России второй половины XIX века // Вестник Саратовской консерватории. Вопросы искусствознания. — 2019. — № 4.
• Рыжкова А. С. Балет Московского хореографического училища "Щелкунчик" П. И. Чайковского (1950 год) // Театр. Живопись. Кино. Музыка. — 2013. — № 2.
• Слонимский, Ю. И. Щелкунчик: [балет в 3-х действиях и 7 картинах] / Ю. Слонимский; музыка П. И. Чайковского ; Ленингр. Государст. академ. театр оперы и балета; [марка театра на обложке работы художника Л. С. Хижинского]. — 2-е издание. — Ленинград : издание Лен. Гос. Акад. театра оперы и балета, 1934.
• Юлия Яковлева. Глава 5. Рождение театра. // Создатели и зрители. Русские балеты эпохи шедевров. — М.: Новое литературное обозрение, 2017. — С. 143—149. — ISBN 978-5-4448-0689-0.

Ыстӧттэз

• Чайковский, Пётр Ильич // Театральная энциклопедия / гл. ред. П. А. Марков. — М.: Советская энциклопедия, 1967. — Т. 5. Табакова — Яшугин. — 38 000 экз.
• балет «Щелкунчик» Театра Санкт-Петербургской консерватории на сцене Михайловского театра на телеканале «Искусство ТВ»
• Щелкунчик — либретто и фотографии балета в постановке Театра классического балета п/р Н. Касаткиной и В. Василёва
• ЩЕЛКУНЧИК. Либретто
• Tchaikovsky Research
• The Nutcracker ballet
• Скворцова И. А. Балет П. И. Чайковского «Щелкунчик»: опыт характеристики // Учебное пособие. — М.: Научно-издательский центр «Московская консерватория», 2011. — 68 с. ISBN 978-5-89598-264-8